VV dhe Nisma drejt koalicionit – ja çfarë thotë Limaj

Kryetari i Nismës Socialdemokrate, Fatmir Limaj, ka paralajmëruar se arritja e një koalicioni mes partisë së tij dhe Vetëvendosjes mund të bëhet së shpejti. Paralajmërimi i tij vjen dy ditë pasi Kurti tha se është shumë i interesuar për të bashkëqeverisur me Limajn.

Limaj pasi u pyet lidhur me deklaratat e kryeministrit në detyrë, njëherit kreut të VV’së, Albin Kurti, për takimet që kanë pasur mes vete, tha se beson se së shpejti do të krijohet shumica parlamentare, shkruan Reporteri.net.

“E vetmja rrugë është shumica parlamentare siç ka ndodhur çdo herë në Kosovë. Partia e parë duhet ta ketë shumicën parlamentare në Kuvend për me mujt me i shty agjendat e tyre përpara edhe me zgjedhjen e Kryetarit të Kuvendit ,edhe me Qeverinë. Besoj që Kosova do ta ketë shumicën parlamentare shpejt”, tha Limaj duke qeshur, teksa u largua nga konferenca.

Ai tha se Nisma do ta jap kontributin e saj për dalje nga ngërçi.

“Nisma ka dhënë dhe do ta jap kontributin krejt çka i takon me tejkalu krizën instutcionale në vendin tonë”, tha Limaj.

Kurti para dy ditësh ka konfirmuarse ka pasur disa takime me Limajn. Ai tha se kanë dështuar të arrijnë marrëveshje, shkaku i një parakushti të Limajt që ta kenë pozitën e Kryeparlamentarit.

Ai shprehu interesim për një koalicion me Limajn, në këmbim të ministrive.

“Unë jam shumë i interesuar që të bashkëqeverisim, pra që ata të kenë Ministri në Qeveri”, tha Kurti.

Sipas tij, një parti me tre deputetët s’mund ta ketë pozitën e Kreut të Kuvendit.

“Unë kam pasur takime me Kryetarin e Nismës Socialdemokrate. Takimet kanë kaluar në një atmosferë ku është rritur besimi, ku është rritur mirëbesimi, vullneti për të bashkëpunuar, mirëpo nuk ka pasur marrëveshje. Thjeshtë për shkak të insistimit për shkak të një parakushti për bashkëpunim në të ardhmen për pozitën e Kryeparlamentarit. Një partie me 3 deputetë t’ia japim Kryeparlamentarin, kur e kam koalicionin me një parti që e ka dyfishin e deputetëve…nuk ishte një gjë e mundur”, deklaroi Kurti në RTK.

Ai tha se është lajm që Limaj është kthyer në Kuvend, teksa shtoi se AAK-ja e kaloi pragun falë tij.

“Është lajm që Fatmir Limaj, Komandant “Çeliku” është kthyer në Kuvendin e Republikës, që Nisma Socialdemokrate, që do të duhej të jetë parti simotër me VV-në i ka 3 deputetët në Kuvendin. Le të mos harrojmë, jo vetëm që u kthye Fatmir Limaj në Kuvendin e Republikës, por njëkohësisht ia mundësoi AAK-së ta kalojë pragun. Pa Nismën, AAK-ja kësaj radhe do të ngelej nën prag”, deklaroi Kurti.

Këto vende do të mbesin pa rrymë sot

Kompania për Distribuimin e Energjisë Elektrike në Kosovë (KEDS) bën të ditur se sot, do të kryhen punime të domosdoshme për siguri të sistemit energjetik.

Si rezultat i kësaj, në disa lokalitete do të ketë ndërprerje të rrymës.

Ky është orari sipas rajoneve:

Prishtinë:
Punime në projekte investive

1.
Nga NS 220/10kV Drenasi do të ndërprehet:

Dalja 10kVJ 28 Llapushnik (kodi: 16100028) nga ora 09:00 deri 17:00

Vendet: Llapushnik, Orllat, Negroc, Vuqak, Divjakë, Xhurgjicë, Shkolla Llapushnik, Kleqkë e re, Berishë dhe Tërpezë.

Arsyeja: Punime sipas projektit investiv, vendosja e përçuesit dhe izolatorëve në linjën ekzistuese.

