Analistët Ilir Mirena dhe Sadri Ramabaja diskutuan në Pressing në T7 për çëeshtjen e “hapjes së urës së Ibrit”.

“Kjo urë ka mujtë me u çelë pa zhurmë të madhe…Ura nuk është e mbyllur, kjo veç për kerre është e mbyllur. Albin Kurtui po don triumfalisht me thanë unë e hapa me dhunë me gjoksin tim edhe nuk po të len KFOR-i me hap, edhe s’ka me të lanë pa u koordinu”, tha Mirena në Pressing.

“Pamjet tregojnë që s’ki sovranitet atje”, u shpreh Mirena.

“Policia fatkeqësisht është shndërru në instrument të kësaj qeverie që s’ka ndodhë kurrë”, tha Mirena në Pressing.

“Kurrë Policia e Kosovës nuk ka qenë profesionalisht më e përgatitur”, tha Ramabaja në Pressing.

”Po don te militantat me thanë këqyre çka rezistova unë, e çela urën i çova gjipat atje, e çova policinë…”, shtoi Mirena.

Analisti Valon Syla ka ironizuar me gabimin që kryeministri Kurti e bëri teksa po zgjidhte një ekuacion matematikor. Ai shkaktoi të qeshura në Pressing në T7, duke e quajtur Kurtin “digitron shqiptar”.

“Miti më i madh që Albini më i mençuri, digitron shqiptar mat madh….Ma i madh se Faik Konica, më popullor se Fishta…”, tha ai.

Sipas Sylës, kryeministri Kurti është sistem që “kur e ka marrë notën 8 në provim, ka thënë hy në provim prap me marrë 10”.

“Ky tash tri herë e zgjidh detyrën e matematikës derisa ta merr 10-she”, tha Syla

“Tash i pash militantat që i kish lëshu shpirti, qysh s’ia qëlloi detyrës”, tha ai, duke shkaktuar të qeshura.

Deputeti i PDK-së, Hisen Berisha, ka akuzuar kryeministrin Albin Kurti për manipulimin e rezultateve të qeverisë duke i shumëfishuar ato për të fshehur dështimet e tij.

Deputeti i PDK-së, Hisen Berisha, teksa ka komentuar gabimin e kryeministrit Albin Kurti me zgjidhjen e ekuacionit, ka thënë se ai kështu e manipulon popullin me rezultatet në qeverisjen e tij që i shumëfishon.

“Nuk duhet të befasohen nxënësit e as qytetarët që e ka bërë X-në në vlerën 5 e ka shumëfishuar e jo zero sepse edhe rezultate e qeverisë që janë krejt zero ky i ka shumëfishuar. Kjo është pjesë e propagandës së tij për të mbuluar dështimin total e falimentimin total në këtë qeverisje”, ka deklaruar ai në Debat Plus.

Ministri i Administrimit të Pushtetit Lokal, Elbert Krasniqi ka komentuar mbylljen e institucioneve paralele serbe në veri të vendit, duke thënë se këto institucione apo struktura paralele serbe janë mbyllur nga Policia e Kosovës pas kërkesës së ministrisë që ai drejton.

Megjithatë, ai tha, se objektet e liruara do të shfrytëzohen për kërkesat e qytetarëve atje e po ashtu për nevojat që ata do t‘i kenë.

“Tashmë janë mbyllur këto 5 institucione ilegale në veri dhe u bashkohen edhe shtatë të tjerave të cilat janë mbyllur më herët me një veprim të përbashkët të institucioneve të Kosovës”, tha Krasniqi në RTK.

Tutje ka thënë ai se tashmë ato institucione ilegale nuk funksionojnë në Kosovë, sepse kanë vepruar jashtë kornizës ligjore dhe kushtetuese të Kosovës dhe nuk kanë më hapësirë të veprojnë në Kosovë.

Krasniqi tha se objektet e liruara janë kryesisht në pronësi të komunave të Kosovës dhe tashmë kanë institucionin që do të veprojë në objektin e liruar dhe aty do të veproj Qendra Rajonale e trajnimeve për Patentshoferë.

“Tashmë jemi duke punuar në nivel lokal dhe qendror që kërkesave të qytetarëve tu jemi sa më afër edhe me objekte të liruara në mënyrë që tu përgjigjemi sa më mirë qytetarëve atje”, tha Krasniqi.

Deputetja e VV-së, Fitore Pacolli, deklaroi se ushtarët e KFOR-it nuk kanë më arsye të rrinë mbi urën e lumit Ibër.

