18-vjeçari nga Podujeva që vdiq tragjikisht në Gjermani ishte futbollist

Sot, Gazeta Imazhi raportoi me dhimbje për ndarjen nga jeta të mërgimtarit dhe ish-futbollistit të ri, Ardian Osmani, vetëm 18 vjeç. Lajmi ka tronditur jo vetëm familjen dhe të afërmit, por edhe gjithë komunitetin sportiv që e ka njohur dhe vlerësuar për përkushtimin dhe sjelljen shembullore në fushën e blertë.

Ardiani ishte futbollist i klubit shqiptar FC Kosova Munchen, ku luante si mbrojtës i krahut të djathtë dhe ishte pjesë e skuadrës së juniorëve për dy sezone, duke treguar aftësi të larta teknike dhe një karakter të fortë sportiv.

Në një telegram ngushëllimi, klubi ku Ardiani kishte luajtur i shprehu respektin dhe dhimbjen për humbjen e një djaloshi të talentuar:

“Ardiani do të kujtohet gjithmonë për sjelljet shembullore, pasionin, përkushtimin dhe shpirtin e tij sportiv.”

– thuhet ndër të tjera në telegramin e shpërndarë nga kryesia e klubit.

Gazeta Imazhi shpreh ngushëllimet më të sinqerta familjes Osmani dhe gjithë atyre që ndihen të prekur nga kjo humbje.

Vdes profesori i njohur universitar

Dje, me 13 qershor ka vdekur Fikret Ahmedit (1943 – 2025), profesori i Fakultetit të Ndërtimtarisë dhe Arkitekturës të Universitetit të Prishtinës.

Egli merr vendimin e papritur

Fillimi i javës nisi me lajme për shkëputje të bashkëpunimit artistik mes Egli Takos dhe Fifit.

Ishte Egli që e konfirmoi një gjë të tillë përmes një reagimi shumë të matur ku fjalët u vërejt qartë që i pati të zgjedhura me kujdes.

Ajo ka vendosur t’i besojë rrugëtimin një tjetër shtëpie mediatike

Se për ku bëhet fjalë e kuptoni në materialin më poshtë! /Prive By Liberta Spahiu

Humb jetën ish-referenti i Gjykatës, dyshohet se u godit nga rryma elektrike

Një ngjarje tragjike ka goditur sot familjen Kasapi në Pejë. Shani Kasapi, ish-referent në Gjykatën Themelore të Pejës, ka ndërruar jetë në rrethana të rënda, ku dyshohet se është goditur nga rryma elektrike, para pak kohe.

Burimet e Gazetës Sinjali bëjnë të ditur se ngjarja ka ndodhur në shtëpinë e tij në Pejë, ku fillimisht është gjetur pa shenja jete, ndërsa ekipet e emergjencës kanë konfirmuar vdekjen e tij në vendin e ngjarjes.

Policia dhe njësitë relevante kanë dalë menjëherë për ta ekzaminuar rastin, ndërsa është njoftuar edhe prokurori i shtetit. Vdekja e tij po konsiderohet aksidentale, megjithëse hetimet janë ende në zhvillim për të sqaruar plotësisht rrethanat.

Gazeta Imazhi i shpreh ngushëllimet më të sinqerta familjes Kasapi.

Qeveria e Kosovës: Irani të ndalojë veprimet hibride, zgjidhja diplomatike është rruga e duhur

Qeveria e Kosovës ka thënë se Irani duhet të ndalojë veprimet hibride që cenojnë stabilitetin rajonal dhe se rruga diplomatike është e duhura për ta zgjidhur konfliktin, pas përshkallëzimit të situatës me Izraelin.

Që nga e premtja, Izraeli dhe Irani kanë intensifikuar sulmet ndaj njëri-tjetrit. Izraeli nisi sulmet duke synuar objektet bërthamore dhe ushtarake të Iranit, e më pas erdhi kundërpërgjigja nga Teherani.

“Republika e Kosovës po e përcjell me shqetësim situatën e tensionuar mes Izraelit dhe Iranit dhe u bën thirrje të gjitha palëve të përfshira që të përmbahen, me qëllim të shmangies së përshkallëzimit të mëtejshëm të krizës së sigurisë në rajon”, thuhet në reagimin e Zyrës së Kryeministrit.

Duke iu referuar të dhënave të fundit të Agjencisë Ndërkombëtare për Energji Atomike (IAEA), ku theksohet se Irani nuk po i përmbush detyrimet e tij për mospërhapjen bërthamore, Qeveria e Kosovës ka thënë se Teherani duhet të ndalë veprimet hibride që cenojnë stabilitetin rajonal dhe më gjerë dhe “t’i përmbahet detyrimeve të IAEA”.

“Zgjidhja diplomatike është rruga e duhur për adresimin e çështjeve të sigurisë, ndaljen e dhunës dhe parandalimin e pasojave më të gjera rajonale e globale”, thuhet më tej në deklaratë.

Qeveria u bën thirrje qytetarëve të Kosovës, veçanërisht atyre që ndodhen në rajon apo kanë kontakte atje, që të tregojnë kujdes të shtuar dhe të ndjekin me përpikëri udhëzimet e Ministrisë së Punëve të Jashtme dhe Diasporës, si dhe të autoriteteve lokale.

Në përfundim, Qeveria ka thënë se riafirmon përkushtimin e saj ndaj vlerave të paqes, demokracisë dhe sigurisë ndërkombëtare, duke shprehur solidaritet me të gjithë qytetarët e prekur nga konflikti aktual.

