Haliti: Koalicioni PDK-VV është gabim i madh, deputetët që tradhtojnë partinë duhet të përjashtohen

Xhavit Haliti nga Partia Demokratike e Kosovës (PDK) e ka vlerësuar si gabim të madh mundësinë e një koalicioni të PDK-së me Lëvizjen Vetëvendosje.

Haliti ka theksuar se shumica parlamentare e VV-së ka krijuar një situatë mosbesimi tek qytetarët ndaj të gjithë politikanëve në Kosovë.

Për këtë arsye, sipas tij, PDK-ja duhet të pozicionohet dhe  të forcohet në opozitë.

“Sa i përket mundësisë së futjes së PDK-së në koalicion me VV-në, unë mendoj që është gabim i madh. Kjo shumicë parlamentare e VV-së ka krijuar një situatë mosbesimi tek qytetarët për të gjithë politikanët e Kosovës, dhe unë mendoj se PDK-ja duhet të qëndrojë në opozitë, pasi duhet të forcohet dhe të ballafaqohet me problemet që i shkakton pozita,” ka thënë ai në emisionin “Mesditë” në Tëvë1.

Haliti është shprehur skeptik se do të ketë ndonjë deputet të PDK-së që do ta votojë Qeverinë Kurti 3.

Megjithatë, sipas tij, nëse dikush “ka shitur veten”, duhet të japë llogari dhe të përjashtohet nga partia.

“Nuk e besoj që do të ketë deputetë që do të kalonin në votim të qeverisë. Në qoftë se dikush e ka shitur vetveten, ai duhet të japë llogari para partisë dhe duhet të përjashtohet. Po ashtu, duhet të japin përgjegjësi ata që i kanë kandiduar për deputetë persona të tillë. Kemi pasur raste të tilla në të kaluarën që kanë votuar ndryshe dhe janë larguar nga partia, duke iu bashkuar Vetëvendosjes, por nuk kemi reaguar duke e konsideruar si vullnet të individit, sepse nuk kanë dëmtuar shumë PDK-në. Por tani mendoj se partia duhet të jetë më e rreptë dhe më rigoroze ndaj elementëve që në një mënyrë apo tjetër tradhtojnë. Nuk guxon dhe nuk duhet të ketë deputetë të zgjedhur të PDK-së që pa miratimin e Këshillit Drejtues të partisë të votojnë për këdo qoftë,” ka theksuar Haliti./teve1.info/

Vazhdojnë befasitë zgjedhore- Kandidati i LDK’së indirekt bën thirrje që të votohet kandidati i VV’së

Kandidati i Lidhjes Demokratike të Kosovës për kryetar të Komunës së Rahovecit, Burim Krasniqi, ka bërë kërkesë në mënyrë indirekte drejt elektoratit të kësaj partie që të votohet Ali Dula, kandidati për kryetar i Lëvizjes Vetëvendosje në Rahovec.

Krasniqi ka thënë se mesazhi është thënë nga fillimi që “Rahovecit i duhet ndryshimi”. Në balotazh do të ballafaqohen kreu aktual në detyrë i komunës së Rahovecit, Smajl Latifi i AAK’së dhe Dula i VV’së, shkruan Insajderi.

“Ju faleminderit të gjithëve me mesazhin e thënë nga fillimi: RAHOVECIT I DUHET NDRYSHIMI”, ka thënë ndër të tjera ai.

Krasniqi ka bërë të ditur se LDK’ja ka marrë 5,124 vota për kryetar komune në Rahovec dhe 4,743 sosh për kuvend komunal.

Sipas Krasniqit, LDK do të përfaqësohet me shtatë asamblistë nga 27 sa do të jenë në Komunën e Rahovecit. /Insajderi.org/

Jep dorëheqje kryetari i kësaj partie politike në Kosovë

Presidenti i Aleancës Kosova e Re, Behgjet Pacolli, ka dhënë dorëheqjen javë më parë nga kreu i këtij subjekti politik

Lajmin e ka konfirmuar për “Gazeta Blic”, Vesel Makolli, Ish-Sekretar i Përgjithshëm i kësaj partie i cili tashmë është caktuar ushtrues detyre i Presidentit të AKR-së.

Makolli tha se në Komisionin Qëndror të Zgjedhjeve (KQZ) janë të njoftuar me ndryshimin.

“Zoti Pacolli ka dhanë dorëheqje para disa javësh dhe ne bazë te Statutit të partisë, me ka caktu Ushtrues Detyre i Presidentit te AKR-së.
Ne KQZ janë të njoftum me ketë ndryshim” tha Makolli për “Gazeta Blic”

Behgjet Pacolli ishte kryetar i AKR-së që nga viti 2006 kur u formua ky subjekt politik.