Punime nga pala e tretë

1.
Nga NS 220/10kV Drenasi do të ndërprehet:

Dalja 10kV J03 Baicë (kodi: 16100008) nga ora 07:00 deri 08:00

Vendet: Baincë, Abri, Tërdevc dhe Damanek.

Arsyeja: Lidhja e urave për energjizimi i TSSH Ekrem Elshani.

Punime nga KOSTT-i

1.
Nga NS 110/10(20) kV Prishtina 2 do të nderprehet:

TR 3 (11000) pa tension mbeten të gjitha daljet 10 kV qe furnizohen nga TR 3 ,prej orës 12:00 deri në ora 15:00.

Vendet: Dodona, Parku, Banesat Latif Kryeziu, rr.Bajram Curri, rr.1 Tetori, rr.Shaip Kamberi, rr.Robert Gajdiku, rr. 4 Llullat, Afër Ilirisë, rr. Gustav Majer, Hotel Ilira, Diletacioni, rr. Sylejman Vokshi, 4 Llullat, Tuak Bashçja, Vreshtat, Kasollat, Kolovica e Re, Kolovica e Vjetër, Xh.Ibishi,Tophanja, pjesa afër Tjegullores, rr.Vushtrrisë, rr.Ilaz Agushi, Blloku i parë i banesave, Gjimnazi, Shkolla teknike, NEW CO Iliria Hotel”, Gustav Majer 2, Gustav Majer 3, Gustav Majer 4, Gustav Majer 6, Gustav Majer 7, Gustav Majer 8, Gustav Majer, rr.Ibrahim Banushi, rr.Elena Gjika dhe Shtëpia e Pleqëve.

Arsyeja: Mirëmbajtje vjetore.

Pejë:
Punime të domosdoshme për siguri të sistemit

1.
Nga NS 110/10(20)[kV] Istogu do të ndërprehet:

Dalja 10[kV] Kërnina (kodi: 54000006) nga ora 11:00 deri 14:00

Vendet: Dubravë, Veriq, Kërrninë, Padalishtë, Bellopojë, Shushicë dhe Shushicë e Ulët.

Arsyeja: Ndërprerje për siguri, shtrëngimi i përçuesve, pastrimi i trasesë.

Punime në projekte investive

1.
Nga NS 110/10kV Deçani do të ndërprehet:

Dalja 10kV J10 Strellci (kodi: 53000004) nga ora 09:00 deri 17:00

Vendet: Isniq, Lebushë, Strellc i Epërm dhe Strellc i Ulët.

Arsyeja: Projekte investive, vendosja e konzollave, izolatorëve dhe përçuesit në linjën e re dhe demontimi i rrjetit të vjetër.

Prizren:
Punime të domosdoshme për siguri të sistemit

1.
Nga NS 35/10 kV Dragash do të ndërprehet:

Dalja 10kV J08 Bellobrodi (kodi: 30036008) nga ora 10:00 deri 14:00

Vendet: Bellobrad, Brrut, Kapre, Kosavë, Pllajnik, Shajne, Xërxe e Sharrit, Zgatar, Zym i Sharrit, afariste: ILVA” Buqe, restorant Dasma Zym, TS-IPKO dhe Vala.

Arsyeja: Mirëmbajtje preventive, ndërrimi i shtyllave dhe izolatorëve të dëmtuar, shtrëngimi i përçuesve dhe pastrimi i trasesë.

Punime në projekte investive

1.
Nga NS 110/35/10 kV Theranda do të ndërprehet:

Dalja 10 kV J23 Mushtishti (kodi: 32000002) në dy termine nga ora 08:00 deri 08:30 dhe nga ora 13:00 deri 13:30

Vendet: Sopija I, Sopija II, Dubrava, Mushtishti, Savrova, Bukoshi, Vraniqi dhe Baqevci.

Arsyeja: Krijimi i kushteve të punës pa tension, largimi i urave të tensionit të mesëm.

2.
NS 110/35/10 kV Theranda

Nga Dalja 10 [kV] Mushtishti do të ndërprehet:

TS 10/0.4 KV Bukoshi II Baralite (Kodi: 32000002010) nga ora 08:00 deri 13:30

Vendet: Bukosh Baralitë.

Arsyeja: Projekte investive në kuadër të Lot 13-Mushtisht.

