“Para jush nuk keni kriminelë, por pesë policë që kryen punën e tyre…” – çka tha avokati i njërit prej policëve të dyshuar për vdekjen e Agon Zejnullahut

Gjykata Themelore e Prishtinës ua ka caktuar masën e paraburgimit prej një muaji pesë zyrtarëve policorë të dyshuar për vrasjen nga pakujdesia të Agon Zejnullahut, 27-vjeçarit nga Lipjani që ndërroi jetë pas ndërhyrjes së tyre.

Gazeta Insajderi ka siguruar aktvendimin dhe deklarimin e mbrojtjes. Në seancën ku u shqyrtua kërkesa për paraburgim, avokati i të pandehurit, Albian Ratkoceri, Urim Vokshi, e kundërshtoi ashpër këtë masë, duke e cilësuar si të pabazuar dhe duke i cilësuar të mbrojturit e tij si zyrtarë që vetëm kanë kryer detyrën.

“Para jush nuk keni kriminelë, por pesë zyrtarë policorë, që kanë ardhur sot këtu vetëm pse e kanë kryer detyrën e tyre,” u shpreh avokati Vokshi në sallën e gjykatës.

Ai tha se prokuroria nuk ka sqaruar si duhet lidhjen shkak-pasojë mes veprimeve të policëve dhe vdekjes së të ndjerit, duke ngritur dyshime për bazueshmërinë e akuzës.

“…para jush nuk keni kriminel, keni zyrtarë policorë, që kanë ardhë sot këtu vetëm pse e kanë kryer detyrën e tyre andaj t’i trajtoni siç e meritojnë dhe kontakti fizik nuk të bën vrasës, tutje është e rëndësishme që prokuroria sqaron se nuk ekzistojnë rrethana të rrezikut të arratisjes apo të ndikimit në prova dhe dëshmitarë, por megjithatë prokuroria pretendon se plotësohet kushti nga neni 2.5.3 me arsyetimin pasi që në këtë çështje penale raportet mes palës së dëmtuar përkatësisht familjarëve të viktimës dhe të pandehurve janë të acaruara“.

Vokshi shtoi se kontaktet fizike nuk përbëjnë vetvetiu vrasje dhe se duhet të provohet se si pikërisht ndërhyrja ka shkaktuar vdekjen.

“Duke shtuar se, para jush nuk keni kriminel, keni zyrtarë policorë, që kanë ardhë sot këtu vetëm pse e kanë kryer detyrën e tyre andaj t’i trajtoni siç e meritojnë dhe kontakti fizik nuk të bën vrasës, tutje është e rëndësishme që prokuroria sqaron se nuk ekzistojnë rrethana të rrezikut të arratisjes apo të ndikimit në prova dhe dëshmitarë, por megjithatë prokuroria pretendon se plotësohet kushti nga neni 2.5.3 me arsyetimin pasi që në këtë çështje penale raportet mes palës së dëmtuar përkatësisht familjarëve të viktimës dhe të pandehurve janë të acaruara”, ka thënë ai.

Avokati hodhi gjithashtu kritika ndaj mënyrës se si është trajtuar rasti në opinionin publik, duke përmendur se vendimi për paraburgim mund të jetë ndikuar nga presioni i ndjeshmërisë së lartë shoqëror

Sidoqoftë, gjykata ka konstatuar se ekziston rreziku i ndikimit në dëshmitarë dhe i përsëritjes së veprës penale, duke arsyetuar kështu vendosjen e masës së paraburgimit.

27-vjeçari Agon Zejnullahu vdiq në orët e para të 7 korrikut në Lipjan, pasi u arrestua nga policia nën dyshimin se në gjendje të dehur po sulmonte automjete e kalimtarë.

Lidhur me rastin, pesë zyrtarë policorë janë ndaluar për 48 orë nën dyshimin për “Vrasje nga pakujdesia”, ndërkaq Inspektorati Policor i Kosovës ka rekomanduar suspendimin e tyre.

eKosova lanson një shërbim të ri

Platforma elektronike e shërbimeve, eKosova, ka lansuar një shërbim të ri.

Ky opsion do t’iu hyjë në shërbim bashkatdhetarëve tanë, shkruan IndeksOnline.

