Tërmkolli: Më e rrezikshme për Kosovën Presidentja Osmani apo Llabani?!

Ish deputetja e LDK-së, Melihate Tërmkolli, ka reaguar lidhur me deklaratat e presidentes Osmani se gjyqtari Radomir Llaban përbën rrezik për sigurinë kombëtare.

Ajo përmes një postimi në Facebook, ka pyetur se a është më e rrezikshme për Kosovën Osmani apo Llabani.

Po ashtu, Tërmkolli ka thënë se Llaban është dashur të arrestohet kur presidentja ka pasur të dhëna se ai përbën rrezik për rendin kushtetues dhe sigurinë kombëtare.

“Presidentja Osmani dhe Albin Kurti padyshim janë rrënuesit më të mëdhenj të rendit kushtetues dhe të sigurisë kombëtare me Puçin e tyre kundër rendit kushtetues që pas zgjedhjeve e deri në veprimin e djeshëm”, ka shkruar ajo.

Postimi i saj i plotë:

Më e rrezikshme për Kosovën Presidentja Osmani apo Llabani?!

Llaban do të duhej të ishte arrestuar që kur Presidentja paska pasur të dhëna zyrtare se ai përbën rrezik për rendin kushtetues dhe sigurinë kombëtare.

Presidentja Osmani dhe Albin Kurti padyshim janë rrënuesit më të mëdhenj të rendit kushtetues dhe të sigurisë kombëtare me Puçin e tyre kundër rendit kushtetues që pas zgjedhjeve e deri në veprimin e djeshëm.

Këta kanë dëshmuar se për pushtet janë në gjendje të shkelin mbi çdo gjë, edhe mbi rendin kushtetues edhe mbi të gjallë e të vdekur!

Në kushte të tilla, në mungesë për kohë të gjatë të institucioneve më vitale të shtetit, të Kuvendit dhe Qeverisë, institucionet e sigurisë do të duhej të vepronin për të rivendosë rendin kushtetues!

Këta fëmijaqë të rrezikshëm nuk njohin gjuhë tjetër!

#MakeDardaniaAgain

#MDA

Protesta kundër Speciales, Mustafa: Sikur ta kisha shëndetin, më 7 gusht do të isha edhe unë në shesh

Të enjtën më 7 gusht me fillim nga ora 17:00, Organiazata e Veteranëve të Luftës së UÇK-së ka organizuar një protestë për të kundërshtuar padrejtësitë e Gjykatës Speciale.

Në mbështetje të kësaj proteste, doli edhe ish-kryeministri i Kosovës Isa Mustafa.

Mustafa tha se po ta kishte shëndetin edhe ai do të dilte dhe të protestonte në shesh.

“Shteti i Kosovës është rezultat i rezistencës politike të drejtuar nga Presidenti Rugova dhe i luftës së UÇK-së. Është vlerë e përbashkët. Ne kemi pasur besim në drejtësinë ndërkombëtare kur Kuvendi i Kosovës votoi themelimin e Dhomave të Specializuara në Hagë me ligje të Kosovës. Jam dëshmitar se këtë besim të plotë e kanë pasur edhe Presidenti Thaçi dhe Kryeparlamentari Veseli, me të cilët kam punuar asokohe. Gjykata u themelua me bindje se do të marrin dënimet e merituara njerëzit për të cilët faktohet se kanë kryer krime. Askujt s’do ti shkonte mendja se në vend të kësaj, bartësit kryesor të luftës për të mbrojtur pragun e shtëpisë, me rol kyç në Rambuje, në bisedat e Vjenës, në shpalljen e pavarësisë; në kundërvënien ndaj depërtimit me dhunë të një milion shqiptarëve nga Kosova, do të cilësoheshin si ndërmarrje e përbashkët kriminale”, tha Mustafa

Tentoi t’i godiste me veturë dhe sulmoi fizikisht policinë – Lihet i lirë 40-vjeçari nga Fushë Kosova

Një incident i rëndë është regjistruar të martën pasdite në rrugën “Pajazit Islami” në Fushë Kosovë, ku një person ka sulmuar zyrtarët policorë që ishin në detyrë, raporton Sinjali.

