Publikohet audio-incizimi rreth skandalit seksual të kryetarit të komunës me një nga punonjëset

Një skandal seksual ka përfshirë kryetarin aktual të Komunës së Novobërdës, Sasha Millosheviq.

Emisioni Debat Plus ka publikuar disa audio-incizime, që dëshmojnë rastin, ku dëgjohen biseda nga momentet intime me një nga punonjëset e komunës.

Sipas materialit të transmetuar të mërkurën në Debat Plus, incizimet janë censuruar për përmbajtjen eksplicite, por në to dëgjohen edhe fjalë fyese dhe ofenduese ndaj zyrtarëve në Beograd, si dhe përmendje e veprimeve të tjera të dyshimta e të paligjshme.

Ngjarja ka ndodhur në ambientet e zyrës së kryetarit.

Derisa Millosheviq ende nuk është deklaruar publikisht për incizimet.

Reagim i fortë i Osmanit ndaj Vuçiqit: “Në vend që të frikësojë fqinjët, le të mësojë bashkëpunimin me NATO-n”

Presidentja e vendit, Vjosa Osmani, i ka reaguar presidentit serb, Aleksandar Vuçiq, i cili e sulmoi Turqinë, pasi Kosova pranoi mijëra dronë kamikaz nga ky shtet.

Osmani tha se në të njëjtën ditë kur presidenti i Shteteve të Bashkuara të Amerikës, Donald Trump e lavdëroi Turqinë dhe Erdoganin për udhëheqjen në promovimin e paqes dhe sigurisë globale, Vuçiqi “pa turp po e sulmon Turqinë, një vend që si anëtare e NATO-s, po na ndihmon në mbrojtjen e paqes”.

“Jam krenare që kam punuar ngushtë me Presidentin Erdogna, një njeri fjale, që gjithmonë ka treguar kujdes të thellë dhe të sinqertë për të gjithë popujt e rajonit tonë, dhe që ka dhënë një kontribut të jashtëzakonshëm në ruajtjen e stabilitetit, sigurisë dhe paqes”.

“Ndërkohë, Vuçiqi duket se beson se mund të kërcënojë një vend të madh të NATO-s si Turqia, në të njëjtën mënyrë siç kërcënon vendet fqinje. Në vend që të bashkëpunojë ngushtë me shtetet anëtare të NATO-s, ai po e shtyn përpara bashkëpunimin ushtarak me Rusinë, Kinën dhe Iranin”, shkroi Osmani, transmeton Klankosova.tv.

Tutje, e para e shtetit tha se Kosova do të vazhdojë të forcojë lidhjet me aleatët e NATO-s, duke modernizuar kapacitetet mbrojtëse sipas standardeve të NATO-s, për të siguruar paqe dhe stabilitet për popullin dhe për të kontribuar në mënyrë aktive në sigurinë e përgjithshme.

“Vuçiqi duhet të përpiqet të bëjë të njëjtën gjë, në vend që të sulmojë vazhdimisht fqinjët e tij. Por, për mendësinë e tij hegjemone, të mbetur në të kaluarën dhe të fiksuar pas frikësimit të të tjerëve, një pjekuri e tillë duket e paarritshme”.

“Faleminderit, Presidentit Erdogan dhe popullit vëllazëror të Turqisë që na ndihmoni të mbrojmë paqen dhe që gjithmonë qëndroni pranë popullit të Kosovës”, shkroi Osmani.

Suspendohet zyrtari policor, kjo është arsyeja

Hetuesit e  Departamentit të Hetimeve kanë pranuar mbrëmë një informacion për një incident në Kaçanik.

IPK njofton se hetuesit e IPK-së kanë dalë në vendin e ngjarjes dhe kanë filluar të ndërmarrin veprime hetimore lidhur me këtë rast pasi që dyshohet se gjatë arrestimit të një të dyshuari ka tejkalime të autorizimeve policore gjatë përdorimit të forcës nga një zyrtar policor.

“Hetimet janë duke u zhvilluar në drejtim të veprës penale “Keqtrajtimi gjatë ushtrimit të detyrës zyrtare ose autorizimeve publike” kurse pas konsultave me prokurorinë rasti  do të trajtohet në procedurë të rregullt”, thuhet në njoftim.

Bazuar në autorizimet ligjore të IPK-së dhe në interes të hetimit IPK ka rekomanduar suspendimin e këtij zyrtari policor, konfirmon IPK.

