Vrasja e trefishtë në Gjilan, ja ku dyshohet se po qëndrojnë të dyshuarit Mefail Shkodra dhe dy djemtë e tij

Kanë kaluar katër ditë që kur Mefail Shkodra, Engjull Shkodra dhe Edonis Shkodra ndodhen në arrati, pas dyshimeve se vranë babë e bir, Selman e Edmond Hasani, si dhe familjarin e tyre, Abedin Hoxha.

Gazetari Faton Mehmeti, në emisionin “Kosova Today” në Klan Kosova, tha se fillimisht të dyshuarit dyshohet se janë plagosur nga njëri prej viktimave dhe janë trajtuar në një klinikë private në Gjilan.

“Pas marrjes së ndihmës së parë, ata janë larguar dhe tashmë po marrin trajtimin, hospitalizimin në Serbi”, tha Mehmeti./Klankosova.tv.

Ndiqni deklaratën e plotë, në videon vijuese:

Kandidati për deputet i VV-së e merr zyrtarisht detyrën e drejtorit të ATK-së – në ceremoni edhe ministri i Kurtit

Sot është bërë pranim-dorëzimi i detyrës së drejtorit të ri të Administratës Tatimore të Kosovë. Drejtori i vjetër, Ilir Murtezaj, ia dorëzoi detyrën drejtorit të ri, Mentor Hyseni, që është anëtar i VV-së.

Në ceremoni mori pjesë edhe ministri në detyrë i Financave, Hekuran Murati.

“Në këtë ceremoni mori pjesë Ministri i Financave, Punës dhe Transfereve, z. Hekuran Murati, i cili falënderoi z. Murtezaj për punën dhe rezultatet e arritura gjatë mandatit të tij, duke theksuar se kontributi i tij ka qenë i rëndësishëm në rritjen e të hyrave buxhetore dhe përmirësimin e shërbimeve tatimore. Ministri Murati gjithashtu uroi z. Hyseni për detyrën e re, duke i ofruar mbështetjen e plotë të ministrisë për të avancuar më tej reformat dhe për të forcuar kulturën e llogaridhënies dhe transparencës në sistemin tatimor të Kosovës.”

Murtezaj ka falënderuar stafin për bashkëpunimin dhe përkushtimin.

“Z. Murtezaj falënderoi stafin e ATK-së për bashkëpunimin dhe përkushtimin gjatë viteve të tij në detyrë, duke theksuar se suksesi i institucionit është rezultat i punës së përbashkët. Ai i uroi  suksese drejtorit të ri z. Hyseni në realizimin e objektivave strategjike të Administratës Tatimore.”

Hyseni tha se do ta ushtrojë detyrën me profesionalizëm, integritet dhe dinjitet.

“Nga ana tjetër, z. Hyseni shprehu mirënjohjen për besimin e dhënë dhe theksoi se do ta ushtrojë detyrën me profesionalizëm, integritet dhe dinjitet, duke vënë në prioritet ngritjen e transparencës, përmirësimin e efikasitetit, si dhe shërbimet ndaj tatimpaguesve. Ai po ashtu, u zotua se do të punojë ngushtë me stafin e ATK-së dhe partnerët institucionalë për të garantuar mbledhjen e drejtë dhe të barabartë të të hyrave buxhetore, në përputhje me ligjin dhe në të mirë të interesit publik. Administrata Tatimore e Kosovës mbetet e angazhuar në përmbushjen e misionit të saj për zhvillimin e qëndrueshëm ekonomik të vendit”.

Dorëheqje e papritur në Vetëvendosje: Demokracia e brendshme – është zbehur deri në zhdukje

Një prej më zërave më aktivë të Lëvizjes Vetëvendosje në Klinë, Lulzim Dragidella ka njoftuar për dorëheqjen e tij nga kjo parti, duke e cilësuar vendimin si “më të vështirin” në jetën e tij politike.

Në një deklaratë të gjatë, Dragidella theksoi se vendimi nuk është marrë për arsye emocionale, por pas një reflektimi të thellë mbi drejtimin që ka marrë LVV në vitet e fundit.

