Sot dhe në ditët që vijnë: Mot i paqëndrueshëm në gjithë vendin

Instituti Hidrometeorologjik i Kosovës bën të ditur se kjo javë parashihet me kushte të paqëndrueshme meteorologjike.

Në njoftimin e lëshuar thuhet se moti do të jetë me diell, shi dhe shkarkime rrufesh.

Moti i plotë për pesë ditët e javës së ardhshme:

E hënë – Mot me diell dhe vranësira të shpërndara. Vranësirat parashihen që vende-vende të sjellin riga shi dhe shkarkime rrufesh. Temperaturat minimale do të lëvizin ndërmjet 3-5 gradë Celsius, ndërsa maksimalet e ditës parashihen të lëvizin ndërmjet 16-20 gradë Celsius. Do të fryjë erë nga drejtimi i juglindjes.

E martë – Mot i vranët dhe me intervale me diell. Temperaturat minimale do të lëvizin ndërmjet 5-8gradë Celsius, ndërsa maksimalet e ditës parashihen të lëvizin ndërmjet 18-21 gradë Celsius. Do të fryjë erë nga jugperëndimi me shpejtësi 1-8m/s.

E mërkurë – Mot i vranët dhe me intervale me diell. Vranësirat gjatë ditës parashihen të dendësohen duke krijuar kushte për riga shiu dhe shkarkime rrufesh. Temperaturat minimale do të lëvizin ndërmjet 5-8gradë Celsius, ndërsa maksimalet e ditës parashihen të lëvizin ndërmjet 19-22 gradë Celsius. Do të fryjë erë e lehtë deri mesatare nga drejtimi i veriperëndimit.

E enjte – Mot me diell dhe vranësira të shpërndara. Vranësirat gjatë ditës vende-vende parashihen të sjellin riga shiu dhe shkarkime rrufesh. Temperaturat minimale do të lëvizin ndërmjet 6-10 gradë Celsius, ndërsa maksimalet e ditës parashihen të lëvizin ndërmjet 18-23 gradë Celsius. Do të fryjë erë nga drejtimi i jugperëndimit me shpejtësi 1-7m/s.

E premte – Mot i vranët dhe me riga shiu. Parashihen edhe shkarkime rrufesh nëpër disa zona . Temperaturat minimale do të lëvizin ndërmjet 7-10gradë Celsius, ndërsa maksimalet e ditës parashihen të lëvizin ndërmjet 18-23 gradë Celsius. Do të fryjë erë nga jugperëndimi me shpejtësi 1-9m/s.

Nëntë fëmijë në Kosovë infektohen me fruth, janë të kësaj grup-moshe

Nëntë fëmijë në Kosovë janë infektuar për një javë me sëmundjen ngjitëse të fruthit.

Kështu ka bërë të ditur Instituti Kombëtar i Shëndetësisë Publike.

E këto raste, sipas IKSHPK-së, vijnë nga qytete e ndryshme të vendit, pas mosvaksinimit kundër kësaj sëmundje.

“Instituti Kombëtar i Shëndetësisë Publike të Kosovës (IKSHPK) informon se nga data 05 deri më 13 maj 2025, në Kosovë janë raportuar 9 raste të fruthit: 4 raste nga Ferizaji; 2 raste nga Shtimja dhe nga 1 rast në komunat: Lipjan, Graçanicë dhe Fushë Kosovë”.

“Sipas grup-moshave, rastet e raportuara janë: 7 raste të moshës 1-2 vjeç dhe 2 raste të moshës 4-5 vjeç. Të gjitha rastet kanë të bëjnë më fëmijë të pavaksinuar me vaksinën MMR (fruth, rubeollë dhe shyta)”, thuhet nga IKSHPK.

Vjen reagimi i Trumpit pasi Bideni u diagnostikua me kancer

Presidenti Donald Trump ka thënë se është “i pikëlluar” pasi paraardhësi dhe rivali i tij, Joe Biden u diagnostikua me kancer në prostatë.

“Melania dhe unë jemi të pikëlluar kur dëgjuam për diagnozën e fundit mjekësor të Joe Biden. Ne i urojmë atij dhe familjes së tij shërim sa më të shpejtë”, tha Trumpi në “Truth Social”.

Një zëdhënës i Bidenit tha të dielën se diagnoza u zbulua të premten pasi mjekët gjetën një nyjë të vogël në prostatën e tij, e cila kishte nevojë për vlerësim të mëtejshëm.

Joe Biden diagnostifikohet me kancer

Ish-presidenti amerikan Joe Biden u diagnostikua me kancer në prostatë, thotë zyra e tij, shkruan BBC.

“Javën e kaluar, Presidenti Joe Biden iu nënshtrua një kontrolli për një gungë të re në prostatë pas përkeqësimit të simptomave urinare. Të premten, ai u diagnostikua me kancer të prostatës, i karakterizuar nga një rezultat Gleason prej 9 (Grupi i Gradës 5) me metastaza në kocka”, thuhet në deklaratë.

Deklarata vazhdon: “Edhe pse kjo përfaqëson një formë më agresive të sëmundjes, kanceri duket të jetë i ndjeshëm ndaj hormoneve, gjë që lejon një menaxhim efektiv”.

Biden dhe familja e tij “po shqyrtojnë opsionet e trajtimit me mjekët e tij”, thuhet në deklaratë.

Këto janë pasojat që mund ti bartë Kosova për moskonstituimin e Kuvendit, që nuk i bëhet vonë Kurtit

Banka Botërore tashmë ka paralajmëruar ngadalësim të zhvillimit ekonomik për sivjet në Kosovë. Situatën, sipas njohësve të fushës, pritet ta rëndojë edhe më shumë ngërçi politik në vend. Kjo pasi edhe shumë marrëveshje ndërkombëtare financiare kanë mbetur pa u miratuar gjatë legjislaturës së kaluar. Në mesin e tyre është edhe marrëveshja e financimit me Asociacionin Ndërkombëtar për Zhvillim, si dhe ajo e kredisë me Bankën Evropiane për Investime të projekteve në KEK.

Të shtunën ka dështuar edhe tentativa e 17-të për konstituimin e Kuvendit të Kosovës. Por si ndikon mosformimi i institucioneve në zhvillimin ekonomik të vendit?

Pasojat janë serioze, paralajmëron kryetari i Odës Ekonomike të Kosovës, Lulzim Rafuna. Ai theksoi se moskonstituimi rrezikon ekonominë, investimet dhe reformat në vend.

“Ndikon për të keq dhe do të ketë pasoja të mëdha. Këto pasoja nuk eliminohen brenda natës. Ne jemi shumë mbrapa për të bërë reformat dhe për miratimin e shumë marrëveshjeve ndërkombëtare. Jemi mbrapa me themelimin e qeverisë, ndërkohë që biznesi ka nevojë për hartimin e politikave fiskale, veçanërisht për çështjen e energjisë elektrike, e cila është urgjente”, tha ai.

Edhe Aleanca e Bizneseve të Kosovës e sheh situatën me shqetësim të madh për efektet nga mosformimi i institucioneve.

Agim Shahini, kryetar i Aleancës së Bizneseve theksoi se kjo do të ndikojë dukshëm dhe do të ketë pasoja të mëdha ekonomike dhe financiare. “Sepse moskonstituimi dhe mosratifikimi i disa marrëveshjeve që kanë të bëjnë me mbështetjen e Kosovës me vlerë mbi 1 miliard euro, rrezikojnë të humbasin si pasojë e mungesës së një Kuvendi dhe Qeverie funksionale”, tha ai.

Njohësi i çështjeve ekonomike, Safet Gërxhaliu, thotë se kriza politike ka ndikim të drejtpërdrejtë në shumë sektorë, duke thelluar pasiguritë ekonomike dhe sociale.

“Efektet e kësaj krize të moskonstituimit dëmtojnë Kosovën në shumë aspekte. Në aspektin ekonomik, vendi nuk mund të ketë zhvillim pa një partneritet të mirëfilltë me Bashkimin Evropian. Vetë fakti që Kosova do të jetë e anashkaluar këtë vit nga Programi i Rritjes dhe Zhvillimit të Ballkanit Perëndimor është dëshmi për këtë. Në këto rrethana, është e vështirë të mendohet për atraktivitet për investitorët e huaj. Në aspektin social, përballemi me inflacion të lartë dhe kriza që po thellohen çdo ditë”, tha Gërxhaliu.

Ai shtoi se ndikimi do të jetë edhe në aspektin politik, në agjendën e Këshillit të Evropës dhe anëtarësimin në institucione të ndryshme kredibile./RTK

OVL-UÇK i çon letër Grenellit për Specialen: Mos e lini këtë gjykatë të shkruajë një histori të rreme

OVL-UÇK i ka dërguar një letër Amerikës, më saktësisht ambasadorit Richard Grenell, i dërguar i posaçëm i presidentit Donald Trump, për Misione të Veçanta.

Përmes kësaj letre, veteranët kanë shprehur shqetësimin e thellë për Gjykatën Speciale, duke theksuar se ajo kanë humbur qëllimin e tyre.

Sipas OVL-UÇK, ajo që do duhej të ishte një gjykatë drejtësie është shndërruar në një armë politike.

“Po ju shkruajmë nga Organizata e Veteranëve të Ushtrisë Çlirimtare të Kosovës (OVL-UÇK), për të shprehur shqetësimin tonë të thellë dhe në rritje se Dhomat e Specializuara të Kosovës e kanë humbur qëllimin e tyre. Ajo që duhej të ishte një gjykatë drejtësie është shndërruar në një armë politike. Dhe administrata juaj, më shumë se kushdo tjetër, e di se çfarë ndodh kur drejtësia bëhet politike, bëhet represion”, thuhet në letër.

Tutje, OVL-UÇK kërkon nga Grenelli dhe administrata e Trumpit, që kjo gjykatë të mbyllet.

“Ju kërkojmë ta ngrini këtë çështje me administratën tuaj. Taksapaguesi amerikan nuk i dërgoi paratë e tij të fituara me mund në Evropë për të financuar një gjykatë që shkel vetë vlerat për të cilat qëndron Amerika. Presidenti Trump po rishkruan rregullat e ndryshkura të kontrollit politik të gjyqësorit të pavarur dhe sipas rregullave të reja, kjo gjykatë duhet të mbyllet. Është një turp për drejtësinë amerikane dhe për vlerat amerikane”, thuhet më tej në letër.

“Presidenti Trump, administrata e tij dhe ju personalisht e kuptuat diçka që pjesa tjetër e botës e harroi: liria nuk jepet. Liria fitohet. Dhe më e rëndësishmja, liria mbrohet. Ne, veteranët e Ushtrisë Çlirimtare të Kosovës, e mbrojtëm atë liri. Luftuam kundër njërit prej regjimeve më brutale në Evropë. Varrosëm vëllezërit dhe motrat tona. Humbëm shtëpi, gjymtyrë dhe familje. Por kurrë nuk e humbëm besimin tonë në demokraci, në liri, në premtimin e Amerikës se drejtësia dhe liria shkojnë krah për krah. Kur lufta mbaroi, ne nuk u kapëm pas armëve, por i lamë ato. Çarmatimi, çmobilizimi dhe riintegrimi ynë ishin ndër më të suksesshmit në histori. Ne ndihmuam në ndërtimin e një Kosove demokratike. Ne i shndërruam luftëtarët në qytetarë. Ne ndoqëm shembullin e Amerikës sepse besuam në të. Udhëheqësit tanë dhanë dorëheqjen vullnetarisht për të vërtetuar pastërtinë e luftës sonë. Sepse kur drejtësia është e drejtë, e vërteta triumfon. Po Dhomat e Specializuara? Kjo nuk është drejtësi. Kjo është një gjueti shtrigash”.

“Presidenti Trump e di më mirë se kushdo tjetër se kur drejtësia rrëmbehet nga elitat politike, ajo bëhet një mjet për të heshtur patriotët. Kjo është ajo që është bërë kjo gjykatë. Një mjet për të heshtur pikërisht njerëzit që sollën paqen, që ndaluan gjenocidin, që mbrojtën lirinë. Pati dorëheqje të kryeprokurorëve, gjyqtarëve dhe zyrtarëve ligjorë nga kjo gjykatë dhe kjo nuk ishte rastësi. Ishte ndërgjegje. Ata panë se kjo gjykatë ishte bërë një makinë persekutimi politik. U desh një prokuror i korruptuar, në rrethana të errëta, për të ngritur padi. ​​Dhe ju e dini, ju e dini më mirë se ato padi ishin hartuar për të sabotuar iniciativën tuaj të paqes në Zyrën Ovale gjatë mandatit të parë të Presidentit Trump. Një paqe që ishte e arritshme. Ai prokuror u kthye me vrap në Amerikë pasi shkaktoi dëmin e tij, duke shpresuar të manipulonte vullnetin e popullit amerikan. Ai dështoi keqas. Sepse Amerika është ndërtuar mbi shekuj lirie, sundimi të ligjit, madhështie kushtetuese. Po kjo gjykatë? Kjo gjykatë është ndërtuar mbi idetë e burokratëve dhe miqve që mendojnë se drejtësia është një mjet për pushtet, jo një qëllim në vetvete”.

“Presidenti ynë, kryetari ynë i kuvendit dhe deputetët tanë të zgjedhur shkuan atje vullnetarisht. Ata nuk kanë asgjë për të fshehur. Por nuk mund ta mbrosh veten në një sallë gjyqi që është ndërtuar për të shtypur zërin tënd. Kjo nuk është drejtësi. Ky është një gjyq i shëmtuar. I dashur ambasador, ne po ju drejtohemi jo si politikanë, por si veteranë për veteranët. Vëllezër në armë. Mbrojtës të lirisë. Ju kërkojmë ta ngrini këtë çështje me administratën tuaj. Taksapaguesi amerikan nuk i dërgoi paratë e tij të fituara me mund në Evropë për të financuar një gjykatë që shkel vetë vlerat për të cilat qëndron Amerika. Presidenti Trump po rishkruan rregullat e ndryshkura të kontrollit politik të gjyqësorit të pavarur dhe sipas rregullave të reja, kjo gjykatë duhet të mbyllet. Është një turp për drejtësinë amerikane dhe për vlerat amerikane”.

“Ne kërkojmë një shqyrtim të plotë, një audit financiar dhe një hetim të pavarur se si funksionon kjo gjykatë dhe si zyrtarët e saj jetojnë si mbretër, ndërsa luftëtarët tanë të lirisë ulen në qelitë e burgut për të mbrojtur lirinë. Nëse liria ka ndonjë kuptim, nëse drejtësia nuk është vetëm një fjalë, por një parim, atëherë kjo nuk mund të qëndrojë. Ne luftuam kundër Millosheviqit për të ndaluar këtë lloj abuzimi. Dhe do të flasim përsëri. Amerika ishte me ne kur kishte më shumë rëndësi. Dhe tani po kërkojmë përsëri, ju lutem mos e lini këtë gjykatë të shkruajë një histori të rreme. Mos i lini elitat e korruptuara t’i shndërrojnë veteranët në keqbërës. Kjo nuk është vetëm një thirrje për ndihmë. Kjo është një thirrje për të mbrojtur lirinë, përsëri”, përfundon letra e OVL-UÇK-së drejtuar Amerikës.

Kriza me mbeturinat në Prishtinë, Rama jep detaje se kur pritet të rikthehet normaliteti

Kryetari i Komunës së Prishtinës, Përparim Rama, ka reaguar ndaj situatës së fundit me mbeturinat në kryeqytet, duke e cilësuar ndërprerjen e shërbimeve nga Ndërmarrja “Pastrimi” si “kulmin e papërgjegjësisë institucionale dhe një formë të përsëritur të shantazhit”.

Në një postim në facebook, Rama njoftoi se komuna ka mobilizuar të gjitha kapacitetet alternative për të menaxhuar situatën dhe ka theksuar se qytetarët nuk do të mbesin pa shërbime për shkak të, siç tha ai, “kalkulimeve politike të askujt”.

“Qytetarët e Prishtinës nuk meritojnë të përballen me situata që cënojnë shëndetin publik dhe dinjitetin qytetar. Ekipet tona kanë punuar 24 orë gjatë vikendit dhe nga dita e hënë pritet rikthimi i normalitetit”, ka shkruar Rama.

Rama kritikoi ashpër përdorimin e ndërmarrjeve publike si instrument shantazhi për interesa të ngushta politike, duke u zotuar se epoka e sabotimeve dhe keqpërdorimit të parasë publike do të marrë fund.

“Unë nuk jam dhe nuk do të jem pjesë e pazareve politike. Qëndrimi im është i pandryshueshëm – gjithmonë në interes të qytetarëve”, tha Rama.

Kryetari falënderoi qytetarët për mirëkuptimin dhe mobilizimin e tyre në ruajtjen e pastërtisë në qytet, duke theksuar se qytetarët tashmë e kanë kuptuar “skemën e sabotimeve që po bëhen në kurriz të tyre”.

Situata me menaxhimin e mbeturinave ka nxitur reagime të shumta në opinionin publik, teksa qytetarët janë përballur me grumbullime të mëdha të mbeturinave në shumë pjesë të qytetit. Komuna ka premtuar zgjidhje të qëndrueshme dhe shërbim të denjë për kryeqytetin.

Këto janë kriteret që duhet t’i përmbush Kosova për anëtarësim në Këshillin e Evropës

Alain Berset, sekretari i Përgjithshëm i Këshillit të Evropës, ka treguar kushtet që duhet të përmbushë Kosova për anëtarësim.

Ai ka deklaruar se njëra nga këto kushte është që vendi ta njeh njihni Gjykatën Evropiane për të Drejtat e Njeriut.

“Për t’u bërë pjesë e Këshillit të Evropës duhet të përmbushen disa kritere. Njëri prej kushteve është të bëheni anëtare e Konventës Evropiane për të Drejtat e Njeriut, ta njihni Gjykatën Evropiane për të Drejtat e Njeriut, trupën më të rëndësishme të Këshillit të Evropës dhe poashtu të zbatoni të gjitha vendimet e GjEDNj-së”, tha ai në Klan Kosova.

“Mendoj se kjo është në interes të të gjithë qytetarëve, pra shteteve, vendeve anëtare, që ta kenë mundësinë të kenë qasje në Gjykatë dhe të njihen me të gjitha shkeljet e të drejtave të njeriut dhe poashtu t’i adresojnë ato dhe të merren vendime për to”.

“Kjo është njëra, ndërkaq një pikë tjetër është siç e dini përfshirja dhe diskutimet me të gjithë qytetarët që jetojnë në territorin e Kosovës, po ashtu në pjesën veriore. E dini saktësisht disa pika të kushteve të vendosura në tavolinë nga ana e Asamblesë Parlamentare të Këshillit të Evropës që do të jetë një element kyç dhe shumë i rëndësishëm i të gjitha diskutimeve”, ka thënë Berset.

TË NGJASHME

Parlamenti Evropian miraton rezolutën për Kosovën

E dhimbshme: Kjo është 19-vjeçarja që humbi jetën nga vetaksidenti në Pouskë të Prizrenit

Një ngjarje tragjike ka ndodhur në orët e para të mëngjesit të së dielës në fshatin Pouskë të Prizrenit, ku një vajzë e re ka humbur jetën si pasojë e një vetaksidenti.

E ndjera është identifikuar si Dilge Nanovçe, 19-vjeçare, shtetase turke me prejardhje nga Kosova. Ajo ishte duke e drejtuar veturën në momentin kritik, kur për arsye ende të paqarta, ka humbur kontrollin mbi automjetin dhe ka dalë nga rruga.

Në veturë ndodheshin edhe dy persona të tjerë, të cilët kanë pësuar lëndime dhe janë dërguar me urgjencë në spital për trajtim mjekësor. Fatkeqësisht, për 19-vjeçaren nuk pati shpëtim, pasi ajo ndërroi jetë në vendin e ngjarjes.

Sipas të dhënave fillestare, vajza po ngiste veturën pa patentë shoferi dhe pa përvojë të mjaftueshme në vozitje. Automjeti i përfshirë në aksident ishte i tipit Opel Astra me targa vendore, transmeton Gazeta Imazhi.

E rëndë në Shqipëri: Shembet muri rrethues, humbjet jetën një 4 vjeçare

Një ngjarje tragjike ka ndodhur mesditën e së dielës në fshatin Suk 2 të Roskovecit në Shqipëri, ku një vajzë 4-vjeçare ka humbur jetën pasi është zënë poshtë nga shembja e një muri rrethues, shkruan Gazeta Sinjali.

Sipas njoftimit të policisë, ngjarja ka ndodhur rreth orës 12:40, në pronën e shtetasit L. T., babai i viktimës. Muri rrethues i amortizuar i banesës është shembur dhe ka zënë poshtë të miturën, e cila për pasojë ka ndërruar jetë.

E mitura është dërguar në qendrën shëndetësore të Roskovecit, por ka mbërritur pa shenja jete.

“Rreth orës 12:40, në fshatin Suk 2, Roskovec, dyshohet se është shembur një mur rrethues në pronësi të shtetasit L. T., dhe për pasojë ka zënë poshtë vajzën e tij të mitur rreth 4 vjeçe, e cila ka ndërruar jetë. Grupi hetimor po punon për zbardhjen e rrethanave të ngjarjes,” thuhet në njoftimin e policisë.