Zafir Berisha zyrtarizon kandidimin për deputet – partia që zgjodhi do t’ju habisë

Zafir Berisha ka konfirmuar se do të jetë pjesë e listës së kandidatëve për deputetë nga Aleanca për Ardhmërinë e Kosovës (AAK).

Ai thotë se ka vendosur t’i hyjë kësaj gare për të luftuar, siç e quan ai, “të keqen” që e ka kapluar vendin.

Berisha thekson se lidhja e tij me kryetarin e AAK-së, Ramush Haradinajn, buron nga e kaluara e përbashkët për liri dhe nga përgjegjësia që, sipas tij, të dy e ndiejnë ndaj Kosovës.

Prandaj, ai e sheh angazhimin e tij të tanishëm politik si vazhdimësi e këtyre përpjekjeve.

“Rreshtimin tim në këtë betejë e shoh si vazhdimësi të përpjekjeve tona dhe të të gjithë atyre që e duan Kosovën seriozisht dhe pa mashtrime”, ka shkruar Berisha në Facebook.

Ai ka komentuar edhe pritjet që mund të rreshtohej krah Bedri Hamzës, duke deklaruar se Hamza është “kandidat kukull në duart e pionerëve pa libreza të PDK-së”, dhe se po përdoret për skenarë që, sipas tij, u panë edhe më 9 shkurt.

“Unë nuk kam mund të jam pjesë e asaj loje”, ka shtuar Berisha, duke theksuar se kandidimi i tij vjen “për Kosovën, jo për figurina politike që lëvizin sipas interesave të dikujt tjetër”.

Motra e Donika Kadajt hyn në garë për deputete – surprizë partia që zgjodhi!

Motra e Donika Kadaj-Bujupit, Ena Kada, ka hyrë në garën për deputete të Kuvendit.

Kadaj do të garojë në këto zgjedhje në kuadër të Partisë Vakat, shkruan IndeksOnline.

E lindur në Sarajevë dhe me kontribut të madh në gastronomi dhe jo vetëm në Prishtinë, prej kohësh ajo po dëshmon aftësitë e saj në politikë.

Kadaj ka kohë që është aktive në këtë fushë, duke qëndruar krah për krah me motrën e saj.

Ajo po ashtu është e angazhuar me punë edhe në Ministrinë e Mbrojtjes.

Ende nuk dihet se cilin numër do ta bartë në partinë e Rasim Demirit.

Kujtojmë se zgjedhjet e parakohshme për Kuvend do të mbahen më 28 dhjetor.

Analisti i T7 i bashkohet Listës GUXO

Bashkëkryetarja e Listës Guxo, Donika Gërvalla, ka bërë të ditur se analisti dhe ekonomisti, Viktor Buzhala, i është bashkuar partisë, duke u bërë pjesë e listës së koalicionit për zgjedhjet e 28 dhjetorit.

Gërvalla e ka përshkruar Buzhalën si një nga zërat më të dalluar të debatit publik në Kosovë.

“Viktor Buzhala ka dhënë një kontribut të rëndësishëm përmes shkrimeve, analizave dhe debatave publike, duke ndikuar në formësimin e diskutimeve kombëtare mbi ekonominë dhe politikat publike”, ka shkruar Gërvalla në një postim.

Sipas bashkëkryetares së Guxo-s, përfshirja e Buzhalës në listën e koalicionit me Lëvizjen Vetëvendosje, Alternativën dhe PShDK-në e forcon ekipin e profesionistëve që synojnë të sjellin ndryshim për vendin dhe qytetarët.

“Bashkë me Viktor Buzhalën dhe profesionistë të tjerë të përkushtuar, angazhimi ynë për një Kosovë më të drejtë, më të zhvilluar dhe demokratike do të jetë më i fuqishëm dhe i vendosur”, tha Gërvalla.