Ferizaj:
Punime të domosdoshme për siguri të sistemit

1.
Nga NS 110/35/10kV Lipjani do të ndërprehet:

Dalja 10kV J08 Sllovia (kodi: 41000003) nga ora 10:30 deri 15:00

Vendet: Dobratin, Gushtericë e Poshtme, Livagjë, Sllovi, Smallushë, Çollapek dhe Gllavicë.

Arsyeja: Mirëmbajtje preventive, ndërrimi i shtyllave/izolatorëve të dëmtuar, shtrëngimi i përçuesve dhe pastrimi i trasesë.

Punime në projekte investive

1.
Nga NS 110/35/10 kV Ferizaj 1 do të ndërprehet:

Dalja 10kV J14 Rahovica (kodi: 40000014) nga ora 09:00 deri 18:00

Vendet: Bibaj, Talinoc i Muhaxherëve, Softaj, Pojatë, Papaz, Rahovicë dhe Fusha e Madhe.

Arsyeja: Projekte investive, energjizimi i rrjetit të ri dhe montimi i trafos së re në Projektin Sazli II Kulla!

Mitrovicë:
Punime të domosdoshme për siguri të sistemit

1.
Nga NS 10 kV Shupkovci do të ndërprehet:

Dalja 10kV J06 Shala (kodi: 70000101) nga ora 10:30 deri 15:00

Vendet: Reka, Tunelli i Parë, Kutllofc, Mazhiqi, Rashani, Terstena, Bare, Bajgora, Vidishiqi, Kovaqica, Kaqanolli, Rahova, Boletini, Zhazha, Vllahia, Zijaqa, Maxhera, Melenica, Dedia, Zabërgja, Selaci, si dhe BRRE-SOWI KOSOVO L.L.C. Central me Erë.

Arsyeja: Mirëmbajtje preventive, vendosja e shtyllave dhe pastrimi i trasesë.

Vërejtje! Dalja ka BRRE.

2.
Nga NS 110/10(20) kV Skenderaj do të ndërprehet:

Dalja 10kV J21 Prekazi (kodi: 74000003) nga ora 10:30 deri 14:30

Vendet: Prekaz i Ulët, Prekaz i Epërm, Mikushnicë dhe Lubavec.

Arsyeja: Mirëmbajtje preventive, pastrimi i trasesë, shtrëngimi i përçuesve dhe kontrollimi i transformatorit.

Punime nga pala e tretë

1.
NS 110/10(20) kV Skenderaj

Nga NS 10/0.4 kV Qyteti I do të ndërprehet:

TS 10/0.4kV Shaban Jashari (kodi: 74000009001) nga 11:00 deri 16:00

Vendet: Dëshmoret e Kombit

Arsyeja: Punime sipas pëlqimit elektro-energjetik dhe projektit të aprovuar, ndërrimi i panelit 0.4 kV si dhe lidhja e blindës dhe kthinat në trafon ekzistuese.

Gjakovë:
Punime nga palët e treta

1.
TS 35/10[kV] Gjakova I do të ndërprehet:

TS 10/0.4kV TS-54 (kodi: 80080008215) nga ora 09:00 deri 14:00

Vendet: Carrapatok, një pjesë.

Arsyeja: Punët që duhet të kryhen sipas zgjidhjes teknike – dislokim i kabllove 0.4 kV dhe demontimi i shtyllës së betonit.

2.
Nga NS 35/10 kV Gjakova I do të ndërprehet:

Dalja 10kV J13 Skivjan (kodi: 80080009) nga ora 09:00 deri 12:00

Vendet: fshatrat: Bitesh, Dobrixhë, Dujakë, Firajë, Hereç, Jasiq, Novosellë e Epërme, Novosellë e Poshtme, Osek Hilë(një pjesë), Osek Pashë, Planço dhe Skivjan.

Arsyeja: Punët që duhet të kryhen sipas pëlqimit elektro-energjetik dhe projektit të aprovuar.

31 të rinj nisin kursin e gjuhës shqipe në Sanxhak, Nuraj jep lajmin

31 të rinj nga Sanxhaku janë regjistruar në kursin e gjuhës shqipe, duke shënuar një hap domethënës në ruajtjen e identitetit dhe kulturës kombëtare shqiptare në këtë trevë.

