A je përfitues nga subvencionimi i rrymës? – Ja tabela e të hyrave që e sqaron këtë

Subvencionimi i faturave të energjisë elektrike për familjet e cenueshme përcaktohet sipas të ardhurave mesatare mujore për anëtar të familjes.

Sipas Ministrisë së Financave, për të përfituar nga ky program familjet duhet të kenë më pak se 150 euro të ardhura mujore për anëtar, raporton Podujeva Sot.

Varësisht nga numri i anëtarëve dhe të hyrave, këtu mund ta shihni nëse i plotësoni kushtet për të përfituar nga subvencionimi i rrymës apo jo:

• 1 anëtar – më pak se 150 euro
• 2 anëtarë – më pak se 300 euro
• 3 anëtarë – më pak se 450 euro
• 4 anëtarë – më pak se 600 euro
• 5 anëtarë – më pak se 750 euro
• 6 anëtarë – më pak se 900 euro
• 7 anëtarë – më pak se 1,050 euro
• 8 anëtarë – më pak se 1,200 euro
• 9 anëtarë – më pak se 1,350 euro
• 10 anëtarë – më pak se 1,500 euro

Shuma e subvencionit mund të ndryshojë në varësi të numrit të anëtarëve dhe nivelit të të ardhurave, raporton Podujeva Sot.

Këtu mund të aplikoni për subvencionim të rrymës

Qytetarët e Kosovës mund të aplikojnë nga sot për të përfituar nga Programi për Mbrojtjen e Konsumatorëve të Cenueshëm të Energjisë Elektrike për periudhën 2025–2026.

Sipas njoftimit zyrtar, familjet që kanë aplikuar vitin e kaluar nuk kanë nevojë të riaplikojnë, pasi të dhënat e tyre janë bartur automatikisht për vitin e ri, raporton Telegrafi.

Aplikimi bëhet përmes platformës eKosova, në seksionin Shërbimet – Grante dhe Subvencione, në këtë link: https://ekosova.rks-gov.net/562.

Hapet aplikimi për subvencionim të energjisë

Ministria e Financave ka njoftuar se është hapur aplikimi në Programin për Mbrojtjen e Konsumatorëve të Cenueshëm të Energjisë Elektrike 2025 – 2026. Kjo ministri thotë se nga sot, qytetarët mund të aplikojnë për subvencionim të energjisë përmes platformës eKosova.

Kanë bërë të ditur se familjet që kanë aplikuar vitin e kaluar nuk kanë nevojë të riaplikojnë, pasi thonë se të dhënat e tyre janë bartur automatikisht për vitin 2025.

“Megjithatë, nëse keni ndryshuar ndonjë informacion, si numri i anëtarëve të familjes, vendbanimi apo njehsori elektrik, ato mund t’i përditësoni lehtësisht në të njëjtin formular, duke bërë ndryshimet dhe më pas duke klikuar “Apliko”, thuhet në sqarimet që i ka bërë kjo ministri sa i përket këtij aplikimi.

Ministria e Financave thotë se ky program synon të mbështesë familjet më të cenueshme gjatë stinës së dimrit për të lehtësuar përballjen me shpenzimet e energjisë elektrike.

MF-ja i ka bërë të ditura kriteret për qytetarët që duan të jenë përfitues të këtij programi.

“Kriteret kryesore të përfitimit: Shtetas të Republikës së Kosovës, të ardhura deri në 150 € për anëtar, pasuri të paluajtshme deri në 100,000 €”, thotë MF-ja.

Kanë bërë të ditur se subvencioni realizohet sipas formulës së përllogaritjes e cila është e bazuar në të ardhurat mesatare të familjes dhe lartësisë faturës së energjisë elektrike për muajin përkatës.

“Aplikimi mbetet i hapur për 6 muaj, por ftojmë të gjithë aplikuesit e rinj dhe ata të vitit të kaluar që kanë ndryshime në të dhënat e tyre që të aplikojnë në muajin tetor pasi pagesat në mënyrë retroaktive nuk do të realizohen”, thuhet në njoftimin që ka shpërndarë Ministria e Financave lidhur me hapjen e aplikimit për Programin për Mbrojtjen e Konsumatorëve të Cenueshëm të Energjisë Elektrike 2025 – 2026 .

“Deri në 4 të mëngjesit në Shipol e Zhabar”, Baton Haxhiu pohon se Kurti frikësoi votuesit e Mitrovicës së Jugut

Analisti Baton Haxhiu në një opinion editorial në kundërpërgjigje ndaj Albin Kurtit ka thënë se ky i fundit ka qëndruar në Shipol e Zhabar të Mitrovicës së Jugut për t’i frikësuar votuesit.

