Sulmohen policia e Kosovës

Brenda një dite në Pejë janë regjistruar dy raste të ndara të sulmeve ndaj personave zyrtarë, ku zyrtarë policorë janë përballur me rezistencë, kanosje dhe dhunë fizike gjatë kryerjes së detyrës.

Rr. “Iljaz Pashë Dibra”, Pejë  22.10.2025 – 09:09. Është arrestuar i dyshuari mashkull kosovar, pasi që ai ka sulmuar zyrtarët policorë. Gjatë arrestimit i dyshuari ka rezistuar, në rast njëri zyrtar policor ka përdorur sprej. I dyshuari dhe një zyrtar kanë pranuar trajtim mjekësor. Me vendim të prokurorit, pas intervistimit i dyshuari është liruar në procedurë të rregullt.

Rr. “Nënë Tereza”, Pejë 22.10.2025 – 09:32. Janë arrestuar tre të dyshuar meshkuj kosovarë, pasi që ata kanë ofenduar, kanosur dhe sulmuar fizikisht zyrtarët policorë. Një zyrtar policor ka pranuar trajtim mjekësor, ndërsa me vendim të prokurorit pas intervistimit një i dyshuar është dërguar në mbajtje, ndërsa dy të tjerë janë liruar në procedurë të rregullt”, thuhet në raportin e policisë.

Kjo është pamja madhështore nga banesa e Engjellusha Salihut

Engjellusha Salihu, e njohur ndryshe si Engji, tashmë po jeton jashtë Kosovës, pas martesës së saj.

Së fundmi ajo ka ndarë me ndjekësit një fotografi nga dritarja e banesës, ku duket një rrugë e bukur dhe e qetë e qytetit ku ajo banon aktualisht.

Pamja tregon një ambient të rregulluar me kujdes dhe një perspektivë që i ofron qetësi dhe inspirim, shkruan “Kosovarja”.

A thua a po i mungon Prishtina e Kosova?

Aksident i rëndë në Kanada, humb jetën mjeku shqiptar

Një mjek shqiptar në Kanada ka humbur jetën si pasojë e një aksidenti me makinë.

Lajmin e ka konfirmuar vetë Ambasada e Shqipërisë në Kanada, teksa ambasadorja Artemis Kosta Malo, ka ngushëlluar familjarët e të ndjerit.

Agron Alija shërbeu si mjek dhe Profesor i Asociuar në Shkollën e Mjekësisë dhe Stomatologjisë “Schulich” në London, në provincën e Ontarios, njofton tch.

“Me dhimbje të thellë mësuam lajmin tronditës për ndarjen e parakohshme nga jeta të Dr. Agron Alija. Në emër të Ambasadës së Republikës së Shqipërisë në Kanada dhe në emrin tim personal, shpreh ngushëllimet më të sinqerta familjes së Dr. Agron Alija për këtë humbje të pazëvendësueshme.

Dr. Agron Alija ishte një figurë emblemë e komunitetit shqiptar në Kanada, një profesionist i përkushtuar në fushën e mjekësisë dhe një njeri me shpirt fisnik që kontribuoi me dashuri, përkushtim dhe integritet në shërbim të njerëzve dhe komunitetit veçanërisht në Hamilton dhe London, aty ku edhe shërbeu si mjek dhe Profesor i Asociuar në Shkollën e Mjekësisë dhe Stomatologjisë “Schulich” në London, në provincën e Ontarios.

Humbja e tij la një boshllëk të madh jo vetëm për familjen e tij, por edhe për gjithë ata që patën fatin ta njihnin e ta vlerësonin. Në këto momente të vështira, shpreh gjithë mbështetjen time dhe uroj forcë dhe durim familjes së Dr. Alija për të përballuar këtë humbje. U prehsh në paqe, Dr. Alija. Kujtimi për ty do të qëndrojë përgjithmonë në zemrat dhe mendjet tona, me respekt, mirënjohje dhe mall të thellë për njeriun fisnik, mjekun e përkushtuar dhe mikun e dashur që ishe”, shkruan ambasadorja shqiptare.

Ky deputet konfirmon votën për Qeverinë e re: Kam arritur dakordancë me Kurtin

Procesi për formimin e qeverisë së Kosovës ka hyrë në ditët finale, ndërsa mandatari për kryeministër, Albin Kurti, ka në dispozicion deri më 26 tetor për të prezantuar kabinetin dhe për të siguruar shumicën parlamentare prej 61 deputetësh.

Sipas Kushtetutës së Kosovës, mandati për formim i është dhënë Kurtit më 11 tetor nga Vjosa Osmani.

Nga ai moment ka filluar afati 15-ditor, që përfundon më 26 tetor.

Megjithatë, deri më tani nuk është raportuar ndonjë marrëveshje konkrete me parti të tjera për koalicion.

Lëvizja Vetëvendosje, me 48 ulëse në Kuvend, ka nevojë për të paktën edhe 13 vota për të siguruar shumicën e nevojshme prej 61 deputetësh.

Deputeti i pavarur nga komuniteti ashkali, Artan Asllani, në një prononcim për FrontOnline ka bërë të ditur se do ta votojë qeverinë e Kurtit.

“Normalisht që do ta votoj qeverinë Kurti”, tha Asllani

Ai ka thënë se ka zhvilluar takime të vazhdueshme me Kurtin, ku janë diskutuar çështje të ndryshme që lidhen me bashkëqeverisjen.

Sipas tij, gjatë këtyre takimeve është krijuar një dakordancë për bashkëpunim dhe se ai është i vendosur ta mbështes formimin e qeverisë Kurti.

“Kemi pasur takime të vazhdueshme me z.Kurtin , kemi diskutuar çështje të ndryshme, kemi diskutuar për bashkëqeverisje, kemi biseduar se si mund të japim kontributin në ekzekutiv dhe e kemi krijuar një lloj dakordance”, deklaroi ai

Nagavci thirrje LDK-së: Votojeni formimin e Qeverisë Kurti

Ministrja e Arsimit në detyrë, Arbërie Nagavci, i ka bërë thirrje Lidhjes Demokratike të Kosovës që të votojë formimin e Qeverisë Kurti, duke theksuar se kjo do të ishte në interes të vendit dhe për të shmangur dy palë zgjedhje.

“Duhet me prit që LDK-ja për interes të vendit, me votu qeverinë Kurti, me bë koalicionin edhe mos me dërgu vendin në dy palë zgjedhje, të bëj edhe marrëveshje,” ka deklaruar Nagavci.

E pyetur nëse kjo është një ftesë e re për LDK-në, ajo ka theksuar se partia duhet të reflektojë dhe të tregojë përgjegjësi institucionale.

“Unë besoj që LDK duhet me reflektu. Prej momentit të parë kur Kurti iu ka dërgu ftesën, ka qenë e mundur që të ulet dhe të diskutohet. LDK nuk është herë e parë që ka bërë marrëveshje në emër të krijimit të institucioneve për të mirën e vendit. Votimi i Qeverisë Kurti është vetëm vazhdimësi e punëve të mira,” ka shtuar ajo në Debat Plus.