Kajtazi: Kurtin e pret lista e zezë e ShBA-së

Gazetari Vehbi Kajtazi ka thënë se partitë politike do të duhej t’i pengonte për të mos realizuar një koalicion me Lëvizjen Vetëvendosje dhe kryetarin e saj, Albin Kurtin, puna që ata kanë bërë në Qeverinë që tashmë është në detyrë.

Në emisionin “Rubikon” në Klan Kosova, ai ka deklaruar se masat e BE-së dhe raportet jo të mira me ShBA-në janë njëri prej indikatorëve se nuk duhet të ketë koalicion qeverisës me Kurtin nga subjektet e tjera politike.

“Gjuha e Kurtit është e papërshtatshme, megjithatë nuk mendoj se do të duhej të ishte pengesë për një bashkëqeverisje. Unë mendoj se dëmet që i janë bërë këtij vendi janë pengesë për një bashkëqeverisje.”

“Ne, derisa jemi nën sanksione të BE-së dhe kemi raporte tepër të këqija me Shtetet e Bashkuara të Amerikës, cili lider politik i Kosovës guxon të hyjë në bashkëqeverisje me këtë, kur zoti Kurti është në prag të sanksionimit me listë të zezë të Shteteve të Bashkuara të Amerikës”, ka thënë Kajtazi.

‘Lëkundje e madhe në VV: Ky zyrtar i Vetëvendosjes i bashkohet Totajt në Prizren për balotazhin!

Kryetar i pikës më të madhe të Vetëvendosjes në Prizren, Fatmir Zeka ka kaluar zyrtarisht në përkrahje të Shaqir Totaj për kryetar.

Zeka i ftoi edhe qytetarët e tjerë që pa dallim partiake dhe etnike ta mbështesin Totajn për mandatin e dytë në Prizren.

UEFA i ka përjashtuar dy klube nga Evropa për shtatë vite

Dy klube evropiane po vuajnë aktualisht dënime shtatëvjeçare nga të gjitha garat e UEFA-s për shkak të një serie shkeljesh disiplinore.

UEFA ka zbatuar sanksione ndaj disa klubeve të futbollit në vitet e fundit, si dhe ndaj gjithë Rusisë.

Të gjitha klubet ruse janë të ndaluara nga pjesëmarrja në garat e UEFA-s, një vendim që u dha menjëherë pas pushtimit të paligjshëm të Ukrainës nga Rusia në shkurt 2024.

Përveç Rusisë, dy klube nga vende të tjera po vuajnë gjithashtu ndalime, me një ekip të pezulluar për një total prej shtatë vitesh që nga viti 2021.

Klubi leton FK Ventspils u përjashtua nga garat e UEFA-s pasi organi qeverisës i futbollit evropian i akuzoi për mashtrim, ryshfet dhe/ose korrupsion, si dhe për “shkelje të integritetit të ndeshjeve dhe garave”.

Hetimi i UEFA-s u përqendrua kryesisht në pretendimet për manipulim ndeshjesh gjatë një ndeshjeje kualifikuese të Europa League midis Ventspils dhe ekipit francez Bordeaux në korrik 2018 — Bordeaux nuk ishte i përfshirë në asnjë mënyrë.

Ndërkohë, presidenti i Ventspils, Adlan Shishkanov, u akuzua për të njëjtat shkelje dhe u ndalua përgjithmonë nga Komisioni i Kontrollit, Etikës dhe Disiplinës i UEFA-s.

Menaxheri sportiv Nikolajs Djakins mori një ndalim katërvjeçar për të njëjtat akuza.

Ndalimi i Ventspils nga UEFA – që u kërkua të shtrihej globalisht – është deri në sezonin 2027/28.

Megjithatë, ndalimi praktikisht nuk zbatohet më, pasi klubi u mbyll në korrik 2021, një muaj pas shpalljes së dënimit, për shkak të problemeve financiare dhe më pas u likuidua në janar 2024

Një klub i ri, JFK Ventspils, u themelua më vonë dhe garon në divizionin e dytë të Letonisë.