Sipas informacioneve, B.M, rreth 40-vjeçar, fillimisht tentoi t’i godiste me veturë zyrtarët policorë të cilët po intervenonin në një rast dhune në familje. Më pas, ai sulmoi fizikisht njërin nga zyrtarët, të cilin e goditi në gjoks me një mjet që dyshohet të ketë qenë telefon.

Falë reagimit të shpejtë dhe përdorimit të pajisjeve ndërmjetësuese, patrulla ka arritur ta neutralizojë dhe arrestojë të dyshuarin në vendngjarje.

Pas shoqërimit në stacionin policor, i dyshuari është intervistuar në praninë e avokatit mbrojtës, ndërsa Prokurori i Shtetit ka autorizuar inicimin e rastit si “Sulm ndaj personit zyrtar”, përderisa i dyshuari është liruar në procedurë të rregullt.

Prokuroria ka udhëzuar se hetimet rreth këtij incidenti do të vazhdojnë. Sinjali do t’ju mbajë të informuar për çdo zhvillim të ri.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata

“Kjo është e vërteta” – Kajtazi tregon arsyen pse Osmani vendosi që ta tërheqë kërkesën e saj

Gazetari Vehbi Kajtazi ka thënë se presidentja Osmani ka qenë e njoftuar se kërkesa e saj ka qenë e papranueshme nga Gjykata Kushtetuese, prandaj edhe ka vendosur që ta tërheq kërkesën e saj.

I ftuar në emisionin Rubikon në Klan Kosova, Kajtazi ka deklaruar se Osmani ka vepruar kësisoj me qëllim që të mos ndihej e poshtëruar.

Sipas Kajtazit, kërkesa e presidentes Osmani ishte e papranueshme dhe se për këtë vetë ajo ishte e njoftuar.

“Osmani e ka ditur se lënda e saj është e papranueshme. Mbi këtë bazë ka vendosur që ta tërheq lëndën në mënyrë që të mos ndjehej e poshtëruar nga gjykata. Kjo është arsyeja e vërtetë. Lënda e saj ka qenë e papranueshme, sepse mënyra se si e ka hartuar ajo ka qenë gabim dhe kjo tregon se kushdo që e ka hartuar at lëndë ka mangësi profesionale. Ky është një arsyetim për ta tërhequr lëndën.

Para se ta dërgonte këtë lëndë në Gjykatën Kushtetuese, njëri nga këshilltarët e Vjosa Osmanit, ka kontaktuar me juristë të kësaj fushe për të marrë mendim se çfarë duhet të bëjë. Ka marrë vërejtje me shkrim se lënda e saj nuk shqyrtohet nga gjykata kushtetuese. Ajo është bazuar në konfliktikin ndër institucional dhe Kuvendi i Kosovës derisa nuk është konstituar nuk konsiderohet se ka Kuvend. Për këtë arsye lënda e saj ka qenë e papranueshme”, ka thënë Kajtazi.

Presidentja Osmani në një konferencë për media të martën bëri të ditur se ka tërhequr kërkesën e saj në Gjykatën Kushtetuese, për shkak se sipas saj lënda i ishte dorëzuar një gjyqtari serb, i cili sipas Osmani përbënte rrezik kombëtar bazuar në informacionet nga organet e sigurisë.

Mushkolaj: Nëse gjyqtari serb cenon sigurinë kombëtare, atëherë përgjegjësinë më të madhe e ka vetë presidentja

Analisti Imer Mushkolaj reagoi pas vendimit të Presidentes Vjosa Osmani për të tërhequr kërkesën e saj nga Gjykata Kushtetuese, me arsyetimin se gjyqtari raportues, Radomir Laban, paraqet rrezik për sigurinë kombëtare.

