Krasniqi dhe Hamza falënderojnë mërgimtarët në Gjermani:Me ju – Kosova mundet ma mirë (Video)

Kryetari i Partisë Demokratike të Kosovës, Memli Krasniqi dhe kandidati për kryeministër i kësaj partie, Bedri Hamza kanë falënderuar mërgimtarët në Gjermani për mbështetjen dhe pritjen madhështore në vikend.

Përmes një video-adresimi ata i janë drejtuar mërgatës. “Mërgimtarë të dashur jemi bashkë me Bedriun këtu që t’ju falënderojmë për pritjen madhështore gjatë kësaj fundjave në Gjermani”, është shprehur Krasniqi. Hamza i ka cilësuar tubimet në Gjermani si impozante.

“I falënderoj nga zemra, me mbështetjen e tyre Kosova mundet ma mirë. I ftoj dhe i pres që të takohemi në vikendin e ardhshëm bashkë në Zvicër”, ka thënë Hamza.

Për më shumë klikoni këtu https://www.facebook.com/reel/8961828777200418

Vjen parashikimi i zgjedhjeve të 9 shkurtit, VV-ja po renditet e treta

Deputeti i PDK-së, Bekim Haxhiu, deklaroi se beson shumë partia e tij do t’i merr 35-36 % në këto zgjedhje.

Kështu deklaroi ai , ku shtoi se qytetarët duhet ta ndëshkojnë Lëvizjen Vetëvendosje për shkak të siç tha, mashtrimeve që i ka bërë.

“Do të jemi partia e parë. LVV nëse e merr rezultatin zgjedhor të vitit 2019 është sukses për ta. LVV do të del partia e tretë. LDK-ja mund ta kalojë Vetëvendosjen në përqindje”, deklaroi Haxhiu.

Ai shtoi se parasheh që LDK-ja do të arrijë t’i merr 28-30 % të votave,  ndërsa LVV jo më shumë se  24-26 %.

“Këtë rezultat të Vetëvendosjes e bazoj në dështimin e plotë të LVV-së në të gjitha sferat, edhe kauzat me të cilat ka ardhur në pushtet i ka përmbysur vetë, asnjërës s’i është përmbajtur, as luftës kundër korrupsionit, as luftës kundër nepotizmit, as zhvillimit ekonomik, as bashkimin me Shqipërinë, as kushteve për dialog me Serbinë”, theksoi deputeti i PDK-së, Bekim Haxhiu në KlanKosova.

Xuxi ‘kërcënon’ banorët: Kam informacione për ju, posaçërisht…

Gjatë natës,  Xuxi pati një ‘përplasje’ me disa nga banorët.

Ai deklaroi se do të merret fillimisht me “këta të Prishtinës”, duke pretenduar se ka informacione për ta, pastaj me të tjerët.

“Ju kallëzoj nesër për krejt këtu, posaçërisht për këta të Prishtinës. Kam informacione sa kanë jetë këta”, u shpreh ai.

Situata u bë edhe më e ndezur kur Drenusha u përfshi në debat, por Xuxi i drejtohet ashpër duke i thënë “Mos fol me mua” .

Për të kuptuar më shumë, ndiqni videon e plotë:

Bie bora e parë për këtë sezon edhe në Shqipëri

Ulja e temperaturave ka sjellë reshjet e para të borës në fshatin Dardhë të Korçës.

Reshjet kanë qenë të pakta por sinoptikanët lokalë bëjnë me dije se ditët në vijim reshjet do të jenë prezente në formë më intensive në lartësitë mbi 1400 m2 mbi nivelin e detit.

Ditën e sotme temperaturat kanë zbritur deri në – 1 grade në orët e para të mëngjesit ndërkohë që gjatë fundjavës parashikohet të shkojnë deri në – 4 gradë celsius.

Zbulohen detaje të reja rreth sulmit me thikë në Ferizaj- Qytetari rrëfen si u goditën vajzat para shtëpisë së tij, njëra në gjendje të rëndë

Katër persona u theren me thikë nga një 59 vjeçar në Ferizaj. I dyshuari është arrestuar ndërsa motivet e kësaj ngjarje tronditëse ende nuk dihen, shkruan Insajderi.

Gjendja e dy personave raportohet të jetë e rëndë. Një vajzë 10 vjeç dhe një djalë rreth moshës 30 vjeçar aktualisht janë në QKUK dhe po trajtohen.

Jeton Emini, ka treguar se gjendja e tyre është e rëndë.

Ai ka rrëfyer se ngjarja ka ndodhur para shtëpisë së tij.

Sipas tij, dy vajzat e mitura kanë qenë mysafirë nga Podujeva dhe janë sulmuar derisa po qëndronin afër shtëpisë.

