Paris Guri: Atë që s’e bëri Serbia në 30 vite, e bëri Albini në 5 vite

Deputeti i LDK-së, Paris Guri, ka reaguar pas vendimit të SHBA-së për pezullimin e dialogut strategjik me Kosovën, duke e quajtur këtë një goditje të rëndë për vendin dhe duke fajësuar direkt kryeministrin në detyrë, Albin Kurti.

“Atë që nuk arriti ta bëjë Serbia për 30 vite, e bëri Albini për 5 vite,” shkroi Guri në një postim në rrjetet sociale.

Dialogu strategjik mes SHBA-së dhe Kosovës kishte për qëllim forcimin e marrëdhënieve ekonomike dhe diplomatike, por është pezulluar për një kohë të pacaktuar për shkak të veprimeve dhe deklaratave të Qeverisë, të cilat SHBA i ka konsideruar si përshkallëzuese dhe destabilizuese.

Syla: Ata që e mbështesin Kurtin prej sot ose janë të poshtër ose budallë

Gazetari Valon Syla, ka reaguar ashpër pasi Shtetet e Bashkuara të Amerikës sot kanë pezulluar dialogun e planifikuar strategjik me Kosovën për shkak të veprimeve të qeverisë në detyrë të Albin Kurtit.

Sipas tij Kurti dhe turma e tij politike ka dalë në terren të paqartë dhe antikombëtar.

“Disa herë kemi shkruar se Albin Kurti ka rrezik të rrëshqet në anti kombëtare me vendimet e tij politike. Vendimi i sotshëm i SHBA për të pezulluar bashkëpunimin strategjik me Kosovën, si vend e shoqëri kemi rënë në pikën e fundit të durimit të arsyetimit. Prej sot e tutje, Albin Kurti dhe turma e tij politike ka dalë në terren të paqartë dhe antikombëtar, izolues dhe të rrezikshëm bashkë me krejtë ata që e mbështesin, tash e tutje”, ka shkruar Syla.

Tutje sipas tij ata që vazhdojnë ta mbështesin Kryeministrin në këto rrethana mund të konsiderohen “të poshtëër, të ligë ose budallë”.

“Nuk arsyetohet më nga ata që e mbështesin që bëhen se nuk e kemi dit këtë, sepse Ambasada e tha qartë qe ska bashkëpunim strategjik. Ata që e mbështesin prej sot shkurt me thonë ose janë të poshtër, ose të ligë, ose budallë”, tha ndër të tjera ai.

Musliu: Pezullimi i dialogut nga SHBA nuk është as prishje e raporteve dhe as dobësim i aleancës me Kosovën

Eksperti i sigurisë dhe themeluesi i Institutit “Octopus”, Agim Musliu, ka komentuar vendimin e Shteteve të Bashkuara për pezullimin e Dialogut Strategjik me Kosovën, duke thënë se ky veprim nuk paraqet as prishje të raporteve dhe as dobësim të aleancës mes dy vendeve.

“Pezullimi i përkohshëm i dialogut strategjik Kosovë–ShBA nuk është as prishje e raporteve dhe as dobësim i aleancës sonë – janë gjëra që ndodhin mes partnerëve. Marrëdhëniet Kosovë–ShBA kurrë s’kanë qenë më të forta: Amerika është mbështetësja më e madhe e sovranitetit tonë, ndërsa Kosova ka popullin më pro-amerikan në botë,” ka shkruar Musliu.

Musliu shtoi se aleanca Kosovë–SHBA shtrihet edhe në fushën e energjisë dhe sigurisë kibernetike, duke e cilësuar atë si “të përhershme, të pathyeshme dhe të palëkundur”.

“Kosova dhe ShBA mbeten të rreshtuara krah për krah, duke mbështetur edhe Ukrainën në luftën për liri – një dëshmi se aleanca jonë është e përhershme, e pathyeshme dhe e palëkundur,” përfundoi ai.

 

Fillon festa në Serbi, Amerika ia ktheu shpinën Kosovës-Përgëzohet Kurti

Pas vendimit të Shteteve të Bashkuara për të pezulluar për një periudhë të pacaktuar Dialogun Strategjik me Kosovën, mediat pro-qeveritare në Serbi kanë reaguar me tituj të ashpër e triumfalistë.

“ShBA-ja sapo i dha shuplakë Prishtinës: Suspendim, dhe atë pa afat”, është një titull i medias pro-qeveritare serbe, B92.

“Ndëshkim nga Uashingtoni. ShBA ndërpret bashkëpunimin me Prishtinën për shkak të Kurtit”, është titulli i artikullit të medias tjetër pro-qeveritare serbe “Alo”.

Ndërkaq media tjetër, po ashtu pro-qeveritare serbe, “Informer”, doli me këtë titull: “Fitore e vogël e diplomacisë serbe: Amerika ‘ia ftohu’ Kurtit, pezullon dialogun me Prishtinën”.

Këto janë disa prej titujve të mediave në Serbi pas njoftimit të ShBA-së se ka vendosur të pezullojë Dialogun Strategjik me Kosovën.

