U zumë sepse po më shikonte”, zbardhet dëshmia e 14-vjeçarit që vrau shokun e klasës

A2 CNN ka zbardhur dëshminë e autorit të vrasjes së 14-vjeçarit pranë shkollës “Fan Noli” në Tiranë.

Sipas burimeve, pasditen e së martës ai është marrë në pyetje dhe ka deklaruar: “Jemi zënë të premten sepse po më shikonte. E kishim lënë për t’u sqaruar. Pastaj jemi zënë sërish të hënën. Ai lajmëroi shokët, si dhe unë shokët e mi. Gjatë përleshjes, ndodhi ajo që ndodhi”.

I pyetur nese është penduar, ai nuk ka pranuar të flasë.

Ndërkohë, as thikën nuk ka treguar se ku e ka fshehur. Ai ka thënë se nuk e kishte në shkollë brenda, por e kishte fshehur diku aty afër.

Dëshmitari i 105-të në rastin ndaj Thaçit dhe të tjerëve: Me kanë akuzuar se kam vrarë shqiptarë, ishte justifikim për ndalimin tim

Në Dhomat e Specializuara të Kosovës (DhSK) në Hagë ka filluar dëshminë dëshmitari i 105-të i cili mban kodin W00344 në procesin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit.

Ky dëshmitar është me masa mbrojtëse dhe është duke dëshmuar përmes video-lidhjes dhe sipas kryetarit të turit gjykues, për arsyeje shëndetësore ky dëshmitar e dha ulur betimin solemn. Ai gjatë dëshmisë në publik tha se është ndaluar dhe si justifikim për ndalimin e tij është thënë se kishte vrarë shqiptarë.

“Thjesht me kanë akuzuar se kam vrarë disa shqiptarë. Nuk kishte kuptim kjo fare se ishte thjeshtë një arsye-justifikim për ndalimin tim”, tha dëshmitari duke iu përgjigjur pyetjeve të prokurorit, Cezary Mihailzcuk.

Megjithatë, përpara kësaj, prokurori lexoi një përmbledhje për dëshmitarin ku tregoi se gjatë ndalimit, i njëjti ishte rrahur dhe keqtrajtuar, raporton “Betimi për Drejtësi”.

“Në vitin 1999, dëshmitari 00344 u rrëmbye nga pjesëtarë të armatosur të UÇK-së përpara shtëpisë së tij dhe u dërgua me makinë se bashku me një tjetër person në një vendndalimi të UÇK-së, dëshmitari 00344 është mbajtur në atë vend me disa të ndaluar të tjerë. Gjatë ndalimit të tij, ai është rrahur në mënyrë të vazhdueshme dhe ka dëgjuar që edhe të ndaluar të tjerë janë keqtrajtuar në shumë raste”, tha ai.

Prokurori tha se dëshmitari ka pasoja fizike dhe psikologjike si pasojë e atij ndalimi dhe keqtrajtimi që iu është bërë atje.

“Dëshmitari 00344 është liruar pak ditë pasi u ndalua dhe është larguar nga Kosova disa ditë më pas. Si rezultat i keqtrajtimit të tij në ndalim, ai vazhdon edhe sot e kësaj dite që të vuaj nga probleme të ndryshime fizike dhe psikologjike”, tha ai.

Kur u pyet se a i ka thënë ndonjë njëri në ndalim se për çfarë akuzohej, dëshmitari tha se askush drejtpërdrejtë nuk ia kishte thënë një gjë të tillë.

“Jo, drejtpërdrejt nuk më kanë bërë asnjë pyetje. Thjesht me kanë akuzuar se kam vrarë disa shqiptarë. Nuk kishte kuptim kjo fare se ishte thjeshtë një arsye-justifikim për ndalimin tim”, tha dëshmitari.

Pjesa tjetër e dëshmisë së dëshmitari kaloi në përmbajtje të redaktuar dhe më pas seanca kaloi në private.

Sipas kryegjyqtarit, dëshmia këtij dëshmitari pritet të zgjas më pak se një ditë dhe nga kjo kohë, Prokuroria ka parashtruar se i duhen vetëm një orë për pyetje.

