Mefail Bajqinovci: Po shtrenjtohen biletat nga Evropa në Kosovë, sepse po vijnë mërgimtarët për 9 nëntor

Kosova më 9 nëntor do të mbajë balotazhin për zgjedhje lokale, ditë në të cilën përveç votuesve në vend, pritet të ushtrojnë këtë të drejtë edhe votuesit jashtë vendit.

E, për këta të fundit, Mefail Bajqinovci nga VV ka reaguar duke treguar se po ka fluks të tyre për të marr pjesë në balotazhin e 9 nëntorit.

Me çrast thotë se po ka edhe shtrenjtim të biletave.

“Sërish rritje e çmimeve të biletave ajrore për Kosovë! Për datën 9 nëntor, kompanitë ajrore kanë shtrenjtuar biletat nga Suedia dhe nga e gjithë Evropa. Kjo ndodh pothuajse çdo herë kur rritet fluksi i udhëtarëve drejt vendlindjes”, tha ai.

Protesta për ish-krerët e UÇK-së nesër në Tiranë – A do të merr pjesë edhe Kurti?

Kryetari OVL-UÇK-së, Hysni Gucati i ka bërë thirrje kryeministrin në detyrë të marrë pjesë të premten në protestën që do të mbahet në Tiranë në mbështetje të ish-krerëve të UÇK-së që po gjykohen në Hagë.

Ai ka thënë se nëse deklarimi i LVV-së që mbështet protestën është i vërtetët, Kurti duhet të jetë nesër në Tiranë.

“Nëse Lëvizja Vetëvendosje na përkrahë me shpirt e zemër, atëherë nesër i ka hije Kurtit me ardh në sheshin “Skënderbeu” të bashkëngjitet me gjithë shqiptarët. Jo të shkruaj në rrjete sociale. Reagimi i tij është i vakët. Nëse Kurti e mbështet UÇK-në, nesër të vjen në protestë dhe është i mirëseardhur”, ka thënë Gucati për Tëvë1.

Të premten nga ora 17:00 do të mbahet protestë në Tiranë, në mbështetje të ish-krerëve të UÇK-së që po gjykohen në Hagë.

Lëvizja Vetëvendosje ka leshur një deklaratë ku mbështetë protestim, deklaratë kjo që nxiti polemika mes kësaj partie dhe kryeministrit të Shqipërisë, Edi Rama.

LVV akuzoi Ramën se kishte ardhur me helikopterë për të ndikuar që Gjykata Speciale të votohet në Kuvend. Rama akuzoi Vetëvendosjen duke thënë se kjo parti, para 10 vjetësh s’e njihte as himnin e Kosovës le më pafajësinë e Thaçit.

Zbulohet: Kjo është gazetarja që do të jetë opinioniste e BBV

Është zbuluar tashmë se kush do të jetë opinionistja e parë në edicionin e katërt të “Big Brother VIP Kosova”.

Sipas Telegrafit këtë rol do ta marrë gazetarja dhe producentja e njohur shqiptare, Dalina Buzi.

Oferta për këtë pozicion i është bërë nga vetë Olsa Muhameti, producentja e spektaklit, e cila ka zgjedhur Buzin si një nga figurat që do të sjellë energji, profesionalizëm dhe analizë të thellë në diskutimet e netëve të spektaklit.

Sipas të njëjtave burime, Dalina Buzi e ka pranuar tashmë ftesën dhe është gati të ulet në kolltukun e kuq për të komentuar zhvillimet brenda shtëpisë më të famshme në vend.

“Big Brother VIP Kosova 4” pritet të nisë në fund të nëntorit, sipas planifikimeve të produksionit, dhe me këtë emër të konfirmuar, interesi për edicionin e ri është rritur ndjeshëm.

Dalina Buzi, e njohur për eksperiencën e saj të gjatë në media, ka përvojën e të qenurit në juri nga spektakli i kërcimit, Dancing With The Stars Albania, ku ajo ishte pjesë e panelit në edicionin e parë. 

Syla pas hyrjes “gabimisht” të ushtrisë: Ushtarët s’janë lodra zgjedhore!

Gazetari Valon Syla ka reaguar pas raportimeve se njësi të Forcës së Sigurisë së Kosovës (FSK) janë futur “gabimisht” në veri të vendit.

Në një postim në Facebook, Syla ka vënë në dyshim versionin zyrtar të ngjarjes, duke thënë se “nuk luhet me ushtri kështu”, teksa ka kritikuar mundësinë që veprimi të ketë qenë i motivuar politikisht.

“Nuk e di a kanë hy ‘gabimisht’ a kanë dashtë me bo filma për zgjedhje në Veri… por nuk luhet me ushtri kështu. Ushtarët nuk janë lodra zgjedhore.

