Magazine PRO

Një takim jozyrtar është zhvilluar mes kryeministrit të Shqipërisë, Edi Rama dhe presidentit të Serbisë, Aleksandar Vuçiq në Pragë.

Kjo u bë e ditur përmes një postimi të Vuçiq në llogarinë e tij në Instagram, i cili ka ndarë fotografi ku Rama e Vuçiq dhe liderë të tjerë shihen bashkë.

Takimi mes tyre vjen pak pasi Rama bëri thirrje nga Praga për gjetjen e një zgjidhjeje mes Kosovës e Serbisë përmes dialogut, me qëllim shmangien e influencës ruse në Ballkan.

“Aty ku Rusia është më influente është në pjesë të tjera të Ballkanit. Kjo është arsyeja pse është e rëndësishme që Serbia dhe Kosova të dalin nga konflikti, na duhet ta mbajmë Serbinë në anën tonë sa më shumë të jetë e mundur. Sa më shumë ta lidhim integrimin evropian më atë të NATO-s, dhe sa më shumë NATO të jetë e pranishme ne Ballkanin Perëndimor, aq më mirë”, kishte deklaruar Rama.

Rama ndodhet në Pragë pasi kryeqyteti çek do të presë duke nisur nga kjo e premte deri të dielën Forumin vjetor Globsec.

Gjithashtu në këtë forum nga Kosova merr pjesë presidentja Vjosa Osmani

Ambasada e Gjermanisë në Prishtinë i është bashkuar reagimit të ambasadës amerikane për aksionin e sotëm në Veri që ka rezultuar me mbylljen e komunave paralele në Veri të vendit, duke thënë se janë të zhgënjyer për veprimet e njëanshme dhe të pa koordinuara.

Ambasadori Rohde ka thënë se njoftimi s’është konsultim dhe sipas tij një gjë e tillë duhet të ndryshojë.

Ai në “X” ka shkruar se s’ka nevojë për situatë krize tjetër dhe ka përmendur edhe dëshirën për heqje të masave dhe lëvizje përpara drejt integrimit në BE të Kosovës.

Qeveria e Republikës së Kosovës, i ka dhënë tokë për shfrytëzim për 99 vjet Shoqatës Bomirëse “Jetimët e Ballkanit për ndërtimin e Kompleksit “Qendra Rezidenciale e Kosovës”. Në vendimin e Qeverisë nuk janë dhënë detaje për sipërfaqen e tokës, por Insajderi merr vesh është 13 hektarë.

Sipas njoftimit, të Qeverisë këto parcela që u dhanë janë në pronësi të Komunës së Graçanicës.

“Sipërfaqet/pjesët e ngastrave kadastrale Nr.150-0, 155-0 dhe 17-8 në pronësi të Komunës së Graçanicës, barten në emër të Qeverisë së Republikës së Kosovës për realizimin e interesit publik sipas pikës 1. të këtij Vendimi. Pas bartjes, me fuqi të këtij Vendimi, të njëjtat do fi jepen në shfrytëzim shoqatës bamirëse nga pika 2. e këtij Vendimi“, thuhet në vendim.

Shoqata “Jetimët e Ballkanit”, ka për kryetar, humanistin Halil Kastrati dhe toka do shfrytëzohet për qëllime humanitare.

Aty do ndërtohet Qendra Rezidenciale për autizëm, sindromë daun dhe aftësi të kufizuar për fëmijë, persona të rritur dhe të moshës së shtyrë.

“Sipërfaqet/pjesët e ngastrave kadastrale të cekura në pikën 3. të këtij Vendimi dhe sipërfaqet/pjesët e ngastrave Nr. 154-0 dhe 36-0 në pronësi të Republikës së Kosovës, i jepen në shfrytëzim Shoqatës Bamirëse “Jetimët e Ballkanit për nevoja të ndërtimit të Kompleksit “Qendra Rezidenciale e Kosovës për autizëm, sindromë daun dhe aftësi të kufizuar për fëmijë, persona të mitur dhe të moshës së shtyrë “, thuhet në vendim.

Deputeti i PDK’së, Enver Hoxhaj thotë se kryeministri Albin Kurti dhe qeveria e tij e kanë bërë një Kosovë pa kurrfarë politike të jashtme dhe pa asnjë aleat në rajon.

Hoxhaj përmes një shkrimi në Facebook thotë se izolimi që i është bërë Kosovës vjen si pasojë e një qeverie passive dhe të paditur në marrëdhënie ndërkombëtare.

“Izolimi, pos që është pasojë e një qeveri pasive dhe e paditur të Kosovës në marrëdhënie ndërkombëtare, atij i është shtuar edhe politika e ledhatimit të Serbisë nga Berlini dhe Parisi, ku për interesa afatshkurtëra gjeopolitike dhe ekonomike, është duke u rrezikuar rendi i krijuar në Ballkan me përfundimin e luftërave në Jugosllavi”.