Lajmin e ka bërë të ditur Amina Nuraj, kryetare e zyrës së Këshillit Kombëtar Shqiptar në Sanxhak, e cila ka ndarë emocionet e saj në një postim prekës, përcjell INA.

“Deri më tani, 31 të rinj janë regjistruar në kursin e gjuhës shqipe në Sanxhak. Nuk ka gjë më të mirë se kur punon me zemër për atdheun, gjuhën dhe kulturën tënde! Kur e shikon flamurin tënd me krenari, duke e ditur se nuk e ke shitur kurrë, por se e ke arritur majën me gjak e djersë që ai të valëvitej edhe më shumë mbi Sanxhak.”, ka shkruar Nuraj.(INA)

Tërmet i fuqishëm në Kretë, alarmohet për një cunami

Një tërmet me magnitudë 6.2 ballë goditi mëngjesin e sotëm brigjet verilindore të Kretës, duke tronditur pothuajse gjithë ishullin grek dhe duke shkaktuar përkohësisht alarm për cunami.

Epiqendra e tërmetit u lokalizua rreth 58 kilometra në verilindje të qytetit bregdetar të Eloundës, sipas Shërbimit Gjeologjik të SHBA-së. Tërmeti ndodhi në det të hapur, në orën 03:19 të mëngjesit (me orën lokale), në një thellësi prej 68.9 kilometrash.

Qendra Sizmologjike Euromesdhetare raportoi se ngjarja kryesore u pasua nga disa pasgoditje, përfshirë një lëkundje të fortë pranë bregdetit të Malias. Në Heraklion, lëkundjet u ndjenë të forta dhe zgjatën disa sekonda, ndërsa pasgoditja kryesore u përjetua për afro një minutë.

Autoritetet greke lëshuan menjëherë një alarm për cunami, duke paralajmëruar banorët dhe turistët të qëndronin larg vijës bregdetare, derisa të kalonte rreziku. Deri tani nuk ka raportime për dëme materiale apo të lënduar.

Tërmeti i sotëm vjen vetëm një javë pas një tjetër tërmeti me magnitudë 6.0 ballë që ndodhi në brigjet lindore të Kretës, pranë ishullit Fry. Ekspertët kanë vërejtur një rritje të aktivitetit sizmik në zonën e Egjeut Jugor, përfshirë edhe afërsinë me Santorinin.

Autoritetet vijojnë të monitorojnë situatën, ndërsa sizmologët paralajmërojnë për pasgoditje të mundshme në orët dhe ditët në vijim.

Ekskluzive: Ky është 68 vjeçari që u hodh nga kati i tretë në spitalin e Mitrovicës së Veriut

Gazeta Sinjali raportoi më parë për një ngjarje tragjike që ka ndodhur mbrëmë në Spitalin Rajonal të Mitrovicës së Veriut, ku një pacient ka humbur jetën pasi është hedhur nga kati i tretë i objektit spitalor.

Sinjali mëson se rasti është raportuar më 21 maj 2025, rreth orës 23:30, kur Policia e Mitrovicës Veri është njoftuar nga sigurimi spitalor për një incident të rëndë brenda klinikës.

Sinjali mëson ekskluzivisht se viktima quhetLjubi Miho Bakmaz, 68 vjeçar, ku njësitë relevante kanë dalë në vendin e ngjarjes, ku kanë konstatuar vdekjen e një pacientit.

Sipas deklaratës së doktoreshës Bojana Bojković, ngjarja ka ndodhur në repartin e internos. Ajo ka treguar se gjatë vizitës në një dhomë tjetër, ka dëgjuar hapjen e një dritareje dhe kur është afruar në dhomën përballë, ka parë viktimën duke u hedhur nga një lartësi prej rreth 15 metrash.

Personeli mjekësor ka ndërhyrë menjëherë, por viktima ka qenë pa shenja jete. Sipas spitalit, pacienti ishte pranuar më 19 maj pas një infarkti në zemër, ndërsa gjithashtu ishte evidentuar si person me gjendje të rënduar mendore.

Deklaratë shqetësuese nga ish-mjeku i Shtëpisë së Bardhë: Edhe kaq muaj i kanë mbetur jetë Bidenit

Një deklaratë e rrallë dhe shqetësuese vjen nga Dr. Ronny Jackson, ish-mjeku i Shtëpisë së Bardhë, i cili në një intervistë ekskluzive për Washington Free Beacon tha se ish-presidenti amerikan, Joe Biden ka vetëm 12 deri në 18 muaj jetë.