A bash për zgjedhje gabuat, kur asnjëherë më parë nuk u raportua një gabim i tillë?”, ka shkruar Syla.

Reagimi i gazetarit vjen pas deklaratave të Ministrisë së Mbrojtjes, e cila njoftoi se hyrja e disa pjesëtarëve të FSK-së në veri ishte rezultat i një “keqkuptimi operacional” dhe jo një veprim i planifikuar.

Ky zhvillim ka ngjallur reagime të shumta në opinionin publik, sidomos në prag të formimit të Qeverisë së re dhe zgjedhjeve lokale që pritet të mbahen në disa komuna, që kanë shkuar në balotazh.

Verifikohen 74% të vendvotimeve në Mitrovicë: Tahiri 50.04%, Peci 45.76%

Në Qendrën Komunale të Numërimit në Mitrovicë janë verifikuar 74.29 për qind të vendvotimeve.

Nga 74.29% të vendvotimeve të procesuara në garën për kryetar të Komunës së Mitrovicës, Arian Tahiri i Partisë Demokratike të Kosovës (PDK) prin me 50.04 për qind të votave të fituara.

Gëzim Plakolli i Lidhjes Demokratike Kosovës (LDK) numëron 3.41 për qind të votave.

Në garën për Kuvendin Komunal, pas procesimit të 74 për qind të votave, PDK-ja kryeson me 41 për qind të votave, e pasuar nga Vetëvendosje me 22 për qind./Indeksonline/

“VV nuk zhagit” – Qeveria Kurti III po vjen, ja dita vendimtare

Qeveria Kurti III bëhet “javën e ardhshme, besoj”, tha Mefail Bajqinovci i Vetëvendosjes në një intervistë për Gazetën Blic.

Bajqinovci tha se “VV nuk zhagit” dhe se do ta bëjë qeveri “me Nismën dhe disa deputetë të caktuar”.

“Nuk dihet s’kemi konfirmim por shumë shpejt, java e ardhshme besoj se s’kemi kur tjetër, deri në të dielën e ardhshme e kemi afatin, mbetet në diskrecion të kryeministrit se kur do të na tregojë t’i bëjmë përgatitjet për seancën solemne”, shton Bajqinovci.

“Është në diskrecion të mandatarit Albin Kurti, i cili do të vazhdojë bisedimet. Opozita dhe deputetët të mos e çojnë vendin në zgjedhje për teke dhe të vazhdohet me qeverisje”, ka theksuar ai

Përfundon numërimi në Obiliq, këta janë kandidatët më të votuar për asamble

Në Obiliq ka përfunduar numërimi i votave të kandidatëve për Kuvendin Komunal. Komisioni Qendror i Zgjedhjeve ka publikuar tashmë rezultatet.

LDK renditet si parti e parë me 43.08 përqind, pasuar nga VV me 42.13 dhe Lista Serbe me 9.68 përqind, shkruan Reporteri.net.

Bajram Hasani, si bartës liste i LDK’së ka marrë 5 mijë e 73 vota. Pas tij renditen Fidan Ahmeti me 519 vota, Fitore Hashani me 519 vota, Muhamet Preniqi me 439 vota dhe Enver Gashi me 338.

Si bartës liste i VV’së, Halil Thaçi ka marrë 4 mijë e 961 vota, i ndjekur nga Bardhyl Mjekiqi me 455, Bashkim Gashi me 446, Mervete Shala me 397 dhe Rinor Kurteshi me 392.

Nga Lista Serbe, Goran Dancetoviq si bartës liste ka marrë 1 mijë e 1140 vota. Pas tij renditen Biljana Spasiq me 586, Stana Jakovljeviq 201, Slavisha Spasiq me 90 dhe Dragan Danqetovic me 63./Reporteri.net

Komandanti i FSK’së: Do të marrim masa ndaj ekipit që hyri gabimisht në veri

Komandanti i Forcës së Sigurisë së Kosovës, Bashkim Jashari, ka deklaruar për Albanian Post se kanë kontaktuar me ekipin e FSK-së që ka hyrë “gabimisht” në veri dhe se për këtë janë duke përgatitur disa masa të brendshme.

“Po, kemi kontaktuar, pasi janë pjesëtarët tanë që kanë ngatërruar rrugën. Do të sqarojmë të gjithë rastin se si ka ndodhur. Sa i përket masave, këto janë procedura të brendshme, sigurisht që ne jemi angazhuar për to dhe besoj se do të arrijmë tek pikat e duhura”, deklaroi Jashari për AP.

Disa automjete të Forcës së Sigurisë së Kosovës të enjten hynë gabimisht në territorin e Mitrovicës së Veriut gjatë së enjtes.

