Dërguti: VV po i kryen favore Listës Serbe duke mos ua zgjedhur nënkryetarin

Aida Dërguti, ka komentuar zhvillimet në Kuvendin e Kosovës dhe mbledhjen e kryesisë e cila pritet të mbahet nesër, ndonëse nuk është zgjedhur nënkryetari i pestë nga pakicat serbe.

Dërguti tha se ky është një kalkulim tjetër elektoral i Lëvizjes Vetëvendosje, duke qenë, sipas saj, të pakënaqur me rezultat e 9 shkurtit, të gjitha përpjekjet tha se shkojnë në drejtim që ta çojnë vendin në zgjedhje të parakohshme.

“Fillimisht me zgjedhjen e kryetarit të kuvendit u duk se u zgjidh kjo krizë, por hapi i dytë, që duket shumë i çuditshëm, pra ku diskohet për emra të përveçëm të nënkryetarëve, e që është absurd”.

“Kjo nënkupton që veprimet e Vetëvendosjes tenton ta zvarris duke bërë qëllimisht një shkelje kushtetuese, që prapë do të kërkojë një afat shtesë të shqyrtimit të kërkesës kushdo që i drejtohet Gjykatës Kushtetuese dhe me siguri e kanë planin që zgjedhjet parlamentare të jenë të njëkohshme me zgjedhjet lokale, nëse arrijnë ta bëjnë këtë”, tha Dërguti në “Info Magazine” në Klan Kosova.

Tutje, Dërguti tha se në prag të zgjedhjeve lokale, VV-ja po i kryen një favor Listës Serbe, duke e problematizuar zgjedhjen e nënkryetarit të kuvendit nga kjo parti.

“Pra duke e problematizuar zgjedhjen e nënkryetarit nga Lista Serbe po i kryen një favor për këto zgjedhje lokale sepse e dimë që Rashiqi nuk përfiton nga kjo përkrahje apo nga kjo qasje që ka qeveria ndaj tij sepse votuesit serbë duan përfaqësuesit e tyre dhe jo dikë që instrumentalizohet nga Kurti”, tha ajo.

Deputetja e LDK’së publikon faturën: Çmimi i librave arrin 110 euro, subvencioni prej 80 eurosh nuk mjafton

Deputetja e Lidhjes Demokratike të Kosovës (LDK), Jehona Lushaku-Sadriu ka publikuar një faturë që tregon shpenzimet e blerjes së librave të klasës së shtatë.

Lushaku-Sadriu ka thënë se kostoja e asaj fature është 110 euro, pa përfshirë fletoret dhe mjetet e tjera të nevojshme për nxënësit, shkruan Insajderi.

“Kjo është një faturë e blerjes së librave të klasës së shtatë, pa i llogaritur fletoret e mjetet e tjera të nevojshme për nxënësit. E kam një pyetje për prindërit: A ia keni dalë t’i siguroni librat me një çmim prej 80 eurosh, aq sa është planifikuar subvencionimi? Unë jo“, ka shkruar ajo.

Tregu i lirë i energjisë – bizneset paralajmërojnë valë të re të shtrenjtimeve

Rritja e çmimit të energjisë elektrike gjatë muajit maj ka ndikuar që të rriten edhe kostot e ndërtimit dhe të prodhimit në tremujorin e dytë të këtij viti, krahasuar me periudhën e njëjtë të vitit paraprak.

Bazuar në të dhënat e Agjencisë së Statistikave, rritja e çmimit të energjisë është një prej faktorëve me ndikimin kryesor në rritjen e kostos së ndërtimit.

Energjia, sipas këtyre të dhënave, ka shënuar rritje prej 26.9 për qind krahasuar me periudhën prill-qershor të 2024-s. Rritje prej 5.5 për qind pati edhe krahasuar me tremujorin e parë të këtij viti.

Edhe çmimet e prodhimit u rritën për 11.3 për qind krahasuar me vitin e kaluar, e 4.1 për qind krahasuar me tremujorin e parë të këtij viti.

Arian Zeka, kryetar i Odës Ekonomike Amerikane, ka paralajmëruar për valë tjetër rritjesh në çmime, shkaku i daljes së bizneseve të mëdha në treg të lirë të energjisë, e të cilat, siç ka thënë, janë përballur me një rritje të kostos së operimit.

