Trump dha propozimin për luftën në Gaza, reagon për herë të parë Hamasi

Zyrtari i lartë i organizatës, Mohammed Mardawi, në deklaratat për rrjetin televiziv Al Jazeera, e përshkroi planin si “një tekst që anon nga pala izraelite”.

“Ajo që u tha në konferencën për shtyp në lidhje me planin për t’i dhënë fund luftës anon nga perspektiva izraelite. Është afër asaj që Netanyahu këmbëngul për të vazhduar luftën”, theksoi ai.

Në të njëjtën kohë, ai theksoi se Hamasi nuk do të vazhdojë me një përgjigje zyrtare para se të marrë tekstin e plotë të planit.

“Ne duhet ta marrim këtë plan në formë të shkruar dhe të qartë para se të përgjigjemi. Plani duhet t’i arrijë Hamasit dhe organizatave palestineze”, shtoi ai.

Ndërkohë, një zyrtar i lartë i Hamasit konfirmoi për BBC-në se nuk kishte marrë asnjë propozim nga Trump për një armëpushim të ndërmjetësuar. Zyrtari tha, megjithatë, se Hamasi mbeti i hapur për të shqyrtuar çdo propozim që mund t’i jepte fund luftës në Gaza, por theksoi se çdo marrëveshje duhet të mbrojë interesat e palestinezëve, të sigurojë një tërheqje të plotë izraelite nga Gaza dhe t’i japë fund luftës.

I pyetur në lidhje me armët e organizatës, zyrtari tha: “Armët e rezistencës janë një vijë e kuqe për sa kohë që vazhdon pushtimi. Çështja e armëve mund të diskutohet vetëm brenda kuadrit të një zgjidhjeje politike që garanton krijimin e një shteti të pavarur palestinez në kufijtë e vitit 1967.”

Qeveria me vendim: Nga 1 tetori rriten pensionet

Nga 1 tetori 2025 pensionet do të rriten në masën 2.5%. Qeveria e Shqipërisë ka miratuar vendimin e indeksimit të pensioneve për 721,398 pensionistë.

Nga vendimi do të përfitojnë kategoritë e pensionit të pleqërisë, invaliditetit, familjarët. Pjesë e vendimit do të jenë edhe qytetarët të cilët dalin në pension duke filluar nga data 1 tetor.

Efektet financiare për zbatimin e këtij vendimi përllogariten në shumën 1,140,000,000 lekë, të cilat përballohen nga fondi për politikat e indeksimit të pensioneve, i parashikuar në buxhetin e Institutit të Sigurimeve Shoqërore.

Vrasja e të riut në Gjilan, dëshmitari tregon çfarë i kërkoi i dyshuari pak para rastit tragjik

Në Gjykatën Themelore në Gjilan po zhvillohet seanca gjyqësore lidhur me rastin e vrasjes së Sokol Osmanit, i cili u vra në mënyrë tinëzare në nëntor të vitit 2024 në qytetin e Gjilanit.

Lidhur me këtë rast, në seancë ka rrëfyer rreth këtij rasti dëshmitari i rastit, Adem Bajrami, nga nacionaliteti rom. Aktualisht, në paraburgim ndodhen dy persona të dyshuar për përfshirje në këtë ngjarje tragjike Valmir Salihu dhe Florian Mitev.

Ai gjatë seancë u pyet rreth bicikletës të cilen Valmiri e shfrytëzoi për këtë akt. “Unë i njoh dy të dyshuarit në këtë rast, personin në anën e djathtë e kam në lagjen ku jetoj. Ndërsa personin nga ana e majtë e njoh pasi ka lëvizur disa herë në lagjen tonë”, ka deklaruar Bajrami.

“Salihun e njoh përafërsisht 3-4 vjet. Kjo ka qenë më herët, jemi takuar në rrugë, kemi pasur pak probleme. Dhe më ka sugjeruar që mos të ngatërrohem më me të, pasi që na jemi rom, ndërsa ne jemi pakicë, ata si shqiptarë janë shumicë” tha ai.