“Megjithëse kjo nuk është fusha ime e specializuar, kam konsultuar shumë urologë pas daljes së lajmit dhe të gjithë ata kanë arritur në të njëjtin përfundim”, tha Dr. Jackson.

Ai theksoi se bazuar në informacionet që ka dhe analizat e mjekëve specialistë, perspektiva për jetën e 82-vjeçarit është e kufizuar në këtë periudhë kohore.

Megjithatë, Dr. Jackson nuk ka humbur shpresën “se trajtimi do të jetë efektiv dhe që presidenti Biden të jetojë shumë më gjatë se sa parashikimet e tanishme”.

 

 

Ai nënvizoi rëndësinë e trajtimeve të avancuara dhe përkujdesjen intensive mjekësore që ish-lideri amerikan po merr aktualisht.

Kjo deklaratë vjen në një moment kritik, teksa publiku dhe komuniteti politik po ndjekin me vëmendje shëndetin e presidentit më të moshuar në historinë amerikane.

Ndërkohë që Shtëpia e Bardhë nuk ka komentuar drejtpërdrejt për këtë deklaratë, mediat po vazhdojnë të kërkojnë informacione të mëtejshme për gjendjen shëndetësore të Biden.

Grabitje si në filma në zemër të Prishtinës – Tre persona të maskuar marrin peng rojen dhe grabisin kasafortën e kompanisë

Njé grabitje e rëndë ndodhi mëngjesin e sotëm në pikën e IPKO-s në Sheshin “Nëna Terezë”, ku një kasafortë me pajisje elektronike dhe para të gatshme u mor nga tre persona të maskuar. Por, përveç dëmit material, ajo që e bën rastin edhe më të rëndë është se grabitësit morën peng rojen e sigurimit, pjesëtarin e Besa Security, Milaim Krasniqi, derisa realizuan grabitjen.

Sipas burimeve të Sinjalit brenda kompanisë së sigurimit, të cilat janë në dijeni të deklaratës që Krasniqi ka dhënë më pas në Polici, ngjarja ndodhi rreth orës 03:00 të mëngjesit, teksa ai ndodhej jashtë objektit duke pirë cigare. Në atë moment, tre persona të veshur me të zeza dhe jelekë reflektues iu afruan dhe e kapën për qafe, duke e tërhequr zvarrë deri në kuzhinën e objektit.

“Më kapën nga pas për qafe dhe më tërhoqën zvarrë në brendësi të lokalit. Më mbajtën me kokën poshtë gjatë gjithë kohës, nuk më lejuan të shoh asgjë,” mësohet të ketë deklaruar roja.

Ndërkohë që ai mbahej peng, grabitësit depërtuan në zyrat e brendshme, ku lokalizuan dhe morën kasafortën e IPKO-s, për të cilën dyshohet se përmbante sasi të konsiderueshme parash, telefona të rinj dhe mbushje elektronike. Ata e kanë transportuar kasafortën përmes një karroce të vogël dhe më pas janë larguar nga vendi i ngjarjes me shpejtësi, në drejtim ende të paidentifikuar.

Pasi autorët u larguan, roja ka kontaktuar shefin dhe më pas ka njoftuar Policinë. Njësitë relevante policore kanë dalë në vendin e ngjarjes bashkë me Forenzikën dhe hetuesit. Ndërkohë, Prokuroria ka autorizuar që rasti të procedohet për hetim si “Grabitje”.

Policia ka arritur të identifikojë veturën e dyshimtë që u përdor në ikje dhe hetimet janë në zhvillim për kapjen e autorëve të këtij akti të rëndë kriminal, i cili ndodhi në një nga pikat më të frekuentuara dhe të ndjeshme të kryeqytetit.

Megjithatë, rasti mund të transferohet për hetim tek Krimet e Rënda, me saktësisht tek njësiti kundër grabitjeve, në mënyrë që të analizohen pamjet e siguruara, të bëhet krahasimi me grabitje të tilla në të kaluarën dhe po ashtu, të intervistohen sërish pjesëtari i sigurimit dhe zyrtarë tjerë që kanë informacion për lartësinë e dëmit dhe të dhënat për telefonat e grabitur.