Pyetje do të bëjë edhe mbrojtësi i viktimave i cili ka parashtruar se i duhen rreth 15 minuta. Ndërsa, mbrojtja e të akuzuarve ka parashtruar se i duhen rreth një orë e 15 minuta.

Vlen të theksohet se me kërkesë të ZPS-së, u pranuan në prova materiale të gjitha deklaratat e mëhershme të dëshmitarit së bashku me materialet përcjellëse në tri gjuhet zyrtare të gjykatës.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.

“Një pjesë e vogël e sasisë…”, Kurti publikon pamjet e armatimit të ri që është blerë për FSK-në

Kryeministri i Kosovës, Albin Kurti, në profilin e tij në Facebook ka publikuar pamjet nga njëra nga depot ku janë vendosur furnizimet e fundit me armatim për ushtrinë e Kosovës.

Ai tha se ky armatim modern është në kuadër të blerjeve dhe furnizimeve të vazhdueshme që janë bërë për ushtrinë e Kosovës.

Sipas Kurtit, kjo është vetëm një pjesë fare e vogël e sasisë më të madhe të armatimit të këmbësorisë që ndonjëherë është blerë.

“Mbrëmë së bashku me Komandantin e Forcës së Sigurisë së Kosovës, Gjenerallejtënant Bashkim Jashari dhe ministrin e Mbrojtjes, Ejup Maqedonci vizituam njërën nga depot ku janë vendosur furnizimet e fundit me armatim për ushtrinë tonë.

Ky armatim modern është në kuadër të blerjeve dhe furnizimeve të vazhdueshme që jemi duke i bërë për forcën tonë dhe është vetëm një pjesë fare e vogël e sasisë më të madhe të armatimit të këmbësorisë që ndonjëherë kemi marrë.

Ngritja e kapaciteteve tona ushtarake ka qenë dhe do të jetë gjithnjë në shërbim të mbrojtjes së sovranitetit dhe integritetit tonë territorial dhe të ruajtjes së paqes dhe sigurisë”, ka shkruar Kurti.

VIDEO

Gjykimi ndaj ish-krerëve të UÇK-së, vjen lajmi i fundit

Në Dhomat e Specializuara të Kosovës në Hagë sot do të vazhdojë procesi gjyqësor ndaj ish-krerëve të Ushtrisë Çlirimtare të Kosovës: Hashim Thaçit, Kadri Veselit, Rexhep Selimit dhe Jakup Krasniqit.

Sot do të vazhdojë dëshminë dëshmitari i radhës i Zyrës së Prokurorit të Specializuar. Ndonëse për të martën ishte planifikuar që të dëgjohet dëshmitari i 105-të, kjo gjë nuk ndodhi.

Seanca e djeshme u hap, duke u njoftuar që do të shkojnë në pushim për 15 minuta dhe nuk u bë e ditur se çfarë ndodhi në seancë private.

Pas disa pushimeve dhe kalimit në sesione private, trupi gjykues i kryesuar nga gjykatësi Charles Smith III, në fund u tha palët do të shihen të mërkurën në orën 09:00.

Dëshmitari i fundit të hënën ishte, Nezir Çoçaj, i cili ishte i 104-ti me radhë në këtë proces gjyqësor dhe ai ka përfunduar të hënën dëshminë në Hagë.

Ndryshe, rasti gjyqësor ‘Hashim Thaçi dhe të tjerët’, filloi më 3 prill 2023 me deklaratat hyrëse të Prokurorit të Specializuar dhe të përfaqësuesit të viktimave, ndjekur nga ekipet e mbrojtjes, më 4 dhe 5 prill 2023.

Kujtojmë se Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

“Çmendet” Putin, pas vendimit të Bidenit që lejoi Ukrainën hedhjen e raketave në Rusi

Presidenti i Rusisë, Vladimir Putin, e miratoi të martën një doktrinë të përditësuar bërthamore, e cila thekson se Rusia mund ta shqyrtojë përdorimin e armëve bërthamore, nëse sulmohet me raketa konvencionale me mbështetjen e një fuqie bërthamore.

Vendimi për ta ndryshuar doktrinën zyrtare të Rusisë është përgjigje e Kremlinit ndaj vendimit të raportuar të administratës së presidentit amerikan, Joe Biden, për ta lejuar Ukrainën të hedhë raketa amerikane me rreze të gjatë thellë brenda Rusisë.

