Aksion i madh nga Njësia Speciale, arrestohen 5 persona

Drejtoria për Hetimin e Krimeve të Organizuar dhe Korrupsionit (DHKOKR), në koordinim me Prokurorinë, ka realizuar dje (16.09.2025) një aksion në Shtime, Lipjan dhe Drenas, ku janë bastisur pronat e pesë personave të dyshuar, meshkuj kosovarë.

Gjatë bastisjeve, policia ka gjetur dhe sekuestruar: një armë automatike AK-47, pushkë e gjatë me dylbi, një pushkë gjuetie, një revole, 116 fishekë, tetë fishekë me gaz, dy pushkë ajrore dhe pesë telefona.

Pesë personat e dyshuar janë arrestuar dhe me vendim të prokurorit, janë dërguar në mbajtje.

Policia e Kosovës njofton se veprimet hetimore do të vazhdojnë në koordinim me organet e drejtësisë.

Ky është 49-vjeçari që humbi jetën në aksidentin tragjik

Gazeta Sinjali raporton se një aksident i rëndë trafiku ka ndodhur mëngjesin e djeshëm në fshatin Makoc të Prishtinës, ku ka humbur jetën shoferi i një automjeti dhe janë lënduar tre persona të tjerë.

Viktima është identifikuar si Mehdi Krasniqi, rreth 49-vjeçar, i cili po drejtonte një automjet të tipit Opel Corsa, që për shkaqe ende të panjohura ka kaluar në korsinë e kundërt dhe është përplasur me një Range Rover pa targa.

Nga përplasja janë lënduar: L.H., rreth 35-vjeçare, L.H., rreth 8-vjeçar dhe D.H., rreth 4-vjeçar.

Siç mëson Sinjali, rreth orës 14:00, në Emergjencën e QKUK-së është konstatuar se Mehdi Krasniqi ka ndërruar jetë si pasojë e plagëve të marra.

Me urdhër të Prokurorit kujdestar, trupi i pajetë i viktimës është dërguar për obduksion në IML.

Bashkëpunimi i Haradinajt me CIA-n, Shala: Ka informata për bashkëpunimin e Kurtit me Serbinë

Analisti Azdren Shala ka thënë se Ramush Haradinaj mund të ketë informacion që Albin Kurti punon me Serbinë si rrjedhojë e raporteve të këtij të parit me CIA-n.

“Kjo ndërprerja ose pezullimi ose suspendimi qysh doni me i thanë, i dialogut strategjik, lidhet me një element. Mes tjerash që foli dje James Rubini, tha Ramushi ka qenë [në raporte] me CIA-n”, ka thënë Shala në Rubikon të Klan Kosovës.

“Na Ramushin e shohim duke na tregue, duke na porositë, duke na paralajmëru që Albin Kurti punon për Serbi. Atë që unë e kam analizë edhe analiza ime më  çon te konstatimi i Ramushit, mendoj që ai ka fakte. Ai e ka edhe informacionin”.

“Pse hala s’del me na kallëzu, këtu ia shoh fort për të madhe z. Haradinajt. Është mirë me kallëzu fakte se besoj që ai e din”.

Bosch: Gjykata në Hagë po i shërben Serbisë, jo drejtësisë

Ish ambasadori i Holandës në Kosovë, Robert Bosch foli mbi procesin gjyqësor të mbajtur në Hagë ndaj ish-presidentit të Kosovës, Hashim Thaçi.

Bosch, i cili mbajti një fjalim në protestën e së dielës në Hagë në mbështetje të Thaçit, theksoi se ngritja e kësaj gjykate është perceptuar jo si një përpjekje e sinqertë për drejtësi.

“Unë kam qenë i përfshirë që në 2010-tën, dhe gjatë luftës kemi bërë gjithçka më ndërkombëtarët për të sjellë paqe, kemi pasur negociata në Kosovë edhe kur u bënë zgjedhjet në Serbi dhe jemi përpjekur të zgjedhim rrugën e duhur. Tashmë e dimë që Vuçiç nuk është miku ynë në Europë por i Rusisë dhe Kinës”, tha Bosch, në Euronews Albania.