Mushkolaj ngriti disa pyetje lidhur me kohën dhe mënyrën e reagimit të Presidentes, duke vënë në pikëpyetje konsistencën dhe përgjegjësinë institucionale të saj dhe të autoriteteve shtetërore.

Sipas tij, nëse gjyqtari serb vërtet cenon sigurinë kombëtare, atëherë “përgjegjësinë më të madhe e ka vetë presidentja, e cila nuk ka reaguar me vite.”

“A ka paraqitur dhe a paraqet rrezik kombëtar gjyqtari serb i Kushtetueses? Nëse po, çfarë kanë bërë institucionet, presidentja për ta larguar atë? Nëse nuk kanë bërë asgjë, atëherë kanë përgjegjësi. Nëse gjyqtari serb cenon sigurinë kombëtare, atëherë përgjegjësinë më të madhe e ka vetë presidentja, e cila nuk ka reaguar me vite. Pse presidentja nuk reagonte kur ai caktohej gjyqtar raportues për raste të tjera, por vetëm tash për kërkesën e saj? Pasojat e kësaj qasjeje të presidentes do të kuptohen më vonë. Pasoja negative, fatkeqësisht.” – shkroi ai.

Sulmi kundër Hekuran Hodës -Pse nisi, kush u arrestua dhe cili është ndikimi i disa policëve në këtë rast?

Sot është sulmuar Hekuran Hoda. Por, pse erdhi deri te ky sulm?

Burime të Insajderit bëjnë me dije se në këtë rast ka shumë interesa të përfshira dhe disa njerëz të fuqishëm me ndikim në Policinë e Gjakovës.

Pavarësisht kësaj, për këtë rast ka pasur disa të arrestuar dhe Insajderi sjell emrat, si dhe tregon se si lidhen ata me persona me ndikim të madh në hetuesi.

Por fillimisht, si ndodhi rasti dhe për çfarë nisi?

Avdyl Zeneli, gjatë kësaj jave, ka pasur një aksident me veturë me djemtë e Hekuran Hodës, Pëllumbin dhe Diamantin, thonë burime të Insajderit, duke treguar se aty nisi telashja.

Pas aksidentit, del nga vetura Avdyl Zeneli dhe dyshohet se e sulmon Pëllumb Hodën duke e kapur për fyti, ndërkohë që Diamanti e godet Avdylin me grusht.

Pastaj në skenë vjen policia, dhe në prani të tyre dyshohet se Avdyli i kërcënon Diamantin dhe Pëllumbin se “do t’i vras”.

Policia e qetëson situatën, pasi Avdyli është vëllai i policit të Autokrimeve, Shaban Zeneli.

Më vonë, pasi Hekuran Hoda njihet me Avdylin, ata vënë kontakt dhe ky i fundit i kërkon falje për atë që ka ndodhur, duke kërkuar ta sqarojnë situatën. Ata lënë takim te lokali “Konti”.

Sipas marrëveshjes, Hekuran Hoda shkon për të biseduar, por në hyrje të lokalit sulmohet nga 6 persona.

Hetuesit dyshojnë se në sulm morën pjesë: Edon A. Zeneli, Haxhi A. Zeneli, Ardion Zeneli, Bajram Begbushati, Avdyl Zeneli dhe një person tjetër, emër tashmë i njohur për Policinë.

Dyshohet se, edhe pse ka të arrestuar, ndikimi i tyre është shumë i madh në Policinë e Gjakovës, pasi djali tjetër i Avdylit është hetues në Hetimet Rajonale në Gjakovë, person i dyshuar më herët për rrjedhje të informatave policore, çka po e ngadalëson hetimin.

Burime të Insajderit bëjnë me dije se familja Zeneli po ushtron presion të madh për të mos u marrë vendime për ndalim nga Prokuroria, ani pse viktima, Hekuran Hoda, ka hundën e thyer dhe shumë plagë tjera në trup.