“Do të ketë ndikim në të gjitha hallkat e ekonomisë, përfshirë këtu edhe sektorin e tregtisë pashmangshëm që në dy-tre muajt e ardhshëm do të shohim edhe rritjen e çmimeve, edhe kjo do ta bëjë koston e jetesës së qytetarëve shumë më të shtrenjtë dhe me të ardhurat aktuale natyrisht edhe më të vështirë”, ka thënë Zeka.

Valë të re të rritjes së çmimeve kanë paralajmëruar edhe përfaqësues të bizneseve, pas marrjes së faturave të rrymës, e të cilat, sipas tyre, janë trefish më të larta sesa ato me çmime të rregulluara.

Lidhur me çështjen e daljes së bizneseve në treg të lirë të energjisë, Oda Ekonomike i është drejtuar Gjykatës Supreme, e cila të premten ka njoftuar se do ta shqyrtojë padinë, porse nuk e ka aprovuar masën e përkohshme për pezullim të njoftimit të ZRRE-së.

“Oda Ekonomike e Kosovës njofton se Gjykata Supreme ka vendosur që padia e ushtruar nga OEK ndaj Zyrës së Rregullatorit për Energji (ZRrE), lidhur me daljen e detyrueshme në tregun e lirë të energjisë, do të procedohet dhe do të shqyrtohet për vendim meritor. Tashmë është caktuar kolegji i gjyqtarëve i cili do ta trajtojë padinë ndaj ZRRE-së”.

Në Odën Ekonomike kanë shprehur pritjen që Gjykata t’i anulojë të gjitha aktet nënligjore të ZRRE-së, me të cilat janë përcaktuar kriteret për daljen në treg të lirë.

KOHA ka raportuar se rreth 200 euro për një megavat energji kanë paguar gjatë korrikut, bizneset që janë detyruar të dalin në treg të lirë të energjisë.

Faturat që i pranuan, sipas tyre, janë trefish më të larta sesa në periudhën kur janë furnizuar me çmime të rregulluara.

Për daljen në treg të lirë të bizneseve, Partia Demokratike i është drejtuar ditë më parë Gjykatës Kushtetuese për vlerësimin e ligjshmërisë së vendimeve të ZRRE-së.

Në mars, ZRRE-ja i njoftoi bizneset me mbi 50 punëtorë ose me 10 milionë euro qarkullim në vit se që nga 1 qershori do të dalin në treg të lirë, duke u detyruar që ta zgjedhin vetë furnizuesin.

Lajm aspak i mirë për bashkatdhetarët që jetojnë në Zvicër

Aktiviteti i ndërtimit nuk ka rënë ende aq ndjeshëm, por pritet të bjerë

Qiramarrësit zviceranë përballen me rritje të ndjeshme të qirave në vitet e ardhshme.

Sipas Martin Tschirren, kreu i Zyrës Federale të Strehimit, qiratë e reklamuara ka të ngjarë të rriten me 3-5% në vit. Kërkesa për strehim vazhdon të tejkalojë ofertën, tha ai për NZZ am Sonntag më 25 gusht 2025, ndërsa zyra e tij publikoi të dhënat e fundit të tregut të strehimit, transmeton albinfo.ch.

Mungesa kujton krizën e vitit 2014, kur vendet e lira ranë në minimumin historik. Edhe sot, furnizimi me banesa të reja po zvogëlohet. Lejet e ndërtimit kanë rënë me gati një të tretën që nga viti 2016, vëren Tschirren.

Aktiviteti i ndërtimit nuk ka rënë ende aq ndjeshëm, por pritet të bjerë. Opozita dhe apelimet ligjore janë fajtorët kryesorë pas projekteve të bllokuara, sipas një studimi që ai citoi. Raporti sugjeron kufizimin e së drejtës së apelimit për ata që preken drejtpërdrejt, duke mbajtur në vend të drejtat e konsultimit. Kjo do të frenonte pengesat oportuniste.

Dy forca më të thella janë gjithashtu në veprim. Strehimi është bërë një investim tërheqës, duke i çuar çmimet më lart. Dhe ndryshe nga e kaluara, bashkitë nuk mund ta zgjidhin më kërkesën në rritje thjesht duke rizonuar tokën – parcelat e disponueshme janë shumë të pakta.