Doktrina e përditësuar, e cila shpalos kërcënimet të cilat mund ta shtyjnë udhëheqësinë e Rusisë ta mendojë sulmin bërthamor, thekon se një sulm me avionë luftarakë, dronë apo raketa konvencionale mund të konsiderohet si kërcënim i tillë.

Sipas kësaj doktrine, çdo agresion kundër Rusisë nga një shtet i cili është anëtar i një koalicioni do të konsiderohet nga Moska agresion nga i tërë koalicioni.

Pak javë para zgjedhjeve të nëntorit në SHBA, Putini urdhëroi ndryshimin e doktrinës bërthamore për të theksuar se çdo sulm konvencional ndaj Rusisë i ndihmuar nga një fuqi bërthamore mund të konsiderohet sulm i përbashkët kundër Rusisë.

Lufta në Ukrainë, e cila nisi në shkurt 2022, ka nxitur konfrontimin më të madh mes Rusisë dhe Perëndimit prej krizës raketore të Kubës më 1962.

Bëhet fjalë për mua”, Nagip Krasniqi deklarohet për videon e paralajmëruar pornografike me një të mitur

Ish-kryeshefi i KEK-ut, Nagip Krasniqi, më në fund është deklaruar rreth pretendimeve se ai është protagonist në një video pornografike me një të mitur.

Përmes  një postimi në Facebook, Krasniqi e tha troç se video e paralajmëruar është për të, por që një gjë e tillë është e fabrikuar, shkruan IndeksOnline.

Krasniqi deklaroi se ka kohë që ka marrë porosi shantazhuese, që nga institucionet e drejtësisë e deri te disa portale.

“Tashmë prej ditësh qarkullojnë në telefonat e njëri-tjetrit politikanë, hetues, prokurorë e pronarë portalesh një material video bashkë me shënimin “ky është ish drejtori i KEK-ut”. Dyshohet që është me një të “mitur.” Ky është fabrikimi më i fundit. Dhe ua kuptoj motivet”, shkroi Krasniqi.

Ai tha se kjo po bëhet në shenjë hakmarrjeje për disa pozita në Prokurori.

“Në prillin e vitit 2023, Prokuroria Speciale autorizoi policët hetues të bastisnin banesën time, zyrën time, konfiskuan gjësende të miat personale, laptopin e telefonin tim. Prej andej ata patën çasje në e-mailin dhe të gjitha adresat e mia. Praktikisht, meqë shteti e ligji ua ka besuar këtë detyrë, ata morën në posedim të gjithë jetën time private, përveç asaj zyrtare e publike. Të cilat, haptazi nuk po përdoren për çështje hetimore por për fushatë të qartë e të pistë elektorale dhe baltosëse”, shtoi Krasniqi.

Ai tha se prapa kësaj gjëje feshet goditja ndaj kryeministrit Albin Kurti.

Ky është postimi i plotë i tij:

Të dashur miq, shokë e ish-kolegë,

Të nderuar dashamirës,

Ka një kohë që në mënyra të ndryshme dhe nga adresa në dukje të ndryshme kam marrë porosi shantazhuese. Pas më shumë se 1 viti po qartësohen gjithnjë e më shumë qëllimet dhe burimet.

Paraprakisht nga burime të afërta me Prokurorë të Prokurorisë Speciale, më pas nga policë hetues, prej më shumë se 1 apo 2 muajve nga zytarë të partive opozitare dhe prej një kohe të gjatë prej pronarëve të disa portaleve është duke u apostrofuar emri im.

Para tre ditësh njëri prej tyre veçse e paraqiti një rrëfim për “videon” intime të “një zyrtari të lartë”. Të njëjtët me paramendim e kanë shtuar përgjatë kohës edhe termin “minorene” apo “e mitur”.

Të dashur miq, shokë e ish-kolegë,

E kanë fjalën për mua.

Tashmë prej ditësh qarkullojnë në telefonat e njëri-tjetrit politikanë, hetues, prokurorë e pronarë portalesh një material video bashkë me shënimin “ky është ish drejtori i KEK-ut”. Dyshohet që është me një të “mitur.”

Ky është fabrikimi më i fundit. Dhe ua kuptoj motivet.

