Trusti vjen me një njoftim të rëndësishëm

Fondi i Kursimeve Pensionale të Kosovës (FKPK) , ka njoftuar të gjithë kontribuuesit tanë se faza e testimit të platformës për aplikimin online për tërheqjen e pensionit është përfunduar me sukses.

Të gjithë kontribuuesit e kualifikuar mund ta dorëzojnë kërkesat e tyre për pension në mënyrë elektronike, përmes faqes zyrtare të FKPK-së.

Kjo platformë është zhvilluar me qëllim të thjeshtimit të procesit të aplikimit, duke mundësuar një përvojë më të shpejtë, më të sigurt dhe më të lehtë për të gjithë kontribuuesit tanë, pa pasur nevojë për vizita fizike në zyrat tona.

Për të aplikuar online, kontribuuesit duhet të:

• Vizitojnë faqen tonë zyrtare www.trusti.org

• Përdorin identifikimin përmes platformës eTrusti.

• Plotësojnë formularin e aplikimit dhe të bashkëngjisin dokumentet e nevojshme.

Për më shumë informata rreth procedurës, kritereve të aplikimit dhe pyetjeve më të shpeshta, ju ftojmë të vizitoni seksionin “Tërheqja e Kursimeve” në faqen tonë të internetit ose të na kontaktoni përmes qendrës së thirrjeve.

I falënderojmë të gjithë kontribuuesit për durimin dhe mbështetjen e vazhdueshme gjatë kësaj faze të rëndësishme të digjitalizimit të shërbimeve tona.

A po heq dorë Albulena Haxhiu nga kandidatura për kryeparlamentare? Ja si u përgjigj ajo sot

Deputetja e Lëvizjes Vetëvendosje dhe kandidatja për kryeparlamentare, Albulena Haxhiu refuzoi të flasë para gazetarëve, derisa po dilte nga Kuvendi i Kosovës, pas dështimit të vazhdimit të sotëm të seancës konstituive.

 

 

 

“Pyesni opozitën ju lutem”, tha Haxhiu kur u pyet se edhe sa herë do të tentohet zgjedhja e kryeparlamentarit.

Këto janë vendimet që i mori sot qeveria në detyrë

Qeveria në detyrë e Republikës së Kosovës ka mbajtur sot mbledhje e 260-të.

ZKM ka njoftuar se në këtë mbledhje qeveria ka:

–         Emëruar znj. Fikrije Zymberi në pozitën e Drejtores Ekzekutive në Agjencinë për Arsim dhe Aftësim Profesional dhe Arsim për të Rritur;

–         Emëruar znj. Besa Bytyqi – Baraliu në pozitën e Drejtores së Përgjithshme të Inspektoratit të Arsimit;

–         Emëruar znj. Sebahate Bushrani Ibraimi në pozitën e Drejtores Ekzekutive në Agjencinë e Meteorologjisë së Kosovës;

–         Emëruar Komisionin Ad hoc për Vlerësimin Profesional për Pranim në Pozitën e lartë të Kategorisë Drejtuese: Drejtor Ekzekutiv në Agjencinë Qendrore të Prokurimit;

–         Emëruar Komisionin Ad hoc për Vlerësimin Profesional për Pranim në Pozitën e lartë të Kategorisë Drejtuese: Drejtor Ekzekutiv në Thesarin e Kosovës;

–         Ndarë 20,721 euro me qëllim mbulimin e kontributit vjetor të Qeverisë së Republikës së Kosovës në Qendrën Rajonale të Nismës Rajonale për Migrim, Azil dhe Refugjatë (MARRI);

–         Emëruar Komisionin e Ankesave për Shtetësi. Ky komision do të funksionojë si organ i pavarur administrativ për shqyrtimin e ankesave ndaj vendimeve për shtetësinë, duke siguruar një proces të drejtë dhe transparent. Qëllimi është forcimi i mbrojtjes së të drejtave të qytetarëve dhe përmirësimi i procedurave administrative në këtë fushë;

–         Miratuar vendimin preliminar për shpronësim për interes publik të pronave të paluajtshme të cilat preken nga realizimi i projektit Mbyllja e Deponisë aktuale dhe realizimin e Deponisë Sanitare të Re në Pejë, Zona Kadastrale Lutogllavë, Komuna e Pejës;

–         Emëruar z. Labinot Zeqiri në pozitën e Kryeinspektorit të Inspektoratit Qendror të Shëndetësisë;