Dislokimi i FSK-së në veri të vendit është i mundur vetëm me pëlqimin paraprak të misionit paqeruajtës të NATO-s në Kosovë, KFOR, bazuar në zotimin e vitit 2013 nga Qeveria e Kosovës ndaj NATO-s.

Ky angazhim, i dhënë përmes një letre nga ish-kryeministri Hashim Thaçi drejtuar sekretarit të atëhershëm të NATO-s, Anders Fogh Rasmussen, mbetet në fuqi edhe tani, pavarësisht ndryshimeve në mandatin e FSK-së.

Pritet të lëshohet urdhërarrest ndaj Dardan Molliqajt

Në mungesë të të akuzuarit Dardan Molliqaj, ka dështuar sërish të nis gjykimi të enjten në Gjykatën Themelore në Prishtinë, në rastin ku ai dhe Fatos Sahiti, akuzohen për sulmin ndaj Haki Abazit pas një debati televiziv në vitin 2019.

Ndaj Molliqajt, do të lëshohet urdhërarrest.

Gjyqtari i rastit, Fisnik Gashi bëri të ditur se për shkak të mungesës në seancë, ndaj Molliqajt do të lëshohet urdhërarrest, raporton “Betimi për Drejtësi”.

“Seanca e sotme e shqyrtimit gjyqësor nuk mund të mbahet për shkak të mungesës së të pandehurit Dardan Molliqaj. Ndaj të pandehurit Dardan Momlliqaj do të lëshohet urdhërarrest”, tha gjyqtari.

Të pranishëm në seancë ishin i akuzuari Fatos Sahiti dhe avokati i Dardan Molliqajt, Dren Kukaj. Ndërsa, nga pala e dëmtuar Haki Abazi me avokaten Sadije Mjekiqi.

Andaj, në mungesë të kushteve ligjore kjo seancë dështoi.

I akuzuari Dardan Molliqaj, kryetar i Partisë Socialdemokrate (PSD) mungoi edhe në seancën e 4 shtatorit 2025, në të cilën mungesën e kishte arsyetuar me angazhimet për fushatën zgjedhore.

Ndryshe, sipas aktakuzës së ngritur më 18 shkurt 2020 nga Prokuroria Themelore në Prishtinë të pandehurit Dardan Molliqaj dhe Fatos Sahiti akuzohen se në bashkëkryerje kanë kryer veprën penale “Sulmi”, nga neni 184, paragrafi 1 lidhur me nenin 31 të Kodit Penal të Republikës së Kosovës, vepër kjo e dënueshme me gjobë ose me burgim deri në një vit.

Në aktakuzë thuhet se më 11 shtator 2019, rreth orës 22:00 në Fushë Kosovë, në Kolegjin “AAB”, të pandehurit e lartcekur pas përfundimit të debatit në emisionin “Pressing” në studion së televizionit T7, ku ishin të ftuar Endrit Shala, Rexhep Hoti, Haki Abazi dhe Dardan Molliqaj, me të dalë në korridor të kolegjit AAB, i pandehuri Molliqaj fillimisht e ka thirrë të dëmtuarin Abazi “ndalu këtu të flasim çka deshte me thënë në debat”, i cili ishte para tyre në korridor duke dalë në shoqëri me Rexhep Hotin.

Tutje, në aktakuzë thuhet se posa i afrohet i pandehuri Molliqaj me dashje, duke e përdorë forcën e sulmon të dëmtuarin Haki Abazi në atë mënyrë që fillimisht e ka kapur për duar e më pas e godet me grusht në fytyrë dhe shqelma në këmbë.

FSK del me njoftim pasi ushtarët hynë gabimisht në pjesën veriore të Mitrovicës

Disa automjete të Forcës së Sigurisë së Kosovës (FSK) u panë sot në Mitrovicë të Veriut. 

FSK-ja, cila njoftoi se automjetet kanë ngatërruar drejtimin gjatë lëvizjes nga Istogu drejt kazermës së FSK-së në Mitrovicë.

“Forca e Sigurisë së Kosovës njofton publikun që sot me datë 16.10.2025 në ora 10:30, gjatë lëvizjes së konvojit të FSK-së nga Istogu për në kazermën e FSK-së në Mitrovicë, pjesëtarët e FSK-së me automjete e kanë ngatërruar drejtimin e lëvizjes”, thuhet në njoftimin për media.

Zëvendësdrejtori i Policisë së Kosovës për rajonin e veriut, Veton Elshani po ashtu tha se FSK-ja është futur gabimisht.

“Na thanë se e kishin gabuar vendndodhjen dhe se mendonin se ishte Mitrovica Jugore”, ka thënë Elshani.

Sipas raportimeve të mediave serbe dhe videove që kanë qarkulluar në Telegram, automjetet e FSK-së hynë në Mitrovicën e Veriut në orët e mëngjesit.