“Në fakt, vetë Kryeministri, me shpurën e tij, kishte qëndruar deri në katër të mëngjesit në Zhabar e Shipol, për t’i bindur banorët nën trysni e frikë, me atë mënyrën tipike të pushtetit që përzien ndikimin me përuljen. Aty nuk mund të matej bindja e lirë, por presioni, dhe aty humbi jo Exit Poll-i ynë, por vota e lirë”, thuhet ndër të tjera në opinionin e Haxhiut.

“Kështu, Kryeministri mori një shkarje në rezultatin përfundimtar të Exit Poll-it dhe e shndërroi në fitore morale. Ai bëri pikërisht atë që bën çdo pushtet kur ndjen krizë: shpik armik për të treguar se ende ka betejë. Ai gjeti fajtorin më të lehtë, sondazhin, median, numrat, sepse nuk mund t’i gjejë dot përgjigjen vetes pse njerëzit s’e besojnë më me të njëjtin entuziazëm”, vijon shkrimi i tij.

 

 

Haxhiu ndër të tjera ka vlerësuar se gabimi i Exit Poll-it ishte njerëzor, por që më vonë u kthye nga Kurti në “armë politike”.

“Por ajo që ndodhi më pas, ishte shumë më e madhe se vetë gabimi. Kryeministri i Kosovës e ktheu një pasaktësi statistikore në armë politike, në mënyrën më tipike të pushtetit që frikësohet nga matja reale e opinionit. Ai foli për komplot, për organizim, për gabim të qëllimshëm, sikur qytetari në Mitrovicë të kishte hyrë në një skemë të madhe mashtrimi për t’i fshehur fitoren. Në fakt, ai vetë e kishte ndërtuar klimën ku matja nuk mund të dilte ndryshe”.

Fatmir Shehollit i rëndohet gjendja shëndetësore, dërgohet në QKUK

Fatmir Sheholli është transferuar në gjendje të rënduar shëndetësore nga Qendra Spitalore në Gjilan në QKUK në Prishtinë.

Kështu ka konfirmuar për Insajderin avokati i tij mbrojtës, Mentor Neziri, i cili tha se aktualisht Shehollit po i bëhen ekzaminimet e nevojshme mjekësore.

Sheholli është arrestuar nga hetuesit policorë të Drejtorisë për Hetimin e Krimeve të Rënda, me urdhër të Prokurorisë Speciale të Republikës së Kosovës, nën dyshimin për përfshirje në veprën penale të “spiunazhit”, bazuar në nenin 124, paragrafi 3 i Kodit Penal të Republikës së Kosovës.

Ndërkohë, Gjykata Themelore në Prishtinë ka caktuar ndaj tij masën e paraburgimit prej 30 ditësh, me kërkesë të Prokurorisë Speciale.

Sipas dosjes së Prokurorisë, Sheholli dyshohet se ka qenë i rekrutuar nga Shërbimi Inteligjent i Serbisë (BIA) dhe ka vepruar nën urdhrat dhe udhëzimet e zyrtarit të BIA-së, Bojan Dimiq.

Në aktakuzë thuhet se ai ka mbledhur informacione mbi pronat e uzurpuara të serbëve në Kosovë dhe i ka përcjellë ato nëpërmjet komunikimeve telefonike te zyrtarët serbë të inteligjencës.

Po ashtu, më 26 shtator 2025, në Mitrovicë të Veriut, Sheholli dyshohet se ka marrë materiale audio dhe transkripte të bisedave të zyrtarëve të Ministrisë për Komunitete dhe Kthim, të cilat dyshohet se janë komprometuese.

Prokuroria thekson se, përmes këtyre veprimeve, Sheholli me vetëdije dhe qëllimisht ka cenuar sigurinë dhe rendin juridik të Republikës së Kosovës, si dhe integritetin e zyrtarëve dhe qytetarëve të saj, duke ndihmuar një shërbim të huaj inteligjent në dëm të interesave shtetërore.

Kurti fton organet e drejtësisë që të hetohet çështja e Exit Poll-eve: Nuk janë thjesht një huqje, cënim i demokracisë

Kryeministri në detyrë, Albin Kurti, në një konferencë për media pas publikimit të rezultateve preliminare të zgjedhjeve lokale të 12 tetorit, ka komentuar çështjen e rezultatit të Exit Poll-eve për Komunën e Mitrovicës.

Kurti s’e ka quajtur rastësi çështjen e huqjeve të Exit Poll-it në Komunën e Mitrovicës dhe ka kërkuar nga organet e drejtësisë ta hetojnë këtë rast, shkruan Insajderi.

