Rutte nga Rumania: Askush mos të guxojë të sulmojë vendet e NATO-s

Sekretari i Përgjithshëm i NATO-s, Mark Rutte, të mërkurën u përpoq të qetësonte zërat, lidhur me tërheqjen e pjesshme të trupave amerikane nga Rumania, duke siguruar se Uashingtoni mbetet i përkushtuar për mbrojtjen e krahut lindor të aleancës.

Ai tha se rregullimet në pozicionimin e forcave amerikane nuk janë të pazakonta dhe se, edhe pas këtij ndryshimi, pozicionimi i forcave amerikane në Evropë mbetet më i madh sesa ka qenë për shumë vite. “Mendoj se po bëjmë shumë bujë për këtë tërheqje”, shtoi Rutte.

SHBA-ja njoftoi javën e kaluar tërheqjen e një brigade nga Rumania dhe nuk do ta zëvendësojë, duke theksuar se kjo është një shenjë pozitive e rritjes së kapaciteteve dhe përgjegjësisë evropiane.

Megjithatë, SHBA-të vazhdojnë të mbajnë një prani të fortë në Evropë dhe aftësinë për të përmbushur angazhimet ndaj NATO-s.

Rutte gjithashtu përmendi operacionin “Eastern Sentry” dhe stërvitjen ushtarake “Dacian Fall” në Rumani dhe Bullgari, ku do të marrin pjesë rreth 5,000 trupa nga 10 vende të NATO-s, si prova që aleanca është e gatshme të mbrojë çdo centimetër të territorit të saj dhe të dërgojë shpejt forcat e nevojshme në Rumani.

Presidenti rumun Nicușor Dan tha se nuk ka shqetësime lidhur me tërheqjen e trupave amerikane dhe se operacioni dhe stërvitja tregojnë koordinimin për lëvizje të mëdha të trupave ushtarake.

Tragjedi në Tetovë: Gjendet e vdekur një 25-vjeçare nga Kosova

Është gjetur pa shenja jete trupi i një 25-vjeçareje nga Kosova, që supozohet të jetë studente në Tetovë.

Ngjarja ka ndodhur rreth orës 19:00, derisa dyshimet e para janë për vrasje, por nuk përjashtohen variantet e tjera.

Trupi i pajetë është gjetur nga kalimtarë të rastit pas tregut të gjelbër në Tetovë, raporton AlsatMk.

Policia dhe Prokurori Publik janë në vendngjarje duke kryer hetimet.

Armend Zemaj i bindur se do të dalin të parët në zgjedhjet e reja

Deputeti i Lidhjes Demokratike të Kosovës, Armend Zemaj, ka deklaruar se partia të cilës ai i takon mund të dalë subjekti i parë politik nëse mbahen zgjedhjet e jashtëzakonshme parlamentare.

I ftuar në emisionin “DPT te Fidani” në Klan Kosova, Zemaj tha se partia e tij tashmë ka performancë të mirë dhe po punon për të fituar zgjedhjet, raporton Klankosova.tv.

“Unë s’mund të paragjykoj, por ne punojmë për zgjedhjet e jashtëzakonshme që t’i fitojmë. Jemi duke punuar dhe kemi performancë të mirë”, u shpreh ai.

I pyetur nga moderatori Fidan Jupolli nëse LDK ka gjasa reale të dalë e para, Zemaj u përgjigj: “Sigurisht”.

“Kemi rezultat të mirë në zgjedhjet lokale dhe partia në çdo komunë ka më shumë vota sesa në zgjedhjet e kaluara. Do të angazhohemi që t’i fitojmë zgjedhjet”, deklaroi deputeti i LDK-së.

Arrin në 30 numri i të plagosurve nga zjarri në azilin e pleqve në Tuzlla

Njëmbëdhjetë njerëz e kanë humbur jetë dhe më shumë se 30 të tjerë janë lënduar si pasojë e një zjarri që shpërtheu në katin e shtatë të një shtëpie pleqsh në Tuzlla mbrëmjen e së martës, njoftuan të mërkurën autoritetet në kantonin e Tuzllës në Bosnje.

Sipas të dhënave të fundit të pakonfirmuara, 30 persona janë shtruar në spital në Qendrën Klinike Universitare në Tuzlla, ndërsa numri i të lënduarve që deri më tani kanë kërkuar ndihmë mjekësore është më i lartë.

