Kupchan: Manovrat në veri i shërbejnë Kurtit, e jo Kosovës

Charles Kupchan, ish-drejtor i çështjeve evropiane në Këshillin e Sigurisë Kombëtare të SHBA-së, beson se veprimet e Qeverisë së Kosovës në veri të vendit, janë të motivuara nga politika e brendshme, përpara zgjedhjeve të shkurtit, por thekson se ato janë të rrezikshme për Kosovën.

Të premten e kaluar, Qeveria e udhëhequr nga Albin Kurti mbylli disa institucione paralele serbe në veri të vendit.

Aksioni nxiti reagimin e NATO-s, Bashkimit Evropian, Shteteve të Bashkuara dhe vendeve të tjera perëndimore, të cilat e cilësuan si “të pakoordinuar” me aleatët perëndimorë dhe me rrezik për sigurinë.

“Për mua, këto janë gjeste dhe manovra në nivel të politikës së brendshme, të cilat mund të jenë të mira për fatin politik të [kryeministrit Albin] Kurti, por nuk janë të mira për Kosovën”, thotë Kupchan për Radion Evropa e Lirë.

Sipas tij, Kosova duhet ta balancojë ushtrimin e sovranitetit me synimin për t’i normalizuar marrëdhëniet me Serbinë dhe për t’u bërë vend anëtar i BE-së dhe NATO-s.

I pyetur rreth kritikave të ashpra të ndërkombëtarëve karshi Qeverisë, pas mbylljes së disa institucioneve paralele serbe në veri, veçanërisht pasi SHBA-ja tha se ky veprim pasqyron “përkeqësimin e marrëdhënieve tona”, Kupchan tha:

“Mendoj se është veçanërisht shqetësuese, sepse vjen pas një sërë hapash që ka ndërmarrë Qeveria e Kurtit – prej se ka ardhur në pushtet – e që kanë penguar dialogun me Serbinë dhe kanë rrezikuar marrëdhëniet me Shtetet e Bashkuara dhe Bashkimin Evropian.

Qoftë ndalimi i përdorimit të dinarit, qoftë detyrimi për ndryshimin e targave, përpjekja për hapjen e urës së Ibrit, përpjeka e njëanshme për t’i instaluar kryetarët e komunave në veri, edhe pse janë zgjedhur nga një pakicë e vogël votuesish, apo tani mbyllja e këtyre institucioneve paralele… këta nuk janë hapa të dobishëm.

Por, tani që zgjedhjet në Kosovë janë shpallur për muajin shkurt, mendoj që Kurti po pozicionohet për t’ia dalë mirë në atë proces.

E dimë se kudo në botë, por sidomos në Ballkan, nacionalizmi funksionon mirë.

Unë mendoj se Kurti po e bën pikërisht këtë. Por, sipas vlerësimit tim, është dritëshkurtër, sepse e minon mbështetjen e Kosovës në bashkësinë ndërkombëtare dhe nuk ndihmon për ta çuar përpara dialogun me Serbinë – përkundrazi, e kthen prapa.

Për mua, këto janë gjeste dhe manovra në nivel të politikës së brendshme, të cilat mund të jenë të mira për fatin politik të Kurtit, por nuk janë të mira për Kosovën”, ka deklaruar ai.

Rriten pagat në 400 euro për këtë kategori

Punëtorët teknikë dhe ata të sigurimit fizik të shkollave të Prishtinës, nga tetori do t’i marrin pagat me rritje për 130 euro.

Kryetari i Sindikatës së Sektorit Privat të Kosovës, Jusuf Azemi, ka thënë se Komuna e Prishtinës ua ka plotësuar 95 për qind të kërkesave të tyre, ndërsa pagat e punëtorëve teknikë nga muaji i ardhshëm do të jenë 400 euro bruto.

Kurti uron nxënësit: MASHTI u kujdes që ky vit i ri shkollor të fillojë mbarë

Kryeministri i Republikës së Kosovës, Albin Kurti, ka uruar nxënësit me rastin e fillimit të ri shkollor

Në një postim në rrjetin social Facebook, Kurti ka thënë se Ministria e Arsimit, Shkencës, Teknologjisë dhe Inovacionit është angazhuar dhe kujdesur që ky vit i ri shkollor të fillojë mbarë.

Ai po ashtu ka përmendur edhe subvencionimin e teksteve dhe mjeteve shkollore për nxënësit nga klasa e parë deri të nëntën dhe rritjen e shtesave për fëmijët deri në moshën 16-vjeçare.