“Ajo çfarë ka ndodhur më 12 tetor duhet hetuar. Exit Pollet e prezantuara gabimisht eme 16 pikë të përqindjes dallim e më tepër se aq nga më shumë se një organizatë, për të njëjtën komunë dhe postimi i lajmeve të rreme se kush ishte fitues ende pa u mbyllur votues nuk janë thjesht një huqje. Kjo është cënim i demokracisë dhe integritetit e sigurisë. I ftoj organet e drejtësisë dhe sigurisë që të merren me këtë çështje”, deklaroi ndër të tjera ai.

Exit Poll-et e vendosën kandidatin e PDK-së për Mitrovicën, Arian Tahirin, fitues pa balotazh në zgjedhjet lokale. Megjithatë, bazuar në rezultatet preliminare, kjo komunë pritet të shkojë në balotazh.

VV fiton 3 komuna pa balotazh, 12 komuna shkojnë në balotazh

Komisioni Qendror i Zgjedhjeve ka nisur publikimin e rezultateve fillestare të zgjedhjeve të 12 tetorit.

Deri tani, sipas të dhënave paraprake, Lëvizja Vetëvendosje del se ka fituar 4 komuna pa balotazh, ndërsa në 11 komuna të tjera gara do të vendoset në balotazh.

Komunat ku VV ka fituar pa balotazh:

Podujevë

Kamenicë

Shtime

Komunat ku gara shkon në balotazh:

Gjilan

Gjakovë

Kaçanik

Fushë Kosovë

Mitrovicë

Obiliq

Rahovec

Pejë

Prishtinë

Prizren

Viti

Balotazhi pritet të mbahet me 9 nëntor.

Këto janë tri komunat që PDK i fitoi pa balotazh, në gjashtë e pret balotazhin

Pos Ferizajt e Skenderajt, PDK e fiton edhe Hanin e Elezit pa balotazh.

Partia Demokratike e Kosovës ka fituar pa balotazh garën për kryetar në Ferizaj me Agim Aliun, Skenderaj me Sami Lushtakun dhe Hanin e Elezit me Mehmet Ballazhin.

Në Ferizaj, Agim Aliu ka fituar pa balotazh mandatin e dytë.

Me 56.47 % të votave, tash kur janë numëruar 95 të votave.

Kurse Sami Lushtaku në Skenderaj ka marrë 83.45 për qind, ndërsa janë numëruar 95 për qind të votave.

Ndërsa, në han të Elezit, Mehmet Ballazhi e ka fituar edhe një mandat duke marrë 50.94 për qind të votave.

Kurse, në balotazh ka arritur që të shkojë në gjashtë komuna, ku në Mitrovicë udhëheq me 47.89%.

Si parti e parë është edhe në Prizren, ku Shaqir Totaj i ka marrë 41.92% nga rezultatet preliminare të KQZ-së.

Në Kaçanik, PDK-ja po ashtu ka shkuar në balotazh si parti e parë, ku ka marrë 39.86%, e po ashtu edhe në Vushtrri ka shkuar në balotazh si parti e parë ku ka marrë 45.56%.

Si e dyta ka shkuar në Dragash me 28.38%, e edhe në Klinë si parti e dytë pasi mori 35.92%.

Kurti mban sot konferencë për media

Kryetari i Lëvizjes Vetëvendosje, Albin Kurti sot do të mbajë konferencë për media nga ora 10:00.

Kështu bëri të ditur zëdhënësi i VV-së, Arlind Manxhuka.

“Te hënën, në ora 10:00, LV mban konferencë për media në të cilën flet kryeministri Albin Kurti. Konferenca mbahet në selinë qendrore të LV-së”, shkroi ai.

Vetëm tri kuti pa numëruar në Prishtinë – si qëndron rezultati aktual?

Në kryeqytetin e Kosovës, Prishtinën, garës për kryetar po i afrohet fundi, me vetëm edhe tri kuti votimi të pambetura për t’u numëruar, sipas Komisionit Qendror të Zgjedhjeve.

Të dhënat e deritanishme tregojnë një garë të ngushtë mes kandidatit të Lidhjes Demokratike të Kosovës (LDK), Përparim Rama, dhe atij të Lëvizjes Vetëvendosje (VV), Hajrulla Çeku.

Rama kryeson me 34,752 vota (33.76%), ndërsa Çeku e ndjek nga afër me 34,022 vota (33.05%). Në vendin e tretë është kandidati i Partisë Demokratike të Kosovës (PDK), Uran Ismaili, me 28,588 vota, që përbëjnë 27.77% të totalit.

Bazuar në këto rezultate, është pothuajse e sigurt që Prishtina do të shkojë në balotazh mes Ramës dhe Çekut, për të përcaktuar kryetarin e ri të qytetit.