–         Plotësuar dhe ndryshuar Tabelat nga paragrafi 2. i nenit 10 të Ligjit Nr.02/L-128 për Barnat Narkotike, Substancat Psikotrope dhe Prekursorë, duke u bazuar në mekanizmat për ndërrim dhe plotësim të përcaktuar me Konventat Ndërkombëtare për kontrollin e Narkotikëve;

–         Rialokuar 4.5 milionë euro në Ministrinë e Administrimit të Pushtetit Lokal nga projekti kapital “Bashkëfinancimi me donatorët për skemën e granteve bazuar në performancën komunale” në 25 projekte kapitale në përputhje me 25 marrëveshjet e mirëkuptimit për projekte kapitale të nënshkruara nga Ministri i MAPL-së dhe Kryetarët e Komunave dhe donatorët;

–         Aprovuar Planin e rishikuar të Veprimit 2025-2026 për zbatimin e Strategjisë për Vetëqeverisje Lokale 2016-2026.  Përmes këtij plani të veprimit synohet të rritet autonomia lokale dhe të ofrohen shërbime me kosto efektive nëpër komuna.

Protesta e bizneseve, Bajrami: Beteja e Kurtit nuk është me ndërtu, por me shkatërru

Deputetja e LDK-së, Hykmete Bajrami, ka kritikuar qasjen e kryeministrit Albin Kurti ndaj protestave të bizneseve kundër liberalizimit të tregut të energjisë elektrike, i cili hyn në fuqi më 1 qershor.

Sipas Bajramit, në vend që të ofrojë zgjidhje për shqetësimet e bizneseve, Kurti ka zgjedhur të përballet me to dhe t’i krahasojë protestat e tyre me barrikadat e vendosura nga Lista Serbe në të kaluarën.

“Beteja e Kurtit nuk është me ndërtu, por me shkatërru. Është turp që protestat e bizneseve, punëdhënësve më të mëdhenj të vendit, krahasohen me barrikada. Ndërkohë që Kurti nuk e thotë asnjë fjalë për koston prej 800 eurosh për transportin e 1 megavatit energji që e bën kompania e Vuk Hamoviqit – për të cilin ai dikur na ligjëronte kur ishte në opozitë”, ka thënë Bajrami.

Ajo gjithashtu kritikoi faktin se Kuvendi ka kaluar për të 23-tën herë në pauzë 48-orëshe, duke ia adresuar fajin Lëvizjes Vetëvendosje si parti e parë që, sipas saj, ka përgjegjësinë për të ofruar zgjidhje.

“Na kujtohet kur Kurti e ka mundur Rrahman Jasharajn me ato grevat. Nuk e ka mundur Jasharajn, por arsimin. Nëse Kurti i mund edhe bizneset, atëherë e mund ekonominë. Dhe kur Kurti i mund arsimin dhe ekonominë, e vetmja përfituese është Serbia”, shtoi Bajrami.

Alarmante: “Do të çojë botën në kaos”, vullkani që pritet të shpërthejë pranë Shqipërisë

Një seri e pandalshme tërmetesh që janë regjistruar pranë Campi Flegrei, ku kohë më parë ka qenë një vullkan në Itali, ka ngritur shqetësimet e ekspertëve për një riaktivizim të fuqishëm nga ky krater, që mund të çojë botën në kaos.

Gjatë këtij muaji, zona u godit nga një tërmet 4.4 ballë, i cili konsiderohet si ndër më të fortët në 40 vite, por për vullkanologët mund të jetë dhe një paralajmërim.

Në 6 muajt e fundit zona ka regjistruar mbi 3000 lëkundje sizmike, shoqëruar me rritjen e emetimeve të gazrave, shenjë kjo që magma mund të jetë duke u ngjitur drejt sipërfaqes.

Studiuesit nga Instituti Italian i Gjeofizikës (INGV) paralajmërojnë se struktura e tokës po kalon nga një fazë përkuljeje në çarje, çka mund të nënkuptojë se jemi afër një shpërthimi të mundshëm. Nëse ndodh, do të ishte shpërthimi i parë që nga viti 1538. Në skenarin më të keq, do të prekte mbi 4 milionë banorë në rajonin e Napolit, raporton A2CNN.

Por pasojat nuk do të ishin vetëm lokale. Shqipëria dhe Ballkani, mund të ndiejnë efektet e ndotjes atmosferike, ndryshimeve klimatike dhe reshjeve të hirit vullkanik, që mund të ndikojnë në bujqësi, shëndetin publik dhe transportin ajror.

