Specialja i ishte përgjigjur letrës së Kurtit, zbulohet se çfarë i kishte thënë Trëndafilova

Zëdhënësi i Dhomave të Specializuara të Kosovës (DhSK) në Hagë, Michael Doyle ka treguar se letrës së kryeministrit në detyrë, Albin Kurtit i ishte përgjigjur kryetarja e Gjykatës Speciale, Ekaterina Trëndafilova.

Doyle ka thënë se në letrën e saj, Trëndafilova ka thënë se vendimet në rastet gjyqësore- specifikisht për paraburgimet, merren nga gjyqtarët në rastet përkatëse dhe jo nga vetë ajo si kryetare e DhSK-së, raporton “Betimi për Drejtësi“.

“Një letër nga Kryeministër Kurti i është dërguar kryetares në shtator 2022 dhe ajo iu përgjigj kësaj letre. Kryetarja në përgjithësi ka theksuar në përgjigje se DHSK-ja dhe gjykatësit janë të pavarur në punën e tyre dhe se ata po zhvillojnë gjykimet sipas kornizës ligjore të DHSK-së dhe standardeve më të larta të të drejtave të njeriut. Ajo gjithashtu ka theksuar se vendimet në lidhje me paraburgimet merren nga trupat gjykues kompetentë në çdo çështje gjyqësore, dhe jo nga kryetarja”, ka thënë Doyle.

Ndryshe, duke folur për proceset gjyqësore në këtë Gjykatë, Doyle ka treguar se në rastin ndaj ish-krerëve të UÇK-së, gjykimi do të vazhdojë të hënën nga ora 14:00 deri në orën 17:00 duke mos llogaritur 45 minutat vonesë në transmetim.

Sipas Doyles, mbrojtja e Hashim Thaçit, synon që të thërrasë edhe tre dëshmitarë të tjerë në këtë proces. Ndërsa, në pasditen e 18 nëntorit pritet të fillojë dëshminë Wesley Clark i cili është dëshmitari i fundit që kjo mbrojtje synon që ta thërrasë.

Ai tregoi se këtij rasti iu shtua edhe një seancë më 21 nëntor 2025, në mënyrë që Clark të përfundojë me dëshminë e tij.

Veç kësaj, se fundi thuhet se është marrë edhe një vendim ndaj ankesës së mbrojtjes së Prokuroria s’ka nxjerrë me kohë materialet për mbrojtjen. Kërkesa u hodh poshtë pasi nuk u vërtetuan pretendimet e mbrojtjes.

“Trupi Gjykues vuri në dukje se “respektimi i plotë dhe në kohë nga Prokuroria i detyrimit të saj për nxjerrjen e materialeve është element dhe garanci e rëndësishme për drejtësinë e procesit dhe barazinë midis palëve, ZPS-së dhe Mbrojtjes”. Trupi gjykues konstatoi se ZPS-ja nuk i kishte dhënë mbrojtjes njoftim të hollësishëm për disa materiale dhe prova në posedim të saj dhe gjykatësit i kujtuan ZPS-së rëndësinë e përfshirjes së materialeve në njoftimin sipas Rregullës 102 (3). Njëkohësisht, trupi gjykues konstatoi se materialet ishin nxjerrë pa vonesë dhe nuk i kishin shkaktuar dëm mbrojtjes, dhe e hodhi poshtë kërkesën”, tha ai.

E rëndë: Dy vëllezërit Morina u vranë në sy të motrës dhe mbesës së tyre

Detaje të reja kanë dalë në dritë lidhur me vrasjen e dyfishtë që tronditi sot Malishevën.

Klankosova.tv ka mësuar se i dyshuari Astrit Isufi (dhëndër i familjes) u mori jetën vëllezërve Driton dhe Naim Morina, në prani të motrës së tyre.

Burimet kanë treguar për redaksinë se motra e viktimave ka qenë në veturë bashkë me vajzën, kur i dyshuari kreu vrasjen.

