Ushtarët serb ia vunë thikën në fyt – Arbnora Ademaj rrëfen tmerrin që përjetoi: “E kam kaluar ferrin”

Aktorja Arbnora Ademaj ka ndarë një rrëfim personale në emisionin ‘Canapé’ me Shpend Lipën.

Me emocione të forta, ajo kujtoi një moment të dhimbshëm nga e kaluara e saj, kur ishte vetëm një fëmijë gjatë luftës në Kosovë.

“Ushtarët serb më vunë thikën në fyt… E kam përjetuar ferrin,” tha ajo ndër të tjera.

Arbnora tregoi se përkundër moshës së re, ajo e kujton me detaje tmerrin e asaj dite.

Ajo tha se kjo ngjarje e ka ndjekur gjatë gjithë jetës dhe ka lënë gjurmë të thella në shpirtin e saj.

Ky rrëfim prekës tregon forcën dhe kurajon e Arbnorës për të ndarë një pjesë kaq personale të historisë së saj. Për më shumë, ndiqni intervistën në linkun në vazhdim.

Prania e shtuar e forcave serbe pranë kufirit me Kosovën, deklarohet Kurti

Kryeministri në detyrë Albin Kurti në mbledhjen e qeverisë ka folur dhe ushtrimin “Defender Europe 25”, i cili është duke u mbajtur dhe në Kosovë.

Kurti ka thënë se Forca e Sigurisë së Kosovës po merr pjesë me përafërsisht 1000 trupa në ushtrimet që po zhvillohen në Kosovë, Shqipëri, Kroaci dhe Maqedoni të Veriut.

“ Aktualisht në tri zona gjeografike në kontinentin e Evropës është duke u realizuar ushtrimi më i madh që Ushtria e ShBA-ve organizon dhe realizon në kontinentin e Evropës, “Defender Europe 25”, me pjesëmarrje të 25 mijë trupave nga 29 vende të NATO-s. Republika e Kosovës ka nderin dhe kënaqësinë të jetë në mesin e 18 vendeve nikoqire, dhe se Forca e Sigurisë së Kosovës po merr pjesë me përafërsisht 1000 trupa në ushtrimet që po zhvillohen në Kosovë, Shqipëri, Kroaci dhe Maqedoni të Veriut”, tha Kurti.

Ai tha se këtë radhë Republika e Kosovës është vend i përzgjedhur nga Ushtria e Shteteve të Bashkuara të Amerikës, ku është vendosur komanda e Divizionit 28 të këmbësorisë.  Ndërsa pohoi se institucionet  dhe ushtria jonë po dëshmojnë që janë të afta për të mikpritur dhe për të organizuar në territorin e saj ushtrime komplekse të cilat kërkojnë planifikim, organizim dhe mbështetje të nivelit shumë të lartë

“Nga baza e FSK-së në Aeroportin e Gjakovës, kjo komandë taktike amerikane po udhëheq me të gjitha brigadat në regjionin e Evropës Juglindore. Institucionet tona dhe ushtria jonë po dëshmojnë që janë të afta për të mikpritur dhe për të organizuar në territorin e saj ushtrime komplekse të cilat kërkojnë planifikim, organizim dhe mbështetje të nivelit shumë të lartë”, tha Kurti.

Ndërkaq tha se rritja e gatishmërisë dhe pranisë së forcave të armatosura të Serbisë pranë kufirit tonë, është reaksion ndaj Defender Europe 25.

“E rritja e gatishmërisë dhe pranisë në kufirin tonë e Forcave të Armatosura të Serbisë besojmë që është reaksion ndaj Defender Europe 25, por ajo çfarë nuk e dimë ende është se a po e bën këtë vetë Serbia apo një gjë të tillë ia ka kërkuar Rusia”, ka thënë Kurti./Indeksonline/

Kuvendi në ngërç, Bislimit s’i bëhet vonë – thotë se VV s’ka nevojë për partnerë

Zëvendëskryeministri në detyrë, Besnik Bislimi, ka deklaruar se situata politike në Kosovë nuk përbën krizë, pavarësisht bllokimit të vazhdueshëm të seancës konstituive të Kuvendit, e cila tashmë është ndërprerë 22 herë.

