Teksa punonte në pyll, rrokulliset me traktor – vdes një 55-vjeçar

Një person ka humbur jetën në Kotorr të Skenderajt pasi i njëjti është rrokullisur me traktor derisa ishte duke punuar në pyll.

Lajmin e ka konfirmuar zëdhënësja e policisë për rajonin e Mitrovicës, Fexhrije Pllana, e cila tha se bëhet fjalë për një person të moshës rreth 55 vjeçare.

“Sot me datën 12.06.2025 rreth orës 19:00 është raportuar se në fshatin Kotorr të Skenderajt, një person i moshës madhore derisa kishte qenë duke punuar në pyll është rrokollisur me traktor”.

“Njësitë relevante kanë dalë ne vendngjarje ku mjeku kujdestar ka konstatuar se personi në fjalë i moshës rreth 55 vjeçare është pa shenja jete”, thuhet tutje në konfirmim.

Ngërçi në Kuvend – Konjufca zbulon me cilën parti mund të bëhet koalicioni

Nënkryetari i Lëvizjes Vetëvendosje, Glauk Konjufca, tha se partia e tij e ka përjashtuar një koalicion me PDK-në, ndërsa tregoi se me Fatmir Limajn kanë pasur gatishmëri për bashkëpunim.

Sipas Konjufcës, LDK-ja ka refuzuar dy herë ftesën e Kurtit për bashkëpunim, ndërsa Limaj është i vetmi opsion që ka treguar hapje për marrëveshje.

“LDK-ja na kundërshtoi dy herë. Ne dy letra ia drejtuam Kryeministri Kurti, kurse nga ana e Vetëvendosjes nuk ekziston vullneti jonë për një koalicion me PDK-në. Me kënd ne jemi të vullnetshëm ta bëjmë qeverinë dhe këtë e kemi hasë edhe prej palës tjetër. Në këtë rast po flas për zotin Limaj, për shembull”, tha Konjufca.

Ai theksoi se konstituimi i Kuvendit do të zbulojë nëse Kurti ka numrat për të formuar Qeverinë, në të kundërtën i hapet rruga partive të tjera ose zgjedhjeve.

“Nëse zoti Kurti nuk e ka kapacitetin për me ndërtu numrat për Qeverinë, atëherë i vjen radha Bedri Hamzës apo sido që është në diskrecionin e Presidentes për të dhënë mundësinë e dytë. Pas kësaj ezaurohen të gjitha dhe kemi një rrugë të çarë drejt zgjedhjeve”, u shpreh Konjufca në ATV.

Tragjike: Tentoi ta shpëtonte djalin në pishinë, nëna nga Kosova humb jetën bashkë me të

Një ngjarje e rëndë raportohet se ka ndodhur jashtë vendit, ku dyshohet se nënë e bir u mbytën në pishinë.

Rastin e ka bërë të ditur, Bashkim Ramosaj, kryetar në këtë komunë.

Në një postim në rrjetet sociale, ai shprehu dhimbjen e thellë për humbjen e tyre.

“Na e keni vrarë zemrën sot! Lagjës sonë do t’i mungojë buzëqeshja dhe mirësia jote, Elzina Halit Ramosaj, dhe birit tënd, Elonit!”

Sipas kryetarit Ramosaj, dyshohet që fëmija ka rënë në bazenin e pishinës, ndërsa nëna ka tentuar ta shpëtojë.

Hetimet për rrethanat e tragjedisë janë në vazhdim.

Arrestohet mësuesja në Mitrovicë të Veriut – dyshohet se goditi nxënësin gjatë orës së mësimit

Një mësuese në një shkollë fillore në Mitrovicën e Veriut është arrestuar nën dyshimin për veprën penale “Keqpërdorim i pozitës apo autoritetit zyrtar”, pasi dyshohet se ka sulmuar fizikisht një nxënës gjatë orës së mësimit, shkruan Insajderi.

Rasti është iniciuar nga Stacioni Policor në Mitrovicë Veri më datë 12 qershor, pasi një prind raportoi se më 6 qershor 2025, e dyshuara M.P., 56 vjeçe, kishte goditur me shuplakë djalin e tij – nxënës i shkollës ku punon e dyshuara.