Nuk është e qartë nëse ndalimi i mëparshëm i shtrihet klubit të ri; ai do të duhet ose të fitojë Kupën e Letonisë, ose të ngjitet në Ligën e Lartë Letoneze dhe të përfundojë në tre vendet e para në sezonin e ardhshëm që ndalimi të ketë efekt.

Klubi i dytë që po vuan një ndalim shtatëvjeçar nga UEFA është FK Arsenal Tivat nga Mali i Zi, i pezulluar për manipulim ndeshjesh.

Ata u akuzuan për shkelje të rregullave që lidhen me “parimet e përgjithshme të sjelljes” dhe “integritetin e ndeshjeve dhe manipulimin e tyre”.

UEFA hetuar një ndeshje të Europa Conference League 2023 kundër ekipit armen Alashkert, që rezultoi në një ndalim fillestar 10-vjeçar për klubin dhe një ndalim përgjithmonë për mbrojtësin e Arsenal Tivat, Nikola Celebic.

Shokët e skuadrës Cetko Manojlovic, Radule Zivkovic dhe Dusan Paletic morën gjithashtu ndalime 10-vjeçare, megjithëse ndalimi i Paletic u anulua pas apelit.

Ndalimi i klubit u ndryshua gjithashtu në shtatë vjet pas një apeli pjesërisht të suksesshëm, duke u shtrirë deri dhe përfshirë sezonin 2031/32.

Serbia në prag të krizës energjetike, Vuçiq i kërkon SHBA-së të tërheqë sanksionet

Presidenti serb Aleksandar Vuçiq i ka bërë thirrje SHBA-së për më shumë kohë për të adresuar çështjet që lidhen me rafinerinë e vetme të naftës në vend, e cila është në pronësi me shumicë nga gjigandi rus i energjisë Gazprom, raportoi të mërkurën Bloomberg.

Më herët këtë muaj, Shtëpia e Bardhë aktivizoi kufizime që synonin NIS (Industria e Naftës e Serbisë). Ky veprim e shtyu Kroacinë fqinje të pezullonte furnizimet me naftë bruto dhe rriti rrezikun e mbylljes së rafinerisë. Sanksionet goditën gjithashtu stacionet e benzinës të operuara nga NIS, të cilat nuk mund të pranojnë më kartat American Express, Mastercard ose Visa.

“Shpresoj që SHBA-të të mos fillojnë sanksione dytësore” të paktën deri në mesin e dhjetorit, tha Vuçiq duke shtuar se Beogradi shpreson të zgjidhë çështjen që lidhet me aksionet shumicë të Gazprom në NIS. Ai thuhet se u kërkoi zyrtarëve amerikanë të përmbahen nga synimi i institucioneve financiare serbe që lehtësojnë pagesat në stacionet e rafinerisë.

NIS është një kompani kryesore energjetike në Ballkan me një rafineri në Pançevo, pranë Beogradit, dhe një rrjet rajonal prej mbi 400 stacionesh benzine. Gazprom Neft është aksionari më i madh me 44.85%, ndërsa Gazprom mban 11.3% dhe shteti serb zotëron 29.87%.

Uashingtoni pret që Beogradi ose të sigurojë shitjen e aksioneve të Gazprom në NIS ose të marrë kontrollin nëpërmjet shtetëzimit, thanë zyrtarët amerikanë, të cituar nga Bloomberg.

Më herët këtë javë, Vuçiq thuhet se hodhi poshtë planet për veprime të njëanshme kundër gjigantit rus të energjisë, i cili ka mbajtur një pjesë të konsiderueshme që nga viti 2008, duke theksuar se ai nuk është “as komunist dhe as fashist”.

Krasniqi: Do të krijojmë qeveri të re pa Kurtin

Kryetari i PDK-së, Memli Krasniqi, tha se zgjedhjet e ardhshme do të prodhojnë qeveri pa Albin Kurtin e Vetëvendosjen.

Ai tha se zgjedhjet tjera të përmendura për prill nga Kurti janë tentim-kërcënim, ndërsa tha se nëse ka zgjedhje tash, ato do të prodhojnë stabilitet për pesë vjetët e ardhshme, përfshirë edhe zgjedhjen e presidentit apo presidentes.