Tentim vrașja ndaj mjekut të njohur shqiptar merr kthesë të papritur – arrestohet gruaja e tij si e dyshuar kryesore

Policia ka arrestuar bashkëshorten e mjekut nga Kumanova, Zekirija Shahini, i cili u plagos para disa ditësh në një sulm të armatosur në qendër të Kumanovës. Ajo dyshohet se është e përfshirë në tentativën për vrasjen e tij.

Nga Ministria e Punëve të Brendshme njoftojnë se 43-vjeçarja nga Tetova është ndaluar nga njësiti policor i Kumanovës, ndërsa gjashtë persona të tjerë janë thirrur për intervistim në lidhje me rastin. Po ashtu, me urdhër të gjykatës është kryer bastisje në shtëpinë e një 50-vjeçari nga Kumanova.

“Pas dokumentimit të plotë të rastit, kundër të arrestuarës do të parashtrohet kallëzim penal për tentativë vrasjeje. Ndërkohë, po kërkohet edhe një 36-vjeçar nga Gostivari, i dyshuar si autor i të shtënave ndaj mjekut Shahini, i cili gjendet në arrati”, bëjnë të ditur nga MPB.

Mjeku Zekirija Shahini, që është kandidat për këshilltar në komunën e Likovës, u qëllua me armë nga person i maskuar më 6 tetor, ndërsa ndodhet jashtë rrezikut për jetë pas trajtimit mjekësor në Spitalin e Kumanovës.

Zbulohet emri i parë, ky është këngëtari që do të hyjë në ‘Big Brother VIP Kosova 4’?

Mentor Haziri, rokeri i njohur nga Ferizaj, mund të jetë një nga emrat që do t’i bashkohet sezonit të katërt të spektaklit më të komentuar televiziv në Kosovë, “Big Brother VIP Kosova”. Pas një periudhe të gjatë në skenën muzikore, ai po përgatitet për një rikthim të fuqishëm, këtë herë përmes ekranit, duke ngjallur kuriozitetin e publikut.

Me një karrierë të suksesshme, Haziri është bërë i njohur për hitet e tij si “Engjëll”, “Mundohem ta harroj” dhe “Diçka”. Stili i tij unik dhe energjia rock e kanë bërë atë të veçantë në skenën muzikore shqiptare. Tani, ai ka mundësinë të sfidojë vetveten në një ambient krejtësisht ndryshe, përballë kamerave 24 orë në ditë.

Burime pranë produksionit kanë konfirmuar se edicioni i ri i “Big Brother VIP Kosova” do të nisë në fund të nëntorit, duke ofruar një kast të pasur me personazhe të njohur nga fusha të ndryshme të artit dhe showbizit. Ky sezon pritet të sjellë shumë surpriza dhe dinamika të reja për publikun.

Nëse lajmi për pjesëmarrjen e Mentor Hazirit konfirmohet, hyrja e tij në shtëpi do të sjellë një atmosferë të veçantë. Me karakterin e tij rebel dhe karizmën që e ka shoqëruar gjithmonë, publiku mezi pret të shohë se si do të përshtatet ai me lojën, sfidat dhe rivalitetet që e karakterizojnë këtë format të njohur televiziv.

Mentor Haziri ka një histori të pasur në muzikë, por tani ai do të përballet me një sfidë të re. Si do të reagojë ai ndaj situatave të paparashikuara dhe tensioneve që krijohen brenda shtëpisë? Kjo është një pyetje që shumë fansa po e bëjnë, duke pritur me padurim të shohin se si do të zhvillohet aventura e tij.

Me një audiencë të madhe dhe një ndjekje të fortë, pjesëmarrja e Hazirit në “Big Brother VIP” do të sjellë një rritje të interesit për spektaklin. Ai ka një bazë të fortë fansash që do ta mbështesin, por gjithashtu do të ketë rivalë të fortë që do të përpiqen ta sfidojnë atë.

Me fillimin e sezonit të ri, pritet që “Big Brother VIP Kosova” të sjellë një përzierje të emocioneve, dramës dhe surprizave. Mentor Haziri, me karrierën e tij të pasur dhe personalitetin e tij të fortë, do të jetë një nga faktorët kryesorë që do të ndikojnë në dinamikën e shtëpisë.

Si do të përfundojë aventura e tij në “Big Brother”? A do të arrijë të fitojë zemrat e publikut dhe të bëhet një nga personazhet më të dashur të këtij sezoni? Të gjitha këto pyetje do të gjejnë përgjigje në ditët në vijim, ndërsa ne presim me padurim fillimin e spektaklit.

