Kurti s’e mban premtimin, nuk shkarkoi ministrat e zyrtarët me aktakuza

“Jo, nuk do të kemi ministra me aktakuza…”, kishte thënë Albin Kurti më 04.02.2021 për Kallxo. com.

4 vite pas kësaj deklarate, udhëheqësi i qeverisë tashmë në detyrë, duket se e ka harruar këtë premtim.

Kjo meqë, në zyrat e Ministrive e në funksione publike vazhdojnë të qëndrojnë persona që tashmë akuzohen për korrupsion.

Në korrik të këtij viti, Prokuroria Speciale e Kosovës, ngriti aktakuzë ndaj ministrit në detyrë të Zhvillimin Rajonal, Fikrim Damka nën dyshimet se kishte financuar dy organizata joqeveritare pa organizuar thirrje publike dhe duke tejkaluar limitet ligjore të financimit.

Bashkë me Damkën, i akuzuar është edhe Besim Kamberaj, por për të Qeveria kishte vendosur ndryshe, duke e pezulluar nga puna pas ngritjes së aktakuzës.

Ministri Damka ka edhe një tjetër aktakuzë tjetër, për sulm dhe kanosje ndaj një kandidateje për deputete nga një parti turke, ngjarje e ndodhur ditën e zgjedhjeve parlamentare.

Megjithatë, ai vazhdon të ushtrojë detyrën e tij në ministri, por edhe si deputet i Kuvendit të Kosovës.

Në gjykatë tashmë është duke u përballur edhe Nagip Krasniqi, ish-Kryeshef i Korporatës Energjetike të Kosovës. Dikur pjesë e VV-së në Komitetin për Energji, PSRK-ja ka ngritur dy aktakuza ndaj tij që lidhen me keqpërdorim të detyrës zyrtare në disa tenderë.

Me akuzat për korrupsion sa ishte nënkryetar i Mitrovicës së Jugut, tashmë do të përballet edhe ish-kandidati për deputet i Lëvizjes Vetëvendosje.

Faruk Mujka, i cili aktualisht është kryeshef i Iber Lepencit, së bashku me ish-drejtorin komunal të Mitrovicës, Hysen Muzliukaj, akuzohen për keqpërdorim të detyrës zyrtare meqë në mënyrë të kundërligjshme kishin privatizuar objektin e ish-Bibliotekës në Mitrovicë.

Mujka nga PSRK-ja akuzohet edhe për mosdeklarimin e rreth 60 mijë eurove që iu gjetën në shtëpinë e tij gjatë bastisjes.

Ndonëse ende nuk ka marr vulën e organit të akuzës, por ende nën hetim, është ministrja e Industrisë Rozeta Hajdari, e cila u intervistua në cilësinë e të pandehurës në lidhje me rezervat shtetërore.

Për këtë çështje u ftua të dëshmojë edhe kryeministri në detyrë Albin Kurti, por i njëjti refuzon të paraqitet, pavarësisht thirrjeve e gjobave të shqiptuara.

I dyshuar për tri vepra të ndryshme penale si “Shpëlarja e parave”, “Shmangia nga tatimi” dhe “Mos raportimi ose raportimi i rremë i pasurisë është edhe ambasadori i Kosovës në Kroaci Martin Berishaj.

Si i pandehur është intervistuar edhe tashmë ministri në detyrë i Infrastrukturës, Hysen Durmishi, për projektin e zgjerimit të rrugës nacionale Prishtinë – Pejë.

Në prokurori ishte paraqitur edhe ministrja e Ekonomisë Artane Rizvanolli, e koordinatorja e Komiteteve në Lëvizjen Vetëvendosje, Dejona Mihali. Dëshmitë e tyre lidheshin me çështjen e ish kryeshefit të KEK-ut, Nagip Krasniqi.

