Deputeti i Partisë Rome të Bashkuar të Kosovës, Albert Kinolli, ka deklaruar se partia që ai përfaqëson është e gatshme ta mbështesë formimin e Qeverisë së re të udhëhequr nga Albin Kurti.
Në emisionin “Ditari” në Tëvë1, Kinolli konfirmoi se janë zhvilluar disa takime me kryeministrin në detyrë dhe se pritet që gjatë ditëve në vijim të fillojnë bisedimet përfundimtare.
“Po, ne kemi pasur deri më tani disa takime me kryeministrin në detyrë, Albin Kurti, dhe duke u bazuar në rrjedhën e këtyre takimeve, ne shpresojmë që institucionet dhe Qeveria të krijohen sa më parë,” tha Kinolli.
Ai bëri të ditur se Partia Rome e Bashkuar ka shprehur përkrahjen e saj për Lëvizjen Vetëvendosje që nga zgjedhjet parlamentare.
“Që nga zgjedhjet e 9 shkurtit, kur partia e z. Kurti doli fituese, ne ia kemi dhënë besimin zotit Kurti për formimin e Qeverisë. Vlen të ceket se për votën tonë nuk kemi vendosur ndonjë kusht, por kemi një marrëveshje xhentelmene – marrëveshje me gojë – që për herë të parë Partia Rome e Bashkuar do të përfaqësohet në Qeverinë e Republikës së Kosovës me një post njëvjeçar,” theksoi ai.
Kinolli shtoi se ende nuk janë zhvilluar takime përfundimtare, por pritet që dialogu me Kurtin të vazhdojë brenda pak ditësh.
“Ende nuk kemi pasur takime konkrete, edhe pse koha po afrohet. Megjithatë, këto dy-tri ditë do të fillojmë bisedimet me z. Kurti për krijimin e kësaj qeverie,” përfundoi Kinolli.
Kombëtarja shqiptare do të mbyllë eliminagtoret e Kampionatit Botërorë 2026 më 16 nëntor me ndeshjen e “luksit” përballë skuadrës më të shtrenjtë në botë të futbollit, Anglisë.
Skuadra e “3 Luanëve” aktualisht është e kualifikuar pë rnë finalet e evenimentit më të madh futbollistik, por nëse nuk ka më një objektiv të sajin për të luajtur, padyshim që ka në dorë fatet edhe të kombëtares sonë, kur siç mund ta dini që Kuqezinjtë janë në vendin e dytë në grupin K me 1 pikë përpara Serbisë, 11 pikë kuqezinjtë pas 6 ndeshjesh ndërsa skuadra serbe me 10 pikë në po kaq ndeshje.
Përpara ndeshjes me Shqipërinë, Anglia do të presë Serbinë më 13 nëntor, datë që ne do të luajmë në Andorra dhe një fitore e anglezëve, bashkë me një sukses të mundshëm tonin në transfertë, zyrtarizon vendin e dytë të Shqipërisë në grup që përkthehet me kalimin në play-off-in e Botërorit.
Ndërkohë që në ndeshjen e fundit nëse Serbia pret Letoninë ne do të luajmë përballë Anglisë në “Arenën Kombëtare”.
Siç ndodh në ndeshje të tilla kur kundërshtari është i këtij niveli, por edhe padyshim për të patur shansin për një festë të ekipin kombëtarë përballë tifozerisë së tyre, në rast se sigurimi i pozicionit të dytë ndodh në ndeshjen e parafundit, problem mbeten biletat.
Është pikërisht ky moment që na kujton se na duhet një stadium më i madh, por që përbllë kërkesave të tilla që burimet për Top Channel konfirmojnë që i tejkalojnë disa fish kapacitetin e stadiumit tonë kombëtarë, që është rreth 22.000 vendësh, duket gjithmonë e pamundur për t’u përmbushur dëshira e të gjithëve.
Mjafton të përmendim këtu, që se të njëjtat burime, bëjnë me dije se nga data 16 tetor kur është hapur shorti i aplikimit për bileta, kanë shkuar drejt faqes on-line ku ato shiten, 100.000 kërkesa.