“Informer” shkruan se “kjo është gjë e madhe për Serbinë, e cila deri në fund të vitit nis dialogun strategjik me Amerikën”.

B92 thotë se kjo masë e ShBA-së vjen “pas ankesës së Listës Serbe për mënyrën e zgjedhjes së zëvendëskryetarit të Kuvendit nga komunitetet joshumicë”.

Edhe “Sputnik” në Serbi, që është degë e medias ruse me po të njëjtin emër, ka raportuar për këtë zhvillim, me titullin “Ekspres ndëshkim: ShBA-ja pezullon dialogun strategjik të planifikuar me Prishtinën”.

Në thelb, narrativa e këtyre mediave është e përbashkët: pezullimi i Dialogut Strategjik shihet si pasojë e veprimeve të Qeverisë së Kosovës dhe njëkohësisht si përfitim diplomatik për Beogradin.

Kajtazi: Gruaja e Albin Kurtit promovon libra në Beograd, librat e saj janë anti-amerikane

Opinionisti Vehbi Kajtazi ka pohuar se bashkëshortja e kryemoinistrit në detyrë, Albin Kurtit promovon libra antiamerikanë në Beograd.

“E kemi Albin Kurtin këtu kryeministër, gruaja e së cilit promovon libra në Beograd”, ka thënë Kajtazi në Rubikon të Klan Kosovës.

“Pra, e presin para dursh, t’u promovu libra ndërkohë librat e saj janë krejt antiamerikanë”.

“I keni online. Krejt janë antiamerikane”.

“Suksese dritë e diellit” – Jozi nxjerr këngë të re por vëmendjen e merr komenti i ish-banores!

Joz Marku ka sjellë këngën e tij më të re.

Projekti vjen solo dhe titullohet “Po shprehem”.

Projekti muzikor vjen fiks në ujërat e stilit të Jozit por një koment ka marrë vëmendje të madhe.

Bëhet fjalë për Livian që e ka përkrahur duke i dhënë Jozit një epitet të veçantë.

“Suksese dritë e diellit”, është shprehur ajo duke treguar afërsinë e respektin që ka për Jozin.

Këngën e plotë e gjeni në videon e mëposhtme. /Prive By Liberta Spahiu

Bajrami: Kurti dhe VV po zbatojnë në përpikëri agjendën e Serbisë dhe Rusisë që Kosova të shkëpusë raportet me SHBA-në

Deputetja e LDK-së, Hykmete Bajrami, tha se ndërprerja e dialogut të planifikuar strategjik të Kosovës me SHBA-në është ndër lajmet më të këqija për Kosovën në vitet e fundit.

Ajo tha se dëmi që ia ka shkaktuar dhe po ia shkakton Albin Kurti dhe partia e tij Kosovës është i pariparueshëm, ndërsa akuzoi atë se po çojnë përpara agjendën e Serbisë e Rusisë që Kosova të shkëpusë raportet e saj me aleatin strategjik të saj.

“Shtetet e Bashkuara të Amerikës ishin, janë dhe do të jenë aleati i pazëvendësueshëm për Kosovën. Albin Kurti dhe Vetëvendosje po zbatojnë në përpikëri agjendën e Serbisë dhe Rusisë që Kosova të shkëputë raportet e partneritetit dhe bashkëpunimit strategjik me SHBA-në. Secili prej nesh duhet të punojë për thellimin e raporteve me Shtetet e Bashkuara të Amerikës. Kush punon kundër është kundër Kosovës dhe është me Serbinë dhe Rusinë.  Rrugë të mesme nuk ka!”, ka shkruar ajo.

Pak më herët, Shtetet e Bashkuara të Amerikës njoftuan për pezullimin e dialogut të planifikuar strategjik me Kosovën për shkak të veprimeve të qeverisë në detyrë të Albin Kurtit.

Pezullimi i dialogut nga SHBA, reagon presidentja Vjosa Osmani

Deklaratë e Presidentes së Republikës së Kosovos

“Republika e Kosovës është ndërtuar mbi themelet e miqësisë së pathyeshme me Shtetet e Bashkuara të Amerikës. Ky raport nuk është vetëm diplomatik, por është pjesë ekzistenciale e identitetit tonë shtetëror dhe kombëtar. Drejt këtij qëllimi, angazhimi i Presidentes ka qenë dhe mbetet i palëkundur dhe i vazhdueshëm, siç është konfirmuar vazhdimisht nga lidershipi i Shteteve të Bashkuara të Amerikës, përfshirë në letrën e fundit të Presidentit Trump drejtuar Presidentes Osmani të gushtit 2025. Prandaj, Presidentja shprehë keqardhje dhe shqetësim të thellë rreth vendimit për pezullimin e Dialogut Strategjik, një mekanizëm i rëndësishëm i bashkëpunimit në mes Kosovës dhe ShBA-ve.

Dialogu Strategjik u iniciua nga Presidentja në vitin 2021, përmes një propozimi të adresuar Presidentit të Shteteve të Bashkuara të Amerikës. Ky propozim i Presidentes u rikonfirmua në qershor 2022, me anë të notës verbale dhe gjatë takimit me Sekretarin Amerikan të Shtetit, në korrik të po atij viti.

