Pas fitores të VV-së, a do të jetë Fatmir Spahiu ministër i Kulturës? Deklarohet aktori

Ndërsa procesi i numërimit të votave për zgjedhjet e jashtëzakonshme të 28 dhjetorit po shkon drejt fundit, vëmendja është zhvendosur te emrat që do të përbëjnë kabinetin e ri qeveritar “Kurti 3”.Deri tani, nga numërimi i mbi 99.50% të votave,rezulton se Lëvizja Vetëvendosje është fituese absolute me rreth 50,55% të votave (që pritet të përkthehen në rreth 57 ulëse në Kuvend).

Me këtë forcë të numrave, Kryeministri Albin Kurti pritet të formojë qeverinë i vetëm, ndërsa një nga emrat më të lakuar për dikasterin e Kulturës, Rinisë dhe Sportit mbetet ai i aktorit dhe producentit, Fatmir Spahiu.

Ky i fundit ishte pjesë e planeve të Kurtit edhe në tentativat e kaluara për formimin e qeverisë.

Më 26 tetor të vitit 2025, përmes një postimi në rrjetet sociale, Spahiu kishte konfirmuar publikisht se kishte pranuar ftesën e Albin Kurtit për t’u bërë pjesë e ekzekutivit.

Megjithatë, pasi ajo përbërje qeveritare nuk u votua, pyetja që shtrohet tani është: A mbetet Spahiu zgjedhja e parë e Kurtit edhe pas triumfit të 28 dhjetorit?

I kontaktuar nga Insajderi për të mësuar nëse ka marrë një ftesë të re pas certifikimit të rezultateve, Spahiu u tregua i rezervuar:

“S’kam asgjë me thënë diçka konkrete për momentin”, deklaroi shkurtimisht ai.

Mbetet të shihet nëse në seancën e ardhshme të Kuvendit, kur pritet të votohet ekzekutivi i ri, Fatmir Spahiu do të ulet në karrigen e ministrit për të udhëhequr një nga dikasteret më me peshë për rininë kosovare./Insajderi

Krasniqi: Qeveria kishte informacion për sulmin në Banjskë 4 ditë para se të ndodhte

Ish-kandidati për deputet i AAK-së në zgjedhjet e 28 dhjetorit, Dardan Krasniqi, tha se institucionet e Kosovës kishin informacione paraprake për sulmin e armatosur në Banjskë të Zveçanit, që ndodhi në shtator të vitit 2023.

Sipas Krasniqi, institucionet shtetërore ishin të njoftuara rreth katër ditë para se të ndodhte sulmi, në të cilin u vra rreshteri i Policisë së Kosovës, Afrim Bunjaku, ndërsa në përballjen e armatosur u vranë edhe tre sulmues.

“Qeveria jonë e ka pas informatën 4 ditë më herët se do të ndodh Banjska. Po e them fjalën publike, institucionet tona kanë pas informacione që do të ndodh informacione”, tha Krasniqi.

Sulmi në Banjskë u cilësua nga autoritetet e Kosovës si akt terrorist. Përgjegjësinë për këtë sulm e mori Millan Radoiçiq, ish-nënkryetar i Listës Serbe, i cili aktualisht ndodhet në arrati. Ai dhe 41 persona të tjerë akuzohen për terrorizëm, vepra të rënda kundër rendit kushtetues dhe sigurisë së Kosovës, ndërsa ndaj Radojçiqit rëndojnë edhe akuza për financim të terrorizmit dhe shpëlarje parash.

“Ta heqin flamurin e Shqipërisë nga varrezat”- Bekim Jashari reagon pas deklaratave të Nexhmedin Spahiut

Bekim Jashari, djali i heroit Hamëz Jashari, ka reaguar pas deklaratave të Nexhmedin Spahiut, i cili teksa komentoi mundësinë që Murat Jashari të kandidohej për president të vendit, kushtëzoi që të heqej flamuri kuq e zi dhe të vendoset ai i Kosovës në varrezat e Jasharëve.

Bekim Jashari me anë të një postimi në ‘Facebook’ ka publikuar një fotografi me Besarta Jasharin, të shoqëruar me një mesazh, ku edhe shihet flamuri kuq e zi, shkruan Insajderi.

“Amanet na e lanë të parët, brez pas brezi e djalë pas djali”. Me gjakun dhe sakrificën e tyre u rritëm ne, për të të mbajtur lart me krenari. Valo, o flamuri më i bukur në botë”, ka shkruar Jashari.

Ky reagim vjen pas deklaratës së Spahiut, i cili tha se Murat Jashari, për t’u zgjedhur president, do të duhej të merrte “aprovim amerikan” dhe të distancohej nga simbolika e flamurit kuq e zi, duke theksuar se në varrezat e heronjve të Kosovës duhet të valojë vetëm flamuri i Kosovës.

“Albini ka edhe variante rezervë, e ka për shembull Murat Jasharin, mirëpo Murati për me u zgjedh president duhet me marrë një leje amerikane siç e ka marrë Albin Kurti para se me u bë kryeministër, kushti që e ka pas Albin Kurti nga kuq e zi me kalu në verdh e kaltër, edhe Murat Jashari për me u bë president duhet me kalu verdh e kaltërt, jo në varreza të kryeheronjëve të Kosovës valon flamuri i Shqipërisë, jo i Kosovës”, tha Spahiu në studiot e ‘Pressing’-ut.

Bëhuni gati: Nga kjo ditë priten reshje bore dhe ngrica në gjithë Kosovën

Moti i ngjashëm me atë të djeshmin pritet të mbajë edhe sot, ndërsa nga dita e enjte parashihet përkeqësim i kushteve atmosferike, përfshirë ulje të temperaturave dhe reshje bore. Kështu kanë bërë të ditur nga Instituti Hidrometeorologjik i Kosovës.

Sipas meteorologut Besim Aliu, moti do të jetë kryesisht i vranët, i shoqëruar me riga shiu me intensitet mesatar deri të lartë. Nga dita e enjte pritet rënie e temperaturave, ndërsa gjatë natës do të fillojnë reshjet e borës.

Ai theksoi se presioni atmosferik aktualisht është nën vlerat normale, ndërsa erërat fryjnë kryesisht nga jugperëndimi dhe veriperëndimi i vendit. Temperaturat e ulëta që do të vazhdojnë edhe të enjten dhe të premten pritet të krijojnë kushte për ngrica në gjithë territorin e Kosovës.

Ndërkohë, reshjet e shiut gjatë ditës së sotme kanë qenë të konsiderueshme në disa zona të vendit. Sipas të dhënave të fundit, sasitë më të mëdha të reshjeve janë regjistruar në Junik, me rreth 250 litra për metër katror, ndërsa në rrethin e Gjakovës janë shënuar 200 deri në 220 litra për metër katror. Reshje të mëdha janë regjistruar edhe në Gllogjan dhe fshatrat përreth.

Po ashtu, Malisheva është përballur me reshje të shumta, të cilat kanë shkaktuar edhe vërshime gjatë ditës së sotme.

Nga Instituti Hidrometeorologjik bëhet e ditur se reshjet do të vazhdojnë edhe gjatë fundjavës, ndaj qytetarët këshillohen të jenë të kujdesshëm dhe të ndjekin njoftimet zyrtare.

Një grua në Turqi pretendon se Trump është babai i saj, kërkon t’i bëhet ADN’ja

Një grua në Turqi ka hapur proces gjyqësor për atësi, duke pretenduar se presidenti i Shteteve të Bashkuara të Amerikës, është babai i saj biologjik dhe po kërkon një test ADN-je për ta vërtetuar këtë.

Necla Ozmen, 55 vjeçe, jeton në Ankara dhe ka ngritur padi në Gjykatën për Çështje Familjare më 25 shtator, raportoi DailyMail.

Padia megjithatë menjëherë është rrëzuar nga gjykata, por ajo ka vazhduar apelin.

Necla ka thënë se ka lindur më 1970, ndërsa është e regjistruar si e bija e Sati dhe Dursun Ozmen, çifti që e rriti. Ajo pretendon se më vonë mori vesh se ishte e adoptuar dhe se Sati ia kishte treguar të vërtetën.

Necla pretendon se “ndërrimi i bebeve” ndodhi në një spital në Turqi rreth vitit 1970. Sipas saj, Sati kishte lindur foshnjën të vdekur dhe një grua amerikane që kishte lindur në të njëjtën ditë dhe në atë spital ia kishte dhënë foshnjën e saj për ta rritur.

Necla pretendon se arsyeja pse gruaja amerikane ia dha fëmijën familjes Ozmen ishte për shkak të marrëdhënies jashtëmartesore me Trumpin.

Ajo u kërkoi gjykatësve testin gjenetik.

Necla për mediat turke ka thënë se dëshiron vetëm ta dijë të vërtetën duke insistuar se ka ngjashmëri me Trumpin dhe fëmijët e tij.

 

Merret vendim në tërë Kosovën, shtyhet procesi mësimor

Ministria e Arsimit, Shkencës, Teknologjisë dhe Inovacionit (MAShTI) njofton opinionin publik se, për shkak të reshjeve të fundit atmosferike dhe kushteve të vështirësuara në disa zona të vendit, ka marrë vendim që fillimi i procesit mësimor të shtyhet deri më 12 janar 2026.

“Si pasojë e vërshimeve dhe situatës së rënduar në shumicën e komunave, si dhe e qarkullimit të vështirësuar për shkak të reshjeve të vazhdueshme, të cilat sipas Institutit Hidrometeorologjik të Kosovës (IHMK) pritet të vazhdojnë edhe në ditët në vijim duke shkaktuar vërshime lokale, vështirësi në komunikacion, probleme në sistemet e kanalizimit dhe pengesa në trafik, Ministria e Arsimit, Shkencës, Teknologjisë dhe Inovacionit ka marrë vendim që pushimi dimëror të vazhdojë edhe për dy ditë në nivel vendi, përkatësisht më 8 dhe 9 janar”, thuhet në njoftimin e Ministrisë së Arsimit.

Mësimi për gjysmëvjetorin e dytë do të fillojë të hënën, më 12 janar 2026.

“MAShTI është në komunikim të vazhdueshëm me të gjitha Drejtoritë Komunale të Arsimit dhe, bazuar në informacionet e pranuara nga terreni, është konstatuar se fillimi i procesit mësimor i paraparë për ditën e enjte është i pamundur. Për këtë arsye, procesi mësimor do të fillojë gjatë javës së ardhshme, ndërkohë që orët e humbura mësimore gjatë këtyre dy ditëve do të zëvendësohen gjatë pjesës së dytë të vitit shkollor 2025/2026 për të gjitha nivelet e arsimit parauniversitar”, thuhet në njoftim.

Ministria e Arsimit falënderon prindërit, nxënësit dhe mësimdhënësit për mirëkuptimin dhe bashkëpunimin, duke ritheksuar se siguria e nxënësve dhe e stafit arsimor mbetet prioritet kryesor. /IndeksOnline/

Donika Gërvalla rikthehet fuqishëm, kjo është detyra e saj në “Kurti 3”

Kryetari i Komunës së Mitrovicës, njëherit Kryetar i partisë “Guxo”, Faton Peci, ka deklaruar se kjo parti do t’i udhëheqë dy ministri në qeverinë “Kurti 3”

Peci zbuloi se Donika Gërvalla do të jetë Ministre e Drejtësisë dhe Zëvendëskryeministre, shkruan Reporteri.net.

Gërvalla ka qenë e paraparë për këtë pozitë edhe në dy qeveritë që nuk ishin votuar në Kuvend, me mandatarë Albin Kurtin dhe Glauk Konjufcën

“Ne e kemi njëfarë dakordimi në parim. Në prezentimin e kabinetit të ri në përpjekje, Kurti 3, emër i pakontestueshëm është Donika Gërvalla si Zëvendëskryeministre dhe Ministre e Drejtësisë. Minimalisht do ta kemi edhe një ministri tjetër, por që nuk dihet cila do të jetë ajo”, u shpreh Peci.

