Bajqinovci i reagon Stanos: Çdo institucion ilegal i Serbisë po mbyllet

Mefail Bajqinovci, deputet i VV-së, ka shkruar një status, në të cilin ka komentuar aksionin e Policisë së Kosovës në veri të vendit.

Në shkrimin e tij, Bajqinovci i ka reaguar zëdhënësit të BE-së, Peter Stano, por nuk ka komentuar fare kritikat e ashpra të ShBA-së, Gjermanisë e Britanisë së Madhe.

Bajqinovci ka kërkuar nga ndërkombëtarët që të ketë presion mbi Serbinë për dorëzimin e Milan Radoiçiqit, i kërkuar nga Kosova për sulmin e armatosur në Banjskë të Zveçanit.

“Bashkësia ndërkombëtare duhet të bëjë presion mbi Serbinë për dorëzimin e terroristëve të përfshirë në sulmin terrorist të Banjskës.

Në vend që Bashkimi Evropian të përshëndesë vendosjen e sundimit të ligjit dhe mbylljen e institucioneve ilegale që prodhojnë dhunë dhe terror, ende flasin për “koordinim”.” – ka shkruar Bajqinovci, ndër të tjera.

Vdes në moshë të re infermierja shqiptare

Një infermiere e Spitalit Rajonal të Beratit, është ndarë nga jeta në moshë të re. Anxhela Isufaj, 31-vjeçe, me profesion infermiere në këtë spital, ka ndërruar jetë pasi prej një kohe të gjatë vuante nga një sëmundje e rëndë.

Kanë qenë kolegët e saj ata të cilët me hidhërim kanë ndarë lajmin e trishtë, duke u shprehur se Anxhela “ishte njëra prej infermiereve më të mira dhe shembullore të Shërbimit të Obstetik-Gjinekologjisë në spitalin rajonal të Beratit”.

Ikja e beftë e Anxhelës në moshë fare të re, ka tronditur bluzat e bardha në tërësi dhe kolegët e bashkëpunëtorët në veçanti.

“Ikja e saj lë pas gjithë respektin dhe dashurinë per kolegët e saj dhe gjithe stafin e Spitalit Berat. U prehsh në paqe ????Angel ???? me sytë e bukur! Do të kujtohesh gjithmonë me respekt dhe dashuri”, thuhet në mesazhin e kolegëve të Anxhelës, në Spitalin Rajonal të Beratit.

“Sot u nda nga jeta në mënyr të parakohshme infermierja jonë e dashur Anxhela Isufaj.
Ajo ishte njera prej nfermiereve më të mira dhe shembullore të Sherbimit të Obstetrik-Gjinekologjisë, por qe fati e deshi te largohej ne mënyrë te trishte dhe ne moshë fare të re. Ikja e saj lë pas gjithë respektin dhe dashurinë per kolegët e saj dhe gjithe stafin e Spitalit Berat.
U prehsh në paqe ????Angel ???? me sytë e bukur!!!
Do të kujtohesh gjithmonë me respekt dhe dashuri”.

Një reagim në rrjetet sociale ka ardhur edhe nga Shoqata e Infermierëve të Shqipërisë.

Reagon ashpër Bahtiri, i lutet karabinierëve mos të provokojnë mbi Ibër

Ish-kryetari i Mitrovicës, Agim Bahtiri ka reaguar ndaj pozicionimit të karabinierëve në urën e Ibrit.

“Mbi Urën e lumit “Ibër”, karabinierët italianë duhet të kuptojnë se paqja nuk vjen nga provokimi, por nga mirëkuptimi. I lus karabinierët italianë që të mos provokojnë situaten.

Në vend që të bëhen pengesë, le të bëhen urë që bashkon, duke ndihmuar në krijimin e një të ardhmeje të përbashkët.Qytetarët e Jugut dhe Veriut të Mitrovicës dëshirojnë të jetojnë në harmoni, pa kufij të padukshëm”, ka shkruar ai.

Broja bën lëvizjen e papritur në minutat e fundit të merkatos

Everton ka bërë një sulm të vonuar për të nënshkruar me sulmuesin e Chelseat, Armando Broja.

Marrëveshja e propozuar është për një hua huazim me opsionin për ta blerë për 30 milionë euro.

Sipas mediave britanike, klubi ka bërë gati dokumentacionin, më saktë ka dorëzuar një fletëmarrëveshje përpara afatit të fundit, në orët në vijim pritet dhe zyrtarizimi.

Një interesim të gjatë kishte edhe Ipswich Town, por megjithatë, u tërhoq nga një marrëveshje pasi klubi refuzoi të pranojë kushtet e Chelsea duke pasur parasysh sasinë e kohës për të cilën Broja ka të ngjarë të jetë jashtë fushës.