Pas punës së jashtëzakonshme të ekipit të Presidencës dhe të Departamentit të Shtetit, ky proces u finalizua me konfirmimin përfundimtar në takimin mes Presidentes Osmani dhe Departamentit të Shtetit, në janar 2025.

Çështja e aleancës me SHBA-të, është çështje strategjike që kërkon unitet politik dhe angazhim të të gjithëve në Kosovë. Qytetarët e Kosovës e dinë se liria e tyre u bë realitet edhe me ndihmën vendimtare të SHBA-ve dhe se pa këtë miqësi historike nuk do të kishim arritur kurrë këtu ku jemi sot.

Presidentja e Republikës së Kosovës do të vazhdojë të punojë ngushtë me Shtetet e Bashkuara në të gjitha fushat e interesit të përbashkët: forcimin e paqes dhe stabilitetit në rajon, demokratizimin e mëtejshëm të vendit tonë, ndërtimin e një të ardhmeje euroatlantike, si dhe mbrojtjen e vazhdueshme të sovranitetit, integritetit territorial dhe rendit kushtetues të Republikës së Kosovës.

Siguria e Republikës së Kosovës është fuqishëm e lidhur me mbështetjen e Shteteve të Bashkuara të Amerikës, prandaj secili duhet ta marrë me seriozitetin dhe përgjegjësinë maksimale ruajtjen e kësaj aleance të shenjtë.

Dialogu Strategjik i arritur në janar 2025 është një mekanizëm tejet i çmuar i këtij bashkëpunimi. Në këtë frymë, Presidenca e Republikës së Kosovës do të angazhohet maksimalisht e me përkushtim të lartë që ky dialog të rifillojë sa më shpejt, sepse partneriteti ynë me Shtetet e Bashkuara është jo vetëm garanci për të tashmen, por edhe busulla më e sigurt drejt së ardhmes.

Pozhari i ashpër: Nuk ka krizë me SHBA-në, opozita po mashtron opinionin publik

Analisti Xhevdet Pozhari ka reaguar në mbrojtje të Qeverisë Kurti, pas lajmit për pezullimin e përkohshëm të Dialogut Strategjik mes Kosovës dhe Shteteve të Bashkuara të Amerikës. Sipas tij, nuk bëhet fjalë për krizë në marrëdhënie, por për një keqinformim të qëllimshëm, shkruan Gazeta Imazhi.

Pozhari thekson se ky proces ishte iniciuar për herë të parë gjatë Qeverisë Kurti 2, ndërsa asnjë qeveri e mëparshme nuk e kishte sjellë këtë temë në tavolinë.

“Pezullimi i përkohshëm i Dialogut Strategjik nuk do të thotë shkëputje e raporteve me SHBA-në. Lajmi i sotëm nuk flet për krizë, por për pezullim të një procesi specifik. Marrëdhëniet nuk maten me lajme bombastike, por me vepra”, ka shkruar ai.

Pozhari ka përmendur disa prej investimeve dhe marrëveshjeve të arritura me SHBA-të gjatë qeverisë Kurti:

• 40 dronë ushtarakë RQ-20 Puma
• 50 autoblinda të reja
• Marrëveshje për helikopterët Black Hawk
• Pagesa për 246 raketa Javelin

Sipas tij, këto janë dëshmi të qarta se partneriteti me SHBA-në jo vetëm që nuk është ftohur, por po thellohet edhe më tej.

“Opozita po përpiqet t’i shtrembërojë këto fakte për përfitime politike, por realiteti nuk manipulohet me deklarata boshe. Aq më tepër, mllefi ndaj Kurtit nuk është koncept, është vetëm një përpjekje e dështuar për t’ia rrëmbyer pushtetin në emër të ‘pro-perëndimores’, ngaqë e kanë të pamundur t’i fitojnë zgjedhjet”, ka shtuar Pozhari.

Ndëshkimi i ShBA-së, Deliu-Kodra: Dështimi më i madh i Qeverisë Kurti

Deputetja e PDK-së, Blerta Deliu-Kodra ka reaguar pas vendimit të ambasadës amerikane në Kosovë për pezullimin pa afat të Dialogut Strategjik për Kosovën.

Përmes një postimi në facebook, Deliu-Kodra tha se sot Kosova humbi jo vetëm një proces strategjik me ShBA-në, por edhe besimin e aleatit më të madh.

Sipas saj, këto janë pasojat e një pushteti të ndërtuar mbi populizëm, që lë qytetarët të paguajnë çmimin e gabimeve të politikës.

“Sot Kosova humbi jo vetëm një proces strategjik me SHBA-të, por edhe besimin e aleatit tonë më të madh. BE-ja na mbylli dyert me sanksione, e tash edhe Amerika po na kthen shpinën. Këto janë pasojat e një pushteti të ndërtuar mbi populizëm, që lë qytetarët të paguajnë çmimin e gabimeve të politikës. Për qytetarët që shpresonin në mbështetjen e partnerëve tanë, kjo është zhgënjyese. Dështimi më i madh i qeverisë Kurti. Pa fjalë!”, ka shkruar deputetja.