Me aktakuza por në kohën sa ishin deputetë të opozitës për gjuajtje të gazit lotsjellës janë edhe Xhelal Sveçla, Albulena Haxhiu dhe Arbërie Nagavci, procese të cilat nuk kanë marr aktgjykimin final./dukagjini

Tentoi të ikë jashtë vendit, ndalohet 25-vjeçari i shumëkërkuar nga Policia

Policia e Kosovës njofton se datë 26.09.2025, në Aeroportin Ndërkombëtar “Adem Jashari”, zyrtarët policorë kanë ndaluar personin e dyshuar Sh. F., 25 vjeçar, i cili ishte në kërkim policor dhe po tentonte të largohej jashtë vendit.

Pas ndalimit, ekipi i hetimeve i Stacionit Policor të Prizrenit, e ka shoqëruar të dyshuarin në stacionin për intervistim.

“Gjatë procedurës, pas prezantimit të dëshmive të pakontestueshme, i dyshuari ka pranuar se ka kryer së paku gjashtë raste të vjedhjeve gjatë vitit 2025, në markete të ndryshme brenda qytetit të Prizrenit”, njofton policia.

“Të gjitha veprimet hetimore janë kryer në koordinim të vazhdueshëm me Prokurorin kujdestar nga Departamenti për Krime të Përgjithshme, i cili ka rekomanduar që pas intervistimit, i dyshuari të lirohet në procedurë të rregullt.

Për të gjitha rastet e dyshuara, do të procedohet me kallëzim penal në Prokurorinë Themelore në Prizren”, thuhet tutje në njoftimin e PK-së.

Burri vret gruan, dy fëmijët dhe veten në Oldenburg të Gjermanisë

Çitaku: Kurti ka përçarë shqiptarët në rajon

Vlora Çitaku, nënkryetare e Kuvendit të Kosovës nga radhët e Partisë Demokratike të Kosovës (PDK) ka akuzuar kryeministrin në detyrë Albin Kurti për rrënim të aleancave me partnerët ndërkombëtarë.

Ajo ka thënë se Kosova tash e disa vite është nën sanksionet e Bashkimit Evropian.

“Për më tepër, ne kemi edhe raporte të ftohta me Shqipërinë, kemi raporte të cenuara me shqiptarët në rajon. Z. Kurti ka luajtur një rol përçarës me shqiptarët në Maqedoninë e Veriut, në Luginën e Preshevës dhe në Mal të Zi”.

”Pra, është një personalitet destruktiv i cili me një lehtësi të padurueshme ka rrënuar aleancat të cilat janë krijuar me shumë mund. Më keq se kaq nuk mund të bëhet. Çfarë po pritni që duhet të ndodhë?”, ka thënë ajo.

Ajo ka folur edhe sa i përket bllokadës parlamentare dhe vendimit që pritet ta marrë Gjykata Kushtetuese.

Çitaku tha se PDK është përmbajtur të komentojë lidhur me vendimin që pritet të nxjerrë Gjykata Kushtetuese, me qëllim që të mos interferojë apo të duket si ndërhyrje në vendimmarrje.

“Ajo me të cilën po ballafaqohemi nuk është as krizë juridike, as krizë kushtetuese, por krizë politike e cila ka ardhur kryekëput si rezultat i kryeneqësisë politike të Lëvizjes Vetëvendosje dhe Albin Kurtit”, ka thënë ajo në RTV Dukagjini.

“Kosova drejt izolimit total, po bën gabime të pafalshme -Vëmendja e SHBA ndaj Serbisë, e shtuar“

Ish ministri shqiptar Paskal Milo komentoi për ‘Real Story’ qëndrimin e Kosovës në skenën ndërkombëtare, menjëherë pas konferencës në Kombet e Bashkuara.

Sipas Milos, grindjet e klasës politike në Kosovë nuk tërheqin vëmendje dhe se fokusi i amerikanëve ka shkuar ndaj Serbisë. Më tej, Milo tha se Kosova po bën gabime të mëdha strategjike të cilat janë të pafalshme dhe nuk mund të jetojë pa një mbështetje të fuqishme të një faktori ndërkombëtar.