“Mos u mërzit se s’do të jetë kjo gjendje. Do ta krijojmë qeverinë e re pa Albin Kurtin dhe pa Vetëvendosjen. Pritshmëritë tona janë që t’i fitojmë zgjedhjet e ardhshme dhe ta udhëheqim qeverinë e Kosovës, me pasë një Kuvend funksional, shumicë të mjaftueshme dhe po ashtu me e bë të qartë atë tentim-kërcënimin që Kurti po ia bën sidomos partnerëve minoritarë, nuk do të ketë zgjedhje në prill. Nëse kemi zgjedhje tash, unë jam i bindur që këto zgjedhje do ta prodhojnë stabilitetin për pesë vjetët e ardhshme edhe me zgjedhje të presidentit apo presidentes edhe me qeveri”.

“Votimi i Projektligjit për Buxhet nga Qeveria në detyrë përbën shkelje kushtetuese“

Qeveria në detyrë në mbledhjen e sotme, ka miratuar projektbuxhetin për vitin 2026

E pas kësaj ka reaguar Instituti GAP, sipas së cilit veprimi i sotëm i Qeverisë në detyrë, e cila procedoi dhe miratoi projektligjin për buxhetin, bie në kundërshtim me kërkesat ligjore të përcaktuara në Ligjin e Qeverisë dhe vet Kushtetutën e Republikës së Kosovës.

“Si vazhdimësi e Letrës dërguar Presidentës së Republikës së Kosovës, znj. Osmani Sadriu, dhe marrë parasysh mbledhjen e sotme të Qeverisë në detyrë, duam të sqarojmë se veprimi i sotëm i Qeverisë në detyrë gjatë procedimit dhe miratimit të projektligjit të buxhetit bie në kundërshtim me kërkesat ligjore të përcaktuara në Ligjin e Qeverisë dhe vet Kushtetutën e Republikës së Kosovës. Kjo për faktin se sot votuan personat që janë të certifikuar si deputetë në Kuvendin e Kosovës. Projektligji për Buxhetin e Republikës së Kosovës për vitin 2026 mund të propozohej nga Qeveria në detyrë, në përputhje me Ligjin për Qeverinë. Megjithatë, siç kemi theksuar dhe në Letrën e dërguar, ky proces do duhej të zhvillohet në pajtueshmëri të plotë me Kushtetutën, ligjin dhe aktgjykimin e Gjykatës Supreme. Të njëjtat përcaktojnë qartë se një person nuk mund të ushtrojë njëkohësisht dy funksione, si anëtar i Qeverisë dhe si deputet”, thuhet në reagimin e GAP-it.

Reagimi i plotë:

𝐑𝐄𝐀𝐆𝐈𝐌 𝐦𝐛𝐢 𝐏𝐫𝐨𝐜𝐞𝐬𝐢𝐧 𝐞 𝐕𝐨𝐭𝐢𝐦𝐢𝐭 𝐭ë 𝐏𝐫𝐨j𝐞𝐤𝐭𝐥𝐢𝐠j𝐢𝐭 𝐩ë𝐫 𝐁𝐮𝐱𝐡𝐞𝐭𝐢𝐧 𝐧𝐠𝐚 𝐐𝐞𝐯𝐞𝐫𝐢𝐚 𝐧ë 𝐃𝐞𝐭𝐲𝐫ë

Si vazhdimësi e Letrës dërguar Presidentës së Republikës së Kosovës, znj. Osmani Sadriu, dhe marrë parasysh mbledhjen e sotme të Qeverisë në detyrë, duam të sqarojmë se veprimi i sotëm i Qeverisë në detyrë gjatë procedimit dhe miratimit të projektligjit të buxhetit bie në kundërshtim me kërkesat ligjore të përcaktuara në Ligjin e Qeverisë dhe vet Kushtetutën e Republikës së Kosovës. Kjo për faktin se sot votuan personat që janë të certifikuar si deputetë në Kuvendin e Kosovës.