Mësuesja është shoqëruar në stacionin policor dhe është intervistuar në prani të avokatit mbrojtës.

Me urdhër të prokurorit të shtetit, ajo është liruar në procedurë të rregullt.

Policia e Kosovës ka bërë të ditur se do të vazhdojë të veprojë në shërbim të të gjithë qytetarëve pa dallim, duke zbatuar ligjin në mënyrë të barabartë dhe pa përjashtime.

Shpërthen një nga vullkanet më aktivë në botë në mbi 100 metra në lartësi

Një nga vullkanet më aktivë në botë, Kilauea në Ishullin e Madh të Havait, ka rifilluar shpërthimet me intensitet të lartë, duke lëshuar lavë nga dalja e tij veriore dhe duke formuar shatërvanë që arrijnë lartësi mbi 100 metra, shkruan Gazeta Sinjali.

Sipas Associated Press, ky aktivitet është pjesë e një cikli të shpërthimeve të përsëritura që kanë filluar që nga dhjetori i vitit 2024. Shkencëtarët e Observatorit të Vullkaneve të Havait (USGS) paralajmërojnë se presioni në sistemin vullkanik është në rritje dhe shpërthimet mund të bëhen edhe më të fuqishme.

Përpara shpërthimit të fundit, është vërejtur fenomeni i “lëvizjes së pistonit të gazit”, që ka shkaktuar ngritje dhe ulje të shpeshta të sipërfaqes së lavës, deri në 10 herë në orë. Më pas është formuar një shatërvan i vogël, por i vazhdueshëm, që ushqen rrjedhat e lavës në krater.

Ky është shpërthimi i 25-të i regjistruar që nga 23 dhjetori 2024, me secilin episod që zakonisht zgjat rreth një ditë dhe pasohet nga pauza disa-ditore. Autoritetet po monitorojnë nga afër situatën për shkak të rrezikut të përshkallëzimit të aktivitetit vullkanik.

Faton Peci pagoi hotel me para të shtetit shtatëfish më shumë se që lejohet me udhëzim për udhëtime zyrtare

Në një udhëtim zyrtar në vitin e parë të marrjes së mandatit, ministri tash në detyrë i Bujqësisë, Faton Peci, së bashku me Bekim Hoxhën, drejtor i AUV’t – dyshe kjo e intervistuar nga Prokuroria Speciale për dyshimet rreth skandalit me fabrikën për mbetje shtazore – kishin qëndruar në Slloveni për një udhëtim zyrtar.

Siç ka siguruar faturën Periskopi, shihet se Faton Pecit ‘nuk i kishte mjaftuar dhoma standarde e Hotelit’, por kishte paguar me para të shtetit hiç me pak se 676.00 euro për një natë qëndrim.

Ajo çka bie në sy është që kërkesën për pagesë e ka bërë dhe arsyetuar Verona Menxhiqi atë kohë pjesë e kabinetit politik të Pecit e tashmë e sistemuar si zyrtare ligjore në shërbimin civil.

Sipas UA, shuma e lejuar për një natë qëndrimi në Slloveni është 103 euro. /Periskopi/

E rëndë në Shqipëri: Një i ri dyshohet se u vetëvar në oborrin e shtëpisë

Një ngjarje e rëndë ka ndodhur sot në fshatin Cakran të Fierit në Shqipëri, ku një i ri është gjetur pa shenja jete nga familjarët e tij.

Policia njofton se viktima është shtetasi N. Ll., 28 vjeçar, i cili dyshohet se i ka dhënë fund jetës duke u vetëvarur në oborrin e shtëpisë së tij

Sipas njoftimit zyrtar, trupi i pajetë është zbuluar rreth orës 14:00 nga të afërmit e tij, të cilët kanë alarmuar menjëherë autoritetet.

“Rreth orës 14:00, në fshatin Cakran, është gjetur nga familjarët, pa shenja jete, në oborrin e banesës së tij, shtetasi N. Ll., 28 vjeç, i cili dyshohet se është vetëvarur,” thuhet në njoftimin e Policisë së Shtetit.

Gjykata Speciale merr një vendim për Veselin dhe Selimin

Pas Jakup Krasniqit, edhe Kadri Veselit dhe Rexhep Selimit iu është refuzuar kërkesa për lirim të përkohshëm, duke iu vazhduar paraburgimi edhe për nga dy muaj.