“Kosova nuk përbën lajm për tu afishuar në OKB, lajmi i keq është ai që përhapet më shpejt. Kosova e ka arritur pikën e ngopjes dhe nuk tërheq vëmendje, vetëm nëse ndodh një krizë më të madhe seç e kemi. Grindjet e brendshme të klasës politike nuk tërheqin më vëmendje, dhe Kosova me aq sa e gjykoj nga distanca, po braktiset nga fati i vet. Serbia e ka rritur potencialin e vet, dhe vëmendja e SHBA ndaj Serbisë është rritur. Serbia është një vend që ka më tepër peshë në llogaritë perëndimore.

Objektivi është që Serbia të shkëputet nga influenca ruse. Perëndimoret, por edhe amerikanët e kanë gabim nëse mendojnë se do e tërheqin Vuçiç nga ana e tyre, nuk mund të fshijnë historinë dhe ta shkëpusin nga Rusia, madje nuk e tërheqin as nga Kina sepse është bërë donator ekonomik nga Serbisë.

Ai po luan me SHBA, BE, Rusinë por edhe me Kinën, është një aftësi. Ky luan me këto katër qendra të mëdha të politikës botërore.

Kosova ka shumë kohë që po bën gabime të mëdha strategjike, të pafalshme. Kosova nuk mund të mbijetojë pa një mbështetje të fuqishme të një faktori ndërkombëtar. Duhet të heq dorë nga ambiciet e parealizueshme, nuk ndodh ajo që ka në mendje Kurti dhe partia e tij për shqiptarët në rajon dhe politikën rajonale. Një vend i vogël është i detyruar që të mbijetojë të ketë një aleat.”/Abcnews.al

Pas pezullimit të Dialogut strategjik, SHBA me kusht për Kosovën dhe Qeverinë Kurti

Shtetet e Bashkuara të Amerikës e kanë derën e hapur për përmirësimin e marrëdhënieve dhe rifillimin e bashkëpunimit me Qeverinë e Kosovës, por me kushtin që qeveria në detyrë të angazhohet për t’i ulur tensionet.

Kështu ka deklaruar një zëdhënës i Ambasadës amerikane në Prishtinë, i pyetur nëse çështja e pezullimit të dialogut të planifikuar strategjik do të trajtohet në takimet me liderët e Kosovës që morën pjesë në margjinat e sesionit të Asamblesë së Kombeve të Bashkuara.

“Siç ia kemi bërë të qartë qeverisë në detyrë, dera është e hapur për përmirësimin e marrëdhënieve dhe rifillimin e bashkëpunimit. Megjithatë, kjo kërkon hapa konkretë nga kryeministri në detyrë Kurti për të ulur tensionet dhe për të çuar përpara qëllimin tonë të përbashkët për forcimin e paqes dhe stabilitetit si bazë për prosperitet ekonomik të ndërsjellë. Ne do të vazhdojmë të vlerësojmë veprimet e qeverisë në detyrë”, kanë thënë për Kohën në Ambasadën e SHBA-së.

Pas vendimit të Shteteve të Bashkuara për pezullimin e Dialogut të planifikuar strategjik me Kosovën, qeveria në detyrë nuk dha sinjale se do të ketë ndryshim kursi ashtu siç kërkuan Shtetet e Bashkuara.

Deri tash në asnjërin prej takimeve të realizuara, për të cilat qeveria lëshoi komunikata, nuk përmendet Dialogu strategjik.

Po ashtu deri tash kanë munguar edhe takimet me përfaqësues të Departamentit Amerikan të Shtetit.

E në një takim me studentë në SHBA, Kurti ka thënë se Shtëpia e Bardhë ka pezulluar Dialogun e planifikuar strategjik me Kosovën, për shkak të mbylljes së strukturave ilegale serbe në veriun e Kosovës, i banuar me shumicë serbe.

“[Arsyeja e pezullimit të Dialogut të planifikuar strategjik] është për shkak të sundimit të ligjit në veri të Kosovës, i cili rezultoi të ishte kundër strukturave ilegale serbe dhe këtu nuk mund të bëj kompromise. Nuk mund t’ia lë këtë problem brezit tuaj. Mendoj që brezi im është ai që duhet ta përfundojë këtë”, ka deklaruar Kurti.