Rreth 40,000 vjet më parë, shpërthimi i Campi Flegrei shkaktoi një nga katastrofat më të mëdha vullkanike në historinë e Tokës, me ndikim të madh në klimën globale

“Desh më zuri e qara” – Kiara Tito tregon momentin e papritur që i ndodhi në skenë

Moderatorja dhe prezantuesja e njohur, Kiara Tito, ka ndarë për publikun një nga momentet më të sikletshme dhe të vështira në karrierën e saj televizive.

E ftuar në një emision televiziv, Kiara foli për familjen, projektet e reja që po vijnë dhe veçanërisht për përvojën e saj në skenën e “Portokallisë”.

Ajo rrëfeu se pjesa më stresuese për të ishte momenti para daljes në skenë, kur nuk dinte nga cili cep të hynte.

“Pjesa më e vështirë ka qenë në momentin para se të dilja në skenë sepse ne kemi disa dalje, pasi nuk dalim gjithmonë nga i njëjti vend dhe kemi dy ose tre dalje. Këta ishin mësuar, por shpejtësia që duhet të dilje nga një cep në tjetrin, ajo më çakordoi fare dhe desh më kapi një e qarë aty në prapaskenë sepse unë nuk po dija nga të dilja. Njëri më thoshte dil djathtas, tjetri majtas ndërkohë duhet të kujtoja dhe tekstin. Derisa ta merrja veten dhe t’i kuptoja këto daljet”, u shpreh Kiara.

Pavarësisht stresit fillestar, Kiara është ambientuar shpejt dhe është bërë një nga figurat më të dashura për publikun në programin humoristik.

Bllokada në Kuvend, deputeti i PDK-së fton qytetarët të protestojnë

Deputeti i PDK-së , Nait Hasani tha se PDK-ja po pret vendimin e Gjyaktës Kushtetuese në lidhje me formën e votimit.

Ai para RTV21 tha se ka pasur tendenca për t’i bindur deputetët për ta votuar kryekuvendarin.

Derisa u pyet për bisedat që ka zhvilluar me Albulena Haxhiun e Vetëvendosjes ditë më parë.

“Ka qenë pjesa e organizmit për përvjetorin e burgut të Dubravës, ka qenë pikërisht për çështjen e burgut, krimin që është bërë në burgun e Durbavës, ka qenë një manifestim i cili nuk duhet të trajtohet bashkë, ai kalon të gjitha përmasat e partive politike , është një ndjenjë kombëtare”, tha Hasani.

Derisa sa i përket bllokadës në Kuvendin e Kosovës ai ftoi qytetarët që të protestojnë.

“Unë kisha pas dëshirë që të gjithë qytetarët të mblidhen pranë Kuvendit ta bëjnë protestën dhe t’’i detyrojnë deputetët ta bëjnë një zgjidhje.” , tha ai.

Ushtarët serb ia vunë thikën në fyt – Arbnora Ademaj rrëfen tmerrin që përjetoi: “E kam kaluar ferrin”

Aktorja Arbnora Ademaj ka ndarë një rrëfim personale në emisionin ‘Canapé’ me Shpend Lipën.

Me emocione të forta, ajo kujtoi një moment të dhimbshëm nga e kaluara e saj, kur ishte vetëm një fëmijë gjatë luftës në Kosovë.

“Ushtarët serb më vunë thikën në fyt… E kam përjetuar ferrin,” tha ajo ndër të tjera.

Arbnora tregoi se përkundër moshës së re, ajo e kujton me detaje tmerrin e asaj dite.

Ajo tha se kjo ngjarje e ka ndjekur gjatë gjithë jetës dhe ka lënë gjurmë të thella në shpirtin e saj.

Ky rrëfim prekës tregon forcën dhe kurajon e Arbnorës për të ndarë një pjesë kaq personale të historisë së saj. Për më shumë, ndiqni intervistën në linkun në vazhdim.

Prania e shtuar e forcave serbe pranë kufirit me Kosovën, deklarohet Kurti

Kryeministri në detyrë Albin Kurti në mbledhjen e qeverisë ka folur dhe ushtrimin “Defender Europe 25”, i cili është duke u mbajtur dhe në Kosovë.

Kurti ka thënë se Forca e Sigurisë së Kosovës po merr pjesë me përafërsisht 1000 trupa në ushtrimet që po zhvillohen në Kosovë, Shqipëri, Kroaci dhe Maqedoni të Veriut.

“ Aktualisht në tri zona gjeografike në kontinentin e Evropës është duke u realizuar ushtrimi më i madh që Ushtria e ShBA-ve organizon dhe realizon në kontinentin e Evropës, “Defender Europe 25”, me pjesëmarrje të 25 mijë trupave nga 29 vende të NATO-s. Republika e Kosovës ka nderin dhe kënaqësinë të jetë në mesin e 18 vendeve nikoqire, dhe se Forca e Sigurisë së Kosovës po merr pjesë me përafërsisht 1000 trupa në ushtrimet që po zhvillohen në Kosovë, Shqipëri, Kroaci dhe Maqedoni të Veriut”, tha Kurti.