Viktimat janë banorë të shtëpisë dhe trupat e tyre do të dërgohen për identifikim dhe autopsi, sipas autoriteteve. Nuk është e qartë se çfarë e shkaktoi zjarrin, por autoritetet e kanë nisur një hetim në vendin e ngjarjes. Ndërkaq, Drejtori i shtëpisë së pleqve, Mirsad Bakalloviq, dha dorëheqje një ditë pas zjarrit.

Në një njoftim zyrtar disa orë pas zjarrit, shtëpia e pleqve konfirmoi numrin e të vdekurve dhe të lënduarve, dhe shtoi se të lënduarit po trajtohen në Qendrën Klinike Universitare të Tuzllës.

Sipas saj, mes të lënduarve ka edhe oficerë policie, zjarrfikës, punonjës mjekësorë dhe punonjës të shtëpisë së pleqve në Tuzlla.

Mblidhet PDK-ja – Ky është qëndrimi i tyre për Konjufcën

Partia Demokratike e Kosovës gjatë ditës së sotme ka mbajtur mbledhjen e kryesisë.

Nga aty është vendosur që zgjedhjet e parakohshme janë zgjidhja e vetme për tejkalimin e krizës institucionale.

Partia Demokratike e Kosovës vlerëson se dhënia përsëri e mandatarit LVV-së përbën humbje kohe.

Postimi i plotë:

Partia Demokratike e Kosovës ka mbajtur sot mbledhjen e rregullt të Kryesisë, ku u diskutua për zhvillimet aktuale politike në vend, rezultatin e arritur në raundin e parë të zgjedhjeve lokale dhe vazhdimin e angazhimit për fitore në balotazh.

Partia Demokratike e Kosovës vlerëson se dhënia përsëri e mandatarit LVV-së përbën humbje kohe, zvarritje të panevojshme dhe thellim të krizës institucionale, sepse tashmë është e qartë që askush nuk e ka shumicën për ta formuar qeverinë nga kjo legjislaturë.

Në këtë mbledhje u ripërsërit njëzëri qëndrimi se PDK nuk do të japë votë për asnjë mandatar nga LVV, dhe se mbajtja e zgjedhjeve të parakohshme është zgjidhja e vetme për tejkalimin e këtij ngërçi, duke u kthyer qytetarëve të Kosovës të drejtën për të vendosur drejtimin e ardhshëm të vendit dhe për t’i dhënë legjitimitet institucioneve të reja.

Kriza e stërzgjatur gjatë këtij viti, e shkaktuar nga Lëvizja Vetëvendosje, përveç dëmit politik, ka goditur çdo sektor, ndërsa rreziku që buxheti i shtetit të mos kalojë me kohë dhe që vitin e ardhshëm qytetarët të mbeten pa paga, e bën edhe më të domosdoshëm përshpejtimin e procesit drejt zgjedhjeve të reja.

Tutje, kryetari Krasniqi u shpreh mirënjohës për angazhimin e secilit anëtar dhe përkrahës të Partisë Demokratike të Kosovës, që i mundësoi partisë rikthimin në vendin e parë pas 12 viteve sa i përket votës popullore në zgjedhjet lokale me 187.526 vota, me ç’rast PDK ka siguruar 206 ulëse gjithsej në Kuvendet Komunale, duke lënë prapa partitë e tjera.

Po ashtu, në këto zgjedhje lokale PDK ka arritur të rris numrin e votave në total për kandidatët për kryetarë komunash, duke u radhitur e dyta, si dhe ka fituar në tri komuna Ferizaj, Skënderaj dhe Han të Elezit në raundin e parë.

Kryetari Krasniqi kërkoi nga kryesia që të vazhdoj angazhimin dhe mobilizimin për fitore në Mitrovicë, Prizren, Vushtrri, Kacanik, Klinë dhe Dragash, ku PDK është në garë, edhe në ditët e mbetura deri në balotazhin e 9 nëntorit.

Berat Buzhala: Astrit Dehari ka bërë vetëvrasje – “Nëse pushteti do të vriste dikë, do ta vriste Albin Kurtin, jo një aktivist anonim”

Në përvjetorin e vdekjes së aktivistit të Lëvizjes Vetëvendosje, Astrit Dehari, gazetari dhe ish-deputeti, Berat Buzhala ka bërë një reagim të gjatë në rrjetet sociale, ku ka thënë se rasti Dehari është keqpërdorur politikisht nga pushteti aktual.

Buzhala thotë se është e vërtetuar si nga ekspertët vendorë ashtu edhe nga ata ndërkombëtarë se Astrit Dehari ka bërë vetëvrasje në burg, dhe se pretendimet e Lëvizjes Vetëvendosje për vrasje janë “komike dhe tragjike”.

