Një sjellje e zakonshme në tavolinë mund të jetë paralajmërim për probleme të rënda shëndetësore.
Mjekësia njeh mbi 200 lloje të ndryshme të kancerit, disa me simptoma të dukshme, ndërsa të tjera mund të shfaqen në mënyrën se si konsumoni ushqimin, duke përbërë shenja paralajmëruese që nuk duhet të neglizhohen.
Zbulimi i hershëm i tumoreve shpesh është vendimtar dhe shpëtimtar, ndaj është shumë e rëndësishme të jeni të vetëdijshëm për çdo shenjë të mundshme. Megjithatë, shumë simptoma mund të kenë edhe shkaqe të padëmshme.
Nëse ndjeni ndonjërën nga simptomat e mëposhtme, vizitoni mjekun sa më shpejt të jetë e mundur, sipas raportimit të Mirror.
Organizata bamirëse Macmillan, e cila ofron mbështetje për pacientët me kancer dhe familjet e tyre, thekson se disa simptoma të përgjithshme mund të ndikojnë në mënyrën e të ngrënit:
Humbja e oreksit – Nëse nuk keni dëshirë të hani si zakonisht ose ngopeni shumë shpejt, bisedoni me mjekun tuaj të familjes.
Vështirësia në gëlltitje – Përtypja e vështirë, ndjesia sikur diçka ju ka mbetur në fyt, ose problemet gjatë gëlltitjes mund të jenë shenjë paralajmëruese.
Macmillan rekomandon gjithashtu të vëzhgoni barkun gjatë darkës. Barku i fryrë ose i ënjtur, sidomos nëse kjo ndodh shpesh ose zgjat gjatë, mund të tregojë probleme serioze. Fryrja e barkut mund të jetë simptomë e shumë gjendjeve, por shfaqet edhe në disa lloje kanceri, si tumoret e vezoreve, tubave fallopiane ose peritoneumit.
Organizata paralajmëron gjithashtu për ndryshimet në jashtëqitje që zgjasin tre javë ose më shumë. Jashtëqitja e holluar, e lëngshme ose e fortë, nevoja më e shpeshtë për të kryer nevojat, apo prania e gjakut duhet të konsiderohen si sinjale alarmi.