Disa si hakmarrje që nuk morën pozitat në Prokurori, disa sepse janë mësuar ti shantazhojnë njerëzit me video e mesazhe, ata të tjerët sepse u ka „djegur“ se nuk e marrin më hisen e tyre prej 320 mijë euro nga KEK-u në emër të „blerjes së mediave“ si më parë dhe nuk i punësojnë burrat, gratë dhe të dashurat e të dashurit e tyre, dhe disa nga opozita që duan të përdorin çdo kartë të pistë për një grimë pushtet.

Dhe nuk kursehen që të godasin nën brez, të godasin familje, fëmijë dhe farefis.

Në prillin e vitit 2023, Prokuroria Speciale autorizoi policët hetues të bastisnin banesën time, zyrën time, konfiskuan gjësende të miat personale, laptopin e telefonin tim. Prej andej ata patën çasje në e-mailin dhe të gjitha adresat e mia.

Praktikisht, meqë shteti e ligji ua ka besuar këtë detyrë, ata morën në posedim të gjithë jetën time private, përveç asaj zyrtare e publike. Të cilat, haptazi nuk po përdoren për çështje hetimore por për fushatë të qartë e të pistë elektorale dhe baltosëse.

Pra, në vend që prokuroria dhe policia hetuese të ruaj jetën private dhe integritetin tim personal siç parashihet me çdo vlerë juridike e me ligj, ata shndërrohen në segmente  e vegla shantazhuese prej brenda institucioneve, kërcënues e frikësues ndaj jetës së qytetarit dhe konkretisht jetës sime dhe familjës sime, duke fabrikuar e më pas shpërndarë ato tek pronarë portalesh.

U burgosa pa asnjë fakt a dyshim të bazuar, prej 19 prillit deri më 15 shtator 2023.

Ende sot, dy vjet pasi që i kanë nisur hetimet nuk kanë qenë në gjendje të ngrenë aktakuzën për të cilën me mbajtën të burgosur.

Ende sot nuk dinë as ata vet se çfarë kam dëmtuar apo çfarë ligji nga sfera penale kam shkelur.

Në këtë gjendje, të sinkronizuar për të fabrikuar filluan fushatën e re publike, nga “i korruptuar” në “i degjeneruar”.

Tani u ka mbetur dhe sfera private e intime e jetës time. Shpresa e fundit për të më goditur e baltosur.

Pra, brenda kësaj kohe sulmi u bë më brutal po i devijuar krejtësisht prej se si u nis në fillim: Kaluan nga korrupsioni e dëmtimi i ndërmarrjes publike te materialet e mia intime e private. Nagipi nuk e paska sulmuar interesin publik, prandaj le ta sulmojmë ne Nagipin. Për ta dëmtuar VETËVENDOSJE!n normalisht.

Të gjithë e dinë që unë nuk jam targeti përfundimtar. Të gjithë këta bashkarisht dhe në sinkron po shpresojnë që nëpërmjet diskreditimit tim të godasin Kryeministrin Albin Kurti, Qeverinë e Republikës së Kosovës dhe Partinë “Lëvizja VETËVENDOSJE!”.

Po meqë janë futur tek baltosja e jetës intime e private është dëshmi e qartë se nuk ju ka mbetur asgjë tjetër nga saga e gjatë e shpalljes “i korruptuar”.

Andaj lirisht le t’i nxirrin të gjitha materialet çfarë kanë fabrikuar ata që shteti jua ka besuar detyrën për të zbatuar ligjin dhe për ta mbrojtur çdo qytetar.

Unë nuk jam shantazhuar as kur u burgosa padrejtësisht, as kur më dërguan porosi e aq më pak tani.

Unë nuk paguaj as nuk bëhem palë me ata që shtetin e Kosovës dhe detyrën e kanë të llogaritur si plaçkë.

Qeveria mban mbledhje elektronike, merr disa vendime

Qeveria e Kosovës ka mbajtur një mbledhje elektronike, gjatë të cilës ka marrë disa vendime.