Ai kritikoi mungesën e demokracisë së brendshme, mungesën e transparencës dhe përjashtimin e zërave kritikë brenda strukturës partiake.

“Pas një procesi të gjatë mendimesh, analizash dhe betejash të brendshme, kam marrë vendimin më të vështirë në jetën time politike: Të tërhiqem menjëherë nga Lëvizja VETËVENDOSJE! Ky vendim nuk ka ardhur si pasojë e një momenti emocional, por si rezultat i një reflektimi të gjatë mbi rrugën time politike, mbi përvojat që kam kaluar dhe mbi realitetin aktual të kësaj lëvizjeje. Unë u bëra pjesë e VETËVENDOSJE!-s sepse besoja se ajo përfaqësonte një vizion të qartë për ndryshim shoqëror: drejtësi, barazi, përgjegjësi, solidaritet dhe guxim për t’u përballur me çdo padrejtësi, pa kompromis me parimet.

Gjatë viteve të fundit, një element themelor që e bëri këtë lëvizje të fuqishme – demokracia e brendshme – është zbehur deri në zhdukje. Sot vendimmarrja ndodh kryesisht në rrethe të ngushta, larg syve dhe mendimeve të shumicës së anëtarëve. Mendimet e ndryshme, që dikur pasuronin debatin, sot shpesh trajtohen si rrezik për unitetin, në vend që të shihen si forcë e tij. Në terren, sidomos në zona si Klina, kam parë një braktisje të angazhimit real me qytetarët. Struktura lokale shpesh lihet pas dore, njerëzit që japin kohën dhe mundin e tyre injorohen, ndërsa kontributet e sinqerta nuk vlerësohen. Kam parë shokë dhe kolegë që janë zhgënjyer deri në heshtje, sepse zëri i tyre nuk gjen hapësirë”, thotë ai.

Dragidella theksoi se dorëheqja nuk është fundi i angazhimit të tij politik, por një fillim i ri jashtë kornizave të Vetëvendosjes, ku ai synon të vazhdojë të kontribuojë në interes të publikut dhe qytetarëve.

“Po largohem sepse nuk dua të bëhem pjesë e një realiteti që nuk përfaqëson më idealet me të cilat fillova këtë rrugë. Po largohem sepse nuk dua të bëj kompromis me bindjet e mia për hir të pushtetit partiak. Po largohem sepse dua të jem i ndershëm – me veten time, me punën time dhe me qytetarët që më kanë dhënë besimin e tyre. Nuk largohem nga politika, por nga një strukturë që nuk më lë më hapësirë për të vepruar me ndershmëri dhe transparencë. Udhëtimi im politik nuk mbaron këtu. Përkundrazi – fillon një kapitull i ri, ku do të vazhdoj të punoj për interesin publik, pa u lidhur me interesa të ngushta.

Dua t’i falënderoj të gjithë ata që më kanë mbështetur në këtë rrugë – kolegët që kanë ndarë me mua ideale dhe përpjekje, qytetarët që më kanë inkurajuar, dhe të gjithë ata që kanë besuar se politika mund të jetë mjet për të bërë mirë. Largohem me kokën lart, pa hidhërim personal, por me një ndjenjë të fortë përgjegjësie për të qëndruar besnik parimeve të mia. Besoj ende se ndryshimi i vërtetë është i mundur – por ai nuk vjen nga heshtja, as nga bindja e verbër. Ai vjen nga guximi për të thënë të vërtetën dhe për të vepruar ndryshe, edhe kur kjo do të thotë të largohesh nga rruga që dikur mendoje se ishte e vetmja”.

Policia serbe arreston qytetarë të Kosovës

Në pikën kufitare të Horgoshit, mes Hungarisë dhe Serbisë, policia serbe ka arrestuar dy persona, H.E. 49-vjep dhe B.E. 52-vjeç, dyshohet shtetas të Kosovës, me dyshimin për “kryerjen e një krimi lufte kundër popullsisë civile me disa anëtarë të UÇK-së, më 9 gusht, 1999″.

Siç njofton Ministria serbe e Punëve të Brendshme, ata dyshohen se në Rahovec kanë rrëmbyer një civil të kombësisë serbe, i cili, sipas tyre, është u zhdukur që nga ajo kohë.