Tragjike në Gjakovë, 19-vjeçari humb jetën pas 14 ditësh luftë për jetë nga plagët e marra në aksident

Një ngjarje e rëndë ka tronditur sot Gjakovën.

Më 8 tetor 2025, rreth orës 13:45, nga QKUK-ja është njoftuar se Emiriton Kryeziu, 19-vjeçar, ka ndërruar jetë, pas 14 ditësh luftë për jetë, si pasojë e plagëve të marra në aksidentin e rëndë që kishte ndodhur më 24 shtator 2025, në lagjen Brekoc të qytetit, përballë varrezave.

Ngjarja kishte ndodhur rreth orës 22:00, kur Qazim Morina, duke drejtuar automjetin Opel Zafira, nuk kishte përshtatur shpejtësinë me kushtet e rrugës dhe kishte humbur kontrollin mbi veturën, e cila kishte dalë nga rruga dhe ishte përplasur fillimisht në shtyllë elektrike, e më pas në mur betoni.

Si pasojë e përplasjes së fuqishme, tre persona kishin pësuar lëndime të rënda: Emiriton Kryeziu – i cili sot ndërroi jetë në QKUK, F.K. dhe E.B. – të cilët kanë marrë lëndime trupore dhe janë trajtuar në spital.

Nga aksidenti janë shkaktuar edhe dëme të konsiderueshme materiale në automjet, si dhe në pronë publike dhe private.

Me urdhër të Prokurorit kujdestar, trupi i pajetë i viktimës është dërguar për autopsi në IML – Prishtinë, ndërsa rasti po hetohet nga njësitet kompetente të Policisë së Kosovës.

Policia nuk i lejon hyrjen në Kosovë këngëtares serbe e ftuar nga Lista Serbe për koncertin në veri

Policia e Kosovës nuk i ka lejuar hyrjen në Kosovë, këngëtares serbe me prirje pro-ruse, Andela Ignjatovic, e cila ishte planifikuar të marrë pjesë në një koncert të organizuar nga Lista Serbe në veri të Mitrovicës.

Burime të Tëvë1, kanë bërë të ditur se ajo është kthyer në pikën kufitare në Jarinjë.

Vendimi për të ndaluar hyrjen e saj në territorin e Kosovës siç mëson Teve1 është marrë nga Ministria e Punëve të Brendshme.

Fluturim deri në 36 minuta dhe rreze veprimi deri në 10 km – veçoritë kryesore të dronëve “SkyDagger 15” që u furnizua Kosova sot

Forca e Sigurisë së Kosovës është pajisur sot me kontigjentin e mijëra dronëve luftarakë kamikazë “SKYDAGGER RTF 15” të cilët kanë arritur sot në Aeroportin Ndërkombëtar të Prishtinës “Adem Jashari”.

Këta dronë janë prodhim i Turqisë dhe kontrata për blerjen e tyre ishte bërë në dhjetor të vitit të kaluar me kompaninë e mirënjohur turke “Baykar”.

Por cilat janë specifikat e këtyre dronëve dhe pse janë të rëndësishëm?

“SKYDAGGER RTF 15″ shquhet si një pajisje me performancë të lartë, e dizajnuar për të përmbushur nevojat e misioneve profesionale, qoftë në monitorim, shpërndarje ose përdorim të specializuar.

Ky dron kombinon shpejtësi, stabilitet dhe kapacitet ngarkese, duke ofruar një zgjidhje të besueshme për operacione të ndryshme ajrore.

“SKYDAGGER RTF 15″ ofron një kohë maksimale fluturimi prej 36 minutash, duke e bërë të përshtatshëm për operacione të zgjatura pa ndërprerje. Kur fluturon me ngarkesë, droni ruan performancën duke ofruar deri në 14 minuta fluturim, ndërsa rrethi maksimal i veprimit arrin deri në 10 km, një distancë e konsiderueshme për misione kërkimi, shpërndarje pajisjesh ose patrullime të largëta.

Me shpejtësi maksimale prej 130 km/h, “SKYDAGGER RTF 15″ garanton lëvizshmëri të shpejtë dhe reagim të menjëhershëm ndaj situatave të ndryshme operative. Kjo e bën ideal për misione urgjente, ku koha është faktor kritik.

Një nga avantazhet kryesore të këtij droni është kapaciteti i ngarkesës, që arrin deri në 5 kg.