Ai tha po ashtu se Guxo do t’i ketë 8 deputetë.

Sipas tij, në vitin 2021, nga kampi i VV-së nuk ka pasur gatishmëri që Guxo t’i ketë dy ministri.

“Arsyeja pse më 2021 Guxo e ka marrë ministrinë e dytë, ka qenë emri im. Tash unë e di që ka qenë edhe një eksponent i VV-së aty në listë që ka qenë i pakënaqur që në moment të fundit nuk ka përfunduar ministër, gjë të cilën unë e kam kuptuar pas rreth dy vitesh. Por unë s’kam qenë as fajtor e as shkaktar i kësaj”, deklaroi ai në Klan Kosova.

Reshjet e shiut, kjo komunë merr vendim për shtyrjen e fillimit të gjysmë vjetorit shkollor

Reshjet e dendura të shiut kanë shkaktuar gjendje të rënduar në disa komuna.

Komuna e Malishevës ka marrë vendim që të shtyjë për datën 12 janar fillimin e gjysmë vjetorit të dytë shkollor.

Deri të ky vendim, komuna e Malishevës ka ardhur duke u bazuar në parashikimet e Institutit Metereologjik të Kosovës për përkeqësimin e motit dhe gjithashtu bazuar në gjendjen në terren në këtë komunë.

Në njoftim thuhet se ditet e humbura do të kompensohen gjatë muajve në vijim.

Dedaj me akuza ndaj LVV-së: Flet për “neokomunizëm” dhe rrezik politik

Ish-ambasadori i Kosovës, Gjergj Dedaj, ka reaguar ashpër përmes një postimi publik, ku ka kritikuar Lëvizjen Vetëvendosje dhe mbështetësit e saj, duke përdorur gjuhë të rëndë politike dhe ideologjike.

Dedaj ka ngritur shqetësime për atë që ai e quan “ringjallje e neokomunizmit” në Kosovë, duke e cilësuar këtë si rrezik për orientimin politik dhe shoqëror të vendit. Ai ka shprehur bindjen se mbështetja për LVV-në, sipas tij, vjen kryesisht nga shtresat sociale më të varfra dhe nga diaspora.

“Votuesit e LVV në diasporë dhe Kosovë, kryesisht janë rastet sociale, shtresa e varfër dhe të pastrehët, të cilët presin lëmosha sociale dhe për interesa vitale e shesin votën”, ka shkruar Dedaj.

Postimi i plotë:

NEOKOMUNIZMI DHE KUQALOSHET E KOSOVËS!
-Rrezik nga ringjallja e Jugosllavisë së Zhablakut!
Votuesit e LVV në diaspore dhe Kosovë, kryrsisht janë rastet sociale, shtresa e varfër dhe të pastrehët, të cilët presin lëmosha sociale dhe për vitra e shesin voten!
Mjerimi dhe varfëria hap rrugën për kuqaloshat e LVV- së!

Vërshimet në vend, reagon presidentja Osmani

Presidentja, Vjosa Osmani, ka reaguar pas situatës aktuale në vend, me përmbytjet e shkaktuara nga vërshimet.

Duke shpërndarë fotografi nga terreni, Osmani ka shprehur mirënjohje për të gjitha institucionet që po përballen me këtë situatë

“Sot gjatë ditës kam qenë në komunikim me kryetarët e komunave të prekura, të cilët po udhëheqin menaxhimin e situatës në terren në koordinim të ngushtë dhe me mbështetjen e institucioneve qendrore.

Agjencia për Menaxhimin e Emergjencave po punon pareshtur bashke me organet e rendit. Falënderoj edhe Forcën e Sigurisë së Kosovës për gatishmërinë e plotë për ofrimin e mbështetjes së menjëhershme, duke vënë në dispozicion kapacitetet e saj njerëzore dhe logjistike, nëse paraqitet nevoja” deklaroi Osmani.