Bëhet fjalë për caktimin e terminëve për misionet diplomatike dhe konsullore të Republikës së Kosovës, tani edhe në Dyseldorf.

Përmes këtij shërbimi mund të nxirrni fletudhëtim, certifikata të lindjes, të martesës, të vdekjes, të regjistrohen faktet e lindjes, martesës, vdekjes, të bëhet pajimi me letërnjoftim e pasaportë, e kështu me radhë.

Shërbimet në fjalë janë në dispozicion për ambasadat në Angli, Austri, Gjermani, Itali e Slloveni, si dhe konsullatat e Republikës në këto shtete.

Ky është linku ku mund të kryeni shërbimet: https://ekosova.rks-gov.net/Public/497

E konfirmon policia – Shkarkohen komandantët e Policisë në Pejë, Suharekë e Klinë, emërohen komandantë të rinj

Policia e Kosovës e ka konfirmuar raportimin e “Betimi për Drejtësi” për ndryshime në pozitat drejtuese të komandantëve të stacioneve policore në Pejë, Suharekë dhe Klinë.

Sipas konfirmimit të Policisë, kapiten Faik Jahmurataj është caktuar Komandant i Stacionit Policor në Pejë, ndërsa kapiten Enis Lluka do të udhëheqë Stacionin Policor në Klinë.

Kapiten Afrim Sylaj, i cili më parë ka shërbyer në Stacionin Policor në Suharekë, është transferuar në Qendrën Rajonale Operative të Drejtorisë Rajonale në Prizren.

“Këto ndryshime bëhen me qëllim të rritjes së efikasitetit në menaxhim dhe përmbushjes së detyrave policore në përputhje me prioritetet operacionale të Policisë së Kosovës”, thuhet në konfirmimin e Policisë së Kosovës.

Policia ka konfirmuar se edhe komandanti i deritanishëm i Stacionit Policor në Lipjan, kapiten Argjent Gashi, ka kërkuar lirimin nga detyra, kërkesë që është aprovuar nga menaxhmenti i PK-së. Në këtë pozitë është emëruar kapiten Brahim Shatrolli.

Idriz Atashi, komandant i Stacionit Policor në Pejë, dyshohet se është shkarkuar pas publikimit të hulumtimit të “Betimit për Drejtësi”.

Ky hulumtim ka zbardhur detaje të rastit që çoi në arrestimin e dy eprorëve të lartë të Policisë – Prekë Tuna, shef i Sektorit të Operativës në Pejë, dhe Nexhat Gutiqi, shef i Sektorit Rajonal për Operativë. Hetimi ngriti dyshime serioze për ndërhyrje të mundshme në procedurat policore dhe shmangie nga detyrat zyrtare. Sipas të dhënave të siguruara, personi i përfshirë në rast kishte raporte shoqërore me zyrtarë të lartë policorë.

Pas publikimit të këtij hulumtimi, Tuna dhe Gutiqi u ndaluan për 48 orë me vendim të Prokurorisë Themelore në Pejë. Aktualisht, ata janë pezulluar nga detyra dhe u është caktuar masa e ndalimit të afrimit ndaj personave apo vendeve të caktuara. Prokuroria ka konfirmuar se ka vepruar pas pranimit të informacioneve nga “Betimi për Drejtësi”.

Në një rast tjetër, komandanti i Stacionit Policor në Suharekë, Afrim Sylaj, dyshohet se është shkarkuar pas vdekjes së një personi të ndaluar, i arrestuar nën dyshimin për dhunë në familje. Në këtë rast, Inspektorati Policor i Kosovës (IPK) kishte rekomanduar suspendimin e tre zyrtarëve policorë – një rreshter dhe dy policë – për shkak të dyshimeve për neglizhencë në përmbushjen e detyrave zyrtare.

Ndërkohë, komandanti i Stacionit Policor në Klinë, Ragip Bytyqi, dyshohet se është shkarkuar pas një rasti ku tre zyrtarë policorë u arrestuan për keqtrajtim të një qytetari gjatë arrestimit. Sipas Prokurorisë Themelore në Pejë, në bashkëpunim me IPK-në, pas grumbullimit dhe analizimit të provave, tre zyrtarët u arrestuan për tejkalim të autorizimeve ligjore dhe keqtrajtim fizik ndaj një personi të prangosur.