“I dyshuari ka ardh me marrë gruan e tij e cila ka qenë tek familja e saj, përkatësisht tek viktimat. Incidenti ka ndodh pasi kanë dalë nga shtëpia dhe janë nis, pas disa metrave i dyshuari është ndalë ka dalë nga vetura dhe e ka kryer veprën ndërkohë që gruaja(motra e viktimave) dhe vajza e tij kanë qenë në veturë”.

Redaksia po ashtu ka mësuar se Astrit Isufi i cili aktualisht gjendet në arrati, është emër i njohur për organet e rendit.

I njëjti i ka qenë i dyshuar për dy vepra penale, ‘Dhunë në familje’ dhe ‘Kanosje’.

Në anën tjetër, lidhur me rastin është deklaruar edhe Prokuroria Themelore në Gjakovë, e cila tha se po ndërmerren të gjitha veprimet e nevojshme me qëllim të lokalizimit dhe arrestimit të personi që vrau vëllezërit në fshatin Gollubovc të Malishevës.

SMS i Kurtit për studentët, Abdixhiku: S’e blejnë as heshtjen as votën, regjim i frikësuar në rënie të lirë

Sot, kryeministri në detyrë, Albin Kurti, vetëm tre ditë para balotazhit të 9 nëntorit, ka njoftuar se është bërë pagesa për grupin e parë të studentëve që janë kualifikuar si përfitues të 100 eurove.

Lidhur me këtë ka reaguar kryetari i Lidhjes Demokratike të Kosovës, Lumir Abdixhiku. Ky i fundit vlerësuar se ‘’regjimi i frikësuar’’ i Kurtit, po i trajton studentët si material shitblerje zgjedhor.

‘’Të ardhmen që ua vodhi, në shtetin më të varfër e më të izoluar në Evropë, me arsimin ndër më të fundit në botë, provon t’ua blejë me 100 euro për votë – tre ditë para balotazhit’’, ka thënë ai mes tjerash.

Të ardhmen që ua vodhi, në shtetin më të varfër e më të izoluar në Evropë, me arsimin ndër më të fundit në botë, provon t’ua blejë me 100 euro për votë – tre ditë para balotazhit.

Një regjim i frikësuar dhe në rënie të lirë, po trajton studentët e Kosovës si material shitblerje zgjedhor. Studentët drejtojnë kohë, rrëzojnë regjime e përcaktojnë epokë.

Prandaj, këta SMS ‘cringe’, para zgjedhjeve nuk blejnë as heshtjen, as shpresën. As votën.

I keni nënçmuar.

Do t’iu kthejnë përgjigje këtë të diel me votë. 

Kosova është shumë e mençur se sa po e trajton kryepopullisti sot!

Mesazhi i Kurtit në telefon studentëve, deputeti Guri: Nuk blihen studentët me 100 euro

Deputeti i LDK-së, Paris Guri, ka reaguar pasi kryeministri në detyrë Albin Kurti u ka dërguar mesazh studentëve duke ua përmendur 100 euro që janë ndarë nga buxheti i Republikës së Kosovës.

Një mesazh të tillë ai e ka vlerësuar si përpjekje e liderit të VV-së për blerje të votave për raundin e dytë të zgjedhjeve lokale, të cilat do të mbahen këtë të diele.

Në profilin e tij në “Facebook”, Guri ka shkruar se pushteti është bërë i lexueshëm në veprime.

“O po lehte te lexueshem jeni. Nuk blihen studentet me 100 euro!”, ka shkruar ai.

Publikohen pamjet: Ushtarët serbë hynë në Kosovë

Në fshatin Rakinicë të Podujevës, ushtarë të armatosur të xhandarmërisë serbe kanë kaluar kufirin duke hyrë në territorin e Kosovës.

Me reagime të shumta që nga Presidentja e zyrtarë tjerë të shtetit është pritur ditëve të fundit informacioni se xhandarmëria serbe hyri në territor të Kosovës në veri, kidnapoi një qytetar dhe u largua.

Por, kjo nuk është hera e vetme që forcat serbe së fundmi kanë kaluar në Kosovë.

