Votoi kundër rezolutës për Specialen, Geci: Shumë krenar për veprimin, jam kundër individëve në Hagë

Deputeti i Lëvizjes Vetëvendosje, Fatos Geci, ka dalë hapur kundër rezolutës së miratuar nga Kuvendi i Kosovës lidhur me Dhomat e Specializuara dhe Zyrën e Prokurorit të Specializuar, duke e cilësuar atë si një dokument që synon mbrojtjen e individëve.

Kuvendi i Kosovës miratoi rezolutën e propozuar nga Partia Demokratike e Kosovës me 90 vota për dhe vetëm një kundër, pikërisht atë të Gecit.

Rezoluta përmban shtatë pika dhe kërkon që Dhomat e Specializuara dhe Zyra e Prokurorit të veprojnë në përputhje me standardet kushtetuese dhe ndërkombëtare, duke garantuar një proces të drejtë dhe të paanshëm, si dhe duke rritur transparencën dhe llogaridhënien.

Megjithatë, në Debat Plus Geci e ka kritikuar përmbajtjen e saj.

“Në tërësi jam kundër krerëve, jo të UÇK-së por të individëve dhe jam shumë krenar për veprimin që e bëra. Teksti flet për mbrojtjen e individëve të cilët janë në Hagë, në Gjykatën Speciale”, ka thënë Geci.

Pse LDK nuk votoi për rezolutën për Gjykatën Speciale?

Lidhja Demokratike e Kosovës nuk mori pjesë në votimin për miratimin e rezolutës së Gjykatës Speciale, e cila u propozua nga Partia Demokratike e Kosovës.

Rezoluta e cila kërkon respektim të ligjit dhe drejtës ndërkombëtare nga Dhomat e Specializuara të Kosovës dhe Zyra e Prokurorit të Specializuar, u votua nga 90 deputetë, por jo edhe nga ata të LDK-së.

Jehona Lushaku, shefe e Grupit Parlamentar të LDK-së, kërkoi nga Kuvendi që në rezolutën ndaj Speciales të përfshihet edhe një pikë shtesë.

Përmes kësaj pike, LDK-ja kërkoi që të zbardhen vrasjet politike gjatë dhe pas luftës në Kosovë.

“Kërkojmë nga të gjitha institucionet dhe organet e rendit të Republikës së Kosovës, si dhe inkurajojmë mbështetjen ndërkombëtare për intesfikimin drejt zbardhjes së plotë të vrasjeve të pazbuluara të ndodhura gjatë dhe pas luftës në Kosovë me qëllim që të zbardhet e vërteta”, tha Lushaku në fjalën e saj.

Lidhja Demokratike e Kosovës nuk mori pjesë në votim, ashtu sikurse edhe deputetët e Listës Serbe që nuk ishin prezent në sallë.