Komandanti i stacionit policor në Lipjan, Argjend Gashi kishte kërkuar të lirohet nga detyra pasi Agon Zejnullahu vdiq derisa ishte duke u arrestuar në qendër të qytetit. Pesë policë janë në masën e paraburgimit nën dyshimin për vrasje nga pakujdesia.

E dhimbshme: Sot i jepet lamtumira e fundit 15-vjeçarit që humbi jetën në aksidentin tragjik në Podujevë

Një aksident i rëndë trafiku ka ndodhur dje në fshatin Sekiraçë, në magjistralen Podujevë-Prishtinë, ku për pasojë ka humbur jetën një i mitur.

Viktima e këtij aksidenti është 15-vjeçari, Benjamin Hasani.

Lamtumira e fundit do t’i jepet sot në orën 18:00, në varrezat e fshatit Dumnicë e Poshtme.

E rëndë në Shqipëri: Humb jetën një pushues në plazhin e Qerretit – dyshohet se pësoi arrest kardiak

Mesditën e sotme, teksa po pushonte në plazhin e Qerretit ka humbur jetën shtetasi K. Gj., 59 vjeç, banues në Tiranë.

Nga të dhënat e para të policisë dyshohet se ai ka pësuar arrest kardiak, kur ka hyrë në det dhe për pasojë ka humbur jetën.

Grupi hetimor vijon punën për dokumentimin e shkakut të humbjes së jetës së 59-vjeçarit.

Seanca për vrasjen e Liridonës të hënën, Gjykata jep detaje

Seanca e radhës ndaj të akuzuarve për vrasjen e Liridona Ademajt, Naim Murselit ,Granit Plavës dhe Kushtrim Kokallës, do të mbahet të hënën. Caktimi i seancën vjen pas përfundimit të ekzaminimit psikiatrik të Murselit.

Nga Gjykata Themelore e Prishtinës kanë deklaruar se gjetjet e ekspertizës do të bëhen publike në seancë.

Zëdhënësja e kësaj gjykate, Mirlinda Gashi, nuk është përgjigjur nëse e kanë pranuar ende raportin e hartuar nga Instituti i Psikiatrisë Forenzike.

“Referuar kërkesës tuaj për informata, ju njoftojmë se seanca e shqyrtimit gjyqësor në çështjen penale ndaj të pandehurve N.M, G.P dhe K.K. është caktuar të mbahet me datë 14 korrik 2025, në ora 09.00. Për njoftimin tuaj në seancën e shqyrtimit gjyqësor do të informoheni me gjitha detajet, të cilat kanë të bëjnë me këtë çështje”, thuhet në përgjigjen e Gashit për Reporteri.

Në raportin që është publikuar në media, tek i ekzaminuari Naim Murseli nuk është konstatuar ndonjë çrregullim mendor apo apo sëmundje mendore e karakterit të përkohshëm apo të përhershëm.

Raporti konstaton se Murseli mund të marrë pjesë në seancën gjyqësore, është i aftë për të mbrojtur veten, të kuptojë akuzën dhe të përballet me gjykimin.

“Në momentin e kryerjes së veprës për të cilën akuzohet, nuk është identifikuar ndonjë simptomatologji e nivelit patologjik, e cila do të mund të ndikonte në aftësinë e tij mendore për ta kuptuar rëndësinë e veprës si dhe të kontrollojë veprimet e tij. Kjo është bazuar edhe në sjelljen e tij dhe dinamikën para, gjatë dhe pas veprës, për të cilën akuzohet”, thuhet në raport.

I njëjti, thekson raporti, është plotësisht i përgjegjshëm dhe i llogaritshëm.

“I qetë në aspektin psikomotor. Bashkëpunues, i përgjigjet thirrjes për bisedë. Kontakti me sy vihet dhe mbahet. Kontakti verbal vihet dhe mbahet pa insistim. Rrjedha e të folurit normale pa ndryshime në të folur. Flet qartë dhe i përshkruan të gjitha ngjarjet në detaje. Nuk mungon spontaniteti”, thuhet në raportin e ekzaminimit psikiatrik të Naim Muselit.