Akti i Planifikimit Hapësinor i Zvicrës, i cili u votua me referendum, përcakton rregullat se si mund të përdoret dhe zhvillohet toka. Qëllimi i tij është të sigurojë që vendbanimet të rriten në një mënyrë kompakte dhe të rregullt, tokat bujqësore dhe peizazhet natyrore të mbrohen dhe infrastruktura të përdoret në mënyrë efikase. Duke vepruar kështu, ai kufizon rizonimin e tokës për ndërtimin e ndërtesave. Ligji u miratua nga Parlamenti në vitin 1979 dhe u miratua nga votuesit në një referendum më 22 qershor 1980. Që atëherë, reforma të ndryshme kanë shtrënguar rregullat mbi zonimin dhe rezervat e tokës.

Nëse ekonomia nuk rrëzohet, qiramarrësit që hyjnë në tregun zviceran të banesave dhe ata që lëvizin brenda tij duhet të përgatiten për qira më të lartë.

E rëndë në Drenas: Pamje nga vendi ku humbi jetën tragjikisht një e mitur

Një aksident me fatalitet ka ndodhur në rrugën Komoran-Drenas gjatë ditës së diel.

Rreth orës 17:00, në fshatin Zabel i Ulët të Drenasit, një automjet u përfshi në një aksident trafiku me pasoja të rënda.

Zëdhënësja e Policisë së Kosovës për rajonin e Prishtinës, Flora Ahmeti, ka dhënë detaje për Insajderin.

“Sot rreth orës 17:00 kemi pranuar informatën se në fshatin Zabel i Ulët të Drenasit ka ndodhur një aksident trafiku me pasoja fatale. Në këtë aksident ka qenë i përfshirë një automjet. Si pasojë e aksidentit një person ka mbetur i vdekur dhe janë lënduar katër të tjerë. Vdekja e viktimës (e mitur) është konstatuar nga ekipi mjekësor në vendin e ngjarjes, ndërkohë që personat e lënduar janë dërguar për tretman mjekësor”, ka thënë ajo.

Gazeta lokale ‘DrenicaOnline’ ka publikuar pamje nga vendi i ngjarjes:

‘Kemi pasur plane tjera’, rrëfehet për herë të parë gruaja e Edmond Hasanit që u vra në Gjilan

Pak muaj pas kurorëzimit, Njomza Hasani përballet me humbjen më të madhe të jetës – vrasjen e trefishtë tragjike në qendër të Gjilanit ku humbën jetën bashkëshorti i saj, Edmond Hasani, babai i tij, Selami Hasani, dhe Abedin Hoxha.

Në një intervistë për Vox News Kosova, Njomza rrëfeu se për disa ditë është larguar nga Kosova për të marrë pak ajër dhe për të lehtësuar dhimbjen që e ka përfshirë gjithçka rreth vetes:

“Jam larguar prej Kosovës për disa ditë pasi, siç dihet, nuk ka shumë muaj që kemi bërë kurorëzimin. Kemi qenë të përgatitur për plane tjera, për jetë tjetër, për gjithçka tjetër. Ndodh një vrasje që ta shkatërron jetën. Kam ardhur vetëm për disa ditë që të liroj mendimet e mia, mërzinë time dhe të kthehem pak. Më është dashur të largohem, sepse mërzia është shumë e madhe për mua, për familjarët e Edmondit dhe për familjarët e Selamit.”

Ajo theksoi se kushdo në Gjilan e dinte se me kë kishin të bënin personat e përfshirë në këtë krim:

“Edhe me u vra në mes të ditës, në mes të qytetit, nga persona që kanë pasur shumë padi në polici… Ka insistuar me i takuar e me i vrarë persona pa i pasur asnjë borxh. Asnjë borxh. Ky është një rast i prerjes në besë, rasti i Edmondit dhe Selamit.”

Autorët e dyshuar, Mefail Shkodra dhe dy djemtë e tij, Edonis dhe Engjull, ndodhen ende në arrati dhe të njëjtit janë shpallur në kërkim nga policia menjëherë pas rastit.

