Kurti i hakmerret Baljes, ia shkarkon zv/ministrin dhe këshilltarin

Kryeministri në detyrë, Albin Kurti i ka shkarkuar nga detyra zvministrin Elldin Ugllarin dhe këshilltarin politik Enesi Sulejmanoviç nga pozita.

Indeksonline merr vesh se vendimi është marrë ditën e djeshme më 27 tetor.

Ky vendim shihet si një formë ”hakmarrje” ndaj deputetës Duda Balje e cila nuk votoi qeverinë e propozuar nga Kurti ditën e diele.

Vlen të theksohet po ashtu se Balje nuk ishte fare në Kuvend datën e 26 tetorit kur edhe u propozua Qeveria.

Megjithatë, Qeveria Kurti 3 po vjen…? Kjo është lëvizja e radhës nga Vetëvendosja

Albin Kurti pritet të provohet edhe një herë në Kuvend për të formuar Qeverinë “Kurti 3”.

Burime të Indeksonline brenda Kuvendit të Kosovës bëjnë të ditur se në këto momente deputetët kanë nisur mbledhjen e nënshkrimeve për seancë të jashtëzakonshme, ku pikë e rendit të ditës do të jetë formimi i Qeverisë.

Paraprakisht, Vetëvendosjes i duhet t’ia dëshmojë presidentes Vjosa Osmani se i ka votat e nevojshme për formimin e qeverisë.

Seanca e Kuvendit është planifikuar të mbahet këtë javë.

Kryeministri Kurti dje në një konferencë pati thënë se në këtë situatë vendi po shkon drejt zgjedhjeve të reja.

“Nuk mund ta lë vetëm”, 14-vjeçari nga Kosova shpëton shokun nga një sulm në Gjermani

Një djalë 14-vjeçar me origjinë nga Kosova, Len Fejzullahu, është bërë hero në Gjermani, pasi rrezikoi jetën për të shpëtuar shokun e tij nga një sulm me çekan.

Gazeta gjermane Friedberger Allgemeine ka sjellë rrëfimin tronditës dhe njëkohësisht frymëzues të Lenit, i cili tregoi guxim e vendosmëri.

Gjithçka ndodhi në oborrin e shkollës, pak para fillimit të orës së parë. Leni dhe dy shokët e tij po bisedonin, kur një adoleshent 15-vjeçar iu afrua, i veshur me uniformë ushtarake dhe me një çekan në dorë.

“Fillimisht mendova se po bënte shaka, se çekani ishte lodër”, rrëfen Leni. Por sekondat në vijim do të tregonin se nuk kishte asgjë për të qeshur. Sulmuesi papritur nisi të godasë njërin prej shokëve të Lenit në kokë.

Pa menduar gjatë, Leni u vërsul për ta ndihmuar. Edhe pse u godit në krah, ai arriti të shmangej dhe t’i kundërpërgjigjej agresorit.

“E pash shokun tim të shtrirë në tokë… Mendova se nuk mund ta lë vetëm”, kujton 14-vjeçari me emocione.

Në përleshje, Leni arriti t’ia rrëmbejë çekanin sulmuesit dhe ta godasë në bark, duke e rrëzuar në tokë. Falë reagimit të tij të shpejtë, ai dhe shoku i plagosur arritën të shpëtonin.

Ndërsa po vraponin drejt hyrjes së shkollës, sulmuesi shtiu në drejtim të tyre me një armë false, ndërkohë që shoku i Lenit, i lënduar rëndë në kokë, kishte nevojë urgjente për ndihmë. Dy mësues që ndodheshin aty njoftuan menjëherë policinë dhe ambulancën.

Sulmuesi 15-vjeçar u arrestua në vendngjarje dhe po hetohet për tentim vrasjeje dhe lëndim të rëndë trupor. Autoritetet gjermane kanë hapur hetime edhe për mundësinë e motivimit ekstremist të ngjarjes.

Leni ka dhënë dëshminë e tij në polici dhe ka hedhur poshtë komentet që qarkullonin në rrjetet sociale, se sulmuesi kishte qenë viktimë bullizmi.

“Nuk e njihja personalisht, vetëm e kisha parë më parë”, thotë ai. “Por po të kishte qenë i huaj, njerëzit do të flisnin ndryshe”.

Për veprimin e tij heroik, kryebashkiaku i Friedbergut, Roland Eichmann, e ka ftuar Lenin në takim për ta falënderuar publikisht për guximin e treguar.