LAJM I FUNDIT: Gjuajtje me armë te sheshi Skënderbeu në Prishtinë, ku po mbahej një koncert

Një incident me armë zjarri ka ndodhur mbrëmjen e së martës në sheshin “Skënderbeu” në Prishtinë, ku po mbahej një koncert me prezencë të madhe qytetarësh.

Sipas informacioneve fillestare të siguruara nga burime brenda hetuesisë për Gazetën Imazhi, nuk raportohet për persona të lënduar nga kjo ngjarje.

Policia e Kosovës ka arrestuar një person që dyshohet se është i përfshirë në rastin e të shtënave, ndërkohë që arma e zjarrit e përdorur është konfiskuar.

Në vendin e ngjarjes është gjetur një gëzhojë, e cila sipas autoriteteve mund të jetë kyçe në zbardhjen e rrethanave të incidentit.

Gazeta Imazhi ka kontaktuar Policinë e Kosovës dhe është në pritje të një deklarate zyrtare nga zëdhënësit kompetentë. Detajet e reja do të publikohen menjëherë sapo të konfirmohen nga burimet zyrtare.

👉 Qëndroni me Gazetën Imazhi për më shumë informacione në vijim.

Stuhi shiu dhe ere në këtë qytet, probleme me qarkullimin në disa lagje

Vlora ëstë përballur me një mot të pazakontë ditën e sotme, ku një stuhi me shi të rrëmbyeshëm ka përfshirë qytetin.

Reshjet e shiut me intensitet të lartë kanë shkaktuar probleme në qarkullimin e mjeteve dhe të njerëzve në disa zona të qytetit i në lagjen “Pavarësia”, “Skelë” por edhe në Bulevardin kryesor.

Kushtetuesja pezullon vendimin e Qeverisë

Gjykata Kushtetuese ka miratuar kërkesën e Komunës së Graçanicës për vendosjen e masës së përkohshme, pezullimin e vendimit të Qeverisë për dhënien e parcelave të kësaj Komune në shfrytëzim të shoqatës bamirëse “Jetimat e Ballkanit” për ndërtimin e qendrës rezidenciale për autizëm, sindromë down dhe aftësi të kufizuar për fëmijë, persona të rritur dhe të moshës së shtyrë.

Sipas vendimit të 5 gushtit 2025, masa e përkohshme do të jetë në fuqi në kohëzgjatje deri më 31 tetor 2025, raporton “Betimi për Drejtësi“.

Më 28 gusht 2024, Qeveria e Republikës së Kosovës miratoi vendimin me të cilin disa parcela në Komunën e Graçanicës i jepen në në shfrytëzim Shoqatës Bamirëse “Jetimat e Ballkanit” për ndërtimin e Kompleksit “Qendra Rezidenciale e Kosovës për autizëm, sindromë down, dhe aftësi të kufizuar për fëmijë, persona të rritur dhe të moshës së shtyrë” në periudhë prej 99 vitesh.

“Sipërfaqet/pjesët e ngastrave kadastrale Nr.150-0, 155-0 dhe 17-8 në pronësi të Komunës së Graçanicës, barten në emër të Qeverisë së Republikës së Kosovës për realizimin e interesit publik sipas pikës 1. të këtij Vendimi. Pas bartjes, me fuqi të këtij Vendimi, të njëjtat do ti jepen në shfrytëzim shoqatës bamirëse nga pika 2. e këtij Vendimi. Sipërfaqet/pjesët e ngastrave kadastrale të cekura në pikën 3. të këtij Vendimi dhe sipërfaqet/pjesët e ngastrave Nr.154-0 dhe 36-0 në pronësi të Republikës së Kosovës, i jepen në shfrytëzim Shoqatës Bamirëse “Jetimët e Ballkanit” për nevoja të ndërtimit të Kompleksit “Qendra Rezidenciale e Kosovës për autizëm, sindromë daun, dhe aftësi të kufizuar për fëmijë, persona të rritur dhe të moshës së shtyrë” sipas tabelës bashkëngjitur këtij Vendimi”, citohet vendimi i Qeverisë.