Ai tha se këtë radhë Republika e Kosovës është vend i përzgjedhur nga Ushtria e Shteteve të Bashkuara të Amerikës, ku është vendosur komanda e Divizionit 28 të këmbësorisë.  Ndërsa pohoi se institucionet  dhe ushtria jonë po dëshmojnë që janë të afta për të mikpritur dhe për të organizuar në territorin e saj ushtrime komplekse të cilat kërkojnë planifikim, organizim dhe mbështetje të nivelit shumë të lartë

“Nga baza e FSK-së në Aeroportin e Gjakovës, kjo komandë taktike amerikane po udhëheq me të gjitha brigadat në regjionin e Evropës Juglindore. Institucionet tona dhe ushtria jonë po dëshmojnë që janë të afta për të mikpritur dhe për të organizuar në territorin e saj ushtrime komplekse të cilat kërkojnë planifikim, organizim dhe mbështetje të nivelit shumë të lartë”, tha Kurti.

Ndërkaq tha se rritja e gatishmërisë dhe pranisë së forcave të armatosura të Serbisë pranë kufirit tonë, është reaksion ndaj Defender Europe 25.

“E rritja e gatishmërisë dhe pranisë në kufirin tonë e Forcave të Armatosura të Serbisë besojmë që është reaksion ndaj Defender Europe 25, por ajo çfarë nuk e dimë ende është se a po e bën këtë vetë Serbia apo një gjë të tillë ia ka kërkuar Rusia”, ka thënë Kurti./Indeksonline/

Kuvendi në ngërç, Bislimit s’i bëhet vonë – thotë se VV s’ka nevojë për partnerë

Zëvendëskryeministri në detyrë, Besnik Bislimi, ka deklaruar se situata politike në Kosovë nuk përbën krizë, pavarësisht bllokimit të vazhdueshëm të seancës konstituive të Kuvendit, e cila tashmë është ndërprerë 22 herë.

Sipas tij, problemi qëndron vetëm te mungesa e vullnetit për konstituimin e Kuvendit, për të cilin nuk nevojiten partnerë, por përfshirje dhe përgjegjësi nga të gjithë deputetët.

Në një intervistë për Deutsche Welle, zhvilluar në Aachen të Gjermanisë, Bislimi u pyet se me cilët partnerë do ta tejkalojnë këtë bllokadë. Ai u përgjigj: “Ne në fakt nuk kemi krizë qeveritare. Qeveria është në detyrë. Ajo po pret Qeverinë e re që do të jetë pak a shumë me përbërje të ngjashme me atë të vjetrën. Ajo ku për momentin kemi ngecur është te konstituimi i Parlamentit, për të cilin si duket ka interesim të disa subjekteve politike që ta bllokojnë, duke paraqitur kërkesa që janë të pakuptimta dhe nuk i ndihmojnë shëndetit të demokracisë në Kosovë.”

Ndërkohë, Lëvizja Vetëvendosje – fituese e zgjedhjeve – po insiston që kryetarja e Kuvendit të jetë Albulena Haxhiu, por pa arritur të sigurojë votat e nevojshme. Pavarësisht kësaj, Bislimi është i bindur se nuk është e nevojshme të krijohen aleanca të reja për të zgjidhur ngërçin.

“Tash Kuvendi është i 120 deputetëve dhe duhet të konstituohet nga 120 deputetë. Aty nuk ka nevojë për partnerë. Secili e ka pjesën e vet të përgjegjësisë. Të gjithë bashkë e konstituojmë Parlamentin,” deklaroi ai.

Ai tha se Vetëvendosje po e përmbush pjesën e saj në këtë proces, përmes propozimeve dhe pjesëmarrjes në votim.

“Ajo çka kërkohet nga kjo fazë është që subjekti ta bëjë nominimin dhe të votojë,” shtoi ai, duke theksuar se “ajo që duhet të bëjnë partitë tjera është që të marrin pjesë në votim dhe të ndihmojnë në konstituimin e Kuvendit.”

Bislimi po ashtu përmendi se LVV-ja ka bërë disa propozime për të tejkaluar situatën, përfshirë edhe ndryshimin e metodës së votimit, një çështje që aktualisht është duke u shqyrtuar nga Gjykata Kushtetuese.