Sipas tij, problemi qëndron vetëm te mungesa e vullnetit për konstituimin e Kuvendit, për të cilin nuk nevojiten partnerë, por përfshirje dhe përgjegjësi nga të gjithë deputetët.

Në një intervistë për Deutsche Welle, zhvilluar në Aachen të Gjermanisë, Bislimi u pyet se me cilët partnerë do ta tejkalojnë këtë bllokadë. Ai u përgjigj: “Ne në fakt nuk kemi krizë qeveritare. Qeveria është në detyrë. Ajo po pret Qeverinë e re që do të jetë pak a shumë me përbërje të ngjashme me atë të vjetrën. Ajo ku për momentin kemi ngecur është te konstituimi i Parlamentit, për të cilin si duket ka interesim të disa subjekteve politike që ta bllokojnë, duke paraqitur kërkesa që janë të pakuptimta dhe nuk i ndihmojnë shëndetit të demokracisë në Kosovë.”

Ndërkohë, Lëvizja Vetëvendosje – fituese e zgjedhjeve – po insiston që kryetarja e Kuvendit të jetë Albulena Haxhiu, por pa arritur të sigurojë votat e nevojshme. Pavarësisht kësaj, Bislimi është i bindur se nuk është e nevojshme të krijohen aleanca të reja për të zgjidhur ngërçin.

“Tash Kuvendi është i 120 deputetëve dhe duhet të konstituohet nga 120 deputetë. Aty nuk ka nevojë për partnerë. Secili e ka pjesën e vet të përgjegjësisë. Të gjithë bashkë e konstituojmë Parlamentin,” deklaroi ai.

Ai tha se Vetëvendosje po e përmbush pjesën e saj në këtë proces, përmes propozimeve dhe pjesëmarrjes në votim.

“Ajo çka kërkohet nga kjo fazë është që subjekti ta bëjë nominimin dhe të votojë,” shtoi ai, duke theksuar se “ajo që duhet të bëjnë partitë tjera është që të marrin pjesë në votim dhe të ndihmojnë në konstituimin e Kuvendit.”

Bislimi po ashtu përmendi se LVV-ja ka bërë disa propozime për të tejkaluar situatën, përfshirë edhe ndryshimin e metodës së votimit, një çështje që aktualisht është duke u shqyrtuar nga Gjykata Kushtetuese.

Protesta e bizneseve, nuk tërhiqet Kurti: Koha e barrikadave ka kaluar

Kryeministri në detyrë, Albin Kurti, ka bërë të ditur se nuk do të tërhiqet nga vendimi i Zyrës së Rregullatorit të Energjisë (ZRRE) për treg të hapur të energjisë elektrike.

Kurti në mbledhjen e Qeverisë të enjten ka thënë se “koha e barrikadave në Kosovë ka kaluar”, duke aluduar në protestat që pritet t’i bëjnë bizneset që po e kundërshtojnë vendimin e ZRRE’së për hapjen e tregut të rrymës, shkruan Insajderi.

“Ajo çfarë Oda Ekonomike e Kosovës nuk po ju tregon është se plotësimi i kërkesës së tyre nuk e zgjidh problemin, por veçse e bart koston e energjisë së këtyre 1,200 ndërmarrje tek faturat e secilit prej jush, secilës familje dhe mbi 100 mijë bizneseve të tjera më të vogla që janë më pak të fuqishme e të zëshme sesa disa. Për të mbrojtur 1 për qind të ndërmarrjeve të fuqishme, në kurriz të 99 për qindëshit, ata duan që të bëjnë barrikada në hyrjet e Prishtinës. Koha e barrikadave në Kosovë ka kaluar, i kemi hequr ato kudo që kanë qenë dhe jemi zotuar se nuk do të lejojmë më të reja të vendosen. I bëjmë thirrje të gjitha odave dhe bizneseve të fillojnë menojnë në mënyrë të mençur për efiçencën dhe optimizimin e shfrytëzimit të energjisë”, ka deklaruar Kurti.