Pas publikimit të raportit në media, ka reaguar edhe vëllai i Liridonës, Leonardi.

Ai ka shkruar se presin gjykim të drejtë dhe profesional.

“Ne si familje e mirëpresim raportin e Forenzikës në lidhje me rastin e vrasjes së Liridonës tonë dhe shpresojmë që gjykata do të vazhdojë të procedojë shpejtë me rastin ashtu siç ka bërë deri më tani. Ne duam drejtësi të shpejtë. profesionale, pa gabime dhe vendosshmëri nga ana e gjykatës që të mos lejojë që ky rast të zvarritet me vite”, ka pohuar ai, përmes një postimi në Facebook.

Hamza e ndërtoi një urë mbi Ibër për 200 mijë, Kurti i nisi dy për 3 milionë euro

Dy urat e shumëpërfolura që do të ndërtohen mbi Ibër që kryeministri në detyrë Albin Kurti i nisi me pompozitetin e zakonshëm në skenën politike tashmë po hetohen nga Prokuroria Speciale

Projekti i urave që ishte nisur ka kohë sipas tash edhe nga kandidati i PDK për kryetar të Mitrovicës, kushton rreth 3 milionë, aq sa janë Ministria e Mjedisit, Planifikimit Hapësinor dhe Infrastrukturës

Në dhjetor të vitit të kaluar ishte një urë tjetër e hapur për qarkullim mbi Ibër, ajo mbi liqenin akumulues. Ajo urë sipas raporteve ka kushtuar 212 mijë euro.

Prokuroria Speciale të enjten njoftoi se ka nisur hetim të projektit të urave që ka implikime edhe politike deri në Bruksel. Siç njoftuan PS nuk konteston projektin infrastrukturor por “rastet kur ekzistojnë dyshime për keqpërdorim të fondeve publike”.

“Ky hetim nuk ka të bëjë me ndonjë kundërshtim ndaj projektit në fjalë, por me përmbushjen e obligimeve ligjore, në mbrojtje të interesit publik dhe sundimit të ligjit, në mënyrë që të garantohet një administrim i drejtë dhe ligjor i resurseve publike”, thuhet në njoftimin e PS-së.

Agim Bahtiri vazhdon ta bullizojë deputetin e ri të LDK’së: Këndi i lojërave për Parisin

Dy deputetët e Kuvendit të Kosovës, Agim Bahtiri nga VV’ja dhe Paris Guri nga LDK, janë duke vazhduar me “shakat” për njëri tjetrin. Situata mes tyre po merr vëmendje.

Nuk u ndalën me biberonin, Bahtiri e ka bullizuar Gurin me një foto tjetër.

Ai ka postuar një story në Instagram, ku e shfaq një bebe duke iu referuar Paris Gurit.

Fotoja e bërë me ChatGPT, shfaqet Kuvendi dhe një pankartë ku shkruan “Këndi i lojërave për Parisin”.

Bahtiri në foto e ka bashkangjitur mbishkrimin “Mos ia prishni lumturinë”.

Deliu-Kodra: Kosova nuk mund të mbahet peng nga egoja jote personale Albin Kurti

Pas dështimit për të 45-tën herë radhazi të seancës konstituive të Kuvendit të Kosovës, deputetja e Partisë Demokratike të Kosovës, Blerta Deliu-Kodra, ka shpërthyer me akuza të ashpra ndaj Lëvizjes Vetëvendosje dhe kryeministrit në detyrë, Albin Kurti.

Ajo tha se vendi po përballet me një përpjekje të qartë për uzurpim të pushtetit dhe kontroll të plotë institucional nga partia në pushtet.

“Sot kemi të bëjmë më një përpjekje të qartë për të shtypur pluralizmin politik, për të uzurpuar pushtetin përmes kontrollit total mbi institucionet e Republikës së Kosovës”, u shpreh ajo.

Deliu-Kodra e cilësoi si “turp” dhe “shkelje të Kushtetutës” faktin që deputetët, të zgjedhur nga qytetarët, nuk po lejohen ta ushtrojnë mandatin e tyre.

