Kompania Rajonale e Ujit “Prishtina” ka njoftuar se furnizimi me ujë në Fushë-Kosovë do të ndalet për një orë.
Sipas njoftimit, shkak është rrjedhja në gypin Ø400 mm.
“Për shkak të një rrjedhjeje në gypin Ø400 mm, është e nevojshme të ndërpritet për një orë furnizimi me ujë nga fabrika Shkabaj përmes gypit Ø630 mm që furnizon qytetin e Fushë-Kosovës. Shpresojmë që ndërhyrja të përfundojë sa më shpejt”, thuhet në njoftim.
Një nënë 32-vjeçare dhe foshnja e saj kanë humbur jetën pas një aksidenti të rëndë në autostradën A3, midis Velburg dhe Parsberg.
Shiu i fortë dhe kushte të vështira të motit i dhanë fund përpjekjeve të familjes për të mbajtur kontrollin mbi makinën, e cila siç shihet edhe në fotografi, përfundoi në një gropë.
”Në fillim, situata ishte shumë e paqartë, ndaj u aktivizuan menjëherë shumë forca emergjente”, tha Hannes Raithel, folës i Shoqatës së Kryqit të Kuq të Qarkut Neumarkt.
Kur mjeku i parë arriti, makina ishte e përmbysur dhe brenda saj ndodheshin dy fëmijë dhe prindërit.
Njësit policie që udhëtonin në drejtim të kundërt ndaluan për të ofruar ndihmën e parë ku së bashku me disa ndihmës të parë, mundësuan reanimimin, por për nënën dhe foshnjën çdo përpjekje ishte e kotë.
Babai 30-vjeç dhe fëmija tjetër trevjeçar mbijetuan, megjithatë janë plagosur dhe janë dërguar për trajtim në spital.
”Ata janë në gjendje stabile dhe janë nën kujdesin mjekësor”, citon gjermanja Bild, Jörg Zitzelsbeger, drejtues i stacionit të policisë për autostradë në Parsberg.
Shkaku i aksidentit është ende nën hetim, por autoritetet dyshojnë se fenomeni i aquaplaning-ut, ku gomat humbasin kontaktin me rrugën për shkak të ujit të grumbulluar, mund të ketë kontribuar në përplasjen.
Aksidenti raportohet se ndodhi pasditen e së shtunës, derisa shiu i dendur vështirësoi gjithashtu operacionet e shpëtimit.
”Këto kushte janë gjithmonë sfiduese për zjarrfikësit”, tha Jürgen Kohl, kreu i shërbimit të zjarrfikësve në Qarkun Neumarkt.
Autostrada A3 drejt Passau mbeti e mbyllur për disa orë, ndërsa policia e Trafikut të Parsberg vazhdon hetimet për zbardhjen e shkaqeve të këtij aksidenti.
Isuf Jaçaj, 58 vjeç, person me precedentë penalë, është personi i ekzekutuar mbrëmjen e kësaj të shtune në lagjen nr. 3 të Sarandës.
Ai ishte babai i Klaus Jaçaj, 31 vjeç. Ky i fundit ndodhet në burg për “përkrahje të autorit të krimit”, si pjesëmarrës në ngjarjen e datës 17.07.2025, kur Ramadan Zoto plagosi me armë, në lagjen nr. 4 të Sarandës, Gëzim Hajdarajn dhe Ernest Lamën nga Kamza, raporton euronews.albania.
Më 21 korrik, një person i maskuar me maskë silikoni vendosi eksploziv në automjetin e Klaus Jacajt, duke e shkatërruar plotësisht atë. Ngjarja mbetet ende e pazbardhur.
Një atentat me tritol ka tronditur mbrëmjen e kësaj të shtune qytetin e Sarandës.
Ngjarja ka ndodhur në lagjen nr. 3, ku një automjet është hedhur në erë me eksploziv.
Si pasojë e shpërthimit të fuqishëm, që është dëgjuar në të gjithë qytetin bregdetar, ka humbur jetën personi që ndodhej brenda makinës.
A2 CNN mëson se i vdekur ka mbetur Isuf Jaçe, ndërsa policia dhe grupi hetimor kanë mbërritur menjëherë në vendngjarje për të përcaktuar rrethanat dhe autorët e mundshëm të atentatit.
Forca të shumta policie kanë rrethuar zonën, ndërsa po kryhen veprime të shpejta hetimore për të zbardhur motivet e ngjarjes së rëndë që ka tronditur Sarandën.
Aleanca Kosovare e Bizneseve ka njoftuar se ka vdekur pronari i kompanisë “Tricom”, Muharrem Ahmeti.