“Edhe këtë vit, po bëjmë subvencionimin e teksteve shkollore dhe materialeve mësimore për nxënësit nga klasa e parë (I) deri në klasën e nëntë (IX), ndërkohë që nga muaji gusht i kemi rritur shtesat për fëmijët deri në moshën 16 vjeç përmes së cilave po ofrojmë mbështetje të vazhdueshme të shtetit ndaj fëmijëve dhe familjeve”, shkroi kryeministri Kurti

Fillimi i vitit të ri shkollor, Haxhiu: Le të jetë ky vit i mbushur me arritje, ngritje e frymëzim

Ministrja e Drejtësisë, Albulena Haxhiu, u ka uruar fillimin e vitit të ri shkollor të gjithë fëmijëve dhe mësuesve.

Përmes një postimi në Facebook, Haxhiu ka shkruar se në rrugëtimin e fëmijëve, roli i prindit mbetet i pa zëvendësueshëm në këtë proces.

“Sot hapet një kapitull i ri plot me mundësi për të mësuar dhe për të arritur ëndrrat të gjithë fëmijët tanë. Viti i ri shkollor sjell përherë entuziazëm për nxënësit, prindërit dhe familjet, sepse rifillon një proces i edukimit, arsimimit, dhe zhvillimit më të madh të aftësive të më të dashurve tanë. Në rrugëtimin e fëmijëve, roli i prindërit në këtë proces mbetet i pa zëvendësueshëm, në mënyrë që fëmijët të kenë një vit pa dyshim të suksesshëm. Le të jetë ky vit i mbushur me arritje, ngritje dhe frymëzim për të gjithë!”, thuhet në postimin e Haxhiut.

Po ashtu, ministrja ka uruar posaçërisht mësuesit, teksa i ka vlerësuar si forcë që udhëheq brezat e rinj drejt suksesit.

Qindra serbë mblidhen për të protestuar në veri

Afër 300 qytetarë serbë u tubuan para një objekti që ishte përdorur nga komuna paralele serbe në Mitrovicë të Veriut më 2 shtator, duke thënë se po përpiqen që të kthehen në punë.

Personat që protestuan të hënën ishin punonjës të administratës të komunës paralele serbe në këtë komunë.

Tubimi vjen disa ditë pasi autoritetet e Kosovës mbyllën pesë institucione paralele serbe në veri të Kosovës, përfshirë komunën paralele të Mitrovicës, duke thënë se këto institucione po punonin nën udhëheqjen e Serbisë, duke e “cenuar kushtetutshmërinë dhe ligjet e Republikës së Kosovës”.

Në mesin e të plagosurve në Prishtinë janë dhe dy të rinj

Mbrëmë, Prishtina u trondit nga një incident i armatosur mes dy grupeve, ku si pasojë një person mbeti i vrarë dhe pesë të tjerë u plagosën.

Në mesin e të plagosurve janë një 21 dhe 29 vjeçar, por që janë jashtë rrezikut për jetë.

Vrasja dhe plagosja në Prishtinë/ Çitaku: Bandat kriminale kanë marrë zemër, Qeveria është dorëzuar

Sekretarja e Përgjithshme e Partisë Demokratike të Kosovës (PDK), Vlora Çitaku, ka reaguar pas incidentit të fundit të ndodhur mbrëmë në Prishtinë, ku pas shumë të shtënave me armë zjarri, mbeti i vrarë një person dhe pesë të tjerë u plagosën.

Çitaku ka theksuar se në vend janë forcuar bandat kriminale dhe ka pyetur se ku janë ministri i Brendshëm dhe ajo e Drejtësisë, duke shtuar se kjo është dorëzim.

Sipas saj, Qeverisja e tyre është reduktuar në propagandë.

“Bandat kriminale kanë marrë zemër. Terror, vrasje, plaçkitje, ikje nga burgjet.  Ku është dora e shtetit? Ku është Ministri i Punëve të Brendshme? Ku është Ministrja e Drejtësisë?  Kjo është dorëzim. Qeverisje e reduktuar në propagandë”, ka shkruar ajo në rrjetin social Facebook.

Imer Imeri paraqitet si viktimë në Speciale: S’jam kundër UÇK-së, por veprat e disave me sollën këtu

Imer Imeri, mbështetës i LDK-së gjatë luftës është dëshmitari i radhës që po dëshmon në Gjykatën Speciale në Hagë, në procesin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit.

Ai tha se do që t’i tregojë popullit se nuk është kundër UUÇK-së por se veprat e disa individëve e kanë çuar të dëshmojë në Hagë.

Atij iu paraqitën fotografi. Ai i shënjoi disa prej tyre për të cilat tha se ishin vendet ku ai ishte mbajtur i ndaluar e ishte keqtrajtuar.

“Në këtë vend isha i burgosur prej 12 prillit 1999 deri me 20-22 qershor 1999. Ky vend quhet Cahan i Kurmes. Këtu përpara si duket është një derë e vogël, e dyta është dera e hyrjes. Mbi derë të hyrjes ishte dritarja ku kam ndejtë unë prej 12 prill deri me 20-22 qershor”, tha Imeri.