Soni Malaj feston ditëlindjen, kaq vjet mbushi

Këngëtarja e njohur shqiptare, Soni Malaj, sot po feston një ditë shumë të veçantë, ditëlindjen e saj të 44-të.

E dashur nga publiku për talentin, energjinë dhe stilin e saj unik, Soni prej vitesh ka qenë një nga emrat më të spikatur të skenës muzikore shqiptare.

Në këtë ditë të rëndësishme, ajo ka marrë me dhjetëra urime nga kolegë, miq e fansa, të cilët i kanë uruar shëndet, lumturi dhe suksese të tjera në jetë dhe në karrierë.

Edhe pse ka kaluar shumë vjet në skenë, Soni vazhdon të ruajë sharmin që e kanë bërë një nga artistet më të dashura për publikun shqiptar.

Presidentja Osmani udhëton për në Gjermani

Presidentja e Kosovës, Vjosa Osmani, është nisur drejt Gjermanisë, ku do të mbajë sot një fjalim në Fakultetin Juridik të Universitetit të Berlinit.

Para studentëve, Osmani do të flasë për mbrojtjen e demokracisë. Takimi pritet të ketë pjesëmarrje të madhe, pasi në këtë universitet po zhvillohet Java e Takimeve me Personalitete Evropiane.

Gjithashtu, presidentja do të zhvillojë edhe takime të shumta në Gjermani.

Paris Guri i LDK-së: Studentët ende s’i kanë marrë 100 euro, dalin pak ditë para balotazhit

Para zgjedhjeve lokale të 12 tetorit, qeveria në detyrë e Kosovës ndau 26 milionë euro për studentët, duke thënë se secili prej tyre do të përfitojë 100 euro.

Kjo nga shumëkush u pa si instrumentalizim i buxhetit shtetëror kryekëput për zgjedhje, por ato para ende s’kanë dalë, siç kujtoi edhe një deputet i Kuvendit..

Për mosekzekutimin e këtyre 100 eurove, deputeti i LDK-së, Paris Guri, bëri një parashikim interesant, duke thënë se këto mjete do të dalin afër datës së raundit të dytë të zgjedhjeve.

“Qeveria ende nuk i ka ekzekutuar 100 eurot për studentët. Mbajeni në mend ato do të dalin pak ditë para balotazhit”, shkroi Guri me ironi në Facebook.

Qeveria vendimin e mori para 12 tetorit, por këto përfitime për studentët ende nuk janë ekzekutuar. Data e balatazhit është 9 nëntori.

Kurti kthehet në Kosovë, merr pjesë në këtë ngjarje

Kryeministri në detyrë, Albin Kurti do të marrë pjesë në ceremoninë hapëse të Festivalit të Teknologjisë, DOKU.TECH 2025, që do të mbahet sot në orën 12:00, në “Tech Park Prishtina”.

Ky edicion i radhës i DOKU.TECH zhvillohet në kuadër të nismës qeveritare “October Tech Kosova” dhe mbështetet nga Qeveria e Republikës së Kosovës. Gjatë dy ditëve të festivalit, më 23 dhe 24 tetor, ngjarja do të mbledhë ekspertë vendorë e ndërkombëtarë për të ndarë ide, përvoja dhe perspektiva të reja rreth teknologjisë, inovacionit dhe zhvillimeve të ardhshme në këtë fushë.

Programi i DOKU.TECH 2025 përfshin një sërë aktivitetesh, si:
• Keynote speakers Edi Demaj dhe Christopher Petrillo, të cilët do të trajtojnë temat më aktuale të teknologjisë dhe ndikimit të saj global;
• Masterclass DIY, që do t’u japë mundësinë pjesëmarrësve të përfshihen në aktivitete kreative dhe edukative;
• Panel diskutimi me ekspertë vendorë dhe ndërkombëtarë mbi sfidat dhe mundësitë që teknologjia ofron për Kosovën dhe rajonin;
• Si dhe një Cyber Exercise, një simulim interaktiv që synon të rrisë ndërgjegjësimin dhe përgatitjen ndaj sigurisë kibernetike.

Festivali DOKU.TECH pritet të shërbejë si një platformë e rëndësishme për shkëmbim idesh dhe nxitje të inovacionit në Kosovë, duke e pozicionuar vendin si pjesë aktive të zhvillimeve teknologjike globale.

Kurti siguron edhe dy vota – edhe dy deputetë i japin dritën e gjelbër!