Sipas tij, Kosova vazhdon të mbajë barrën e përgjegjësisë për marrëveshjen me Serbinë, dhe theksoi se shumë individë përgjegjës për krimet e viteve ’90 sot mbajnë pozita të rëndësishme në Serbi.

“Kosova këtu fajësohet gjithmonë sa i takon marrëveshjes me Serbinë. E gjithë kjo gjykatë ishte pjesë e kësaj marrëveshje, ne krijuam de facto për serbët. Në një raport që nuk besoj se e ka lexuar njeri, ka një pikë të rëndësishme sa i takon krimeve të kryera nga Thaçi supozohet, shkruhet që të gjitha krimet janë kryer nga serbët dhe asnjë serb nuk akuzohet nga kjo gjykatë.

Ka shumë fajtor që mbajnë pozicione të mira ndërkohë që kanë qenë kriminelët kryesorë në vitet 90’. Nuk është një gjykatë objektive por është një gjykatë për ti shërbyer Serbisë”, shtoi ish-ambasadori i Hollandës në Kosovë, Robert Bosch.

E turpshme: Bulliqi kërkon nga Hyseni në studio televizive që ta dëshmojë me foto se e ka vëllain invalid lufte

Kandidati për kryetar të Podujevës nga radhët e Lëvizjes Vetëvendosje, Shpejtim Bulliqi, ka bërë një veprim të turpshëm përgjatë përballjes me Ekrem Hysenin, kandidatin e LDK’së për kryetar në Podujevë.

Bulliqi përgjatë debatimit në studion televizive të RTV 21 të ka kërkuar që t’ia dëshmojë se vëllai i Hysenit është invalid lufte përmes një fotografie, shkruan Insajderi.

Pjesë nga debati:

Ekrem Hyseni: Vëllai im është invalid dhe mashtrimi yt…

Shpejtim Bulliqi: Po çfarë invalidi bre? Ku ka qenë bre invalid?

Ekrem Hyseni: Si ka bre mundësi?

Shpejtim Bulliqi: Ku invalid, çfarë invalidi?

Ekrem Hyseni: Ti je i paftyrë more burrë…

Shpejtim Bulliqi: Invalid në Koliç a? Po leje more këtëfar muhabeti.

Ekrem Hyseni: Është invalid i luftës, është i plagosur si 14-vjeçar.

Shpejtim Bulliqi: Këtë e dëshmon me një fotografi…

E rëndë: Rrokulliset me traktor, vdes 45-vjeçari

Një ngjarje tragjike ka ndodhur ditën e djeshme në Carralevë të Shtimës, ku si pasojë e rrokullisjes me traktor, një 45-vjeçar ka humbur jetën.

Rastin për Sinjalin e ka konfirmuar zëdhënësi i Policisë për rajonin e Ferizajt, Kanun Veseli.

“Ju njoftojmë se më datën 16.09.2025, rreth orës 09:00, Policia në Shtime ka pranuar një informatë për një incident të ndodhur në lagjen ‘Kastrati’ të fshatit Carralevë. Është raportuar për rrokullisjen e një traktori, ku si pasojë ka humbur jetën një person i moshës 45 vjeç. Vdekja e tij është konstatuar nga ekipi mjekësor i Qendrës së Mjekësisë Familjare në Shtime. Njësitë policore menjëherë kanë dalë në vendngjarje dhe kanë nisur hetimet për të sqaruar rrethanat e rastit. Për të gjitha veprimet policore është njoftuar prokurori i shtetit, i cili ka urdhëruar që trupi i pajetë të dërgohet në Institutin e Mjekësisë Ligjore në Prishtinë për obduksion”, tha Veseli.

Sabri Fejzullahu feston ditëlindjen, urimi më i ëmbël vije nga bashkëshortja

Legjenda e muzikës shqipe, Sabri Fejzullahu, ditën e sotme feston ditëlindjen.

Ai mbush plotë 78 vjet jete, shkruan “Kosovarja”.