Rtv Dukagjini posedon që nga mesi i tetorit një video sesi forcat serbe hyn në vend por kah veri-lindja, saktësisht në fshatin Rakinicë, në afërsi të Orllanit të Podujevës.

Por, televizioni ka qenë në pritje të një konfirmimi për rastin nga Policia e Kosovës, pyetjet të cilëve u janë drejtuar që nga 20 tetori dhe ende nuk ka një përgjigje.

Megjithëkëtë, konfirmimin e krejt ngjarjes e ka bërë misioni i NATO-s në Kosovë, KFOR-i.

Çitaku publikon një sms me të cilin Kurti iu drejtohet studentëve për 100 eurot: Mashtrim, abuzim, papërgjegjësi

Sot, kryeministri në detyrë, Albin Kurti, vetëm tre ditë para balotazhit të 9 nëntorit, ka njoftuar se është bërë pagesa për grupin e parë të studentëve që janë kualifikuar si përfitues të 100 eurove.

Për këtë ka reaguar deputetja e Partisë Demokratike të Kosovës, Vlora Çitaku. Kjo e fundit këtë veprim të qeverisë në detyrë e cilësoi si ‘’abuzim me taksat e qytetarëve’’ të Kosovës, gjë e cila po bëhet për ‘’nevojat elektorale’’ të Kurtit.

Çitaku ka deklaruar edhe se kjo gjë s’është kujdes social e as mbështetje për rininë, porse, siç ka vlerësuar ajo, është mashtrim, manipulim, papërgjegjësi dhe panik.

Në postimin e saj, deputetja Çitaku ka ndarë edhe një fotografi përmes të cilit shihet se Kurti i është drejtuar studentëve lidhur me 100 eurot e ndara për ta.

Postimi:

Ja si duket abuzimi me taksat e qytetarëve të Republikës së Kosovës për nevoja elektorale të Kryetarit të LVV.

Vetëm tre ditë para zgjedhjeve, me paratë e qytetarëve të varfëruar, të cilëve ua ka shtrenjtëuar rrymën për t’i shërbyer mafias energjetike, ai shpërndan nga 100 euro për studentët.

Ky nuk është as kujdes social, as mbështetje për rininë.

Është mashtrim.

Është manipulim.

Është papërgjegjësi.

Dhe mbi të gjitha, është panik.

Hospitalizohet Përparim Rama

Përparim Rama, kandidat për mandat të dytë për kryetar të Prishtinës është hospitalizuar ndërsa një ambulancë, siç merr vesh Nacionale, ka shkuar t’i ofrojë ndihmë mjekësore.

Kjo edhe në ditën kur Përparim Rama e ka të caktuar debatin e fundit për balotazhin e së dielës, me Hajrull Çekun e Vetëvendosjes.

Me ç’merr vesh Nacionale, Rama mund të ketë kapur grip sezonal – ndërsa ende s’dihet nëse kjo gjë do të jetë edhe pamundësim për të marrë pjesë në “Debat Plus” mbrëmjen e së enjtes.

Dalin 100 eurot e studentëve

Kryeministri në detyrë, Albin Kurti, ka njoftuar se sot është procesuar pagesa për grupin e parë të studentëve që janë kualifikuar si përfitues të shumës së njëhershme prej 100 eurove, me rastin e fillimit të vitit të ri akademik, shkruan Reporteri.net.

Ai ka thënë se pjesa e mbetur e aplikuesve që plotësojnë kriteret për përfitim do të shqyrtohen dhe procesohen me grupin e dytë në ditët në vijim.

“Sot është procesuar pagesa për grupin e parë të studentëve që janë kualifikuar si përfitues të shumës së njëhershme prej 100 eurove, me rastin e fillimit të vitit të ri akademik. Janë gjithsej 49,623 studentë përfitues të të gjitha drejtimeve e institucioneve arsimore, publike e private që janë procesuar me grupin e parë. Pjesa e mbetur e aplikuesve që plotësojnë kriteret për përfitim do të shqyrtohen dhe procesohen me grupin e dytë në ditët në vijim. Me qeverinë tonë, studentët çdoherë do të kenë mbështetjen e shtetit”, ka shkruar Kurti.