“Pjesëtarët e Ministrisë së Brendshme, Drejtorisë së Policisë Kriminale dhe Shërbimit të Hetimit të Krimeve të Luftës, në Kalimin Kufitar Horgosh në hyrje të Serbisë, arrestuan H. E. (1976) dhe B. E. (1973) për shkak të ekzistencës së bazave të dyshimit se ata kanë kryer një vepër penale të krimeve të luftës kundër popullsisë civile”.

“Dyshohet se më 9 gusht 1999, në Rahovec, në bashkëpunim me disa anëtarë të së ashtuquajturës UÇK, ata rrëmbyen një civil të kombësisë serbe J. M. më 9 gusht 1999, duke përdorur forcë fizike, armë zjarri dhe kërcënime serioze për jetën dhe gjymtyrët dhe e çuan atë në një drejtim të panjohur, që nga ajo kohë ai është zhdukur. J. M. ende listohet si person i zhdukur”, tha ministria serbe në një deklaratë, raporton Klankosova.tv.

Të dyshuarve iu dha urdhër të mbahen në paraburgim deri në 48 orë, me miratimin e prokurorit publik të Zyrës së Prokurorit Publik për Krime Lufte.

Ata më pas do të sillen në zyrën e prokurorit kompetent me një kallëzim penal.

Gjykata vendos paraburgim për shqiptarin e dyshuar për krime lufte në 1999

Gjykata Themelore në Prishtinë ka caktuar masën e paraburgimit prej një muaji ndaj Ramadan Morina, si i dyshuar për krime lufte.

Lajmin e ka konfirmuar për Klankosova.tv, zëdhënësja e Gjykatës Themelore në Prishtinë, Mirlinda Gashi.

Morina dyshohet se gjatë luftës në Kosovë, në periudhën 29–31 mars 1999, në bashkëkryerje me pjesëtarë të forcave policore dhe ushtarake serbe, ka marrë pjesë në masakrën e 34 civilëve shqiptarë në fshatin Burim të Komunës së Malishevës, raporton Klankosova.tv.

E jashtëzakonshme: Ky është polici që hyri mes flakëve për të shpëtuar të moshuarën

Në përballjen me zjarret që po shkatërrojnë Gramshin, oficeri i policisë, Alfred Zhupani, ka treguar një akt heroik duke rrezikuar jetën për të shpëtuar një grua të moshuar.

Duke kaluar mes flakëve dhe tymit, Zhupani mbajti gruan në krahë dhe vrapoi për ta larguar nga zona e rrezikut, pa menduar për pasojat.

Ky akt guximi dhe përkushtimi është lavdëruar nga banorët dhe ka bërë xhiron e rrjeteve sociale.

Jeta Statovci, bartëse e listës së Guxo për Prishtinën

Jeta Statovci do t’i prijë listës së kandidatëve për Kuvendin Komunal të Prishtinës nga Guxo, raporton Gazeta Blic.

Këtë e ka bërë të ditur përmes një postimi në Facebook, derisa ka thënë se lista ka 25 gra e 26 burra.

“Nuk gaboj të them, se është lista më e freskët këto zgjedhje, me profile doktorësh, arkitektësh, ekonomistësh, profesorë e artistë”, ka shkruar Statovci.

Postimi i saj i plotë:

Guxo për Prishtinën!

Kam nderin të prezantoj dhe t’i prijë listës së kandidatëve për Kuvendin Komunal të Prishtinës, nga Partia Guxo. Në listë gjenden profile të jashtëzakonshme, 25 gra e 26 burra.

Nuk gaboj të them, se është lista më e freskët këto zgjedhje, me profile doktorësh, arkitektësh, ekonomistësh, profesorë e artistë.

Prishtina ka një mundësi kreative, na priftë e mbara!

#GuxopërPrishtinën

Gjykata e Hagës ia ndalon të drejtën Fahri Fazliut ta takojë të atin

Ish-ushtari i Ushtrisë Çlirimtare të Kosovës, Fadil Fazliu, po mbahet në paraburgim në Dhomat e Specializuara në Hagë, i akuzuar për pengim të drejtësisë.