“Është e turpshme dhe antikushtetuese si deputetët e zgjedhur me votën e qytetarëve të Kosovës, sot nuk lejohen ta ushtrojnë mandatin e tyre kushtetues.”

Ajo theksoi se fjalimi i saj është në formë proteste kundër sjelljes autoritare të kryeministrit në detyrë.

“Protestë ndaj një njeriu që sillet si një pronar i shtetit dhe jo si në shërbëtor i tij.”

Në fund, ajo i bëri thirrje Kurtit që të reflektojë dhe të ndalë, siç tha, egoizmin personal.

“T’i lërë inatet personale dhe të kthehet në rendin kushtetues e demokratike e të reflektojë. Kosova nuk mund të mbahet peng nga egoja jote personale Albin Kurti.”

Familja e Liridona Ademajt pas raportit për Murselin: E mirëpresim, kërkojmë drejtësi të shpejtë dhe të vendosur

Pas publikimit të raportit të Institutit të Psikiatrisë Forenzike, i cili konfirmon se Naim Murseli është mendërisht i aftë dhe përgjegjës për veprimet e tij, ka reaguar edhe familja e Liridona Ademajt.

Përmes një deklarate publike, vëllai i Liridonës, Leonardi ka bërë të ditur se e mirëpresin gjetjen e Forenzikës, duke shtuar se shpresojnë që drejtësia do të vijojë pa vonesa.

“Ne si familje e mirëpresim raportin e Forenzikës në lidhje me rastin e vrasjes së Liridonës tonë dhe shpresojmë që gjykata do të vazhdojë të procedojë shpejt me rastin, ashtu siç ka bërë deri më tani,” shkroi ai.

Ai deklaron se si familje, kërkojnë një drejtësi të shpejtë, profesionale, pa gabime dhe me vendosshmëri, në mënyrë që rasti të mos zvarritet për vite me radhë.

“Ne duam drejtësi të shpejtë, profesionale, pa gabime dhe vendosshmëri nga ana e gjykatës që të mos lejojë që ky rast të zvarritet me vite,” , ka thënë ai teksa ka bërë me dije se seanca e radhës gjyqësore, do të mbahet me 14 korrik nga ora 09:00.

Instituti i Psikiatrisë Forenzike ka përfunduar ekzaminimin psikiatrik të Naim Murselit, i akuzuar për organizimin e vrasjes së bashkëshortes së tij, Liridona Ademaj – një rast që ka tronditur opinionin publik në Kosovë.

Sipas raportit mjekësor të siguruar ekskluzivisht nga Gazeta Insajderi, ekspertët psikiatrikë kanë konstatuar se Murseli nuk vuan nga ndonjë çrregullim mendor apo sëmundje mendore të përhershme apo të përkohshme.

Ai nuk ka shfaqur as prapambetje, ngecje mendore apo abuzim me substanca psikoaktive ose alkool.

Më tej, raporti sqaron se në momentin e kryerjes së veprës penale, për të cilën ai akuzohet, nuk është identifikuar ndonjë simptomatologji psikiatrike patologjike që do të kishte ndikuar në aftësinë e tij për të kuptuar rëndësinë e veprës apo për të kontrolluar sjelljen e tij.

“Vlerësimi është bërë duke analizuar edhe dinamikën e sjelljes para, gjatë dhe pas kryerjes së veprës”, thuhet në raport.

Ekspertiza përfundon se Murseli është plotësisht i përgjegjshëm dhe i llogaritshëm për veprimet e tij, si dhe në gjendje të përballet me gjykimin.

Ai mund të marrë pjesë në seanca gjyqësore, të mbrohet vetë ose të konsultohet me avokatë, dhe e kupton akuzën ndaj tij.

Lajmin për përfundimin e raportit e ka konfirmuar për Insajderin drejtori i Institutit të Psikiatrisë Forenzike, Shpend Haxhibeqiri.

“Po, është e vërtetë, kështu shkruan në raport, por nuk mund të prononcohemi më gjatë pa e parë raportin gjyqtarja e rastit,” tha Haxhibeqiri.