Projektligji për Buxhetin e Republikës së Kosovës për vitin 2026 mund të propozohej nga Qeveria në detyrë, në përputhje me Ligjin për Qeverinë. Megjithatë, siç kemi theksuar dhe në Letrën e dërguar, ky proces do duhej të zhvillohet në pajtueshmëri të plotë me Kushtetutën, ligjin dhe aktgjykimin e Gjykatës Supreme. Të njëjtat përcaktojnë qartë se një person nuk mund të ushtrojë njëkohësisht dy funksione, si anëtar i Qeverisë dhe si deputet.

Prandaj, që ky proces të jetë i ligjshëm, ka qenë e domosdoshme që nënshkruesit e këtij projektligji të jenë në përputhje të plotë me legjislacionin e lartëcekur, dhe propozuesit të jenë zv.kryeministri dhe ministra e zv.ministra përkatës që nuk kanë fituar njëkohësisht pozitën e deputetit në këtë legjislaturë. Çdo veprim që e anashkalon këtë parim cenon vlefshmërinë e vet ligjit për buxhetin, situatë që ndodhi sot.

Në këta fazë të ndjeshme politike, respektimi i rendit kushtetues dhe vendimeve gjyqësore është thelbësor për te ruajtur stabilitetin institucional dhe për të garantuar që procesi i miratimit të buxhetit mbetet i ligjshëm. Çdo tentativë si kjo e sotmja për të anashkaluar ligjin e Qeverisë, aktgjykimin e Gjykatës Supreme dhe Kushtetutën e Republikës së Kosovës dëmton jo vetëm procesin e miratimit të buxhetit por edhe vet parimin e sundimit të ligjit në Kosovë.

Për nga përmbajtja, projektligji dhe pakot e propozuara vërehet se janë përgatitur pa një qasje gjithëpërfshirëse institucionale, duke e thelluar edhe më tutje krizën politike në vend dhe përfundimisht mos miratimin e tij përmes konsensusit të përbashkët mes gjitha partive politike. Një qasje e tillë cenon rëndë parimet e demokracisë së këtij vendi sepse po bëhet në periudhën e zgjedhjeve komunale dhe paralajmërimit edhe të zgjedhjeve të përgjithshme.

Duam të ritheksojmë se miratimi i buxhetit është jetik për funksionimin normal të shtetit dhe pa një buxhet të miratuar, në rast të një ngërçi të përsëritur institucional, mund të hyjmë në një destabilitet të thellë financiar por edhe të funksionimit të përgjithshëm të shtetit. Qeveria në detyrë kishte një mundësi ligjore për t’a proceduar ligjërisht procesin e miratimit të këtij buxheti, por mënyra e cila u aplikua sot shkel në thelb Kushtetutën, legjislacionin dhe aktgjykimet e deritanishme.

Sinqerisht,

Instituti GAP

Grupi për Studime Juridike dhe Politike (GLPS)

Fondacioni Kosovar për Shoqëri Civile (KCSF)

Instituti për Politika Zhvillimore (INDEP)

Instituti i Kosovës për Politikat Evropiane (EPIK)

Community Development Fund (CDF)

SHL-Kosova

YMCA Kosova

TOKA

Instituti Kosovar për Qeverisje Lokale (KLGI)

Balkan Green Foundation (BGF)

Qendra Kosovare për Studime Gjinore (QKSGJ)

Community Building Mitrovica (CBM)

Advocacy Training and Resource Center (ATRC)

Vdes Azem Muja, babai i deputetit Armend Muja

Ka vdekur mitrovicasi Azem Muja, babai i deputetit Armend Muja, shkruan Mitrovica SOT

Lajmin për vdekjen e tij e dha deputeti.

“Ai u nda prej nesh pas një sëmundje të shkurtër duke lënë pas kujtime të paharruara dhe një boshllëk të madh në zemrat tona,” ka shkruar Muja.

Deputeti ka bërë të ditur se detajet e varrimit do të publikohen së shpejti.

Gjykata merr vendim për ish-rreshterin e policisë që rrahu dhe e bëri për spital kolegen e tij për motive xhelozie

Në Gjykatën Themelore në Pejë është dhënë sot vendimi final ndaj ish-rreshterit të Policisë së Kosovës, Senad Hamzic, i akuzuar për rrahjen e koleges së tij, policen, F.K.

