PDK-ja del me qëndrim për mandatarin – ja nëse do ta votojë Glauk Konjufcën

Partia Demokratike e Kosovës vlerëson se vendi ndodhet përpara një momenti vendimtar politik dhe institucional, që kërkon vendime të qarta, të përgjegjshme dhe në përputhje me realitetin politik në Kuvendin e Republikës së Kosovës.

Në një situatë ku është e qartë se shumica shqiptare në Kuvend, së bashku me disa deputetë të komuniteteve joshumicë joserbe, kanë shprehur qëndrimin e prerë se nuk kanë votë për një mandatar tjetër nga Lëvizja Vetëvendosje, çdo tentativë për t’ia dhënë sërish mandatin kësaj partie do të përbënte humbje kohe, zvarritje të panevojshme dhe thellim të mungesës së besimit në institucione.

Ashtu siç dështoi Albin Kurti për të siguruar shumicën, do të dështojë çdo përpjekje tjetër për ta zgjatur artificialisht këtë proces nga Lëvizja Vetëvendosje. Realiteti politik është i qartë: askush nuk e ka shumicën për të formuar qeverinë nga kjo legjislaturë.

PDK konsideron se injorimi i këtij realiteti vetëm sa do ta thellonte krizën, do ta zgjaste pasigurinë institucionale dhe do ta dëmtonte më tej stabilitetin e vendit.

Në emër të përgjegjësisë dhe të besimit qytetar, Partia Demokratike e Kosovës bën thirrje për t’i dhënë fund çdo skeme zvarritëse, çdo improvizimi politik dhe çdo përpjekjeje për ta mbajtur peng shtetin për interesa të ngushta partiake.

Aktualisht, zgjidhja e vetme e drejtë dhe demokratike janë zgjedhjet e reja të parakohshme, që do t’i kthejnë sovranit, qytetarit të Republikës së Kosovës, të drejtën për të vendosur drejtimin e ardhshëm të vendit dhe për t’i dhënë legjitimitet institucioneve të reja.

Kriza e stërzgjatur gjatë këtij viti, e shkaktuar nga Lëvizja Vetëvendosje, përveç dëmit politik, ka goditur ekonominë, ka cenuar mirëqenien e qytetarëve, ka dëmtuar raportet me partnerët tanë ndërkombëtarë, ndërsa rreziku që buxheti i shtetit të mos kalojë me kohë dhe që vitin e ardhshëm qytetarët të mbeten pa paga, e bën edhe më të domosdoshëm përshpejtimin e procesit drejt zgjedhjeve të reja.

PDK mbetet e përkushtuar të kontribuojë në çdo proces që i shërben stabilitetit, funksionimit normal të institucioneve dhe forcimit të demokracisë parlamentare në vend.

Këto janë hapat që VV-ja duhet t’i ndjekë për të bindur Presidentën për mandatarin e radhës

Sot Kurti në mbledhjen e Këshillit të Përgjithshëm të VV’së e ka propozuar Glauk Konjufcën për mandatar të dytë për formimin e qeverisë.

Emri i tij pritet të dërgohet më pas te presidentja.

Ehat Miftaraj nga IKD ka thënë për Express se sipas Kushtetutës dhe aktgjykimit të vitit 2014 VV duhet ta bindë presidenten Osmani se i kanë 61 vota për të votuar qeverinë me mandatarin e ri.

“Mënyrat më të mira për të bindur presidenten se i kanë 61 vota është përmes mbledhjes së nënshkrimeve të deputetëve që votojnë pro, ose në rast të arritjes së një koalicioni mandatari të shkojë te Presidentja bashkë me liderin e asaj partie që së bashku me LVV I kanë 61 vota për votimin e qeverise”, tha Miftaraj.

Sipas tij, nëse nuk i vërtetohet kjo gjë, Osmani s’ka pse të thërrasë seancë të re por duhet menjëherë t’i shpallë zgjedhjet.