“Shteti rrezikon të falimentojë”, rreziqet e Kosovës në mungesë buxheti

(Radio Evropa e Lirë) Dështimi për formimin e një qeverie të re ka rritur rrezikun që Kosova të hyjë në vitin 2026 pa buxhet.

Eksperti i financave, Haki Shatri tha në një intervistë për Radio Evropa e Lirë se, shteti rrezikon të falimentojë, teksa mund të mos ketë para as për paga, e as për pensione e shtesa për fëmijët në fillimvitin e ardhshëm.

“Sipas përvojës që kam pasur edhe në Kuvend, Kuvendi mund të hyjë pak “në të kuqen”, nëse pajtohen deputetët me shumicë votash, t’i kërkojnë Qeverisë që të marrë vendim lidhur me buxhetin. Përndryshe, tjetër rrugë nuk ka.Thjesht, jam i trishtuar deri ku ka ardhur puna. Të vijë situata, pas 25 vjetësh çlirim, të falimentojë shteti, të mbyllet shteti, të mos funksionojë”.

“Nëse më 1 janar nuk kemi një vendim të plotfuqishëm për të vazhduar një e dymbëdhjeta e buxhetit të këtij viti, nuk do të ketë paga, pensione, shtesa të fëmijëve, nuk do të ketë më para për asnjë lloj shpenzimi, as për lëndë djegëse sa për të futur çelësin një veture [qeveritare] për ta ndezur”.

Ai theksoi se vetëm një qeveri me kompetenca të plota mund të ndërmarrë nisma për ndryshimin e ligjit për buxhetin, apo për vazhdimin e ndarjeve buxhetore edhe për muajt e parë të 2026-tës.

“Nëse nuk gjendet ndonjë zgjidhje që të funksionalizohet një e dymbëdhjeta e buxhetit në janar, edhe tërmet të ketë, nuk guxon askush të ndërmarrë asgjë”, shprehet Shatri.

Ish-ministri i Ekonomisë dhe Financave thotë se pa një qeveri të re, në janar s’do të ketë para as për ushtrinë e Policinë, transmeton Klankosova.tv.

Rama për Thaçin: Emri i tij do të mbetet si emri i njeriut që u bë njësh me fatin, lirinë dhe pavarësinë e Kosovës

Kryeministri i Shqipërisë, Edi Rama, ka reaguar me tone të forta për procesin gjyqësor ndaj ish-krerëve të Ushtrisë Çlirimtare të Kosovës në Hagë, duke e cilësuar atë si një “padrejtësi historike” ndaj luftës çlirimtare.

Në një postim në rrjetet sociale, Rama u shpreh se është “e tmerrshme të mendosh” që ata që dikur shpëtuan Kosovën po gjykohen sot për lirinë që sollën.

“A nuk është e tmerrshme ta mendosh se shpëtimtarët e një kohe kur vetë ekzistenca e Kosovës ishte në tehun e thikës së gjatë të padrejtësisë historike ndaj shqiptarëve, duhet të paraqiten para një gjykate të dalë krejt nga objekti për të cilin u ngrit, për të dëshmuar se lufta për liri nuk është krim…”, shkruan Rama.

Kreu i qeverisë shqiptare kritikoi ashpër ata që, sipas tij, “urojnë të mos dalë më kurrë prej aty” Hashim Thaçi, duke i quajtur “shqipsharës digjitalë” dhe “tifozë të verbuar prej budallakisë kinse patriotike”.

Në përmbyllje të reagimit, Rama theksoi se pavarësisht zhvillimeve të sotme, “emri i Hashim Thaçit do të mbetet përgjithmonë si emri i njeriut që u bë njësh me fatin, lirinë dhe pavarësinë e Kosovës”.

Uragani “Melisa” hyn në nivelin e 5 të rrezikshmërisë në këtë vend

Uragani “Melissa”, i cili pritet të jetë më i fuqishmi që ka prekur ndonjëherë Xhamajkën, po afrohet me shpejtësi drejt vendit të Karaibeve, duke kërcënuar me përmbytje katastrofike dhe rrëshqitje toke.

Me erëra që arrijnë deri në 280 kilometra në orë, uragani i Kategorisë 5 – niveli më i lartë në shkallën e fuqisë së stuhive tropikale – ka shkaktuar tashmë shtatë viktima: tre në Xhamajkë, tre në Haiti dhe një në Republikën Dominikane.