Kurti harron që e ka kundërshtar politik, impresionohet me punën e kryetarit të kësaj komune

Kryetari i Lëvizjes Vetëvendosje, Albin Kurti, sot shkoi në Klinë për të marrë pjesë në një mbledhje të degës së Vetëvendosjes atje ku u nominua Ramiz Rrusta kandidat për kryetar për komunën e Klinës.

Gjatë vizitës në Klinë, Kurti përshkoi edhe sheshin e qytetit për të cilin u impresionua.

“Shumë është i mirë qeky shesh, shumë më pëlqen”, tha Kurti atje.

Kosova ndalon katër pjesëtarë të MPB-së serbe, Beogradi reagon me akuza për hakmarrje politike

Zyra për Kosovën në Qeverinë e Serbisë tha se autoritetet kosovare i kanë ndaluar të shtunën tre pjesëtarë të Ministrisë së Punëve të Brendshme të Serbisë (MPB) dhe një oficer të pensionuar në pikat kufitare, një javë pasi Serbia e arrestoi një ish-polic të Kosovës

Ajo tha se autoritetet kosovare nuk kanë pasur “asnjë arsye ligjore” për arrestimin e tyre dhe se kjo “është hakmarrje e nxitur politikisht kundër popullit serb”, shkruan Radio Evropa e Lirë.

Në të njëjtën ditë, ministri i Brendshëm në detyrë i Kosovës, Xhelal Sveçla, tha se e ka privuar nga shtetësia një shtetas të Kosovës nga komuniteti serb, për “cenim të sigurisë kombëtare” të vendit.

Sveçla nuk tregoi nëse Nikolla Vujoviq pjesëtar i policisë serbe, është arrestuar dhe nuk dha hollësi të tjera rreth tij.

Në njoftimin e Zyrës për Kosovën përmenden vetëm inicialet e të ndaluarve nga MUP-i serb: N.V., (26 vjeç), M.M., (28), dhe A.M., (36), si dhe M.S., (53), i cili është polic në pension.

Autoritetet kosovare nuk kanë komentuar deri tani rreth këtyre ndalimeve të raportuara.

Për të ndaluarin me inicialet N.V., Zyra serbe tha se autoritetet e Kosovës kanë marrë vendim për “dëbim të kundërligjshëm”.

“Të gjithë ata, së bashku me familjet, jetojnë prej vitesh në mënyrë paqësore në ‘Kosovë dhe Metohi’ dhe detyrat i kryejnë në drejtoritë policore në territorin e Serbisë qendrore. Aktualisht ndodhen në paraburgim”, thuhet në deklaratën e Zyrës serbe.

Ajo shtoi se për “privimin e kundërligjshëm nga liria” do t’i njoftojë përmes kanaleve diplomatike të gjithë përfaqësuesit ndërkombëtarë, si dhe të dërguarin e BE-së për dialogun Kosovë-Serbi, Peter Sorensen.

Ndërkohë, ish-pjesëtari i Njësisë Speciale të Policisë së Kosovës, Arbnor Spahiu, u arrestua nga autoritetet serbe më 7 qershor në pikën kufitare ndërmjet Hungarisë dhe Serbisë, derisa po kthehej nga Austria në Kosovë me autobus së bashku me familjen e tij.

Distria Krasniqi prek finalen e Botërorit

Distria Krasniqi ka kaluar në finale të Kampionatit Botëror në Budapest të Hungarisë

Ajo në gjysmëfinale mposhti spanjollen Ariane Toro Soler.

Në finale Disi takohet me garuesen Uta Abe nga Japonia.

Foshnja tre-muajshe nxirret e gjallë nga rrënojat pas sulmit iranian në Izrael

Një foshnjë tre-muajshe ishte midis atyre që u shpëtuan nga rrënojat pasi sulmet hakmarrëse të raketave iraniane goditën shtëpitë në Izraelin qendror.

Të paktën tre persona u vranë dhe 20 u plagosën kur Rishon LeZion, një periferi e Tel-Avivit, u godit nga një breshëri raketash herët në mëngjes, raporton “Telegraph”, transmeton Klankosova.tv.

Një oficer policie u pa duke e mbajtur foshnjën, e cila shërbimet e emergjencës thanë se ishte plagosur lehtë.

“E tërhoqa në krahët e mi dhe pastaj ia dhashë oficerit të parë të policisë që pashë, dhe pastaj fillova të nxirrja të gjithë anëtarët e tjerë të familjes”, tha Idan Chen, kapiteni i shërbimit të zjarrfikësve dhe shpëtimit.

“Ndërsa po e bënim këtë, kishte njerëz të bllokuar në shtëpinë sipër dhe pranë – dhe përballë kishte një zjarr”, i tha ai agjencisë izraelite të lajmeve “Walla”.

E konfirmon Policia: Vujoviqi, pjesëtar i inteligjencë serbe do të largohet me forcë nga Kosova

Policia e Kosovës ka njoftuar se, pas vendimit të Ministrisë së Punëve të Brendshme për heqjen e shtetësisë së Kosovës ndaj personit N.V., janë iniciuar procedurat për largimin e tij me forcë nga territori i Republikës së Kosovës.

Sipas njoftimit zyrtar, N.V. ishte njëkohësisht shtetas i Serbisë dhe pjesëtar i inteligjencës policore serbe. Drejtoria për Migrim dhe të Huaj ka lëshuar vendimin për largim me forcë, bazuar në legjislacionin përkatës.

Derisa të përmbushen kushtet për ekzekutimin e vendimit, ndaj personit në fjalë është shqiptuar masa e ndalimit në Qendrën e Mbajtjes për të Huaj.

Policia e Kosovës ka theksuar se do të vazhdojë të përmbushë detyrat e saj kushtetuese dhe ligjore, duke zbatuar vendimet e institucioneve shtetërore.