Mefail Shkodra, i dyshuar për vrasjen e dy personave sot në mesditë në Gjilan, është shpallur në kërkim nga Policia.
Policia e Gjilanit po kërkon ndihmën e qytetarëve për kapjen e tij, duke publikuar fotografinë e të dyshuarit me autorizim të Prokurorisë.
“Policia e Kosovës, Drejtoria Rajonale e Policisë në Gjilan, bazuar në autorizimin e Prokurorisë Themelore në Gjilan, me qëllim të lokalizimit dhe arrestimit të të dyshuarit, lëshon këtë kërkesë për bashkëpunim me qytetarët dhe mediat”, thuhet në njoftim.
“Policia e Kosovës, Drejtoria Rajonale Gjilan, kërkon nga qytetarët dhe mediat që kushdo që ka informacion për vendndodhjen e personit në foton e bashkangjitur, të lajmërojë Policinë e Kosovës në stacionin më të afërt policor apo përmes aplikacionit digjital ‘Lajmëro Policinë’, në E-mail: info@kosovopolice.com dhe në numrat kujdestarë: 192; 03850807001. Të dhënat tuaja do të ruhen në konfidencialitet të plotë.”
Dy persona u vranë në rrugën “Ibrahim Rugova” në Gjilan, ndërsa dy të tjerë mbetën të plagosur dhe po trajtohen në emergjencë. Gjendja e tyre ende nuk është bërë e ditur.