Kurse, obligohej Agjencia Kadastrale e Kosovës të kryejë të gjitha veprimet procedurale dhe gjeodezike (matjet dhe ndarjet) dhe të bëjë bartjen e sipërfaqeve/pjesëve të ngastrave në emër të Shoqata “Jetimët e Ballkanit” me seli në Prishtinë.

Në vendimin e Kushtetueses thuhet se Komuna e Graçanicës më 2 prill 2025 kishte dorëzuar kërkesë në Gjykatën Kushtetuese, me të cilën kishte kontestuar kushtetutshmërinë e vendimit të Qeverisë, duke kërkuar nga Kushtetuesja të vendos masën e përkohshme për të pezulluar ex lege hyrjen në fuqi dhe zbatimin e vendimit të kontestuar, deri në vendosjen në merita të kërkesës nga Gjykata.

Komuna e Graçanicës ka kontestuar vendimin, me pretendimin se bie ndesh me nenin 3 [Barazia para Ligjit], nenin 7 [Vlerat] dhe nenin 52 [Përgjegjësia për Mjedisin Jetësor] të Kushtetutës. Po ashtu, pretendoi se procesi i miratimit të atij vendimi nuk ishte transparent, gjithëpërfshirës, por i njëanshëm dhe përjashtues.

“…duke marrë parasysh që Komuna e Graçanicës para miratimit të tij (i) nuk ishte njoftuar nga Qeveria e Republikës së Kosovës apo Ministria kompetente e Mjedisit, Planifikimit Hapësinor dhe Infrastrukturës; (ii) nuk është konsultuar gjatë përgatitjes së projektit të ndërtimit të qendrës banesore që do të realizohej në territorin e Komunës, gjë që prodhon pasoja për Komunën e Graçanicës dhe kjo ka të bëjë me synimin e Qeverisë për të hequr pjesë të njësive kadastrale në një sipërfaqe të konsiderueshme që janë në pronësi të Komunës”, thuhet në vendim.

Andaj, parashtruesja e kërkesës ka pretenduar se nuk i di detajet e mënyrës dhe kritereve sipas të cilave është vendosur. Pretendoi se Qeveria nuk i ka respektuar dispozitat ligjore të Ligjit për pronën publike. Po ashtu, tha që pa konsultim dhe miratim paraprak, Komunës së Graçanicës i hiqet e drejta për të administruar pronën e saj.

“Qeveria e Republikës së Kosovës, gjithashtu, me rastin e vendosjes, nuk e ka marrë parasysh ndjeshmërinë se në pyetje është një komunë me shumicë serbe, edhe pse ndjeshmëria për komunitetet dhe komunat me shumicë serbe njihen me Kushtetutën e Republikës së Kosovës dhe Ligjin nr. 03/L-040 për vetëqeverisjen lokale. Me miratimin e vendimit të lartpërmendur, Qeveria e Republikës së Kosovës e kufizon komunën e Graçanicës, këtu paditësin, në ushtrimin e kompetencave vetanake të parapara me nenin 17 të Ligjit nr. 03/L-040 për Vetëqeverisjen Lokale, të cilat nuk mund të kufizohen dhe as hiqen me ligje tjera”, thuhet më tej.

Sipas parashtruesit të kërkesës, miratimi i njëanshëm i vendimit të kontestuar ka për pasojë që për parcelën nr. 17-8 ZK Graçanicë të parashikojë konfiskimin e një pjese të konsiderueshme dhe se Komuna e Graçanicës ka planet e saj më të vjetra për parcelën e përmendur, të cilat janë me interes publik për Komunën dhe qytetarët e saj.

Më tej, parashtruesi i kërkesës ka pretenduar se Qeveria me marrjen e vendimit të kontestuar në mënyrë të njëanshme nuk ka marrë parasysh, ndër të tjera, se rrezikon interesat e përgjithshme, zhvillimore dhe ekonomike të Komunës së Graçanicës dhe qytetarëve të saj.