LDK-ja s’ka votë për Konjufcën: Le të thonë fjalën e tyre qytetarët në zgjedhje

Lidhja Demokratike e Kosovës ka reaguar pas propozimit të Glauk Konjufcës për mandatar të dytë për formimin e qeverisë, duke theksuar se tashmë është e qartë se asnjë subjekt politik nuk e ka shumicën e nevojshme parlamentare.

Sipas LDK-së, zvarritjet dhe interpretimet procedurale vetëm po thellojnë bllokadën institucionale, ndaj e vetmja zgjidhje legjitime janë zgjedhjet e reja.

Partia thotë se vendit i duhet qartësi dhe legjitimitet i ri politik, jo “zvarritje, pazare dhe improvizime”, duke bërë thirrje për veprim të shpejtë dhe në përputhje me Kushtetutën.

A do ta votojë PDK-ja Konjufcën për kryeministër? – Vjen reagimi i parë nga kjo parti

Deputetja e Partisë Demokratike të Kosovës, Blerta Deliu, ka reaguar pas propozimit të Glauk Konjufcës si mandatar i dytë për formimin e Qeverisë së Kosovës.

Përmes një postimi në rrjete sociale, Deliu ka kritikuar vendimin, duke e cilësuar si përpjekje për të zvarritur proceset politike në vend.

Sipas saj, zgjedhjet janë zgjidhja e vetme.

“Mandatari i ri pa shumicë është thjesht një lojë për të fituar kohë. Nëntë muaj dështim nuk mund të mbulohet me taktika politike. Zgjedhjet janë zgjidhja,” ka shkruar Deliu.

Ky reagim vjen pas njoftimit të Albin Kurtit se Lëvizja Vetëvendosje do të propozojë sërish të njëjtin kabinet qeveritar, me ndryshimin që këtë herë Konjufca do të jetë kandidat për kryeministër, ndërsa Kurti do të marrë postin e zëvendëskryeministrit të parë dhe ministrit të Jashtëm.

Haradinaj deklarohet pasi Glauku u mandatua për kryeministër

Kreu i AAK-së, Ramush Haradinaj, ka reaguar pasi kreu i LVV-së, Albin Kurti, e ka nominuar për kryeministër, Glauk Konjufcën.

Sipas Haradinajt, presidentja Vjosa Osmani s’mund ta mandatojë Konjufcën, derisa nuk deponohen 61 nënshkrimet e deputetëve të cilët e votojnë Qeverinë e re.

Kreu i AAK-së thotë se Osmani do të bënte shkelje të rëndë kushtetuese, nëse e mandaton Konjufcën pa e pasur një garanci të tillë.

Postimi i plotë

Afati kushtetues për votimin e qeverisë përfundon nesër dhe presidentja e vendit nuk ka mandat ta mandatojë askënd për krijimin e qeverisë, pa dëshminë se kandidati i nominuar e ka shumicën e nevojshme.

Shumica e nevojshme dëshmohet vetëm me nënshkrime të deponuara të deputetëve. Në çdo situatë tjetër presidentja bën shkelje të rëndë kushtetuese. Kandidatura e dytë nga VV për qeveri është veç përpjekje për të vazhduar kapjen e institucioneve të shtetit, në kundërshtim me krejt normat kushtetuese e politike.

Kjo farsë duhet të marrë fund menjëherë dhe vendi të shkojë në zgjedhje të jashtëzakonshme.

Glauku mandatari i ri për kryeministër, ish-opoizta i drejtohen Presidentës me këtë vendim

Kryetari i Vetëvendosjes, Albin Kurti, ka propozuar Glauk Konjufcën për mandatar të dytë për formimin e qeverisë, duke e prezantuar atë si një shans të ri.

Por, as Konjufca s’do të gjejë mbështetje te partitë ish-opozitare.

Siç merr vesh Gazeta Express këto parti qysh tani kanë thënë presidentes Vjosa Osmani se nuk do të votojnë Konjufcën në rast se emri i tij prezantohet në foltoren e Kuvendit.