Postimi i plotë:

Të nderuarë miq, duke qenë se nuk po mundem t’iu pergjigjem thirrjeve t’juja  të shumta.

Po iu shkruaj që të iu njoftoj që sot rreth 15:15,

ka ndodh një akt kriminal nga një person i moshuar (rreth moshës 59 vjeq), i cili për arsye ende të panjohura i therr dy vajza të mitura

(të cilat ishin musafir nga Podujeva tek axha im) dhe thjerrjen e bënë mu para derës së shpisë sime.

Ky person më pas vazhdon dhe therr pak metra më larg edhe një person tjeter (mashkull rreth moshes 30 vjeq), gjithashtu sipas informaciove që kam marrë një tjeter therrje ka bërë në një zonë tjetër të qytetit.

Pra, 4 therrje dhe ende nuk dihet motivi i saj,

E vetmja gjë që mund t’iu informojë mometalisht që njëra nga vajzat është liruar për në shtëpi pas sherbimeve spitalore, ndërsa vajza tjeter dhe personi mashkull i moshës rreth të 30-ta  janë duke u trajtuar në Prishtinë pasi gjendja e tyre është e rëndë.

PERSONI QË KA KRYER KËTO VEPRA ËSHTË ARESTUAR NGA POLICIA .

Lutemi për të lenduarit që të dalin sa më shpejtë nga gjendja e rëndë në cilen janë për momentin.

P.S. për personin e 4-të momentalisht nuk e kam të njohur  si informacion se kush është dhe se si e ka shëndetin.

Momente paniku në një aeroplan, vdes një pasagjer, bëhet ulje emergjente në Londër

Një fluturim i avionit të Ryanair u detyrua të bënte një ulje urgjente në Londër pasi një pasagjer u konfirmua i vdekur në bord.

The Mirror shkruan se fluturimi nga Tirana për në Aeroportin e Mançesterit, u detyrua të devijonte pak para orës 20:00 të së dielës, pasi kishte fluturuar tashmë mbi Zvicër dhe Francë.

Ekuipazhet e urgjencës mbërritën në avion pas uljes, por edhe pse i kanë dhënë ndihmën e parë pasagjerit, nuk kanë mundur ta shpëtojnë. Ende nuk dihet mosha dhe shtetësia e pasagjerit, transmeton TopChannel.

London Stansted konfirmoi se sapo avioni u ul mbërritën në kohë mjekët dhe shërbimi zjarrfikës, sapo u dha alarmi se një person kishte shfaqur probleme shëndetësore. Por edhe pas ndihmës mjekësore, pasagjeri nuk ia dalë. Referuar mediave të huaja viktima shoqërohej nga disa miq të tij, ndërsa paraprakisht dyshohet se ka pësuar infarkt.

Ngjarja ka shkaktuar momente paniku në avion dhe te pasagjerët tjerë, të cilët deklarojnë se kanë tentuar që t’i japin ndihmë dhe ta mbajnë në jetë, ndërsa situatën e përshkruajnë si tronditëse.

Ganja, Kurtit: Do të mbetesh në histori si rrenc, ti veç nder s’ke – je turpi i këtij vendi

Deputetja e PDK-së, Ganimete Musliu, e ka quajtur kryeministrin e Kosovës, Albin Kurtin, “rrenc”.

Gjatë fjalës së saj në seancën e sotme, ajo u shpreh se një kryeministër që ka nder e arsye të shëndoshë, e dorëzon karrigen e jo shtetin.

“Ti Albin the “e kam nderin që po e çoj mandatin deri në fund”. Jo Albin, ti nuk ke nder, ti nuk e din çka është nderi, ti ke turp, turpin që e ke mbajtë këtë shtet peng me zero zhvillim, me dialog në favor të Serbisë, me sanksione nga BE-ja, me ministra antikushtetues”.

“Një kryeministër që ka nder e arsye të shëndoshë e dorëzon karrigen nuk e dorëzon shtetin si ti Albin. Pesë vjet në pushtet do të mbahen në mend si pesë vitet më të errëta të ngritjes së Kosovës shtet. Do të mbetesh në histori si një rrenc destruktiv antishtetëror, antikombëtar. Ti je turpi i këtij vendi”, tha Musliu në Kuvend.

“Kurti apo Vuçiq, i ka raportet më të mira me Trump”, flet kryeministri

Kryeministri Albin Kurti, ka shprehur qëndrimin e qeverisë për të vazhduar bashkëpunimin me Shtetet e Bashkuara të Amerikës, pavarësisht rezultatit të zgjedhjeve.