“…dhe Vendimi në fjalë është akt administrativ në formë të dekretit, që është në kundërshtim me parimet e demokracisë, sepse me shqiptimin e vendimit të kontestuar, cenohen interesat e Komunës së Graçanicës dhe në masë më të madhe cenohet kontributi i saj në zhvillimin e përgjithshëm të Republikës së Kosovës”, citohet më tej në vendim.

Duke marrë parasysh se Qeveria ka ndërmarrë hapa për ndërtimin e objektit, Komuna e Graçanicës ka kërkuar nga Gjykata Kushtetuese që të vendosë masë të përkohshme, me të cilën do të shtyjë ekzekutimin e vendimit të Qeverisë deri në nxjerrjen e vendimit nga gjykata.

Gjykata Kushtetuese ka vlerësuar se pretendimet dhe faktet e prezantuara nga Komuna e Graçanicës ngrenë çështje të nivelit kushtetues të cilat ndërlidhen me garancitë kushtetuese për organizimin dhe funksionimin e vetëqeverisjes lokale dhe legjislacionin me interes vital, sipas përcaktimeve të Kushtetutës dhe ligjeve të aplikueshme në Republikën e Kosovës.

Gjithashtu, Kushtetuesja ka vlerësuar se pezullimi i vendimit të kontestuar mund të “evitojë rreziqe apo dëme të pariparueshme” të cilat lidhen me cenimin e mundshëm të përgjegjësisë dhe kompetencave komunale përkitazi me posedimin dhe menaxhimin e pronave komunale.

Po ashtu, kjo Gjykatë thekson se vlerësimi i kushtetushmërisë së vendimit të kontestuar është në interesin publik, pasi që i shërben sigurisë juridike ndërlidhur me pasojat eventuale që mund të afektojnë përgjegjësitë komunale, përfshirë dëmin e pariparueshme që mund të pësojë buxheti i Komunës së Graçanicës, gjë e cila rrjedhimisht mund të ndikojë në mirëqenien ekonomike dhe sociale të qytetarëve të saj.

Andaj, Kushtetuesja vendosi që ta miratojë kërkesën për masë të përkohshme, në kohëzgjatje deri më 31 tetor 2025 dhe ta pezullojë menjëherë zbatimin e Vendimit (Nr.05/218) të miratuar nga Qeveria e Republikës së Kosovës më 28 gusht 2024.

Avokati Ferizi: Radomir Laban është gjyqtari më i mirë i Kushtetueses

Gjyqtari i Gjykatës Kushtetuese, Radomir Laban, po përballet me akuza, pas kërkesës së Presidentes Vjosa Osmani për shkarkimin e tij, për shkak të pretendimeve se ai përbën rrezik për sigurinë kombëtare të Kosovës.

Osmani kërkoi shkarkimin e gjyqtarit Laban pas informacioneve nga institucionet e sigurisë që lidheshin me aktivitetet e tij në vitet 2018, 2021 dhe 2024, shkruan Insajderi.

Avokati Taulant Ferizi i ka dalë në mbrojtje të gjyqtarit të Gjykatës Kushtetuese, Radomir Laban, duke theksuar se pavarësisht spekulimeve për rrezik për sigurinë kombëtare apo emërimeve politike, ai mbetet pakontestueshëm gjyqtari më i mirë i kësaj gjykate.

Ferizi thekson se, edhe nëse Laban konsiderohet si një “rrezik” për vendin, atëherë ai është pro këtij “rrezikimi”, duke theksuar se vendimet e tij të arsyetuara dhe trajtimi profesional i çdo çështjeje janë kontribuim i jashtëzakonshëm për sistemin juridik të Kosovës.

Avokati nënvizon se nuk ekziston jurist i denjë që nuk e vlerëson lartë Labanin, madje edhe për mendimet e tij mospajtuese, duke e cilësuar atë si një figurë që i ka dhënë shumë sistemit juridik, më shumë se shumë prej atyre që çdo ditë flasin për një sistem “perfekt”.