Sulmuesi kuqezi pritet të mungojë deri në mes të tetorit për shkak të një dëmtimi në këmbë.

Broja ka pasur më parë tre huazime, te Vitesse, Southampton dhe Fulham. Kontrata e tij me Chelsea është deri në vitin 2028.

Çfarë fshihej brenda komunave ilegale në Veri, Policia publikon pamjet e aksionit

Policia e Kosovës ka publikuar pamje të operacionit policor të realizuar në veri të Kosovës.

“Pamje nga operacioni policor i realizuar me 30.08.2024 në veri të Kosovës, bazuar në kërkesën e Ministrisë së Administrimit dhe Pushtetit Lokal për ndërprerjen e aktiviteteve ilegale dhe mbylljen e pesë objekteve të komunave ilegale në veri të Kosovës”, shkruan policia krahas pamjeve.

Aksioni i djeshëm policor që përfundoi me mbylljen e pesë objekteve të komunave ilegale në komunat veriore shkaktoi reagime të ashpra nga SHBA, BE e Mbretëria e Bashkuar.

Ndërkaq, sot KFOR u pa me një prezencë të shtuar te Ura e Ibrit.

VIDEO

Pas aksionit policor në veri, KFOR-i merr këtë veprim

Dje Policia e Kosovës realizoi një aksion policor në veri të Kosovës kundër objekteve të strukturave paralele të Serbisë.

Një operacion i tillë policor u kritikua gjerësisht nga ndërkombëtarët si i pakoordinuar dhe që vë në rrezik ushtarët e KFOR-it. Pikërisht këta të fundit sot me mëngjes janë parë në Urën e Ibrit.

Një numër i konsiderueshëm i ushtarëve të KFOR-it janë vendosur mbi Urën e Ibrit, hapja e së cilës është bërë temë politike që disa javë.

 

 

Në një video të publikuar nga mediumi Koha, shihen qartësisht ushtarët e KFOR-it mbi Urën e Ibrit, të cilët kanë bllokuar tashmë edhe lëvizjen mbi këtë urë.

Në video shihen edhe disa autoblinda të KFOR-it, të cilat i përkasin “Carabanieri”-t të Italisë.

Mbyllja e komunave ilegale, hidhet mjet shpërthyes në veri

Një aksion i Policisë së Kosovë dje në veri rezultoi me mbylljen e pesë objekteve që operonin ilegalisht si komuna paralele serbe.

Policia e Kosovës njoftoi dje se gjatë aksionit të bastisjes ka hasur në disa kompjuterë dhe gjësende të tjera, të cilat janë konfiskuar si provë materiale.

Pikërisht pranë ish-komunës ilegale në Leposaviq, mbrëmë pas mesnate raportohet të jetë hedhur një shok-bombë.

Lajmin e ka bërë të ditur vet Policia e Kosovës. Këta të fundit pohojnë se uk raportohet të ketë pasur të lënduar nga ky incident.

“Policia e Kosovës, ka pranuar informacion se pas mesnatës në afërsi të objektit të ish komunës ilegale në Leposaviq, është hedhur një mjet shpërthyes i cili dyshohet të jetë shok bombë.

Njësitet relevante policore, menjëherë kanë dalur në vendin e ngjarjes, për të kryer ekzaminime dhe hetime lidhur me rastin.

Nuk raportohet për lëndime, përderisa hetimet për rastin janë duke vazhduar nga njësitet kompetente policore” thuhet në njoftimin e Policisë.

“Rrezik për përshkallëzim të mëtejshëm”, Stano reagon për aksionin e policisë në Veri

Zëdhënësi i BE-së, Peter Stano, ka reaguar për aksionin e djeshëm të Policisë së Kosovës ku mbylli pesë objekte të komunave ilegale.

Stano, duke shpërndarë reagimin e djeshëm të Zyrës së BE-së në Kosovë, tha se hapat e fundit nga Kosova rrezikojnë përshkallëzim të mëtejshëm, raporton Gazeta Express.

“Deklarata për hapat e fundit të njëanshëm dhe të pakoordinuar në veri nga autoritetet e Prishtinës, duke rrezikuar përshkallëzim të mëtejshëm”, shkroi Stano në X krahas deklaratës.

Kosova aktualisht është nën masa ndëshkuese nga Bashkimi Europian për tensionet e vitit të kaluar në veri të vendit. Derisa pritej që BE të heqë masat pas qetësimit të situatës në veri, paralajmërimet e Qeverisë së Kosovës për hapjen e Urës së Ibrit erdhën bashkë me paralajmërimet e BE-së se masat edhe mund të rriten.