“Ne bashkëpunojmë me Shtetet e Bashkuara të Amerikës në mënyrë të pazëvendësueshme dhe me gjithë përkushtimin dhe sinqeritetin dhe seriozitetin tonë,” u shpreh Kurti, duke shtuar se për qeverinë e Kosovës bashkëpunimi me SHBA-në është prioritet.

Pas fitores së Donald Trump në zgjedhjet presidenciale, Kurti ritheksoi përkushtimin e qeverisë së tij për të ruajtur marrëdhëniet e ngushta me administratën amerikane, duke theksuar se synojnë t’i thellojnë ato jo vetëm në aspektin diplomatik.

“Ne dëshirojmë, jemi të gatshëm, shumë të interesuar që ta vazhdojmë këtë angazhim, pse jo edhe ta zgjerojmë dhe thellojmë këtë bashkëpunim i cili shprehet jo vetëm në aspektin diplomatik,” theksoi Kurti.

Kryeministri është pyetur për bisedën mes Trump dhe presidentit serb, Aleksandar Vuçiq, dhe kush i ka raportet me të mira.

“Unë bëjë raporte zyrtare, shtetërore, politike. Kush i ka raportet më mirë me kënd nuk e di këtë punë.”

Ai shprehu qëndrimin se Kosova do të vazhdojë traditën e bashkëpunimit me SHBA-në, pavarësisht se cila parti është në pushtet në Uashington.

Duke kujtuar historinë e mbështetjes amerikane, Kurti theksoi se kjo marrëdhënie është e palëkundshme.

“Çlirimin e kemi në kohën e presidentit demokrat, pavarësinë e kemi shpallur në kohën e presidentit republikan. Besoj që kjo flet shumë,” tha ai, duke rikujtuar kontributin e figurave të njohura amerikane, si Bob Dole dhe Tom Lantos, në mbështetje të Kosovës që nga fundi i viteve ‘80.

Kur do të paditet Serbia për gjenocid, flet kryeministri Kurti

Kryeministri Albin Kurti pas vizitës që i bëri Institutit për Krimet e Kryera gjatë Luftës, është pyetur se a do të ndihmojnë materialet që të hartohet padia për gjenocid ndaj Serbisë dhe se ku është Qeveria me përgatitjet për këtë padi.

Padia për gjenocid ndaj Serbisë është një premtim i kahmotshëm i kryeministrit Kurti.

Ai ka thënë se përgatitjet janë konfidenciale, pasi që kanë të bëjnë me një shtet armiqësor dhe agresor si Serbia

“Ky është Instituti për Krimet e Kryera gjatë Luftës në Kosovë dhe synimi është hulumtimi, dokumentimi, e vërteta në përmasën e saktë për hir të historisë dhe drejtësisë, por natyrisht që i përket organeve të tjera që më pastaj të punojnë dhe të veprojnë mbi bazën e këtyre materialeve të arkivuara këtu”.

“Ne po e vazhdojmë punën tonë, përgatitjet tona që janë të thella e komplekse, e për të cilat në kuptimin konkret të përmbajtjes së tyre nuk mund të flas, meqenëse këto përgatitje zhvillohen në konfidencialitet, sepse natyrisht kemi të bëjmë me një shtet agresor, i cili është shtet armiqësor ndaj nesh dhe nuk i pranon krimet e kryera në Kosovë, përkundrazi i quan ato fabrikime”.

“Duke e pasur parasysh kontekstin rajonal, fqinjin tonë armiqësor, këto përgatitje duhet t’i zhvillojmë jashtë syve të opinionit publik”, tha kryeministri para gazetarëve.

Ja kur pritet të nisin reshjet e borës në Kosovë

Besim Aliu nga Instituti Hidrometeorologjik i Kosovës ka bërë të ditur se nga fundi i nëntorit, në Kosovë priten reshje bore.

Po ashtu ai shton se këtë vit, dimri pritet të jetë më i ftohtë se ai paraprak.

“Masat e ajrit të ftohta që kanë mbizotëruar ditëve të fundit, kanë ndikuar që në disa pjesë të territorit të Kosovës, në zona të izoluara që të ketë rënie të temperaturave, dhe të krijohen kushte për reshje bore. Patëm reshje bore që nuk e kanë përfshirë të gjithë territorin. Nuk janë reshje të dendura, janë të lehta. Në ditët në vijim presim të kemi riga shiu të cilat në vise të ulëta vijnë në formë shiu, e në vise të larta me borë”, tha Aliu në emisionin “Fol me Arin”.

“Bora në viset e ulëta pritet diku nga data 26 apo 27 nëntor. Sipas statistikave tona, ky vit do të jetë më ndryshe se viteve të tjera, në kuptimin e temperaturave më të ulëta dhe reshjeve më të dendura të borës, të cilat do të na shoqërojnë nga nëntori e edhe në muajt pasues, deri në mars”.