Në mënyrën e shpërndarjes së biletave për këtë ndeshje përparësi ka Klubi i Tifozëve të Kombëtares, secili aplikant si gjithmonë dhe kudo, ka mundësi vetëm për 4 bileta në një aplikim ndërkohë që çmimi i tyre varion sipas kategorisë së përcaktuar të stadiumit.
Bileta më e lirë për të ndjekur ndeshjen Shqipëri-Angli më 16 nëntor është ajo në zonat e stadiumit të emërtuara E101, N106 apo E109, S101 apo thenë ndryshe, këndet e stadiumit që ndodhen tek goditja e këndit. Çmimi për këto vende është 2500 lekë.
Më pas sektori i dytë për nga renditja e çmimeve nga më të lirat tek më të shtrenjtat janë sektoret prapa portave S dhe N të cilat variojnë nga 3500 lekë.
Pjesa e karshisë me tre blloqet E104, E105 dhe E106 të cilësuara si Kategori 1, kushtojnë 15.000 lekë ndërsa kati I dytë I stadiumit dhe pjesët më anësore të karshisë kanë një çmim prej 9000 lekësh.
Ndërkohë që edhe tribuna ka disa kategori, ku në pjesët anësore çmimi është 25.000 lekë dhe duke u afruar në qendër dhe deri tek kategoria VIP janë nga 40.000 dhe më e kushtueshmja 50.000 lekë.
Në pamje të parë çmime të kripura edhe pse bëhet fjalë për rreth 7% kapacitetit të stadiumit.
Ndërkohë duket që falë shitjes në këtë formë ku çdo biletë gjurmohet se kush e merr, ka filluar edhe survejimi i tregut të zi.
Një ndër aplikantët që kishte publikuar on-line rishitjen e biletës së përfituar, është evidentuar dhe sipas burimeve pranë FSHF për Top Channel, bileta i është revokuar personit duke e nxjerrë të pavlefshme dhe për ta kaluar në system sërish, ndërsa adresa e aplikimit ka kaluar në listë të zezë për të mos u përfshirë më në shorte apo aplikime për bileta ndeshjesh.
Big Brother VIP Kosova 4 po vjen me një energji të re dhe emocion që do t’ju mbajë të gjithë të magjepsur para ekranit.
Ky spektakël i madh, që shënon sezonin e katërt, pritet të nisë shumë shpejt në Klan Kosova, duke sjellë personalitete nga më të ndryshmet dhe tërheqëse nga bota e shoubizit dhe jo vetëm.
Producentja e BBVK-së, Olsa Muhameti, ka ndarë me publikun pak pamje nga brenda shtëpisë ikonike, duke zbuluar një kënd të veçantë të ambientit ku do të qëndrojnë të famshmit.
“Ohh, mezi po presim edhe ne, mos mendoni vetëm ju. BBVK 4 po vjen!”, ka shkruar ajo, duke nxitur kuriozitetin dhe pritshmëritë e shikuesve.
Klan Kosova do të bëjë së shpejti të njohur datën e nisjes së këtij spektakli madhështor, i cili gjatë tri viteve të fundit ka sjellë emocione të thella, lot gëzimi, surpriza dhe shumë momente të paharrueshme për publikun.
Faik Kadriu, ish-mësimdhënës i gjuhës angleze në shkollën fillore të mesme të ulët “Andon Zako Çajupi” në Vushtrri, është dënuar me 1 vit e 4 muaj burgim për veprat penale të keqtrajtimit gjatë ushtrimit të detyrës zyrtare dhe ngacmimit seksual ndaj nxënësve të klasës së gjashtë.
Lajmin e ka konfirmuar për Tëvë1 zëdhënësja e Gjykatës Themelore në Mitrovicë, Hateme Haxhaj.
“Lidhur me rastin që ju i jeni referuar, Gjykata Themelore në Mitrovicë – Dega në Vushtrri, me datë 21.10.2025 ka bërë shpalljen e aktgjykimit ndaj të pandehurit F.K., duke i shqiptuar dënim unik me burgim në kohëzgjatje prej 1 (një) vit e 4 (katër) muaj, për kryerjen e veprave penale: ‘Keqtrajtim gjatë ushtrimit të detyrës zyrtare ose autorizimeve publike’ nga neni 195 paragrafi 2 lidhur me paragrafin 1 të KPRK-së, dhe ‘Ngacmim seksual’ nga neni 183 paragrafi 3 lidhur me paragrafin 1 dhe nenin 77 të KPRK-së”, deklaroi Haxhaj.