Papa i ri vazhdon traditën e vjetër: Nuk e njohim Kosovën

Papa Leon i katërmbëdhjetë emëroi Luigji Bianko si Nunc Apostolik në Slloveni dhe Delegat Apostolik në Kosovë. Kështu raporton media e Vatikanit, që saktëson se Selia e Shenjtë vazhdon me politikën e vjetër ndaj Prishtinës zyrtare.

“Vatikani nuk e njeh pavarësinë e Kosovës dhe në të kaluarën ka mbështetur dialogun dhe moderimin në konfliktin me Serbinë. Rajoni, i cili është i banuar kryesisht nga shqiptarë etnikë, shpalli pavarësinë nga Serbia në vitin 2008. Nga afërsisht një milion e gjysmë banorë, rreth 250 mijë kosovarë i përkasin Kishës Katolike, shumica prej të cilëve shqiptarë etnikë”, shkruan media Vatican News. Selia e Shenjtë thekson se situata mes Kosovës dhe Serbisë është stabilizuar kryesisht pas luftës, shkruan A2 CNN.

“Megjithatë, kohët e fundit ka pasur raste të përsëritura dhune dhe konflikti, veçanërisht në veri të Kosovës, e cila është kryesisht e populluar nga serbët. UNESCO e konsideron trashëgiminë kulturore ortodokse të krishterë të Kosovës si nën kërcënim”, lexohet në lajmin e Vatican News.

Kriza politike në vend, PDK mban mbledhjen e kryesisë, marrin këtë vendim

Partia Demokratike e Kosovës ka mbajtur sot mbledhjen e rregullt të Kryesisë, ku ka diskutuar krizën politike të krijuar pas zgjedhjeve të 9 shkurtit dhe përgatitjet për zgjedhjet lokale.

PDK vlerëson se Kosova po përballet me një bllokadë të rrezikshme institucionale, për të cilën përgjegjësi ka koalicioni i partive që kanë dalë të parët në zgjedhje, LVV, Guxo dhe Alternativa – që, në mungesë të shumicës parlamentare, kanë marrë peng themelimin e institucioneve të reja, legjitime dhe demokratike.

Kryetari i PDK-së, Memli Krasniqi, ka ritheksuar në takimin me Presidenten më 15 maj se zgjidhja më e mirë për vendin është formimi i një qeverie të re nga partitë që kanë qenë në opozitë, për të rikthyer stabilitetin dhe rrugën euroatlantike të Kosovës. Ai ka njoftuar se i ka kërkuar Presidentes që t’i drejtohet me pyetje kushtetuese Gjykatës Kushtetuese për çështjen e kandidatit për kryetar/e Kuvendi, me qëllim që të sqarohen pozicionet institucionale dhe juridike në këtë situatë.

Kryetari Krasniqi informoi Kryesinë edhe për takimin që ka zhvilluar me Kryetarët e Degëve të PDK-së, me qëllim të përgatitjeve për zgjedhjet lokale. Ai ka vlerësuar lart angazhimin dhe punën e tyre në funksion të organizimit sa më efikas dhe të suksesshëm të strukturave të partisë nëpër të gjithë vendin.

Në përmbyllje të mbledhjes, Kryesia e PDK-së ka shprehur shqetësimin dhe indinjatën lidhur me vendimin e fundit të Dhomave të Specializuara në Hagë për refuzimin e kërkesës për lirimin me kusht të z. Kadri Veseli, z. Jakup Krasniqi dhe z. Rexhep Selimi.

“PDK vlerëson se, pas përfundimit të fazës së prokurorisë dhe në mungesë të rrezikut për ndikim në proces, lirimi me kusht ka qenë një e drejtë e pritshme dhe e arsyeshme, ndërsa refuzimi i saj përbën mohim të një të drejte themelore, në kundërshtim me standardet ndërkombëtare të drejtësisë”, thuhet në njoftimin për media.

Një autoambulancë shihet në oborrin e Qeverisë së Kosovës

Një autoambulancë është parë të mërkurën pasdite në oborrin e Qeverisë së Kosovës.

Sipas raportimeve, aty është alivanosur një person. Ngjarja ka ndodhur rreth orës 15:30.

Fotografitë janë publikuar nga portali “Magazina“.