Ndërsa, Hashim Thaçi nuk ka parashtruar një kërkesë të tillë.

Por, për të dy thuhet se ekziston rreziku që të pengojnë procedurat dhe të kryejnë vepra penale ndaj atyre që perceptohen si kundërshtarë të UÇK-së, duke përfshirë edhe dëshmitarët që kanë dhënë dëshmi ose do të dëshmojnë në këtë çështje.

Mbrojtja e Veselit kishte parashtruar se çdo rrezik i mbetur i identifikuar nga trupi gjykues, mund të menaxhohet në mënyrë efektive përmes lirimit të përkohshëm me kushte të zbatuara nga Policia e Kosovës.

Mbrojtja gjithashtu rikujtoi se gjyqtari i procedurës paraprake i kishte hedhur poshtë kushtet e propozuara nga ata për lirimin e përkohshëm, duke konstatuar se informacioni që ka ofruar Policia e Kosovës nuk ishte e mjaftueshme për të eliminuar mundësinë që Veseli të përcillte mesazhe për anëtarët e familjes së tij ose të përdorte mesazhe të koduara gjatë bisedave.

Por, tani mbrojtja ka argumentuar se bazuar në informacionet e dhëna nga Policia e Kosovës për kapacitetin e saj për të zbatuar çdo kusht të lirimit me kusht, i rrëzojnë bazat e ngritura nga gjyqtari i procedurës paraprake.

“Mbrojtja e Veselit gjithashtu paraqet se z. Veseli është i gatshëm të dorëzojë pasaportën e tij dhe të respektojë çdo masë që Trupi Gjykues e sheh si të nevojshme (“Kushtet e Propozuara”). Sipas Mbrojtjes, garancitë e dhëna nga Policia e Kosovës, së bashku me masat specifike të propozuara për lirimin me kushte të z. Veseli, duhet të merren në konsideratë bashkë me përvojën e saj në zbatimin e lirimeve të përkohshme të mëhershme të urdhëruara nga DhSK-ja. Mbrojtja gjithashtu fton Trupin Gjykues që të kërkojë drejtpërdrejt çdo informacion shtesë që e konsideron të munguar nga Policia e Kosovës”, thuhet në vendim.

Trupi gjykues i ka marrë parasysh informacionet e dhëna nga Policia e Kosovës lidhur me kapacitetet e saj për mbikëqyrjen e kësaj çështjeje, e po ashtu edhe raportimet e Komisioni Evropian që tregojnë se kapacitetet operacionale të Policisë së Kosovës janë përmirësuar.

Por, ky trup gjykues thotë se s’është bindur se masat e propozuara nga Policia e Kosovës mund t’i zbusin rreziqet përkatëse që dalin nga lirimi i përkohshëm.

“Po ashtu, Trupi Gjykues konsideron se garancitë e dhëna nga Policia e Kosovës nuk janë të mjaftueshme për të zbutur rreziqet që lidhen me rrjedhjen e mundshme të informacionit konfidencial lidhur me dëshmitarët gjatë vizitave te z. Veseli. Në veçanti, Trupi Gjykues është i vetëdijshëm se [REDAKTUAR]. Si i tillë, Trupi Gjykues konsideron se, në rast se z. Veseli dhe vizitorët e tij do të përdornin mesazhe të koduara, [REDAKTUAR]. Trupi Gjykues është gjithashtu i mendimit se çështja e mesazheve të koduara do të vazhdonte edhe në [REDAKTUAR]. [REDAKTUAR]. Siç është konstatuar më parë nga Trupi Gjykues i Gjykatës së Apelit, edhe duke marrë në konsideratë se një zyrtar i Policisë së Kosovës mund [REDAKTUAR]”, thuhet në vendim.

Por, trupi gjykues ka vendosur që vazhdimi i paraburgimit për Veselin është i nevojshëm.

Ngjashëm edhe mbrojtja e Selimit i ishte referuar garancive të ofruara nga Policia e Kosovës. Gjithashtu, ata kishin argumentuar se përfundimi i çështjes së Prokurorisë i zbut tejmase gjasat që i akuzuari të ndërmarrë veprime penguese ndaj procesit.