Rasti kishte ndodhur gjatë vitit 2022, ndërsa viktimat ishin nxënës të mitur të klasës së gjashtë. Kadriu tashmë është shpallur fajtor për veprimet e tij dhe ndaj tij është shqiptuar masa e dënimit me burgim efektiv.
Anëtari i Lëvizjes Vetëvendosje në Komision Qendror të Zgjedhjeve, Sami Kurteshi, ka hedhur dyshime mbi vërtetësinë e votimeve në Komunën e Hanit të Elezit.
Në mbledhjen e parë të KQZ-së pas përfundimit të zgjedhjeve lokale të 12 tetorit, Kurteshi ka kërkuar nisjen e hetimeve nga Prokuroria e Policia lidhur për votimin me asistencë.
Kurteshi ka paraqitur disa parregullsi në Komunën e Hanit të Elezit, për të cilat ka thënë se parregullsi të tilla ka edhe në komunat tjera.
“Në Komunën e Hanit të Elezit pjesëmarrja është 5015 votues, nga ta 527 janë me asistencë, pra 10,51% të votuesve. Nga këta votues me asistencë – të verbër ose me shikim të dobësuar janë 243 votues kurse analfabetë 244. Sipas të dhënave të departamentit të pensioneve në Han të Elezit e kemi vetëm një të verbër që merr pension në shumën prej 300 eurove”, ka deklaruar Kurteshi.
Sipas tij këto shifra mund “të vërtetojnë” se votat me asistencë janë të shitura – të blera, ose të manipuluara.
Ai ka propozuar para KQZ-së që në Kosovë të ndalohet votimi me asistencë, ndërkaq në vendvotimet ku ka pasur numër të madh të votave me asistencë të bëhet rinumërimi.
Në Han të Elezit fitues është shpallur kandidati i PDK-së, Mehmet Ballazhi. Ai është shpallur fitues qysh në raundin e parë me vetëm 130 vota dallim.
Komisioni Qendror i Zgjedhjeve ka vendosur për rinumërimin e 16 vendvotimeve për zgjedhjet e 12 tetorit, për shkak të parregullsive në numërim.
Drejtori i sekretariatit të KQZ-së ka paraqitur sot para anëtarëve të Komisionit propozimin për rinumërimin e 16 vendvotimeve ku përfshihen komunat e Deçanit, Gllogocit, Prishtinës, Shtimes dhe Suharekës.
Sipas propozimit të tij, rinumërimi do të bëhet për shkak të diferencës në numrin e nënshkrimeve dhe fletëvotimeve.
Kësisoj, me rinumërim do të shuhen të gjitha dilemat për një proces të rregullt të votimit.
Deputeti i Kuvendit nga Partia Rome e Bashkuar e Kosovës, Albert Kinolli, ka bërë të ditur se do të zhvillohet një takim me kryetarin e LVV-së, Albin Kurti, për diskutimin rreth formimit të Qeverisë së re.
Kinolli tha se, me kërkesë të Kurtit, takimi do të mbahet pas kthimit të tij nga vizita në Londër.
“Sipas informacioneve që kemi dhe me të cilat jemi dakorduar paraprakisht, po e presim kthimin e kryeministrit në detyrë, Albin Kurti, që pas kthimit të tij nga Londra do të takohemi për formimin e Qeverisë. Do të kem takim unë si përfaqësues i komunitetit Rom, ndërsa për të tjerët nuk kam informacione”, deklaroi ai për RTV21.
Deputeti Kinolli theksoi se asnjë subjekt politik nuk pranon të përfshihet në koalicion pa kushte, por shtoi se janë të gatshëm të kontribuojnë në formimin e institucioneve të reja.
Ai gjithashtu përmendi se presin një marrëveshje gjentëlmene me Kurtin, ku si pjesë e Qeverisë së Republikës së Kosovës, Partia Rome do të marrë atë që i takon, sikurse edhe deputetët tjerë nga partitë e tjera që janë të përfaqësuara në Kuvend me nga një deputet.