Tutje, Hoxhaj thekson se Kosovës i duhet një qeveri e cila e nxjerr vendin nga izolimi.

”Kurrë më shumë se tash, Kosovës i duhet një qeveri e cila e nxjerrë vendin nga izolimi dhe komunikon edhe karshi partnerëve të saj gabimet strategjike që po bëhen me ledhatimin e Serbisë, gjë që sot është gabim, por do të jetë edhe në të ardhmen”.

Sot ka përfunduar afati për të gjitha partitë politike të regjistruara në Kosovë që të njoftojnë KQZ-në se në zgjedhjet e 9 shkurtit 2025, do të garojnë si pjesë e koalicionit.

E pikërisht në këtë ditë është konfirmuar edhe koalicioni mes Partisë së Drejtësisë dhe Aleanca Kosova e Re, me emrin “Lista për Familjen”, gjë e cila është bërë e ditur sot nga zëdhënësi i KQZ-së, Valmir Elezi.

Në lidhje me koalicionin mes Partisë së Drejtësisë dhe Aleanca Kosova e R, Klan Kosova ka raportuar dy ditë më parë.

Ndërkaq, Elezi gjithashtu njoftoi edhe se cilat janë partitë që nuk dëshirojnë të garojnë në zgjedhje.

“KQZ njofton se ka përfunduar edhe periudha për partitë politike të regjistruara në Kosovë, që të njoftojnë se nuk dëshirojnë të garojnë në zgjedhje”.

“Gjatë kësaj periudhe 16 gusht deri më 30 gusht 2024, tri parti politike të regjistruara kanë njoftuar se nuk dëshirojnë të certifikohen për zgjedhje si në vijim: Partia Demokratike e Diasporës, Lëvizja për Bashkim dhe Partia Balliste”, është shprehur ai.

Presidenti kroat Zoran Millanoviq tha të premten se Serbia është më tepër se dy herë më e pazhvilluar se Kroacia dhe se po armatoset “për një javë luftë fiktive”, duke komentuar vendimin e Serbisë për të blerë 12 avionë të rinj luftarakë francezë Rafale.

Presidenti francez Emmanuel Macron ndodhet për një vizitë dyditore në Serbi me ftesë të presidentit serb Aleksandar Vuçiq dhe në kuadër të vizitës së tij të enjten është nënshkruar kontrata për blerjen e 12 avionëve të rinj luftarakë Rafale me vlerë 2.7 miliardë euro.

“Kjo është punë e tyre. Kjo nuk ka të bëjë me mua dhe ne,” tha Millanoviq.

“Sidoqoftë, kur shikon se ku ishte Serbia në vitet 1990, çfarë ishte potenciali i saj, niveli i industrializimit, arsimit, traditës industriale, atëherë ata duhet të ishin më të zhvilluar se Rumania. Sot, ata janë dy herë më të pazhvilluar sesa Rumania dhe më shumë se dy herë më shumë sesa Kroacia”, u tha Millanoviq, gazetarëve të premten në Pozhegë.

Millanoviq tha se këto janë fakte, pra shifra.

“Gjithçka tjetër është një paradë. Si ky me Rafalet që do të blejë Serbia në fund, siç blen sisteme kundërajrore franceze, si dhe ato kineze dhe ruse të klasit të parë, ndoshta më të mirat në botë. Ne i kemi asnjë prej tyre, pra e kemi këtë fuqi të Serbisë, e cila po armatoset, por në fakt po armatoset për një javë të një lufte fiktive që nuk do të shpërthejë kurrë”, tha presidenti kroat.

Në fund të vitit 2021, Kroacia bleu dymbëdhjetë Rafales të përdorura për 1.13 miliardë euro. Gjashtë të parat kanë ardhur në fund të prillit të këtij viti, ndërsa të tjerat priten në fillim të vitit 2025, kujton Hina.

Pas vizitës që presidenti francës, Emmanuel Macron ka realizuar në Serbi dhe pas marrëveshjes për shitjen e aeroplanëve luftarakë, ka reaguar deputetja britanike Alice Kearns.

Në një postim në platformën “X”, Kearns ka ngritur një paralele mes dy vizitave të ndryshme.

Ajo ka thënë se ish-kreu i diplomacisë britanike, David Cameron, në fillim të vitit  shprehu përkrahje për Kosovën pas sulmit të Banjskës në emër të Mbretërisë së Bashkuar. Tutje ajo thekson se në anën tjetër presidenti francez gjatë vizitës në Serbi, po i shet Vuçiqit aeroplanë luftarakë .

“Lord Cameron në Kosovë në fillim të këtij viti, u zotua për mbështetjen e Mbretërisë së Bashkuar pas sulmit në Banjskë shtatorin e kaluar. Presidenti Macron në Beograd këtë javë, duke i shitur avionë luftarakë presidentit Vuçiq”, ka shkruar ajo.