Sipas saj, siguria në veri është e kënaqshme dhe nuk ka arsye për praninë e ushtarëve.

“Nuk ka arsye që ura të mbetet e mbyllur për vetura dhe nuk ka më arsye të kemi ushtarë të KFOR-it në urë, përderisa siguria në atë pjesë të territorit të Kosovës është e kënaqshme, si dhe Policia e Kosovës ka treguar që është e gatshme të mbrojë atë pjesë të territorit të Kosovës nga krimet që mund të ndodhin nga aktet e dhunshme si dhe t’i mbrojë qytetarët nga sulmet, vjedhjet e rëndomta…”, tha ajo në Tëvë1.

Ndërkohë, nuk ceki datë se kur ura mund të jetë e hapur, por tha që janë duke punuar intensivisht.

“Ne kemi thënë që do të punojmë intensivisht në hapjen e urës dhe këtë po e bëjmë. Tani janë kryer të gjitha punët teknike që kanë të bëjnë me urën dhe në ndërkohë jemi në konsultime të vazhdueshme me komunitetin ndërkombëtar që ta hapim urën”, deklaroi ajo.

Kryetari i të ashtuquajturit Asociacioni i Qytetarëve të Qarkut të Mitrovicës, Rasha Rojeviq, ka paralajmëruar se nga 6 shtatori, serbët do të organizojnë bllokada në të gjitha pikat kufitare me Kosovën.

Sipas tij, bllokada do të zgjasë derisa Policia e Kosovës të tërhiqet nga veriu i vendit.

Lidhur me këtë paralajmërim është deklaruar KFOR-i.

Në një përgjigje për Klankosova.tv, thuhet se “është e rëndësishme të shmangen veprime që mund të krijojnë tensione të panevojshme”.

“Ky është çelësi për sigurinë e qëndrueshme në Kosovë dhe për stabilitetin rajonal”, thuhet në përgjigjen e KFOR-it për Klankosova.tv.

Misioni paqeruajtës i NATO-s në Kosovë thotë se po i ndjek nga afër zhvillimet aktuale dhe vazhdon të zbatojë mandatin e tij të OKB-së për të kontribuar në një mjedis të sigurt për të gjithë njerëzit në Kosovë dhe lirinë e lëvizjes, në çdo kohë dhe në mënyrë të paanshme.

Ndërkaq, në përgjigje KFOR-i ka thënë se komente tjera lidhur me çështjen e paralajmërimit për bllokim kufijsh, mediat t’i drejtohen autoriteteve të Serbisë.

Kryeministri i Kosovës, Albin Kurti, u kërkon falje nxënësve të klasës së shtatë të shkollës “Ali Hadri”, për ekuacionin matematikor të cilin e zgjidhi gabim.

Kurti tha se në sekondën e parë i është dukur që ekuacioni ka zgjidhjen x=5, por thekson se po të mendonte pak do ta shihte se zgjidhja e saktë ishte x=0.

Tutje, Kurti thotë se u ndje i gëzuar që nuk ishte nxënës në ato momente.

“…më duhet të them që tash jam i gëzuar që nuk isha nxënës në atë çast, sepse nuk do të merrja notë kaluese”,shkruan Kurti.

Ai u thotë nxënësve se ekuacionin e ditën më mirë se kryeministri.

“Ju kërkoj falje. Zgjidhja e atij ekuacioni, ashtu qysh ju e dini më mirë se kryeministri i juaj, është x=0”, shkruan Kurti.

Postimi i tij i plotë:

Kërkimfalje nxënësve të klasës 7/1 të shkollës fillore “Ali Hadri”

Të dashur nxënës,

Ju falemnderit për mikpritjen e përzemërt në ndërtesën e re të shkollës suaj. Gëzimi juaj sot më mbushi me mall për bankat shkollore. Por, më duhet të them që tash jam i gëzuar që nuk isha nxënës në atë çast, sepse nuk do të merrja notë kaluese. Ekuacioni i thjeshtë matematikor m’u duk që në sekondën e parë që e ka zgjidhjen x=5; pra pesë, porsi pesëshet që ua dëshiroj juve. Po të mendoja pak, do ta shihja që zgjidhja e saktë është x=0, por në atë rast, nuk besoj që do të merrja mundin të merrja shkumësin e të shkruaja në dërrasën e klasës suaj. Ju kërkoj falje. Zgjidhja e atij ekuacioni, ashtu qysh ju e dini më mirë se kryeministri i juaj, është x=0.

Ju përshëndes e ju dua fort,

Albini

Kurti nuk kalon në matematikë, ia huq një detyre të thjeshtë por duartrokitet