Zyrës për informim e Kryeministrit, bënë të ditur se në mbledhjen e së hënës, Qeveria ka ndryshuar dhe plotësuar vendimin e saj për emërimin e Komisionit Ad-Hoc për Vlerësimin Profesional për Pranim për Pozitën e Kategorisë së Lartë Drejtuese: Drejtor Ekzekutiv në Agjencinë për Barazi Gjinore, në kuadër të Zyrës së Kryeministrit.

Bëhet e ditur se Qeveria ka ndarë mjeteve buxhetore për Komunën e Kamenicës për organizimin e vizitës ne Belfast.

“Qeveria ka ndarë mjeteve buxhetore Komunës së Kamenicës për organizimin e vizitës ne Belfast më qëllim të promovimit të sistemit të arsimit të përbashkët ndërmjet komuniteteve dhe shkëmbimit të përvojave”, thuhet në njoftimin e sotëm të zyrës për informim të Kryeministrit

Ndërsa, vendimi i tretë që është marrë është aprovimi i Kërkesës së Ministrinë së Punëve të Brendshme për transfer dhe rialokim të mjeteve buxhetore deri nën 25% të ndarjes së ndikuar negativisht në total të kategorive të shpenzimeve për vitin 2024.

Provokim i ri: Veriu i Kosovës mbushet me posterë me flamuj e mbishkrime serbe

Posterë të ndryshëm me mbishkrime janë shfaqur sot në veri të vendit.

Në disa prej komunave të veriut të Kosovës janë parë posterë me ngjyrat e flamurit serb dhe me mbishkrimet “Ja ku jemi për Krishtlindje”.

Sipas informacioneve të para theksohet se ato janë vërejtur si fillim nga qytetarët pasi ishin vendosur në objekte, mure e vitrina objektesh.

Në vendet ku janë vendosur këto mbishkrime tashmë thuhet se ka zyrtarë policorë të cilët po i largojnë ato.

Duhet theksuar se në prag të zgjedhjeve në vendin tonë ekziston rreziku edhe i përshkallëzimit të situatave, e të krijimit të rrezikut në veri- siç ka ndodhur çdoherë. Kjo madje u tha dje edhe nga ish-ministrja e Jashtme, Meliza-Haradinaj e cila theksoi se duhet pasur kujdes nga ndërhyrja e mundshme e serbëve përmes Vuçiq-it.

E vranë me 5 plumba sapo doli nga lokali, ky është i riu që humbi jetën

Një atentat ka tronditur Tiranën pak pas mesnate. Një 28-vjeçar mbeti i vrarë pasi u qëllua me armë sapo doli nga një lokal në zonën e “Xhamllikut”. Viktima është identifikuar si Klaudio Prendi. Ditën e sotme janë publikuar foto të të riut që humbi jetën. I riu ishte djali i ish-gjyqtarit Fran Prendi.

Ngjarja e rëndë ka ndodhur rreth orës 01:40 ndërsa i riu teksa po dilte nga një lokal është qëlluar me 5 plumba. Prendi u transportua në spital në gjendje të rëndë për jetën, por si pasojë e plagëve të marra nuk arriti të mbijetone.

Ndërkohë një orë pas ngjarjes në zonën e Farkës është gjetur edhe një makinë e djegur e cila dyshohet se u përket autorëve. Klaudio Prendi nuk është em;r i panjohur, pasi më 6 maj 2023, ai ka qëlluar me armë në qytetin e Pukës.

Qeveria e Kosovës mban mbledhje elektronike, merr këto dy vendime

Në një mbledhje elektronike të mbajtur të dielën, Qeveria e Kosovës ka miratuar dy nisma që synojnë forcimin e bashkëpunimit me Maqedoninë e Veriut.

Sipas njoftimit, e para lidhet me nismën për lidhjen e Protokollit për Implementimin e Marrëveshjes për Pikat e Përbashkëta të Kalimit Kufitar Hani i Elezit – Bllacë dhe Glloboqicë – Jazhincë.

Gjithashtu, Qeveria miratoi nismën për lidhjen e një Memorandumi të Mirëkuptimit ndërmjet Ministrisë së Ekonomisë së Kosovës dhe Ministrisë së Energjisë, Minierave dhe Burimeve Minerale të Maqedonisë së Veriut.

Ky memorandum ka për qëllim bashkëpunimin në sektorin e energjisë, në përputhje me politikat dhe strategjitë kombëtare të të dy vendeve.