Parlamenti Evropian ka miratuar një rezolutë për Serbinë, në të cilën theksohet polarizimi dhe represioni në rritje në vend, një vit pas shembjes së strehës në Stacionin Hekurudhor të Novi Sadit.
Për rezolutën votuan 457 eurodeputetë, ndërsa kundër ishin 103.
Serbia gjithashtu ftohet të harmonizohet me politikat e BE-së në luftën kundër ndërhyrjeve të huaja dhe fushatave të dezinformimit.
Teksti nënvizon se, edhe një vit pas tragjedisë në Novi Sad, hetimet nuk janë përfunduar dhe bën thirrje për “zbatim të plotë dhe transparent të procedurave ligjore pas hetimeve të organeve kompetente, në mënyrë që përgjegjësit të dalin para drejtësisë, në përputhje me sundimin e ligjit”.
Në dokument theksohet gjithashtu se ndikimi i Kinës në Serbi është rritur ndjeshëm gjatë viteve të fundit përmes investimeve të mëdha infrastrukturore, duke ngritur shqetësime për transparencën, përputhshmërinë me standardet e BE-së dhe respektimin e rregullave mjedisore.
Rezoluta kujton se shembja e strehës shkaktoi protesta të paprecedenta në mbarë vendin, të udhëhequra nga studentët, të cilët kërkonin drejtësi, përgjegjësi institucionale, transparencë, zgjedhje të parakohshme dhe të ndershme, respektim të lirive qytetare, ndarje të pushteteve, liri të medias, fund të korrupsionit sistematik, si dhe më shumë investime në arsim.
Rezoluta shton se autoritetet serbe kanë përdorur dhunë ndaj kundërshtarëve politikë dhe forcë të tepruar kundër protestuesve në të gjithë vendin, duke vlerësuar se represioni është përshkallëzuar që nga fillimi i vitit.
Sipas burimeve të pavarura, protestuesit më 15 mars u sulmuan me armë akustike, gjë që ka ngritur shqetësime serioze për proporcionalitetin dhe ligjshmërinë e përdorimit të forcës.
Në dokument thuhet se që nga gushti dhuna është intensifikuar edhe më tej, dhe se agjencitë e sigurisë kanë regjistruar në mënyrë të paligjshme dhe transmetuar biseda private, të cilat janë përdorur për të akuzuar studentët dhe aktivistët për vepra kundër rendit kushtetues dhe sigurisë së Serbisë. Po ashtu, përmendet se njësia elitare ushtarake “Kobre” është dislokuar në terren dhe në një rast ka përdorur municion të vërtetë. /Zëri
Deputeti i pavarur nga komuniteti Ashkali, Artan Asllani, ka konfirmuar se do ta votojë pro Qeverisë Kurti 3.
Ai për GazetaBlic theksoi se vendit i nevojitet stabilitet dhe vazhdimësi në qeverisje, prandaj mbështet formimin e qeverisë së re
“Po, do të votoj pro Qeverisë Kurti 3, sepse besoj se vendit i duhet stabilitet dhe vazhdimësi në qeverisje”, tha Asllani.
Ndryshe, më 11 tetor, Presidentja e Kosovës, Vjosa Osmani, e ka mandatuar liderin e Lëvizjes Vetëvendosje (LVV), Albin Kurti, që të formojë Qeverinë e re të vendit, tetë muaj pas mbajtjes së zgjedhjeve të përgjithshme.
Pavarësisht se kanë mbetur vetëm edhe pesë ditë afat për ta paraqitur përbërjen e re të Qeverisë, deri më tani nga LVV nuk është ndërmarrë asnjë hap konkret.
Nuk është raportuar për ndonjë takim apo negociatë me subjektet e tjera politike që do të mundësonte ndërtimin e një koalicioni qeverisës.
Kjo, pasi LVV-së i nevojiten të paktën 61 vota në Kuvend për të formuar Qeverinë, ndërsa në zgjedhjet e 9 shkurtit, kjo parti ka siguruar 48 ulëse.