Hamzic dyshohej se e kishte rrahur kolegen për motive xhelozie, pasi kishte pasur një raport të afërt me të njëjtën

Sipas të dhënave të siguruara nga Insajderi, Hamzic është dënuar me një gjobë prej 3 mijë eurosh për shkak të lëndimit të lehtë trupor, ndërsa për veprën penale kanosje nuk iu shqiptuar asnjë dënim, pasi akuza për këtë ishte refuzuar.

Dy ditë më parë, gjyqtari Ademaj kishte vendosur që seanca të mbahet e mbyllur për publikun, me qëllim të mbrojtjes së jetës personale dhe familjare të palëve të përfshira në çështje.

“Për të mësuar se çfarë ka ndodhur me rastin, mund të ndiqni storien e plotë:

Presidentja deklarohet pas takimit me krerët e partive politike, zbulon kërkesën e Kurtit

Presidentja e vendit Vjosa Osmani ka folur pas takimit të sotëm që kishte me partitë politike.

Osmani tha se disa nga partitë politike kishin qëndrime që nuk mund të krijojnë shumicë, por kishte dhe qëndrime që të takoheshin sërish me qëllim që të ketë një mandatar të ri.

Ajo tha se për këtë do të presë deri më 5 nëntor, aq sa përcakton afati i Gjykatës Kushtetuese, transmeton Zeri.info.

“Deri më 5 nëntor do të komunikoj sërish me kryetarët e partive, por do të jem në komunikim me ta dhe kushdo që ka gatishmëri për të parë përfundimisht se a ka mundësi për mandatar të ri”.

Ajo përmendi se Kurti ka kërkuar t’i jepet kjo kohë.

“Kurti ka kërkuar që të më takojë edhe një herë para se të skadojë afati 10-ditor dhe pas konsultimeve që ka brenda partive që i takon, do të vijë ose jo me mandatar të dytë, është çështje e tyre”, deklaroi Osmani para gazetarëve.

Blerim Latifi thotë se për njohjen e Sirisë kanë merita SHBA e Izraeli: Tregimet e tjera janë dokrra hini

Profesori universitar, Blerim Latifi, ka thënë se njohja e pavarësisë së Kosovës nga Siria është rezultat i zhvendosjes së këtij shteti në orbitën amerikane, pas rënies së regjimit të Asadit.

Sipas Latifit, kjo njohje është edhe përfitim indirekt nga fitorja e Izraelit në Lindjen e Mesme.

Tregimet e tjera për procesin e marrjes së kësaj njohje ai thotë se janë “dokrra hini”. Siria e ka njohur sot Kosovën. Presidentja e Kosovës, Vjosa Osmani, ka njoftuar nga Damasku për këtë vendim të Sirisë, duke falendëruar Princin e Kurorës së Arabisë Saudite.

Postimi i plotë i Latifit:

Siria nën Asadin ishte një satelit i Iranit dhe Rusisë. Milicitë e Hezbollahut patën rol vendimtar në mbajtjen e Asadit në pushtet përgjatë luftës civile që nisi aty në vitin 2011. Pastaj Irani nxiti Hamasin dhe Hezbollahun që të sulmojnë Izraelin. Në përgjigje, Izraeli shkatërroi Hamasin, shpartalloi Hezbollahun dhe bombardoi Iranin, duke e nxjerrë jashtë loje për dhjetë ditë lufte. Pa Iranin dhe Hezbollahun, Asadi nuk mund të qëndronte më në pushtet. Regjimi i tij ra si një kullë prej letre dhe milicitë e Ahmed Al Sharas marshuan në Damask. Kështu Siria u zhvendos nga orbita e Rusisë dhe Iranit në orbitën amerikane. Njohja e Kosovës nga Siria është rezultat i kësaj zhvendosjeje.Është një përfitim i yni i tërthortë nga fitorja e madhe e Izraelit në Lindjen e Mesme. Tregimet tjera për procesin që solli deri te kjo njohje janë thjesht dokrra hini.