Vdes profesori i njohur deçanas

Ka vdekur profesori i shquar Demë Hasanramaj, një prej figurave më emblematike të arsimit dhe sportit në qytetin e Deçanit, shkruan GazetaDemos.

Profesor Demë Hasanramaj ishte i njohur për përkushtimin e tij të palodhur ndaj arsimit shqip dhe për kontributin e jashtëzakonshëm në zhvillimin e sportit në komunën e Deçanit.

Me gjallërinë, përpikmërinë dhe karizmën e tij prej pedagogu, ai edukoi breza të tërë me dije, kulturë dhe vlera njerëzore.

Brezi i tij në gjimnazin “Vëllezërit Frashëri” konsiderohet si brezi i artë, që la gjurmë të pashlyeshme në historinë e këtij institucioni arsimor. Ishte njeri i veçantë, me integritet të lartë dhe respekt të gjerë në mesin e kolegëve, nxënësve dhe qytetarëve të Deçanit.

Armend Muja alarmohet nga një status i Berat Buzhales, fton institucionet e sigurisë

Deputeti i VV-së, Armend Muja është frikësuar nga një postim i gazetarit, Berat Buzhala.

Buzhala, i cili njihet për shkrimet me ironi e shaka, në një postim, me shaka kishte shkruar: “Nese vendosim me hy neper institucione, Dimalin lemnani mu.”

E, ky postim i gazetarit e ka frikësuar deputetin e pushtetit. Muja e ka quajtur postimin si thirrje për dhunë.

“Kjo është thirrje për dhunë, me të cilën duhen të merren institucionet e sigurisë.”, ka shkruar Muja në postimin e tij.

Mbetet të shihet nëse pushteti do vihet pas gazetarëve edhe për postimet në Facebook./Periskopi/

Mësimdhënësit drejt shteteve të Perëndimit, mbi 600 kanë lënë Kosovën këtë vit

Një pjesë e madhe e kosovarëve janë duke lënë vendin e tyre për të shkuar në shtetet e Perëndimit.

Në mesin e këtyre qytetarëve janë edhe mësimdhënësit.

Nënkryetari i SBASHK-ut, Ymer Ymeri, në Klan Kosova, ka pohuar se mbi 600 mësimdhënës kanë lënë vendin për të shkuar në Evropë gjatë vitit shkollor 2024/2025.

“Sa i përket çështjes së ikjes, edhe mësimdhënësit, sikurse pjesa tjetër e popullatës, janë duke e lëshuar vendin e punës. Madje, kemi edhe drejtorë shkollash.

“Nuk kemi shifra të sakta, por numri është mbi 600 që kanë lëshuar vendin për të migruar. Kjo shifër është deri në përfundimin e vitit shkollor 2024/2025. Por tani, gjatë pushimeve, ky numër mund të rritet edhe më shumë,” tha Ymeri.

Incident në Prizren: Grushte e plumba midis qytetit

Lajmi në Prizren u nda shpejtë.

Prizrenasit mësuan për një përleshje që përfundoi me shkrepje plumbash mbrëmjen e së shtunës.

Incidenti kriminal fillesat i pati në rrugën ”Ismet Jashari – Kumanova/Xhavit Bajraktari”.

Të përfshirë në kacafytje, siç mëson Klan Kosova, ishin Zejnel Begolli, 29 vjeç dhe Vahit Salihu, 25.

Viktima u nis menjëherë për trajtim mjekësor, ku pas trajtimit gjendja iu stabilizua dhe gjendet jashtë rrezikut për jetë.

Por, keqbërësi iku menjëherë bashkë me veturën e tij të tipit “Opel Corsa” në një drejtim tjetër.

Megjithatë, s’shkoi shumë dhe u lokalizua nga policia, nga të cilët edhe u konfiskuan disa elemente.

Klani mëson se konflikti mes dyshes s’nisi sefte këtë vikend.

Dyshohet se këta kishin raporte jo fort të mira prej kohësh, duke përfshirë edhe familjarë të tjerë.

Kjo nuk qe as hera e parë që ishte përdorur arma, pasi shpesh kishin provokuar njëri-tjetrin përmes të shtënave.

Në anën tjetër Begolli, ka pak kohë që është liruar nga burgu, pasi edhe ai ka të kaluar të errët për organet e rendit.