ZPS-ja ishte përgjigjur se asnjë prej kushteve të propozuara nuk është i mjaftueshëm për të zbutur rreziqet e lirimit të përkohshëm. Kurse, mbrojtja kishte thënë se Prokuroria nuk jep asnjë argument mbi arsye se pse kushtet e propozuara nuk janë të mjaftueshme për lirimin e përkohshëm të Selimit.

Si rrjedhojë, ngjashëm sikur për dy të akuzuarit tjerë, edhe për Selimin u mor vendimi që atij t’i vazhdohet paraburgimi.

Ndërkohë, më 15 prill 2025, Prokuroria ka njoftuar se ka përfunduar paraqitjen e provave në këtë rast.

Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimitdhe Jakup Krasniqit është konfirmuar më 26 tetor 2020.

Detaje ekskluzive: Aksioni në Ministri – Arrestohen tre zyrtare, ndër to nëna e Getoar Selimit dhe gruaja e ish-zyrtarit të AAK-së

Gazeta Sinjali sot raportoi për një aksion të ndërmarrë nga Policia e Kosovës në objektin e Ministrisë së Mjedisit, Planifikimit Hapësinor dhe Infrastrukturës, duke çuar në arrestimin e tre zyrtareve të kësaj ministrie.

Siç raportoi Sinjali, në pranga kanë përfunduarFlora Selimi, Edila Gosalci dhe Vjollca Vishaj. Të tria dyshohen për përfshirje në raste të veçanta të keqpërdorimit të detyrës zyrtare.

Personazhet në fjalë janë emra të njohur edhe për opinionin publik për shkak të lidhjeve familjare me figura të njohura. Flora Selimi është nëna e këngëtarit të njohur, Getoar Selimi. Vjollca Vishaj është bashkëshortja e Binak Vishajt, ish-anëtar i kryesisë së AAK-së, ndërsa Edila Gosalci – Qupeva është bashkëshortja e Ramë Qupevës, ish-drejtor i Departamentit të Infrastrukturës Rrugore në të njëjtën ministri.

Vjollca Vishaj me burrin e saj, Binak Vishajt, ish-anëtar i kryesisë së AAK-së

Bashkëshorti i Edila Gosalci – Qupeva, Ramë Qupeva, ish-drejtor i Departamentit të Infrastrukturës Rrugore.

Sipas burimeve të Sinjalit, hetimet ndaj tyre kanë nisur prej disa muajsh dhe arrestimet janë bërë në kuadër të një operacioni të gjerë kundër korrupsionit në institucionet publike.

Operacioni është zhvilluar në prani të hetuesve të Njësisë për Krime Ekonomike dhe përfaqësuesve të Prokurorisë Themelore.

Kujtojmë që ditë më parë, Njësia për Krime Ekonomike e Policisë së Kosovës në bashkëpunim me prokurorinë para dy ditësh në aksionin e koduar “Patenta” ku arrestuan gjithsej 11 persona.

Në mesin e njëmbëdhjetë personave të arrestuar është edhe Sadri Sutaj, djali i axhës së kryesuesit të Asamblesë së Komunës së Deçanit, Hajdar Sutaj. Krahas Sutajt, i arrestuar është edhe Kamer Shabani, Drejtor i Qendrës për Patentë Shofer në Gjakovë.

Të arrestuarit dyshohet se janë të përfshirë në keqpërdorime të rënda me procesin e testimit dhe dhënies së lejeve të vozitjes në qendrat e Patent Shoferëve në komunën e Gjilanit dhe Gjakovës.

Shpëtohet një kosovare në Shëngjin, rrezikonte të mbytej gjatë notit

Një e moshuar nga Kosova derisa ishte me pushime në Shëngjin është shpëtuar sot nga vrojtuesit e detit.

Sipas abcnews.al, e moshuara ishte në rrezik për mbytje derisa ishte duke u larë në det.

Vrojtuesit e detit i kanë dhënë ndërhyrjen e parë kosovares, dhe pastaj është dërguar në Spitalin e Lezhës për trajtim të mëtejshëm mjekësor dhe sipas raportimeve ndodhet jashtë rrezikut për jetën.