Ai është pyetur edhe për ditën kritike kur edhe ndodhi vrasja e Sokol Osmanit. Ai iu është përgjigjur pyetjeve të prokurores së rastit. “E kam parë pasi jetojmë në lagjen e njëjtë. Edhe kur ka ardhur policia e kam parë. Disa ditë më parë, para ngjarjes, ka ardhur tek unë dhe ka kërkuar karrige që ju kanë shërbyer për të luajtur me letra, kurse ditën kritike ka kërkuar një biçikletë nga unë. Biçikletë nuk i kam dhënë pasi s’kam pasur, pastaj e ka kërkuar një motor nga një fqinje tjetër,” shtoi ai.

Tutje, me pyetje ka vazhduar avokati mbrojtës i familjes Osmani. “Fillimisht për rastin e kam kuptuar kur i kam parë policinë, shumë policë në lagjen tonë. Ndërsa rastin për vrasjen e kam kuptuar në media”, shtoi ai. Seanca po vazhdon me dëshminë e dëshmitarit Afrim Kurdiu, shok i të ndjerit./IndeksOnline/

Mitrovicasi humb jetën në QKUK pasi u godit nga vetura

Ka vdekur një person në QKUK, një muaj pasi është goditur nga një veturë teksa po ecte në rrugë.

Menjëherë pas aksidentit që kishte ndodh më 31 gusht, viktima kishte marrë lëndime të rënda trupore dhe ishte dërguar për tretman emergjent në Qendrën Klinike Universitare të Kosovës (QKUK).

Pavarësisht përpjekjeve të mjekëve dhe trajtimit të gjatë shëndetësor, më 29 shtator 2025, ai nuk arriti t’i mbijetojë plagëve të marra, duke ndërruar jetë.

Policia e Kosovës ka bërë të ditur se rasti është në procedurë hetimore dhe pritet të sqarohen të gjitha rrethanat e këtij aksidenti fatal.

Fotografia e Vjosa Osmanit me presidentin argjentinas nxit debat në Argjentinë

Presidentja e Kosovës, Vjosa Osmani, ka takuar presidentin e Argjentinës, Javier Milei, gjatë pritjes së organizuar nga presidenti amerikan, Donald Trump, në kuadër të aktiviteteve përcjellëse të Asamblesë së Përgjithshme të Kombeve të Bashkuara.

“Në pritjen e presidentit Trump në New York, krah liderëve të tjerë botërorë – diskutime të rëndësishme në interes të Republikës së Kosovës dhe qytetarëve tanë!”, shkroi Osmani në “Facebook” të shtunën në mbrëmje, pa dhënë detaje specifike.

Fotografia e Osmanit me Milein ka nxitur debat në Argjentinë, për shkak se ky vend refuzon ta njohë Kosovën.

Qëndrimi i Buenos Aires ka qenë i qartë që nga viti 2008, kur Kosova shpalli pavarësinë: autoritetet argjentinase e kanë kundërshtuar njohjen, duke e cilësuar një precedent të rrezikshëm për çështjen e Ishujve Falkland.

“Përbuzje ndaj Ishujve Malvinas. Milei në OKB u fotografua – buzagaz – pranë përfaqësueses së Kosovës, duke refuzuar qëndrimin tonë historik mbi integritetin territorial”, shkroi ish-Ministri i Jashtëm, Santiago Cafiero, duke përmendur edhe misionin paqeruajtës të Forcës së Sigurisë së Kosovës në Ishujt Falkand.

Ish-sekretari i Ishujve Falkland, Guillermo Carmona, reagoi gjithashtu pas fotografisë të dy liderëve, duke kritikuar presidentin argjentinas: Argjentina pretendon sovranitet mbi ishujt, duke i konsideruar pjesë të territorit të saj historik, kurse Britania e Madhe administron ishujt dhe i konsideron pjesë të territorit të saj jashtëkontinental.

“Është jashtëzakonisht serioze që Milei është fotografuar – dhe ndoshta ka zhvilluar një takim – me dikë që pretendon të jetë president i një entiteti që Argjentina nuk e njeh si shtet, duke kundërshtuar qëndrimin tonë në lidhje me integritetin territorial”.

Në të kaluarën, emri i Kosovës është përdorur nga presidenti argjentinas vetëm në kontekste metaforike. Milei ka përdorur shprehjen “Esto es Kosovo/Kjo është Kosova” për të ilustruar një gjendje të çrregullt. Megjithatë, këto referenca kanë qenë jashtë kontekstit diplomatik dhe nuk përbëjnë qëndrim të artikuluar politik për Kosovën.