Nga 12 tetori rregulla të reja të hyrje – daljeve në BE, Policia e Kosovës del me njoftim

Policia e Kosovës ka dalë me njoftim për rregullat e reja të hyrje/daljeve në BE prej datës, 12 Tetor 2025.

Nga 12 Tetori 2025 hyn në fuqi Entry/Exit System (EES) – një sistem i ri digjital për regjistrimin e hyrjes dhe daljes në zonën e BE, njofton policia.

“Vlen për të gjithë shtetasit jo-BE që udhëtojnë drejt Evropës. Nuk ka më vula në pasaportë – gjithçka digjitale. Regjistrohen automatikisht hyrjet/daljet, gjurmët e gishtërinjve dhe fotografia”, thuhet në njoftim.

Detaje nga njoftimi i publikuar në faqen e Qendrës Kombëtare për Menaxhim Kufitar:

Kjo është gjendja e të lënduarit në aksidentin ku humbi jetën vëllai i Gjestit

Ngjarja e rëndë që i mori jetën Eldionit, vëllait të artistit të njohur Gjesti, tronditi të gjithë. Përveç viktimës, në aksident ka mbetur i plagosur edhe një mik i tij, i cili ndodhej si pasagjer.

Emisioni “Kosova Live” në T7 ka kontaktuar Spitalin e Përgjithshëm të Pejës për të mësuar më shumë mbi gjendjen e të plagosurit. Në një përgjigje me shkrim, nga ky institucion kanë deklaruar:

“Një pacient pas një aksidenti është duke u trajtuar në Spitalin e Përgjithshëm në Pejë, ku po merr trajtimin e nevojshëm. Për shkak të respektimit të privatësisë së pacientit, nuk mund të japim më shumë detaje, mirëpo gjendja e tij aktualisht është stabile.”

Zbardhet vrasja tronditëse në Shqipëri: Biznesmeni i njohur ekzekutohet për një sherr banal, ky është autori i dyshuar

Gazetarja e Top Channel Dorjana Bezat bën me dije se grupi hetimor ka gjetur provat e krimit dhe ka identifikuar autorit, i identifikuar si Kamber Sulçaj, i cili punon si çoban.

Ata dyshohet se janë konfliktuar verbalisht për dritat e gjata të makinës, dhe më pas 48-vjeçari e ka qëlluar me armë.

Njoftimi i policisë:

Salari, Tepelenë/Hetimet e shpejta dhe profesionale çojnë në zbardhjen e autorësisë dhe dinamikës së vrasjes së shtetasit E. S., trupi i pajetë i të cilit u gjet në vendin e quajtur “Qafa e Dilanit”, pas mesnatës së datës 26.09.2025.

Identifikohet dhe shpallet në kërkim një 48-vjeçar, autori i dyshuar i vrasjes.

Nga hetimet dyshohet se 48-vjeçari, pas një konflikti për motive të dobëta, ka qëlluar me armë, drejt shtetasit E. S., shtetasve që e shoqëronin atë dhe automjeve të tyre të ndaluara.

Nga të shtënat humbi jetën shtetasi E. S..

Sekuestrohen nga vendngjarja, automjetet e shtetasit E. S. dhe shoqëruesve të tij, si dhe 2 armë gjahu.

Gjithashtu, sekuestrohen automjeti dhe veshjet e përdorura gjatë krimit, si dhe 2 500 000 lekë (në valutat lekë dhe euro), 3 armë gjahu, municion për armë gjahu me saçme, municion për armë me vjaska, 450 fara të dyshuara Cannabisi dhe 2 kasaforta.

Si rezultat i hetimeve intensive të kryera nga grupi i posaçëm hetimor, i përbërë nga ekspertë të strukturave hetimore të Drejtorisë Vendore të Policisë Gjirokastër dhe nga ekspertë të Departamentit të Policisë Kriminale të DPPSh-së, të drejtuar nga Prokuroria e Gjirokastrës, ngritur menjëherë pas ngjarjes së ndodhur rreth mesnatës së datës 26.09.2025, në aksin rrugor “Nivicë-Salari”, ku u vra shtetasi italian E. S., 44 vjeç, u mundësua zbardhja e autorësisë dhe rrethanave të rastit.