“Përderisa ne po flasim këtu, Oda Ekonomike që do të duhej të qëndrojë pranë bizneseve, po tenton të bllokojë rrugët magjistrale me një kërkesë të vetme: shtyrjen e zbatimit të liberalizimit të tregut. Shtyrjen e vendimit po e kërkojnë me justifikimin se për një vit do të përgatitemi, duke injoruar faktin se nga ana e tyre s’ka bërë asnjë përgatitje për tetë vitet e shkuara, përderisa është shtyrë nga viti në vit ky proces”, ka thënë më tej ai.

Shefi i qeverisë në detyrë ka thënë se shtetet e rajonit veçse e kanë kapërcyer këtë vendim, teksa sipas tij, në Kosovë është vonuar së zbatuari për më shumë se tetë vite.

Bizneset sot kanë paralajmëruar se do të bllokojnë të gjitha hyrjet e Prishtinës nga ora 10:00 deri në orën 12:00. Ndërkaq, në rast të mos-plotësimit të kërkesave të tyre, ata kanë paralajmëruar se do ta bllokojnë kryeqytetin tërë ditën.

E rëndë: Ky është i riu që dyshohet që kreu vetëvřasje në Prishtinë

Sinjali ka siguruar identitetin e të riut që dyshohet se i dha fund jetës së tij sot në mëngjes në lagjen Ulpiana në Prishtinë. Viktima, i cili jetonte në një banesë me qira, u gjet pa shenja jete pranë “Fontanës”, me plagë të dukshme në trup.

Sinjali mëson se bëhet fjalë për Gentrint Mushinca.

Burime nga vendi i ngjarjes bëjnë të ditur se në lokacion kanë dalë njësitë e nevojshme policore, përfshirë hetuesit e SP-Jugu, hetimet rajonale, si dhe forenzika. Zjarrfikësit kanë asistuar në hapjen e derës së banesës me forcë për të mundësuar ekzaminimin e plotë të vendit ku dyshohet se ka qëndruar viktima para ngjarjes tragjike.

IML ka bërë tërheqjen e trupit për procedura të mëtejme, ndërsa me urdhër të prokurorit kujdestar, rasti është iniciuar si “Hetim mbi vdekjen”.

Sinjali do të ju mbajë të informuar me të gjitha zhvillimet e reja rreth këtij rasti.

Sot mblidhet Qeveria në detyrë

Vetëm dy orë para se të nis seanca e 23-të për konstituimin e Kuvendit të Kosovës, Qeveria në detyrë e Kosovës ka paralajmëruar mbledhje.

Në një njoftim nga ZKM, thuhet se Qeveria në detyrë e Kosovës do të mbajë sot mbledhje pa dhënë detaje tjera, por mbledhja do të mbahet nga ora 09:00.

Nuk dihen pikat e rendit të ditës.

Gjendet një i vdekur në Prishtinë, këto janë dyshimet e para

Një ngjarje e rëndë është raportuar në orët e para të mëngjesit të sotëm në lagjen Ulpiana të Prishtinës, ku një person është gjetur i shtrirë në tokë dhe i gjakosur, pranë vendit të njohur si “Fontana”, mëson Sinjali.

Sipas informacioneve fillestare, rreth orës 06:15 të datës 29 maj 2025, është raportuar për një trup të dyshimtë në tokë. Në vendin e ngjarjes është dërguar njësia policore, e cila ka konfirmuar se personi ishte pa shenja jete dhe me gjurmë gjaku, duke ngritur dyshime të forta për vetëvrasje.

Menjëherë në vendin e ngjarjes ka arritur edhe ekipi mjekësor nga Urgjenca, i cili ka konstatuar vdekjen e personit. Gjithashtu janë njoftuar hetuesi kujdestar, krimtekniku dhe njësitë tjera të nevojshme, të cilët kanë marrë në dorë rastin për hetim të mëtejshëm.