“Dëshiroj të martohem me ty…”, prokuroria merr vendim për Behar Kamberin

Është liruar nga qelia Behar Kamberi, mjeku psikiatër nga Kosova, që policia e Tiranës e arrestoi pas një kallëzimi të bërë nga moderatorja sportive, Albano Bejko, e cila pretendonte se ishte përndjekur nga mjeku kosovar.

Vendimi për lirimin e Kamberit, është marë nga Prokuroria e Tiranës, e cila pasi vlerësoi materialin e referuar nga Komisariati nr.2, mori deklarimin e kallëzueses Albano Bejko si edhe realizoi këqyrjen e mesazheve.

Disa mesazhe tregojnë një ndjenjë sentimentale që mjeku kosovar Behar Kamberi, ka shfaqur ndaj moderators sportive.

Mesazhe me tekste si: “…Të dua…dëshiroj të martohem me ty…” apo “…jeni shumë e bukur, dua t’ju takoj se kam ardhur nga Kosova vetëm për ju…”, janë vlerësuar nga prokuroria e Tiranës si një komunikim krejt normal dhe aspak shqetësues, intimidues, apo kanosës për jetën e moderatores sportive.

Deklarata e Kurtit në SHBA-Kajtazi: Tashmë jam bindur se ky punon për Rusinë e Serbinë

Analisti Vehbi Kajtazi tha se është i bindur që kryeministri në detyrë, Albin Kurti punon për Serbinë dhe Rusinë.

Sipas Kajtazit, Kurti nuk e përfaqëson interesat e këtij shteti.

“Me këtë që tha zoti Kurti nuk kam asnjë dilemë që ky njeri nuk punon për Kosovën, ky nuk i përfaqëson interesat e këtij shteti, ky njeri e tha vet se ai përfaqëson interesat e Rusisë, se ai tha ‘s’du me ni a po don Amerika a jo me tërheq Serbinë dhe krejt Ballkanin nga ndikimi rus”, tha Kajtazi në Klan Kosova.

Ai shtoi se Rusia çdo ditë investon që ta mbajë rajonin, më saktë Serbinë nën kontroll, duke nënvizuar se një pro-amerikan do të ishte në gatishmëri me iu përgjigj Amerikës gjithçka që ka të bëj me sigurinë.

E rëndë: Ndërron jetë në moshë të re mërgimtari

Pas një sëmundjeje të rëndë, është ndarë nga jeta Driton Limon Gashi, në moshën 41-vjeçare.

Dritoni ishte i njohur si person pozitiv dhe human, i respektuar nga të gjithë ata që e njihnin.

Varrimi do të bëhet sot, në orën 16:00, në varrezat e fshatit Spaniq.

Maqedonci: Lufta e UÇK-së ishte e drejtë dhe e pastër

Ministri në detyrë i Mbrojtjes, Ejup Maqedonci, në kuadër të vizitës në Varshavë, ka qenë i ftuar në një intervistë në TVP World, si dhe nga ekipi i Forumit të Sigurisë.

Maqedonci, në intervistën për TVP World theksoi se lufta e UÇK-së ishte e drejtë dhe e pastër, ndërsa qëllimi i vërtetë i Serbisë përmes akuzave kundër drejtuesve të UÇK-së është minimi i shtetësisë së Kosovës dhe i legjitimitetit të intervenimit të NATO-s që ndali gjenocidin e ushtruar nga Serbia në Kosovë.

“Bëra të qartë se Serbia po vazhdon të mbajë qasje hegjemoniste ndaj Kosovës dhe vendeve fqinje, duke zhvilluar luftë hibride dhe duke strehuar e mosdorëzuar pjesëtarët e grupit paramilitar që tentoi aneksimin e pjesës veriore të Kosovës dhe kreu akte terroriste kundër institucioneve tona. Paraqita këndvështrimin tonë për ambientin global të sigurisë, ndryshimet teknologjike, si dhe për invazionin rus në Ukrainë, duke nënvizuar mbështetjen që Kosova i ka dhënë dhe po vazhdon t’i japë Ukrainës në luftën e saj të drejtë për liri”, tha ai.