Konkretisht, u identifikua autori i dyshuar i vrasjes, shtetasi K. S., 48 vjeç banues në fshatin Mesaplik, Vlorë, i cili u shpall në kërkim për veprat penale “Vrasja në rrethana të tjera cilësuese”, në mënyrë të rrezikshme për jetën e shumë personave, “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe shitja e narkotikëve”.

Nga hetimet dyshohet se 48-vjeçari, fillimisht është konfliktuar verbalisht, për motive të dobëta, me shtetasin E. S. dhe me shtetasit që shoqëronin këtë të fundit. Më pas shtetasi K. S. dyshohet se ka qëlluar me armë me vjaska, në drejtim të këtyre shtetasve dhe automjeteve të tyre, në aksin “Nivicë-Salari”, ku si pasojë e të shtënave, humbi jetën 44-vjeçari.

-Gjatë veprimeve procedurale u sekuestruan nga vendngjarja, automjetet e përdorura nga shtetasi E. S. dhe shoqëruesit e tij, si dhe 2 armë gjahu.

-Gjatë kontrolleve, shërbimet e Policisë gjetën të fshehura në një stan në një zonë të thellë malore midis fshatrave Nivicë dhe Bolenë, automjetin dhe veshjet që dyshohet se ka përdorur 48-vjeçari, gjatë kryerjes së krimit.
Gjithashtu në këtë zonë, u gjet e hedhur në shkurre, një çantë, në të cilën ishin 1 palë dylbi me rreze infra, 1 palë dylbi termike, 1 mbajtëse arme dhe 1 elektrik dore.

-Më tej, gjatë kontrolleve të kryera në bashkëpunim me shërbimet e Policisë së Vlorës, në banesën e 48-vjeçarit dhe në banesat e familjarëve të tij, në fshatin Mesaplik dhe në Vlorë, u gjetën rreth 2 500 000 lekë (në valutat lekë dhe euro), 3 armë gjahu me municion luftarak (saçme dhe vjaska), 450 fara të dyshuara Cannabisi dhe 2 kasaforta (të mbyllura).

Vijon puna intensive, në bashkëpunim me Policinë e Vlorës dhe me Departamentin e Policisë Kriminale në DPPSh, me qëllim kapjen e shtetasit K. S..

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.

Mjeku kosovar i arrestuar për përndjekjen e moderatores është psikiatër i fëmijëve në QKUK

Mjeku kosovar Behar Kamberi ka përfunduar në prangat e Policisë së Shtetit në Shqipëri, nën dyshimin se është përfshirë në një veprimtari të kundërligjshme. 42-vjeçari u arrestua nën akuzën e përndjekjes së moderatores sportive, Albana Bejko.

Kamberi, emri i të cilit doli në të gjitha mediat shqiptare është psikiatër i fëmijëve dhe adoloshentëve në Qendrën Klinike Universitare të Kosovës (QKUK), ka njoftuar gazetarja Saranda Ramaj, në profilin e saj në Facebook.

Siç u raportua nga mediat në Shqipëri, psikiatri ka ndjekur vazhdimisht viktimën, duke u shfaqur në mënyrë të përsëritur pranë banesës së saj, gjë që ka shkaktuar shqetësim të thellë te ajo – derisa ia bëri ‘gropën’ për ta kapur Policia.

Bazuar në informacionet e para, moderatorja ka bashkëpunuar me policinë për të organizuar një takim në një zonë të Tiranës, ku mjeku ishte ftuar. Në momentin që ai ka mbërritur në vendin e caktuar, oficerët kanë ndërhyrë dhe kanë kryer arrestimin e tij.

Behar Kamberi ndodhet aktualisht në paraburgim në ambientet e burgut “Mine Peza”, ndërsa ndaj tij rëndon akuza për veprën penale të përndjekjes.