Në një postim në Facebook AKB shprehu ngushllime për familjen dhe miqtë e tij.
“Humbje e madhe për botën e biznesit të Kosovës. Me pikëllim të thellë mora lajmin për ndarjen nga jeta të mikut tim dhe afaristit të njohur Muharrem Ahmeti, pronar i kompanisë “Tricom”. Ai ishte njeri i ndershëm, punëtor i palodhur dhe biznesmen me vizion, që la gjurmë të forta në ekonominë e vendit.
Kjo është një humbje e madhe për komunitetin e bizneseve të Kosovës dhe për të gjithë ata që e njohën. Ngushëllimet më të sinqerta për familjen dhe miqtë e tij.
U prehtë në paqe, miku ynë Muharrem Ahmeti”, thuhet në njoftim.
Doktoresha e shëndetit mendor, Nikolina Bode, ka zbuluar se vajza 14-vjeçare e cila u hodh pasditen e së shtunës nga kati i tretë, në qytetin e Korçës, thotë se do e bëjë përsëri këtë veprim.
“Nuk ka frikë nga humbja e jetës dhe e përdor si kërcënim që në rast se përsëritet ngjarja, do e bëjë përsëri. Është hera e parë, kemi patur raste suicide te fëmijët ku rasti mbetet i njëjti, edukimi në familje dhe përballja me elementin social. Arsyet familjare janë madhore. Ajo që është problem në këtë situatë është se tentativa e vetëvrasjes, por edhe qëllimi i kësaj tentative dhe vendosmëria pa ndjerë frikë dhe pendesë. E para është vetë nëna, që është në kontakt të afërt me fëmijët e saj, janë dhe tre të tjerë që kanë qenë vëzhgues të kësaj situate dhe ky model është i frikshëm që shikohet nga fëmijët e tjerë. Merren si modele në rrethin e ngushtë familjar, e shikojnë dhe reagojnë pa aspak kritikë duke i dhënë të drejtë motrës së tyre për këtë veprim. Nuk duan të humbin motrën, por i japin të drejtë në lidhje me situatën”, shprehet doktoresha, shkruan A2CNN.
“Vajza thotë se unë e dua lagjen dhe lagjja më do mua, por për konflikte të vogla hyjnë në lojë të mëdhenjtë dhe njoftimi i policisë nga mami bën që të realizoj këtë veprim. Është veprim banal i pazgjidhur si duhet nga të rriturit”, shton doktoreshë Nikolina Bode.
Kryeministri në detyrë i Kosovës, Albin Kurti ka marrë pjesë në një tubim në shkollën “Migjeni” në Mitrovicë në përkrahje të kandidatit për kryetar të Mitrovicës, Faton Peci.
Kreu i Qeverisë tha se numri 105, 12 tetori është dita kur Faton Peci do të jetë kryetar i Mitrovicës.
Sipas kryeministrit, më 12 tetor, fitorja në këtë komunë do të jetë pa balotazh.
“Lagjia Ilirida është me Faton Pecin, e Mitrovica mbarë mbështet kandidatin tonë për kryetar. Në tubimin e mbajtur në shkollën “Migjeni”, atje ku Fatoni edhe e ka kryer gjimnazin, përkrahja ishte e madhe për programin dhe vizionin me të cilat garojmë në këto zgjedhje. 105 është numri, 12 tetori është dita, Faton Peci do të jetë kryetari i Mitrovicës. Infrastrukturë, arsim, shëndetësi, bujqësi, çdo fushë merr vëmendjen e duhur dhe përkujdesjen e merituar me fitoren tonë pa balotazh në këtë komunë”, ka shkruar kryeministri.
Ministri në detyrë i Financave, Hekuran Murati tha sot se partitë opozitare në parlament po përgatiten që, pas zgjedhjeve lokale, të formojnë një koalicion qeverisës me Listën Serbe.
Murati pretendoi se ka informacione për këtë.
Në një postim në rrjetin social Fcaebook, ministri në detyrë tha se eksponentë të opozitës kanë filluar “ta thonë [këtë] edhe hapur nëpër tubime lokale e nëpër studio televizive”.
“Në këto zgjedhje lokale do të vendoset për shumë më tepër sesa vetëm për komunat. Opozita po bëhet gati për me e ndryshu në tavolinë rezultatin e zgjedhjeve të 9 shkurtit dhe me formu qeveri në koalicion me Listën Serbe”, tha Murati.