Kjo mundëson transportimin e pajisjeve, materialeve ose sensorëve të ndryshëm, duke e shndërruar “SKYDAGGER RTF 15″ në një zgjidhje të gjithanshme për nevoja të shumta operative.

Droni mund të përdoret edhe për një gamë të gjerë aplikimesh profesionale, duke përfshirë: Monitorim dhe mbikëqyrje të zonave të largëta, shpërndarje të materialeve të lehta në distanca të konsiderueshme, operacione kërkim-shpëtimi dhe kontroll dhe inspektim teknik i infrastrukturës kritike. /Telegrafi

Dronët kamikazë në Kosovë – ‘tmerrohet’ Vuçiq akuzon Turqinë: Po e destabilizon Ballkanin me armatosjen e Kosovës

Kosova ka pranuar të mërkurën kontejnerët “me mijëra dronë” luftarakë kamikazë, Skydagger, njoftoi kryeministri në detyrë, Albin Kurti.

Kurti tha në Facebook se dronët kanë mbërritur para afatit të paparaparë kohor dhe se dhjetëra ushtarakë të Forcës së Sigurisë së Kosovës (FSK) tashmë janë trajnuar për përdorimin e tyre.

Por lidhur me këtë ka reaguar presidenti i Serbisë, Aleksandër Vuçiq.

Vuçiq e ka kritikuar Turqinë, duke thënë se është i tmerruar nga sjellja e këtij vendi dhe ka konsideruar se ai e ka shkelur Kartën e Kombeve të Bashkuara dhe Rezolutën 1244 të Këshillit të Sigurimit të OKB-së.

“Tani është plotësisht e qartë se Turqia nuk dëshiron stabilitet në Ballkanin Perëndimor dhe është duke ëndërruar sërish për ringjallje të Perandorisë Osmane. Serbia është shtet i vogël, por ne i kuptojmë synimet e tyre reale”, ka thënë presidenti serb përmes një postimi në X.

Radio Evropa e Lirë u është drejtuar autoriteteve turke për koment dhe është në pritje të përgjigjes.

Skydagger RTF është dron “i gatshëm për fluturim”, shpesh edhe dron luftarak, i pajisur me një mjet shpërthyes për përdorim kundër shënjestrave të palëvizshme dhe të lëvizshme, megjithëse ka edhe aplikime profesionale si vëzhgimi dhe kërkim-shpëtimi.

RTF nënkupton se droni është plotësisht i montuar dhe përfshin të gjitha komponentët e nevojshëm, si vetë droni, një transmetues radioje, një marrës dhe bateritë, duke e bërë atë të gatshëm menjëherë për fluturim sapo të blihet.

Ky dron mund të fluturojë me një shpejtësi maksimale prej 130kmh në largësi maksimale deri në 10 kilometra.

“Serbinë e kemi armik të përhershëm, Albin Kurtin armik të përkohshëm”

Gazetari dhe analisti Vehbi Kajtazi ka reaguar pas deklaratës së kryeministrit Albin Kurti për ardhjen e “mijëra dronëve kamikazë nga Turqia” në Kosovë. Për Kajtazin, kjo deklaratë është jo vetëm manipuluese, por edhe shenjë e një qasjeje të rrezikshme të Kurtit ndaj shtetit dhe aleatëve ndërkombëtarë.”

Ai thotë se Kurti është “uzurpator i shtetit” dhe se përdorë shifra të paqarta për të mashtruar opinionin publik.
“Shifra mijëra është manipuluese, pra e rrejshme. Mijëra nënkupton nga 1 mijë deri në 999 mijë. Por, ai thotë ‘mijëra dronë’ pa e përcaktuar numrin sepse këtë e han popullata analfabete funksionale prej 45 për qind, siç e cilësonte ai gati gjysmën e popullsisë së Kosovës”, shkruan Kajtazi.

Ai e quan Kurtin të certifikuar si “antiamerikan”, duke shtuar se pavarësinë dhe sigurinë e Kosovës e garanton SHBA, jo qeveria aktuale.
“Lirinë, pavarësinë, na e solli Amerika. Sigurinë na e garanton Amerika. Edhe sot kur erdhën dronët, kufirin me Serbinë na e ruan Amerika. Hapësirën ajrore të Kosovës e kontrollon Amerika nëpërmjet NATO-s. Pra, nëse Amerika të cilën e lufton Kurti, do të donte, Kosova këta dronë do t’i mbante në magazina”, thekson më tej ai.