Imer Imeri po merret në pyetje nga prokurorja e Zyrës së Prokurorit të Specializuar, Vega Iodice.

Prokuroria pretendon se Imeri ishte rrëmbyer nga anëtarët e UÇK-së me maska dhe ishte mbajtur i ndaluar në Shqipëri, ku, siç thotë Prokuroria, “e kanë rrahur ushtarët e UÇK-së” dhe “ka parë se si janë keqtrajtuar persona të tjerë që kanë qenë të ndaluar ma të”.

Imer Imeri është vëllai i aktivistit të LDK-së, Haki Imeri i cili ishte vrarë në nëntor të vitit 1999

Rrugët e përgjakura: Tre të vdekur vetëm dje nga aksidentet në Kosovë

Tre persona kanë humbur jetën gjatë 24-orëve të fundit si pasojë e aksidenteve në trafik.

Policia ka njoftuar se përveç tri aksidenteve me pasoja fatale kanë ndodhur edhe 23 të tjera me persona të lënduar dhe 15 me dëme materiale.

Aksidentet me persona të vdekur kanë ndodhur në Komoran, Lipjan dhe Rahovec, transmeton IndeksOnline.

Njoftimi i policisë për tri aksidentet fatale:

AKSIDENT TRAFIKU ME FATALITET

Rr. “Nazmi Gashi”, Komoran/01.09.2024 – 13:30. Raportohet për një aksident trafiku ku janë përfshirë dy vetura me drejtues një mashkull kosovar dhe një femër kosovare dhe një motoçiklisti mashkull kosovar. Si pasojë e aksidentit drejtuesi i motoçikletës ka ndërruar jetë, vdekja e të cilit është konstatuar në QKUK. Me urdhër të prokurorit trupi i pajetë i viktimës është dërguar në obduksion ndërsa drejtuesi i njërës nga veturat e përfshira në aksident i dyshuari kosovar është arrestuar dhe është dërguar në mbajtje.

Raport shtesë:

AKSIDENT TRAFIKU ME FATALITET

Rr. “Ibrahim Rugova”, Lipjan / 31.08.2024 – 18:30. Raportohet se më 01.09.2024 në QKUK Prishtinë ka ndërruar jetë viktima mashkull kosovar i cili ishte duke u trajtuar si pasojë e lëndimeve në aksident trafiku. Me vendim të prokurorit trupi i pajetë është dërguar në IML për obduksion.

AKSIDENT TRAFIKU ME FATALITET

Fshati Celinë, Rahovec / 22.08.2024 – 14:18. Raportohet se më 01.09.2024 në QKUK Prishtinë ka ndërruar jetë viktima mashkull kosovar, i cili ishte duke u trajtuar si pasojë e lëndimeve në aksident trafiku. Me vendim të prokurorit trupi i pajetë është dërguar në IML për obduksion.

Bajqinovci reagon për vrasjen në Prishtinë, e akuzon krejt sistemin e drejtësisë

Deputeti i LVV-së Mefail Bajqinovci ka reaguar pas vrasjes së mbrëmshme në lagjen Aktash në Prishtinë.

Bajqinocvi në llogarinë e tij në “Facebook” ka shkruar se është shqetësuese se si personat që i sekuestrohet arma përfundojnë në procedurë të rregullt në gjykata.

Kjo sipas tij kjo është një dështim i çartë i drejtësisë në trajtimin e armëmbajtjes pa leje dhe përdorimit të tyre.

Ai ka thënë shumë njerëz bartin armë pasi dinë që nuk përfundojnë në burg, kurse kërkon nga sistemi i drejtësisë që të reagojnë më seriozitet në raste të tilla për të mbrojtur jetët e qytetarëve.

“Është shqetësuese kur shohim se personave që ju sekuestrohen armët nga policia përfundojnë në gjykata në procedura të rregullta, askush nuk burgoset dhe dënimet janë me të holla. Kjo politikë ndëshkimore është një sinjal i qartë i dështimit të sistemit tonë të drejtësisë në trajtimin e armëmbajtjes pa leje dhe përdorimit të tyre. Andaj edhe vrasjet, tentim vrasjet rriten sepse askush nuk ka frikë për të bartur armë. Nëse ligjet nuk zbatohen me rreptësi dhe ata që kapen me armë ilegale marrin dënime të buta, kjo krijon një kulturë pandëshkueshmërie që vetëm sa shton rrezikun për sigurinë tonë. Sot shumë njerëz që bartin armë pa leje e din që nuk përfundojnë në burg por dënohen me të holla. Sistemi i drejtësisë duhet të reagojë me seriozitetin e duhur për të mbrojtur jetën dhe sigurinë e qytetarëve tanë!”, ka shkruar Bajqinovci.