Detaje të reja nga vdekja e 25-vjeçares nga Gjakova: Pati presion fizik dhe psikik nga i dashuri i saj

Gazetarja Liridona Vejseli ka thënë se Daorsa Spahiu, 25-vjeçarja nga Gjakova, që vdiq mbrëmë në Tetovë të Maqedonisë së Veriut, pati vazhdimisht presion fizik dhe psikik nga i dashuri i saj.Në emisionin “Kosova Today”  ajo ka deklaruar se dëshmitarët okularë në vendin e ngjarjes i kishin thënë asaj se vazhdimisht e ndjera kishte pasur probleme dhe se kishin dëgjuar britma nga banesa e saj.

“Fjalët e para që na thanë banorët që banonin aty, ishin se vajza në fjalë ka vuajtur dhe se ka pasur shumë britma dhe dhunë fizike, si dhe një gjendje të tensionuar fizike të sajën”.“Edhe komshinjtë tjerë që e patën afër, atë e kanë fotografuar dhe e kanë regjistruar, sepse vajza disa herë në ballkonin e banesës së saj ka qarë, ka dashur të bëjë vetëvrasje, është kthyer prapë, ka folur në telefon, ka qarë dhe ka shkruar mesazhe. Pra, rrethanat të gjithë i dinë se vajza ka pasur probleme dhe askush nuk e ka marrë guximin t’i njoftojë autoritetet”, ka thënë Vejseli.

E njëjta ka pohuar se para se të ndodhte ngjarja, vajzës i kishte rënë telefoni në një kafene.“Aty ku është banesa, në anën tjetër ka një kafiteri, ku fillimisht kishte rënë telefoni i vajzës nga banesa mbi kafiteri. Pronari e kishte marrë telefonin dhe e kishte parë duke cingërruar, ku dikush e kishte thirrur dhe i kishte thënë se telefoni është i vajzës në fjalë dhe se për gjysmë ore do të shkonin që ta merrnin telefonin”, tha Vejseli.

Vejseli tha më tutje se pronari i kafiterisë kishte pritur që të shkonin ta merrnin telefonin dhe më vonë e kishte parë policinë në vendin e ngjarjes dhe e kishte kuptuar se vajza kishte vdekur.“Në vendin e ngjarjes, policia dhe prokuroria kishin gjetur barna për gjendje të rënduar të shëndetit mendor”, ka thënë ajo.

Ky është i dyshuari për vrasjen e dy vëllezërve në Malishevë, pronar i një auto-servisi

Astrit Isufi, pronar i një auto-servisi në Komoran të Drenasit, është i dyshuari për vrasjen e dyfishtë që ndodhi të enjten në mesditë në Golluboc të Malishevës.

Isufi, me origjinë nga Sankoci, fshat në Komunën e Gllogocit, dyshohet se vrau me armë zjarri Naim dhe Driton Morinën, dy miqtë e tij. Viktimat, sipas raportimeve të mediave, janë vëllezër me bashkëshorten e të dyshuarit.

Vrasja e dyfishtë ka ndodhur rreth orës 11:30, tha Policia e Kosovës.

“Rreth orës 11:30, Policia e Kosovës është njoftuar se dy persona të gjinisë mashkullore, të moshës madhore (vëllezër), janë dërguar në Qendrën e Mjekësisë Familjare në Kijevë, si pasojë e plagëve të marra nga arma e zjarrit në fshatin Gulluboc të Malishevës”, tha Sheremet Elezi, zëdhënës i Policisë së Kosovës për rajonin e Gjakovës.

I dyshuari, Astrit Isufi, ndodhet në arrati nga organet e rendit.

Portali Klan Kosova raporton se njësitet policore kanë kryer të enjten bastisje në Auto-Servis ‘Astriti’ në Komoran të Drenasit, i cili është në pronësi të të dyshuarit.