Nuk ka munguar as urimi nga bashkëshortja, Nera e cila kishte zgjedhur fjalët më të ngrohta “Lal, gëzuar ditëlindjen dashuria ime, ti je forca, drita dhe gëzimi im. Çdo vit pranë teje është dhuratë e shtrenjtë, dhe sot falë jetën qe më dhe ty. Uroj shëndet, qetësi dhe ditë të mbushura me dashuri. Të dua me shumë se fjalët mund ta thonë”.

Fejzullahu i takon gjeneratës së vjetër të këngëtarëve i cili ka arritur që edhe në kohën e re të zë vendin e vet në muzikën argëtuese të Kosovës, por edhe më gjerë.

“Pis, laper, idiot”, përplasje e ashpër, Panduri ndërpret emisionin

“Pis, laper”, përplasje e ashpër, Panduri ndërpret emisionin

VIDEO:

Gjyqi ndaj Thaçit, reagon edhe reperi Noizy

Reperi Noizy përmes një postimi në rrjetin social ”Instagram”, ka shprehur mbështetjen e tij për ish-krerët e UÇK-së në Hagë.

Ai ka ripostuar videon të cilën e ka ndarë Kryeministri i Shqipërisë, Edi Rama, shkruan IndeksOnline.

Në atë video shihet dëshmitar James Rubin, duke dëshmuar me shqetësim se pavarësisht që është vetëm i akuzuar dhe vetofroi të paraqitej në gjykatë, ish-presidenti Hashim Thaçi po mbahet i burgosur për pesë vite për shkak të ndërhyrjes së politikës në sundim të ligjit.

Duket se edhe Noizy ka mendimin e njejtë me kryeministrin Rama, i cili ka thënë se ky procesë gjyqësor është shtangës dhe ka njollosur drejtësisë ndërkombëtare.

Burri i Albulena Haxhiut vazhdon me cinizëm pas dëshmisë së Rubin: Ka pasur apo nuk ka pasur Shtab të Përgjithshëm të UÇK?

Alban Krasniqi, bashkëshorti i Albulena Haxhiut, i cili është edhe anëtar nga radhët e LVV-së në KQZ, ka vazhduar me shkrimet e tij cinike pas përmbylljes së ditës së dytë të dëshmisë së James Rubin, ish-ndihmëssekretarit të Departamentit amerikan të Shtetit në rastin e ish-krerëve të UÇK’së në Hagë.

Krasniqi me anë të një shkrimi në ‘Facebook’ ka thënë se ka një pyetjet për bashkëluftëtarët dhe OVL-UÇK’në, shkruan Insajderi.

“Një pyetje për bashkëluftëtarët por edhe për OVL të UÇK-së Ka pasur apo nuk ka pasur SHTAB TË PËRGJITHSHËM TË UÇK-së?“, thotë Krasniqi.

Krasniqi u lajmërua edhe dje, duke thënë se bazuar në dëshminë e Rubin, rezulton se kreu i UÇK’së ishte Agim Çeku e jo Hashim Thaçi.

“James Rubin, duke treguar përvojën e tij, dëshmoi që lufta e UÇK-së ishte e drejtë, por shpërfaqi edhe disa të vërteta ndryshe nga ato që i janë servirur publikut për 25 vite: 1. Hashim Thaçi tash po del që nuk paska qenë komandant apo udhëheqës i UÇK-së, por Agim Ceku. Andaj, të ia njohim këtë rol dhe vlerë general Çekut, të cilën ia kanë mohuar në luftë edhe pas luftës. 2. Delegacioni ynë në Rambuje, në krye me Thaçin, paskan qenë të gatshëm të pranojnë një marrëveshje ku nuk përmendet pavarësia, por që fatmirësisht ka pasur presion nga komandantët dhe luftëtarët e UÇK-së në terren për të mos pranuar një zgjidhje që nuk e përmban brenda dokumentit pavarësinë në perspektivë. 3. Është pranuar marrja e përgjegjësisë për çfardo krimi që mund të bëhet pas përfundimit të luftës në emër të saj”, shkroi dje Krasniqi në Facebook.