Kurti të dielën e 26 tetorit dështoi të marrë votat e nevojshme në Kuvend për formimin e qeverisë meqë në seancë shkoi pa një marrëveshje./Express/

Kurti propozon Glaukun për kryeministër, vetveten për…

Kryetari i Lëvizjes Vetëvendosje, Albin Kurti e ka propozuar të martën Glauk Konjufcën si mandatar të dytë për formimin e qeverisë.

Propozimin, ai e bëri në mbledhjen e Këshillit të Përgjithshëm.

“Dua të bëj një propozim të menduar mirë. E bëj këtë propozim jo për të bërë lëshim, sepse për Lëvizjen Vetëvendosje kurrë nuk ka për të vendosur ndonjë subjekt tjetër”, tha Kurti në mbledhjen e KP të Vetëvendosjes.

“Pas diskutimeve të zhvilluara në kryesinë e Lëvizjes Vetëvendosje, unë si kryetar do të propozojë që mandatin për formimin e qeverisë t’ia japim nënkryetarit, aktivistit, shokut e mikut, Glauk Konjufca”, tha ai.

Kurti tha se këtë propozim e bën për shkak të vlerësimit të madh që kanë të gjithë për Glauk Konjufcën.

Kurti, po ashtu e propozoi vetveten për ministër të Jashtëm në qeverinë ku mandatar për kryeministër e propozoi Konjufcën.

“Unë marrë vendin e Glaukut, e Glauku timin”, tha kryetari i Vetëvendosjes.

Kurti e paraqiti propozimin e Konjufcës si mandatar për kryeministër si një hap kompromisi në mënyrë që opozita të votojë qeverinë e re, të cilën nuk do ta drejtonte ai.

Glauk Konjufca për mandatarin: Do ta mësoni kur të zbres poshtë

Deputeti i Vetëvendosjes, Glauk Konjufa nuk ka pranuar të deklarohet rreth asaj se emri i tij është përmendur që të jetë për mandatar të ri për kryeministër.

Ai teksa hyri në zyrat e VV-së, atje ku do të mbahet mbledhja e Këshillit të Përgjithshëm të VV-së, tha se “Do ta mësoni kur të zbresë poshtë”.

Kush do të jetë mandatari i ri për kryeministër? Flasin nga VV-ja

Nënkryetarja e Kuvendit të Kosovës, Albulena Haxhiu, nuk kanë thënë nëse Albin Kurti do të jetë sërish emri për mandatar të ri për kryeministër apo do të ketë një emër tjetër.

“Pas mbledhjes së Këshillit, Këshilli e vendos”, tha shkurt ajo teksa hyri në zyrat e Vetëvendosjes ku edhe do të mbahet pas pak mbledhja e Këshillit të Vetëvendosjes.

Kurti ka zhvilluar takim me Osmanin gjer në ora 11:15, mëngjesin e së martës.

Takimi është mbajtur një ditë para se të finalizohet afati kushtetuese për të dërguar mandatar të ri për formim të qeverisë ose jo, për çka në takimin e fundit Kurti i ka kërkuar Osmanit që të presë në mos do të dërgojë mandatar të ri.

Mblidhet LVV, votohet mandatari për kryeministër

Këshilli i Përgjithshëm i Lëvizjes Vetëvendosje do të mblidhet sot për të caktuar mandatarin e ri për kryeministër.

Në rendin e ditë të kësaj mbledhje që ka siguruar Tëvë1 mbledhja do të mbahet nga ora 12:00.

Të dielën Qeveria Kurti III nuk mori votat e mjaftueshme në Kuvend.

Partitë ish-opozitare kanë thënë se nuk do të provojnë të formojnë qeveri, duke kërkuar zgjedhje.

Në takimin e presidentes Osmani me liderët e partive politike nuk u arrit ndonjë marrëveshje. Aty u tha se Kurti kërkoi që të provojë edhe një herë formimin e qeverisë.

Nga LVV kanë thënë se nuk kanë mandatar tjetër pos Kurti për kryeministër, ndërsa sipas njohësve të Kushtetutës, Kurti nuk i lejohet në këtë moment të jetë mandatar.