Gjithashtu, ai ka theksuar investimet e Qeverisë në zhvillimin e kapaciteteve mbrojtëse të Kosovës dhe faktin që ushtria jonë po ndërtohet sipas standardeve të NATO-s, duke siguruar ndërveprueshmëri me aleatët dhe duke përgatitur vendin për anëtarësim në NATO.

|Konfirmova se Republika e Kosovës mbetet e vendosur në rrugën e saj drejt anëtarësimit në NATO dhe Bashkimin Evropian, si dhe në ruajtjen dhe forcimin e vlerave demokratike”, tha ai.

Ish-ushtaraku shqiptar: Kurti vendosi rendin në veri të Mitrovicës, GreneII humbi ndikimin

Ish-ushtaraku shqiptar, Artur Meçollari, ka reaguar pas deklaratës së kryeministrit Albin Kurti në SHBA, duke theksuar se Veriu i Kosovës është tashmë nën sovranitetin e plotë të institucioneve të Kosovës.

Sipas tij, kjo ka minimizuar mundësitë e Serbisë për destabilizim dhe ka dobësuar ndikimin e ndërkombëtarëve, veçanërisht të Richard Grenell.

Meçollari paralajmëron se ideja e rikthimit të Asociacionit të Komunave me shumicë serbe, pa njohjen e Kosovës nga Serbia, rrezikon të kthehet në mekanizëm kontrolli ndaj Qeverisë së Kosovës.

Ai shton se, edhe nëse rrëzohet nga ndërkombëtarët, Kurti ka treguar se mund të ringrihet politikisht.

Postimi i plotë:

Kurti deklaroi sot nga SHBA se Veriu i Kosovës ishte thelbi i kundërshtive me Ambasadën e SHBA.

E kam deklaruar këtë përpara tetë ditësh, një ditë pas deklaratës së Ambasadës së SHBA në Prishtinë. Bile, kam deklaruar se pas kësaj deklarate qëndron Richard Grenell.

Prej mbi 20 vjet, situata e paqëndrueshme në veri të Kosovës ka qënë mekanizmi i kontrollit dhe shtrëngimit të qeverive të Kosovës, si edhe të Sërbisë. Vendosja e rendit ligjor në këto territore dhe ushtrimi i sovranitetit të shtetit të Kosovës, ka bërë që lobistët ndërkombëtarë të humbasin një mekanizëm shumë të fortë kontrolli. Sot Kosova ëdhtë më shumë sovrane.

Sot, Veriu i Kosovës është nën sovranitetin dhe ushtrimin e ligjeve të Kosovës. Sërbisë i është minimizuar mundësia e destabilizimit të Kosovës. Kujtoni aktin terrorist të Banjskës. Ndërkombëtarëve (pazarzhinjëve si Grenell) ju është minimizuar mundësia e kontrollit dhe shtrëngimit të Qeverisë së Kosovës. Kosova është më sovrane, jo vetëm nga Sërbia, por dhe nga pazarxhinjë si Grenell. Albinin Kurtin mund ta rrëzojnë ndërkombëtarët por nuk mund ti mohojnë trashëgiminë se ai vendosi rendin në veri të Kosovës, ashtu sikurse ishte i vetmi që kundërshtoi Gjykatën Specisle.

Ringritja e përsëritëshme e çështjes së Asosacionit të Komunave me shumicë serbe, pa njohjen paraprake nga Sërbia të Kosovës, nuk është në interes të Kosovës, pasi do ti japi mundësi Sërbisë të destabilizojë Kosovën. Por, kjo iniciativë mund të shihet edhe si një mekanizëm i ri për rivendodjen nën kontroll të Qeverisë së Kosovës.

Edhe po ta rrëzojnë ndërkombëtarët, Albin Kurti, ai do të vijojë të ketë fuqi të mjaftueshme të ringrihet. Ai është i ri dhe ka treguar se mund të ringrihet. Fuqia e tij do të vijojë të jetë e mjaftueshme në Parlament, që njerëz të kontrolluar nga Grenell në Kosovë të mos lejohen të bejnë pazare me kurriz të Kosovës, siç bënë me Sazanin në Shqipëri.