Qendra Kombëtare e Uraganeve (NHC) e Shteteve të Bashkuara ka lëshuar një paralajmërim të fortë për banorët:

“Ky është një uragan potencialisht vdekjeprurës, me pasoja të ngjashme me ato të uraganeve Maria (2017) dhe Katrina (2005).”

Sipas autoriteteve lokale, tre personat që humbën jetën në Xhamajkë u goditën nga aksidente të ndryshme teksa përgatiteshin për stuhinë, duke prerë degë pemësh ose duke punuar në shkallë për të siguruar shtëpitë.

Kryeministri i Xhamajkës, Andrew Holness, paralajmëroi se dëmet mund të jenë të mëdha, veçanërisht në pjesën perëndimore të vendit.

“Nuk besoj se ndonjë infrastrukturë në atë rajon mund t’i rezistojë një uragani të Kategorisë 5. U bëj thirrje banorëve të evakuojnë menjëherë zonat më të rrezikuara,” – deklaroi Holness për CNN.

Autoritetet kanë vendosur kufizime të plota lëvizjeje dhe po përgatisin qendra emergjence për strehimin e banorëve, ndërsa ekipet e shpëtimit qëndrojnë në gatishmëri për ndërhyrje të menjëhershme.

Pas ndarjes nga Leo, Lela merr vendimin që askush nuk e priste! (Foto)

Çifti që nisen romancën brenda shtëpisë së “Big Brother Vip Kosova”, Lela dhe Leo, duket se kanë vendosur përfundimisht të shkëpusin çdo raport me njëri-tjetrin.

Pas raportimeve për ndarjen e tyre, e reagimeve të herë pas hershme të çiftit, Lela duket se ka marrë vendim të rëndësishëm në jetën e saj, shkruan IndeksOnline.

Lela me anë të një paraqitje në llogarinë e saj në Instagram, ka bërë me dije se është gati për një fillim të ri.

Në fotografi shihen edhe disa valigje, përmes së cilave Lela na bënë me dije se po e lë Kosovën.

Kosovari gjendet pa shenja jete në shtëpinë e tij në Veri

Një person është gjetur pa shenja jete në shtëpinë e tij në Veri të Mitrovicës.

“Raportohet se në shtëpinë e tij është gjetur pa shenja jete viktima mashkull kosovar”, ka njoftuar policia në raport.

Me vendim të prokurorit, trupi i pajetë i viktimës është dërguar në IML për obduksion.

Bie nga lartësia një grua, vdes në emergjencë

Një ngjarje e rëndë ka ndodhur mbrëmë në Gjakovë.

Atje, një grua ka vdekur pasi ra nga një lartësi, njofton raporti 24 orësh i policisë.

Policia njofton se është duke e hetuar rastin.

“Gjakovë 27.10.2025-22:27. Raportohet se viktima femër kosovare kishte rene nga një lartësi. Si pasoje, e njëjta ka pësuar lëndime trupore dhe është dërguar në emergjencë, ku mjeku kujdestar ka konstatuar vdekjen e saj. Me vendim të prokurorit, trupi i pa jetë dërgohet në IML për obduksion”, thuhet në raportin 24 orësh të Policisë së Kosovës.

Tërmet i fortë godet Turqinë gjatë natës, 22 persona të plagosur

Një tërmet me magnitudë 6.1 ballë goditi Turqinë perëndimore të hënën vonë, duke tronditur qytete përfshirë Stambollin dhe provincën e Izmirit.

Sipas Autoritetit të Menaxhimit të Fatkeqësive dhe Emergjencave, AFAD tërmeti ndodhi në orën 22:48 dhe epiqendra e tij ishte pranë qytetit Sındırgı. Mësohet se në këtë qytet një shtëpi është shembur dhe disa të tjera janë dëmtuar.

Ministri i Brendshëm turk, Ali Yerlikaya tha se ekipet e emergjencës u dërguan menjëherë në vendngjarje pas tërmetit. Nga tërmeti janë plagosur 22 persona të cilët morën plagë nga paniku teksa dilnin nga banesat e tyre.

Turqia ndodhet në disa vija aktive sizmike. Një tërmet në shkurt të vitit 2023 në jug të Turqisë vrau më shumë se 53,000 njerëz dhe shkatërroi pjesën më të madhe të qytetit të lashtë të Antakyas, ndërsa një dridhje me magnitudë 5.8 ballë në korrik të këtij viti vrau një person dhe plagosi 69 të tjerë në të njëjtin rajon.