“Këtë tashmë kanë filluar ta thonë edhe hapur nëpër tubime lokale e nëpër studio televizive, nëse ua kushtoni vëmendjen e i dëgjoni me kujdes. Po premtojnë se pas zgjedhjeve lokale do të bëhen të gjithë bashkë e ta përmbysin qeverinë”.
Sipas Muratit, opozita me qëllim po e zvarrit hapin e formimit të qeverisë me Listën Serbe.
“Por meqenëse e dijnë se një koalicion me Listën Serbe para zgjedhjeve komunale do të ishte fatal për ta, opozita synimin e ka që me e zvarritë sa të mundet hapin e formimit të qeverisë, ashtu që koalicioni i tyre me Listën Serbe me u zyrtarizu tek pasi të kryhen zgjedhjet komunale”, tha ai.
Murati tutje shtoi se për zvarritje, “një argat po ua bën edhe Gjykata Kushtetuese, e cila po e mban Kuvendin të bllokuar tash e 1 muaj.”
“Në këto zgjedhje lokale do të përcaktohet edhe se çfarë Qeverie do të ketë Kosova – një Qeveri Kurti 3 që e forcon shtetin, apo një qeveri që e pret Listën Serbe në Kuvend për 6 orë derisa të kthehen nga Beogradi me instruksione se si ta sabotojnë shtetin e Kosovës”, u shpreh ai.
Ish-nënkryetari i OVL-UÇK-së, Nasim Haradinaj, ka dalë publikisht në përkrahje të kandidaturës së Ramiz Lladrovcit në garën për zgjedhjet lokale në Drenas.
Haradinaj ka shkruar se “luanët mbesin luanë”, përkundër atyre me çfarë ballafaqohen.
“Luanët mbesin luanë sado që ballafaqohen më beteja qoftë edhe hiliqare. Ai gjithmonë ngadhënjen….! +4 kampion”, ka shkruar Haradinaj.
Kanë hyrë në fuqi tarifat për kalimin nga Tuneli i Llogorasë, një ndër investimet më të mëdha infrastrukturore në jug të Shqipërisë.
Sipas vendimit të botuar në Fletoren Zyrtare, pagesat do të aplikohen menjëherë për të gjitha kategoritë e automjeteve, me çmime që nisin nga 100 lekë (€0.96) për motoçikletat dhe shkojnë deri në 5000 lekë (€48) për mjetet e peshë të rëndë, njofton shqiptarja.com (shifrat në euro janë bazuar në kursin aktual të këmbimit valutor)
Tarifat sipas kategorive të mjeteve
100 lekë (€0.96) – Mjete motorike me karakteristika motoçiklete, motoçikletë me tre rrota dhe katërçikletë.
250 lekë (€2.40) – Mjete motorike me dy boshte dhe lartësi ≤ 1.30 m (të matura në boshtin e parë), si makinat e pasagjerëve dhe automjetet e lehta të shpërndarjes.
500 lekë (€4.80) – Mjete motorike me më shumë se dy boshte dhe lartësi ≤ 1.30 m, si makina pasagjerësh me rimorkio ose karavan, apo automjete të lehta me rimorkio.
1000 lekë (€9.60) – Mjete motorike me dy ose tre boshte dhe lartësi > 1.30 m, përfshirë autobusë, kamionë dhe mjete të ngjashme me rimorkio.
5000 lekë (€48) – Kategoria IV: mjete motorike me katër ose më shumë boshte dhe lartësi > 1.30 m, përfshirë autobusë dhe kamionë me shumë rimorkio.
Për autoveturat, tarifa është 250 lekë (€2.40) për një drejtim dhe 500 lekë (€4.80) vajtje–ardhje (shifrat në euro janë bazuar në kursin aktual të këmbimit valutor).
Kush përjashtohet nga pagesa?
Sipas udhëzimit, kalimi do të jetë falas për:
Mjetet e policisë
Zjarrfikëset
Ambulancat
Mjetet ushtarake
Mjetet që përdoren nga invalidët
Gjithashtu, në tunel nuk lejohet qarkullimi i mjeteve që transportojnë mallra të rrezikshme.
Nga sezoni veror në përdorim të përhershëm
Tuneli i Llogorasë u hap për herë të parë në korrik të vitit 2024 vetëm për sezonin turistik veror dhe u mbyll në nëntor të po atij viti. Pas përfundimit të plotë të punimeve, ai u hap përfundimisht në maj të këtij viti. Deri më tani, kalimi ka qenë pa pagesë për të lehtësuar lëvizjen gjatë sezonit veror.
Ky projekt ka kushtuar 20.4 miliardë lekë (195 milionë euro) dhe konsiderohet një ndër investimet më strategjike për zhvillimin e jugut të vendit.