Deputeti i pavarur nga komuniteti Ashkali, Artan Asllani, ka konfirmuar se do ta votojë pro Qeverisë Kurti 3.

Ai për GazetaBlic theksoi se vendit i nevojitet stabilitet dhe vazhdimësi në qeverisje, prandaj mbështet formimin e qeverisë së re.

“Po, do të votoj pro Qeverisë Kurti 3, sepse besoj se vendit i duhet stabilitet dhe vazhdimësi në qeverisje”, tha Asllani.

Edhe, deputeti i Partisë Rome të Bashkuar të Kosovës, Albert Kinolli, ka bërë të ditur se kjo parti do ta mbështesë Albin Kurtin për formimin e qeverisë së re.

Ai tha se janë zhvilluar takime me Kurtin dhe, ndonëse nuk kanë vendosur kushte, ekziston një marrëveshje që partia e tij do të përfaqësohet me një pozitë ministrore në qeverinë e ardhshme.

“Kemi pasë takime me Kurtin, duke marrë parasysh faktin që VV’ja është mandatare për formimin e qeverisë, ne do t’ia japim votën Kurtit. Ne nuk kemi kushte, por kemi marrëveshje që ne si parti, në momentin që do të formohet qeveria, do të jemi të përfaqësuar me një pozitë ministrore”, tha Kinolli për GazetaBlic.

Ndryshe, më 11 tetor, Presidentja e Kosovës, Vjosa Osmani, e ka mandatuar liderin e Lëvizjes Vetëvendosje (LVV), Albin Kurti, që të formojë Qeverinë e re të vendit, tetë muaj pas mbajtjes së zgjedhjeve të përgjithshme.

Pavarësisht se kanë mbetur vetëm edhe pak afat për ta paraqitur përbërjen e re të Qeverisë, deri më tani nga LVV nuk është ndërmarrë asnjë hap konkret.Nuk është raportuar për ndonjë takim apo negociatë me subjektet e tjera politike që do të mundësonte ndërtimin e një koalicioni qeverisës.

Kjo, pasi LVV-së i nevojiten të paktën 61 vota në Kuvend për të formuar Qeverinë, ndërsa në zgjedhjet e 9 shkurtit, kjo parti ka siguruar 48 ulëse.

Zubin-Potok: Një shofer godet me veturë një zyrtar policor

Një shofer ka goditur me veturën e tij një zyrtar policor.

Rasti ka ndodhur pasditën e së martës

Sipas njoftimit të policisë, incidenti ka ndodhur pasi një njësit policor, teksa ishte në një pikë kontrolli, tentoi të ndalojë një veturë për kontroll rutinor.

Drejtuesi i veturës u largua nga vendi me shpejtësi, me ç’rast edhe goditi zyrtarin policor.

“Vetura e dyshuar nuk është arritur të ndalohet” thuhet në njoftimin e policisë.

Rasti është iniciuar si “Sulm ndaj personit zyrtar”.

Xhensila ka një fjalë për Ledrin

Pas publikimit të këngës së re nga Ledri Vula, një ndër reagimet që mori vëmendjen më të madhe ishte ai i Xhensila Myrtezajt.

Këngëtarja e ka ndarë një fragment nga videoklipi i reperit në Instagram Story, duke shkruar “Amazing” shoqëruar me një emoji zjarri, në shenjë mbështetjeje për kolegun e saj.

Ky reagim vjen pas një vere të tërë ku dyshja është përfolur gjerësisht për një afërsi më të madhe se ajo profesionale. Komentet nisën që pas bashkëpunimit të tyre të suksesshëm “Ma Kthe”, ku kimia në skenë dhe para kamerave u bë temë diskutimi në rrjet.

Megjithatë, të dy artistët janë pjesë e së njëjtës shtëpi muzikore dhe menaxhim, prandaj kjo mbështetje nuk duhet interpretuar si diçka më shumë sesa përkrahje brenda grupit. Vetë Ledri në intervista të mëparshme e ka cilësuar raportin me Xhensilën si “ekipor dhe profesional”, ndërsa asnjëri nuk ka bërë ndonjë deklaratë që konfirmon ndonjë lidhje romantike.

Spekulimet për një romancë midis tyre janë ushqyer kryesisht nga rrjetet sociale dhe mediat rozë, por deri më tani nuk ekziston asnjë konfirmim zyrtar. Si Ledri ashtu edhe Xhensila kanë zgjedhur të fokusohen në projektet muzikore dhe në bashkëpunimet e tyre që po rezultojnë të suksesshme.