Pothuajse prej një viti, djali i tij, Fahriu, pohon se nuk i lejohet asnjë lloj kontakti me babanë, ndërsa  kujtimin e tij e mban gjithnjë pranë, përmes një fotografie.

Fahriu thotë se po i shkelen të drejtat nga Gjykata në Hagë.

“Këtë muaj që po hyjmë po behën 9 muaj që s’po munden ta takoj babin tim, as ta shohë në video lidhje as ta takoj në mënyrë fizike, ku ai po qëndron atje padrejtësisht. Është një mërzi e madhe si djalë i tij, por mendoj që është një shkelje e madhe e të drejtave të njeriut që s’po më lejohet ta takoj vetëm njëherë babin tim”, tha Fahri Fazliu, biri i Fadil Fazliut.

Megjithëse, familjarët e tjerë gëzojnë të drejtën për ta takuar dhe për të komunikuar me të, Fahriu thotë se nuk e kupton arsyen pse po i mohohet kontakti me babanë teksa thekson se ende nuk ka marrë përgjigje nga Dhomat e Specializuara në Hagë.

“Në dhjetor kur kemi kërkuar si familje të shkojmë ta vizitojmë më nënën, vëllain dhe motrën, më është kkthyer email nga Dhomat e Specializuara që “nuk mundesh ta takosh, as në mënyrë fizike, as përmes videolidhjes, dhe asnjë arsyetim i vetëm nuk ka qenë pse unë nuk kam të drejtë ta takoj babin tim”, theksoi Fahriu.

Ai tregon për mallin që ndjen për babanë dhe për lidhjen e veçantë mes tyre, duke theksuar se mungesën e tij e ndjen në çdo moment.

“Mungesa e tij është e madhe, sepse, si çdo fëmijë, edhe unë, por ndoshta pse kam qenë fëmija më i madh, kam qenë më i lidhur me të, po edhe siç ma kanë lënë edhe emrin e vëllait të Fadilit- dëshmor. Është një mungesë e madhe, ishte edhe ditëlindja e tij, ndihet mungesa e tij në shoqëri, në familje, shtëpi, në përvjetorët e dëshmorëve që i kemi , se është një boshllëk i madh pa kryefamiljarin këtu”, shtoi ai.

Fahriu thotë se problemin më të madh e ka se nuk ka institucion se ku ta paraqesë këtë shqetësim, por mbetet me shpreson se drejtësia do të triumfojë.

Vdes një grua në QKUK

Një grua nga Gjilani ka vdekur derisa kishte qenë duke marrë tretman mjekësor në QKUK dje rreth orës  01:45.

Policia tha se po e heton vdekjen, ndërsa trupi i pajetë i gruas është dërguar për obduksion.

HETIM MBI VDEKJEN – Gjilan / 10.08.2025 – 19:34.  Më 13.08.2025 rreth orës 01:45 viktima f/k ka ndërruar jetë në QKUK, e cila kishte qenë në tretman mjekësor. Me urdhër të prokurorit trupi i pajetë i viktimës është dërguar në IML për obduksion”, thuhet në raportin 24-orësh të policisë.

Policia e Kosovës përdor sprejin ndaj disa qytetarëve serbë që po pengonin një arrestim në veri

Një situatë tensioni u shënua mbrëmë në veri të Kosovës, ku Policia e Kosovës përdori sprej irritues ndaj disa qytetarëve serbë që po tentonin të pengonin arrestimin e një personi të dyshuar.

Sipas informacioneve fillestare, policia ishte në një operacion për arrestimin e një qytetari, kur një grup serbësh u mblodhën në vendin e ngjarjes dhe tentuan të ndërhyjnë në veprimet e zyrtarëve policorë.

Për të shpërndarë turmën dhe për të siguruar zbatimin e ligjit, policia ka përdorur sprej si masë parandaluese.

Policia e Kosovës nuk ka dhënë ende detaje të mëtejshme rreth personit të arrestuar apo arsyeve ligjore të këtij veprimi.

VIDEO KËTU: