“Nga bashkimi kombëtar te interesat në Greqi”, akuzat e Kajtazit për Kurtin

Gazetari Vehbi Kajtazi ka deklaruar se Kosova ndodhet në një gjendje të mjerueshme politike, duke e cilësuar Albin Kurtin si uzurpator të pushtetit. Ai foli edhe për raportin me Shqipërinë që sipas tij është “fake”, por edhe me interesat në Greqi.

Sipas Kajtazit, Kosova aktualisht po përballet me një izolim të thellë ndërkombëtar.

Ai theksoi se Albin Kurti e ka dhënë dorëheqjen si kryeministër për të bërë betimin si deputet në Kuvend, por sipas Kushtetutës dhe ligjeve në fuqi, nuk i lejohet që të vazhdojë të ushtrojë funksionin e kryeministrit njëkohësisht si deputet.

Kështu, Kajtazi e ka cilësuar Kurtin si “uzurpator të pushtetit”.

“Jemi në një gjendje të mjerueshme politike. Kosova është e izoluar. Udhëhiqet nga një uzurpator i pushtetit sepse Kurti ka dhënë dorëheqje si kryeministër, si akt, për tu betu si deputet  por nga ana tjetër nuk i lejohet as me ligj as me kushtetutë me ushtru funksionin e kryeministrit derisa është deputet. Është uzurpator i pushtetit këtu dhe kërkush ska çka i bën këtij njeriu me shku me tërheq apo me largu prej zyrës ku qëndron ilegalisht. Kushtetuta dhe ligji që e ka miratu vet nuk e lejojnë një gjë të tillë”, u shpreh Kajtazi në Rubikon.

Ai shtoi se Kurti tashmë është bërë përfaqësuesi më i mirë i mjerimit në të cilin ndodhet vendi.

“Nëse e sulmojmë Shqipërinë nga këndi i Albin Kurtit, fatkeqësi është për neve. Ka arrit me na mbyt me mjerimin e tij dhe ka arrit me na mbyt edhe logjikën tonë të shëndosh, edhe sytë edhe pamjen edhe gjithçka. Ka arrit për shumë vjet”, tha Kajtazi.

Ai theksoi faktin se që nga ardhja në pushtet, Kurti nuk i ka kaluar pushimet asnjëherë në Shqipëri, por gjithmonë në Greqi – një vend që, sipas tij, përfaqëson interesa të tjera të lidhura me pushtetin e Kurtit.

“Ky patrioti që neve na ka ardh në pushtet për bashkim kombëtar a e dini që prej se është kryeministër kurrë nuk ka kalu pushime në Shqipëri. Gjithmonë i ka kalu në Greqi. Kjo na flet shumë. Sepse Kurti raportin me Shqipërinë e ka “fake”. Se ai nuk është patriot qysh na shitet, se në Greqi ka gjetur interesa tjera. Interesat që lidhen me pushtetin e Albin Kurtit dhe Greqinë janë konfirmu edhe në hetimet penale që i ka zhvillu Prokuroria Speciale e Kosovës. Interesat ekonomike që lidhen me energjinë elektrike dhe në mesazhet e Dejona Mihalit. Pra kjo është gjendja e Kosovës, e përfaqësuar nga Kurti tash”, shtoi Kajtazi.

Analisti Spahiu tregohet pak diplomat: Nuk do të lëshohem në detaje, por Gjuriqi është largpamës

Një fotografi e publikuar nga profesori, Nexhmedin Spahiu, ku shfaqet në zyrën e ministrit të Punëve të Jashtme të Serbisë, Marko Gjuriq, ka ngjallur reagime të shumta në media dhe skenën politike në Prishtinë, transmeton Insajderi.

Spahiu, në një deklaratë për gazetën Danas, ka sqaruar se takimi me ministrin serb ishte krejtësisht informal. Ai tha se ishte ftuar për një kafe nga Gjuriq, me të cilin ka një njohje të vjetër, sapo ky i fundit kishte kuptuar se Spahiu ndodhej në Beograd.

“Thjesht isha në një konferencë në Beograd. Ministri mori vesh që jam aty dhe më ftoi për një kafe. Diskutuam për marrëdhëniet ndëretnike, për dialogun dhe shkëmbyem mendime. Asgjë e jashtëzakonshme”, deklaroi Spahiu.

Ai shtoi se reagimet në Prishtinë ishin të pritshme dhe të motivuara politikisht.
“Është ngritur shumë zhurmë sepse opozita në Prishtinë pretendon se kam qenë aty për të siguruar vota për Albin Kurtin, gjë që është krejtësisht e pavërtetë. Nuk kemi folur fare për atë temë”, theksoi ai.

Spahiu vlerësoi bisedën si të dobishme për të dy palët.

“Ishte një bisedë joformale për çështje që rëndojnë shoqërinë kosovare dhe raportet Kosovë-Serbi. Nuk do të ishte korrekte të zbuloj detaje, por mund të them se e vlerësoj Marko Gjuriqin si një nga politikanët më largpamës në qeverinë serbe – ai e di çfarë kërkon dhe për çfarë punon”, tha ai.

Surpriza në Tiranë: 11 figura të rëndësishme të PS rrezikojnë të mbeten jashtë Kuvendit

Numërimi i votave nga diaspora po shkon drejt përfundimit, gara në qarkun e Tiranës po rezulton më e ngushtë dhe më e paparashikueshme se pritej, duke sjellë surpriza të mëdha për Partinë Socialiste, shkruan Gazeta Sinjali.

Rezultatet paraprake tregojnë se 11 figura të rëndësishme të kësaj force politike janë jashtë listës fituese për momentin dhe rrezikojnë të mos jenë pjesë e legjislaturës së re që pritet të nisë në shtator.

Bëhet fjalë për emra të njohur të politikës shqiptare, përfshirë ish-ministra, deputetë me përvojë dhe personalitete të spikatura në jetën parlamentare të PS-së. Kjo situatë ka krijuar jo pak tension dhe diskutim brenda radhëve të partisë, ndërsa pritet që rezultati përfundimtar të sjellë qartësi për formacionin e ri politik në Kuvend.

Pandeli Majko

Mimi Kodheli

Klotilda Bushka

Ermonela Felaj

Xhemal Qefalia

Toni Gogu

Arben Pëllumbi

Etjen Xhafaj

Etilda Gjonaj

Plarent Ndreca

Blerina Gjylameti

“Marrëveshje kartel”, në Prishtinë dhe Gjakovë çmimi i bukës u shtrenjtua me koordinim mes furrave

Autoriteti i Konkurrencës thotë se pas inspektimeve në disa furra në Prishtinë dhe Gjakovë kanë ardhur në përfundim se shtrenjtimi i çmimit të bukës është bërë me marrëveshje dhe me koordinim. Ndaj shkelësve të Ligjit për Mbrojtjen e Konkurrencës (marrëveshje të ndaluara – kartele), pos hetimeve formale, Autoriteti i Konkurrencës po e analizon mundësinë e masës së përkohshme që nënkupton mbylljen e operatorit ekonomik deri në 6 muaj.

Kosova është shtet demokratik dhe ekonomia funksionin mbi parimin e tregut të lirë.

Shteti nuk mund të vendosë se sa kushton një produkt por vepron kur tregtarët e bukës për shembull, në një qytet, vendosin që çmimi për një bukë nga 50 centë të bëhet 60 centë. Shembull për këtë ishte Gjakova, para dy javësh.

Kjo është konstatuar pas inspektimeve në dy qytete. Këtë e kanë konfirmuar nga Autoriteti i Konkurrencës.

“Pas inspektimeve të zhvilluara, Autoriteti ka identifikuar shkelje të nenit 5 të Ligjit Nr. 08/L-056 për Mbrojtjen e Konkurrencës (marrëveshje të ndaluara – kartele) nga subjekte të sektorit të bukës në Komunën e Gjakovës dhe atë të Prishtinës. Këto shkelje lidhen me bashkërendimin e çmimeve mes furrtarëve për produkte të ndryshme, çka përbën shkelje ligjore për koordinim të tillë në treg.”, kanë deklaruar nga AKK për RTV Dukagjini.

Për këto raste janë duke u ndërmarrë hapat procedurale për nisjen e hetimeve formale, në përputhje me ligjin.

Autoriteti i Konkurrencës thotë se është duke e analizuar mundësinë e vendosjes së masave të përkohshme sipas Ligjit për Mbrojtjen e Konkurrencës. Masat e përkohshme nënkuptojnë mbylljen e operatorit ekonomik deri në 6 muaj.

Nën llupën e AKK-së janë mbi 20 produkte ushqimore, përfshirë edhe në sektorin e gastronomisë.

“…Është një monitorim edhe në produktin e kafes, edhe tek kafja e kemi pas një shqetësim, në sektorin e gastronomisë, me theks të veçantënë rritjen e çmimit të kafesë, është në vëzhgim prej autoritetit. Inspektorët e autoritetit çdo ditë tani më janë në terren dhe po zhvillojnë në qytete të ndryshme intervista dhe po mbledhin të dhëna prej ndërmarrjeve për arsyejet e ngritjes së këtyre çmimeve” deklaroi Adrian Mustafa – U.d. i shefit të Departamentit të Analizës dhe Metodologjisë.

Arsyetimi kryesor të cilin e kanë dhënë furrtarët por edhe gastronomët për shtrenjtimin e çmimit të bukës dhe kafesë është shtrenjtimi i çmimit të rrymës. Megjithatë çmimet janë ngritur disa javë para se KEDS të nis faturimin me tarifa të reja.

Tarifat e reja të energjisë, ‘zgjohet’ Kurti më në fund – i thotë disa fjalë

Kryeministri në detyrë i Republikës së Kosovës, Albin Kurti, mori pjesë në Forumin me temë “Liberalizimi i tregut të energjisë elektrike: efektet dhe masat lehtësuese”, organizuar nga Këshilli Kombëtar për Ekonomi dhe Investime.

 

 

Në këtë forum, i cili u hap nga Sekretari i Këshillit Kombëtar për Ekonomi dhe Investime, Artan Mehmeti, u diskutua për ndikimin e liberalizimit të tregut të energjisë dhe mënyrat e bashkëpunimit për përballimin me sukses të kësaj sfide, e cila është paraparë me Ligjin për Energji Elektrike të miratuar në vitin 2016. Kryeministri u shpreh se janë të vetëdijshëm se bizneset që preken nga liberalizimi mund të përballen me rritje të kostos, veçanërisht ato prodhuese.

Me këtë rast, ai siguroi që Qeveria e Republikës së Kosovës do të qëndrojë pranë prodhuesve vendorë për të dëgjuar brengat kryesore dhe nevojat e tyre për përkrahje lidhur me procesin e liberalizimit të tregut.

“Qëllimi ynë i përbashkët është i qartë: të sigurojmë një kalim të menaxhueshëm dhe të drejtë drejt tregut të lirë, ku askush nuk mbetet pas dhe ku konkurrenca dhe investimet nxisin zhvillim. Si Qeveri, do të qëndrojmë gjithmonë pranë prodhuesve tanë dhe do të sigurojmë që edhe ky proces të shoqërohet me masa konkrete mbështetëse, në mënyrë që prodhuesit vendorë të mos mbeten të pambrojtur dhe të mund të vazhdojnë rritjen, zhvillimin dhe gjithashtu depërtimin gjithnjë e më të madh përmes eksportit në tregje të jashtme të prodhimeve tona”, u shpreh kryeministri Kurti, njofton Zyra e Kryeministrit.

 

 

Ai përmendi hapat konkretë të ndërmarrë për tejkalimin e kësaj sfide, duke përfshirë: dizajnimin e skemave të granteve për efiçiencë të energjisë dhe burime të ripërtërishme, për të ulur konsumin e energjisë elektrike, me mbështetje konkrete e që do të rritet me rishikimin e buxhetit; hapjen e thirrjeve publike përmes KIESA-s për subvencionimin e Ndërmarrjeve Mikro, të Vogla dhe të Mesme për blerjen e makinerive prodhuese dhe përpunuese, me një buxhet të planifikuar prej 5 milionë eurosh; si dhe mbështetjen për të bërë auditime energjetike, që të bëhet ulja e konsumit dhe kostove të energjisë elektrike.

Ndër të tjera, kryeministri Kurti veçoi edhe përkrahjet e tjera gjatë katër viteve të qeverisjes, sikurse rritja e kapitalit të lirë, tregjeve të reja, infrastrukturës moderne, fuqisë punëtore të kualifikuar dhe të motivuar, si dhe lehtësimin e barrës administrative.

Ndërkaq, ministrja në detyrë e Ekonomisë, Artane Rizvanolli, tha se liberalizimi i tregut të energjisë elektrike është obligim që rrjedh nga pjesëmarrja në komunitetin e energjisë dhe integrimi në tregun rajonal dhe evropian, të cilin tanimë e kanë zbatuar edhe më herët dhe në masë shumë më të madhe shtetet e rajonit.

Ajo, ndër të tjera, theksoi se është duke u punuar në një skemë të re mbështetëse për biznese për efiçiencë të energjisë.

“Aktualisht jemi duke e përfunduar një skemë të re mbështetëse për bizneset prodhuese me përkrahjen e LuxDev Development. Brenda kësaj skeme do të përkrahim efiçiencën e energjisë përmes investimeve në izolim të ndërtesave, sisteme solare fotovoltaike (FV, për prodhim të energjisë elektrike), sisteme solare termike (për ngrohje të ujit), bateri për sisteme solare FV, si dhe pajisje si rregullatorët e fuqisë reaktive për të rritur efiçiencën e pajisjeve që prodhuesit tashmë i kanë në përdorim.”

Në këtë forum morën pjesë edhe zëvendëskryeministri në detyrë Besnik Bislimi, ministrja në detyrë e Ekonomisë, Artane Rizvanolli, ministrja në detyrë e Industrisë, Ndërmarrësisë dhe Tregtisë, Rozeta Hajdari, prodhues, përfaqësues të bizneseve, përfaqësues të Odave Ekonomike dhe përfaqësues të Këshillit Kombëtar për Ekonomi dhe Investime.

Presidenca i reagon Nexhmedin Spahiut pasi ky tha se Kosova u prezantua me fusnotë në samitin në Tiranë

Analisti Nexhmedin Spahiu ka thënë se mediat në Serbi “po thonë” se Kosova në Samitin e Komunitetit Politik Evropian në Tiranë është prezantuar me fusnotë.

“Mediet e Beogradit po thonë që Kosova në Tiranë është prezantuar me fusnotë. Dhuratë e çmuar e Edi Ramës për Aleksandar Vučić. Nuk po tregojnë gjë cili ka qenë reagimi I Vjosa Osmanit”, ka shkruar Spahiu në ‘Facebook’.

Ndaj kësaj deklarate ka reaguar Ridvan Haliti nga kabineti i presidentes Osmani, i cili ka thënë se kjo deklaratë e Spahiut është gënjeshtër dhe shpifje.

Ai ka shtuar se Kosova nuk ka qenë e përfaqësuar me fusnotë as kur samitet janë organizuar në shtetet jonjohëse.

“Kjo eshte genjeshter e shpifje e rradhes nga ana e Nexhmedin Spahiut. As ne kete EPC ne Tirane e as ne 5 EPC paraprake Kosova s’ka qene e perfaqesuar me fusnote, madje as kur keto samite jane organizuar ne shtete jonjohese si Spanja e Moldavia. Ne sallen plenare dhe cdo salle tjeter ku mbahen takime, te gjithe lidereve, pavaresisht nga cili shtet vijne, u shkruan emri e mbiemri perpara, pra te gjithe perfaqesohen ne nivel te barabarte. Shihni fotot e bashkengjitura nga samiti ne Tirane qe e deshmojne kete. Madje Kosova sivjet ka qene e perzgjedhur qe bashke mr Kroacine, te udheheqe diskutimet rreth sigurise e migrimit.”

Trump njofton kthesën e madhe në luftën Ukrainë – Rusi

Presidenti Donald Trump ka thënë se telefonata e tij me Vladimir Putinin “shkoi shumë mirë” dhe Rusia e Ukraina “do të fillojnë menjëherë negociatat drejt një armëpushimi”.

Në një postim në Truth Social pak çaste më parë, Trump shtoi se Vatikani kishte shprehur interes për të pritur negociatat.

Ai më pas vazhdoi duke thënë se Rusia “dëshiron të bëjë tregti në shkallë të gjerë” me SHBA-në sapo të mbarojë lufta dhe se Ukraina gjithashtu mund të përfitojë shumë nga tregtia.

Trump tha gjithashtu se kishte informuar Volodymyr Zelenskyy-n, presidentin ukrainas, si dhe udhëheqësit e BE-së, Francës, Italisë, Gjermanisë dhe Finlandës, menjëherë pas telefonatës me Putinin.

Postimi i plotë:

Sapo përfundova telefonatën time dy-orëshe me Presidentin Vladimir Putin të Rusisë. Besoj se shkoi shumë mirë. Rusia dhe Ukraina do të fillojnë menjëherë negociatat drejt një armëpushimi dhe, më e rëndësishmja, një FUNDI të Luftës. Kushtet për këtë do të negociohen midis dy palëve, siç mund të bëhet vetëm sepse ato i dinë detajet e një negociate për të cilën askush tjetër nuk do të ishte në dijeni. Toni dhe fryma e bisedës ishin të shkëlqyera.

Nëse nuk do të ishte kështu, do ta thoja tani, në vend që të ndodhte më vonë. Rusia dëshiron të bëjë TREGTI në shkallë të gjerë me Shtetet e Bashkuara kur kjo “gjakderdhje” katastrofike të mbarojë, dhe unë pajtohem. Ekziston një mundësi e jashtëzakonshme për Rusinë për të krijuar sasi të mëdha vendesh pune dhe pasurie. Potenciali i saj është i PAKUFIZUAR. Po kështu, Ukraina mund të jetë një përfituese e madhe në Tregti, në procesin e rindërtimit të vendit të saj. Negociatat midis Rusisë dhe Ukrainës do të fillojnë menjëherë.

E kam informuar Presidentin Volodymyr Zelenskyy të Ukrainës, Ursula von der Leyen, Presidente e Komisionit Evropian, Presidentin Emmanuel Macron të Francës, Kryeministren Giorgia Meloni të Italisë, Kancelarin Friedrich Merz të Gjermanisë dhe Presidentin Alexander Stubb të Finlandës, gjatë një telefonate me mua, menjëherë pas telefonatës me Presidentin Putin. Vatikani, i përfaqësuar nga Papa, ka deklaruar se do të ishte shumë i interesuar të priste negociatat. Le të fillojë procesi!

Presidentja Osmani nën kërcënime të vazhdueshme – Asnjë ndëshkim ndaj autorëve

Presidenca e Kosovës ka pranuar një email kërcënues të drejtuar ndaj Presidentes së Republikës, Vjosa Osmani.

Emaili është dërguar në adresën zyrtare të Presidencës dhe përmban gjuhë fyese e kërcënuese, duke përfshirë etiketime si “kriminele”, “ordinere” dhe “antikushtetuese”, si dhe kërcënime serioze për jetën e Presidentes.

Bekim Kupina Këshilltari për Media i Presidentes tha se kërcënimi i kësaj jave është vazhdimësi e kërcënimeve të vazhdueshme me jetë ndaj Presidentes Osmani.

Sipas tij, ajo çka i bashkon këto kërcënime është mosveprimi i institucioneve të drejtësisë.

Kupina theksoi se përkundër kërcënimeve nuk është marrl asnjë veprim ndaj kërcënuesve për vite me radhë.

“Përkundër dhjetëra kërcënimeve — shumica prej tyre kërcënime me jetë — asnjë veprim nuk është ndërmarrë ndaj kërcënuesve për vite me radhë. Kjo, edhe pse në shumicën e rasteve, kërcënimet bëhen me emër, mbiemër dhe nga profile të identifikueshme. Disa kërcënime janë bërë madje edhe në emisione televizive, por edhe atëherë kanë munguar veprimet për t’i përballur kërcënuesit me përgjegjësi.”, tha ai.

Ai thekson se këto kërcënime janë të vetmet në historikun e institucioneve.

“Rasti i kërcënimeve të njëpasnjëshme me jetë ndaj Presidentes dhe familjes së saj është i vetmi në historikun e institucioneve, siç na është thënë nga institucionet e sigurisë, ku asnjë nga kërcënuesit nuk është përballur me drejtësinë.”, u shpreh ai.

“Kur kërcënimet e rënda nuk trajtohen me seriozitetin që meritojnë, ato jo vetëm që nuk ndalen — përkundrazi, inkurajohen. Kjo klimë e rrezikshme nxit të tjerë të ndjekin të njëjtin model: nxitje dhune, thirrje për eliminim fizik dhe përçmim të plotë ndaj rendit kushtetues.”, tha mes të tjerash ai.

Kërcënohet presidentja Vjosa Osmani

Presidentja e Kosovës, Vjosa Osmani, është kërcënuar sërish me jetë përmes një mesazhi të dërguar në adresën elektronike zyrtare të Presidencës. Ky rast i fundit vjen në një seri kërcënimesh që, sipas burimeve, janë shpeshtuar kohëve të fundit, shkruan Gazeta Sinjali.

Në fotografinë e publikuar së fundmi, mund të shihet përmbajtja e mesazhit kërcënues, që i është drejtuar presidentes Osmani. Deri tani, nuk ka detaje shtesë për autorin apo autorët e mundshëm të këtij akti.

“Me tra nprit dekt me tlan partis dyt mundsin duhet deri tash kriminele antikushtetuese ordinere ti ha ropt tvraj”, shkruhet në mesazhin e dërguar.

Tragjike në Itali: Vdes shqiptari në vendin e punës, u shtyp nga një kamion ndërtimi

Një aksident tragjik në vendin e punës ka ndodhur mëngjesin e sotëm, më 19 maj, në komunën Vernio pranë Pratos, Itali, ku një punëtor shqiptar 56-vjeçar humbi jetën, shkruan Gazeta Sinjali.

Sipas raportimeve nga La Repubblica, viktima ishte duke shkarkuar materiale ndërtimore nga një kamion në zonën via del Bisenzio, në fshatin Mercatale. Mjeti ishte ndalur në një shpat, por për shkak të humbjes së tërheqjes në asfalt, kamioni lëvizi papritur, duke e shtypur punëtorin dhe i shkaktoi atij vdekjen e menjëhershme. Më pas, automjeti përfundoi në një kanal anës rrugës.

Ngjarja ndodhi rreth orës 11:00 paradite. Viktima ishte i punësuar nga një kompani që punonte për llogari të Hekurudhave Shtetërore italiane. Edhe pse në vendin e ngjarjes mbërriti shpejt një ambulancë e emergjencës 118, mjekët nuk mundën të bënin asgjë për ta shpëtuar.

Në vendngjarje ndërhynë gjithashtu zjarrfikësit, karabinierët, policia bashkiake dhe inspektorë të ASL Centro. Prokuroria e Pratos, nën drejtimin e prokurorit Luca Tescaroli, ka nisur një hetim për vrasje nga pakujdesia. Janë sekuestruar zona ku ndodhi aksidenti si dhe vetë kamioni, për të hetuar nëse ka pasur shkelje të rregullave të sigurisë në punë.