Identiteti i viktimës dhe rrethanat e sakta të vdekjes ende nuk janë konfirmuar zyrtarisht, ndërsa hetimet janë në fazën fillestare.

Mos harroni çadrën: Ja çfarë moti na pret sot

Sot parashikohet depërtimi i masave të ftohta dhe të lagështa, me ç’rast pritet të mbajë mot kryesisht i vranët dhe kohë pas kohe me reshje shiu, të cilat lokalisht pritet të jenë në formë të rrebesheve, të shoqëruara me disa shkarkesa rrufesh.

Era do të fryjë nga veriu, e cila herë pas here pritet të jetë e fuqishme, me shpejtësi prej 10-45 km/h, raporton MeteoKosova, transmeton Gazeta Sinjali.

Temperaturat do të pësojnë ulje, me minimale që do të lëvizin prej 8 deri në 11°C, ndërsa ato maksimale prej 15 deri në 18°C. Orëve të pasditës temperaturat pritet të ulen nën 15°C.

Këto janë rrugët që do të bllokohen pas pak në Prishtinë – shkak protesta e bizneseve

Bizneset e Kosovës do të protestojë sot kundër vendimit të ZRrE-së si shkak i mos-shtyerjes së vendimit për liberalizimin e tregut të energjisë, vendim ky që hyn në fuqi pas tri ditësh.

Për shkak të kësaj proteste do të bllokohen hyrjet kryesore në kryeqytet.

Protesta do të fillojë nga ora 10:00 dhe do të vazhdojë deri në ora 12:00.

OEK shton se do të përdoren mjete për bllokim, do të jenë automjetet e kompanive të prekura nga vendimi i ZRRE-së, që sipas OEK-ut me qëllim të sigurohet një prani e dukshme dhe të theksohet ndikimi që ka ky vendim në sektorin privat.

Lokacionet e bllokimit i keni më poshtë:

Hyrja nga Veterniku – Hyrja nga Gjilani – bllokohet hyrja nga Albi Mall e poshtë Veternikut – Kështu bllokohen të gjitha hyrjet (Ferizaj, Gjilan, Aeroport)

Hyrja nga Fushë Kosova – Hyrja nga Mitrovica – do të bllokohet hyrja prej rrethit të Madh te Lakrishtja (Dukagjini toëer) – Kështu bllokohen të gjitha hyrjet nga Mitrovica dhe Fushë-Kosova

Hyrja nga Podujeva – Hyrja në lagjen e Vranjevcit – te ish-Humanisti – Udhëkryqi te banka Raiffeisen – bllokohen hyrje-daljet nga Podujeva, por edhe lëvizjet nga Dragodani në drejtim të Shkabaj/Orlloviq.

Tahiri: Më e keqe se bllokada do të ishte formimi i qeverisë nga Kurti

Deputeti i PDK-së, Abelard Tahiri, ka thënë se më e keqe se bllokada e Kuvendit të Kosovës është nëse kreu i VV-së, Albin Kurti, do ta formonte qeverinë.

Sipas Tahirit, prodhuesit e Kosovës, me Kurtin kryeministër do ta shihnin tmerrin e vërtetë dhe sipas tij, atëherë Kosova do të hynte në fazë të rrezikshme.

“Mendoj që këta prodhues atëherë kanë me pa tmerrin e vërtetë, atëherë Kosova ka me hy në një fazë shumë të rrezikshme, shumë të dëmshme që mendoj se ka me u zvogëlu edhe më shumë në numrin e popullsisë, ka me u zvogëlu edhe në biznese, dhe ju e shihni ata që e mbajnë ekonominë e vendit”, tha Tahiri në RTV21.

Nesër do të jetë seanca e 23-të që Lëvizja Vetëvendosje do të provojë që për kryetare të kuvendit të votohet Albulena Haxhiu.