“Masat janë ende aty, dhe ato janë progresive, mund të zvogëlohen, mund të rriten, varësisht na zhvillimi i situatës”, kishte thënë Stano më herët këtë muaj.

Reagimi i Zyrës së BE-së në Kosovë:

BE-ja është e zhgënjyer për mungesën e vazhdueshme të koordinimit me ofruesit e sigurisë së Kosovës dhe me partnerët ndërkombëtarë.

Operacioni i sotëm i Policisë së Kosovës kundër zyrave të mbështetura nga Serbia në Mitrovicën e Veriut, Zveçan, Zubin Potok dhe Leposaviq, i zhvilluar me udhëzime të Qeverisë së Kosovës, rrezikon situatën e brishtë të sigurisë në terren. EULEX-i u vendos menjëherë për të monitoruar zhvillimin e këtij operacioni, i cili nuk ishte i koordinuar me BE-në dhe partnerët ndërkombëtarë.

BE dëshiron të përsërisë se Kosova është zotuar për depërshkallëzim. BE-ja vazhdimisht i ka bërë thirrje Kosovës që të shmangë çdo veprim që mund të ndikojë negativisht në sigurinë e njerëzve në terren. Fatkeqësisht thirrjet tona janë shpërfillur nga Qeveria e Kosovës.

BE-ja dëshiron të përsërisë se operacioni aktual i policisë kundër zyrave të mbështetura nga Serbia mund të çojë në përshkallëzim të mëtejshëm të një situate tashmë të paqëndrueshme.

Zyrat e mbështetura nga Serbia janë paraparë të adresohen dhe zgjidhen në dialogun e lehtësuar nga BE-ja.

Ne presim që Kosova dhe Serbia të adresojnë dhe zgjidhin çështjet e hapura mes tyre në dialogun e lehtësuar nga BE-ja.

Rama: Kosova dhe Serbia t’i tejkalojnë mospajtimet për t’ia pamundësuar Rusisë ndikimin në rajon

Kryeministri i Shqipërisë, Edi Rama, ka thënë të premten se është fatkeqësi që Bashkimi Evropian e ka kuptuar përmes një mënyre të egër, siç është lufta e Rusisë në Ukrainë, sa i rëndësishëm është Ballkani Perëndimor për sigurinë e Evropës.

Ai, ka thënë gjithashtu, se Kosova dhe Serbia duhet t’i tejkalojnë sa më shpejt mospajtimet, për t’ia pamundësuar Rusisë ndikimin në rajon.

“Duhet ta falënderoj presidentin e Rusisë, Vladimir Putin, sepse falë tij, Bashkimi Evropian, e ka kuptuar sa e rëndësishme është të mbajë Ballkanin Perëndimor sa më afër, dhe sa i rëndësishëm është Ballkani Perëndimor për BE-në”, ka thënë Rama gjatë një diskutimi për brishtësinë e Ballkanit, në kuadër të Forumit Globsec, që po mbahet në Pragë të Republikës Çeke.

Ai ka thënë se rajoni i Ballkanit është në pozitë më të mirë se që ka qenë, dhe që përveç aspektit ekonomik, ai ka thënë se nuk sheh dallim të madh mes rajonit të Ballkanit dhe BE-së.

“Edhe sot, rajoni i Ballkanit do të ishte vlerë e shtuar për BE-në”, ka thënë ai, kur ka folur për rëndësinë e anëtarësimit të rajonit në bllokun evropian.

Edhe Gjermania e zhgënjyer pas aksionit në veri: Njoftimi s’është konsultim, të zhgënjyer për veprimet e pakoordinuara

Pas reagimit të ambasadës së Shteteve të Bashkuara të Amerikës në Kosovë për aksionin e sotëm në veri, ku shprehur zhgënjimin e saj me veprimet e vazhdueshme të pakoordinuara të ndërmarra nga Qeveria e Kosovës, të njëjtin mendim ka ndarë edhe Ambasadori i Gjermanisë në Kosovë, Jorn Rohde, duke thënë se njoftimi s’është konsultim.

Ai tha se Gjermania i bashkohet Ambasadës Amerikane në Prishtinë duke shprehur shqetësimin dhe zhgënjimin për veprimet e pakoordinuara dhe tha se kjo gjë duhet ndryshur.

“Njoftimi nuk është konsultim. Gjermania i bashkohet Ambasadës Amerikane në Prishtinë duke shprehur shqetësimet dhe zhgënjimin për veprimet e pakoordinuara. Kjo duhet ndryshuar”.

“Ne duam të heqim masat dhe të ecim përpara sa i përket integrimit rajonal dhe evropian të Kosovës. Jo më krizë të panevojshme”, ka shkruar ambasadori Rohde.