“Astrit Dehari ka bërë vetëvrasje në burg dhe kjo është konstatuar edhe nga ekspertët vendorë edhe nga ata ndërkombëtarë. Arsyet mund të jenë të ndryshme, mirëpo ka dyshime të bazuara se Astriti ka pasur presion nga partia që të mos bashkëpunojë me organet e hetuesisë lidhur me sulmin me zollë ndaj Kuvendit të Kosovës,” ka shkruar ai.

Sipas Buzhalës, një mundësi tjetër është që Dehari të ketë qenë në depresion dhe ta ketë marrë vetë jetën, “ashtu siç kishte bërë edhe vëllai i tij, Arbnori”.

Ai kritikon ashpër narrativën e Vetëvendosjes, duke thënë se po përdoret për qëllime politike:

“Tregimi i LVV-së dhe Kurtit se Astrit Deharin e kanë vrarë në burg është komik dhe tragjik. Po të donte pushteti të vriste dikë, do ta vriste Albin Kurtin, e jo një aktivist anonim. Astrit Dehari nuk ka qenë askush që të ketë arsye dikush ta vrasë në burg.”

Buzhala thotë se për herë të parë kishte dëgjuar për Astrit Deharin vetëm pasi ishte bërë publik lajmi për vdekjen e tij, dhe sipas tij, që nga ajo kohë pushteti aktual ka vazhduar “abuzimin politik” me figurën e Astritit dhe familjen e tij.

Në fund të reagimit, ai i referohet një thënie italiane “Cui bono?” (Kush përfiton?), duke shtuar se përfituesit më të mëdhenj të ngjarjes kanë qenë vetë drejtuesit e sotëm të Vetëvendosjes.

“Pra, kush ka përfituar më së shumti nga vetëvrasja e Astritit? Ka përfituar Albin Kurti dhe ata që sot janë ministra,” shkroi Buzhala.

Ai shton se nuk do të ishte marrë me këtë temë nëse, siç thotë ai, “pushteti nuk do të gënjente çdo vit”, duke paralajmëruar se do të vazhdojë të flasë “për të vërtetën” çdo përvjetor të rastit Dehari.

Kërkohet shkarkimi i menjëhershëm i Dimal Bashës

Deputetja e PDK-së, Ganimete Musliu, ka reaguar ashpër ndaj deklaratës së kryetarit të Kuvendit, Dimal Basha, i cili kishte thënë se “rasti i Astrit Deharit është më i rëndë se ajo që kanë vuajtur shqiptarët nën Millosheviqin”.

Përmes një postimi në facebook, Musliu e ka quajtur këtë deklaratë skandaloze, fyese dhe të papranueshme për çdo qytetar të Kosovës që ka përjetuar vuajtjet e luftës.

“Të krahasosh një rast tragjik individual me terrorin shtetëror, masakrat, dhunimet dhe dëbimet që Serbia e Millosheviqi ushtruan mbi mijëra shqiptarë, është një fyerje e rëndë ndaj kujtimit të viktimave”, ka shkruar Musliu.

Deputetja e PDK-së ka shtuar se një kryetar Kuvendi që bën deklarata të tilla “ose nuk e kupton peshën e fjalës publike, ose e përdor qëllimisht për të ndezur emocione dhe për të mbuluar paaftësinë politike”.

Ajo e ka cilësuar këtë deklaratë si vazhdimësi të punimit shkencor kundër UÇK-së nga Basha, duke kërkuar shkarkimin e menjëhershëm të tij nga pozita.

Lushtaku-Sadriu: S’kemi votë për Konjufcën, po të donim do ta votonim origjinalin

Deputetja e LDK-së, Jehona Lushaku-Sadriu, ka deklaruar se partia e saj nuk do ta mbështesë asnjërin nga kandidatët e propozuar nga Lëvizja Vetëvendosje për postin e kryeministrit.

Duke folur në emisionin Rubikon të Klan Kosovës, ajo theksoi se qëndrimi i LDK-së mbetet i pandryshuar edhe pas nominimit të Glauk Konjufcës.

“Nuk kemi votë, nuk e kemi ndarë ndryshimin e kandidatëve. Po të donim, do ta votonim origjinalin.

Jemi kundër mendësisë dhe për aq kohë sa vazhdon diskursi i VV-së në mënyrën e njëjtë, siç e pamë edhe sot nga deputetja Kusari, ne nuk do të kemi përkrahje për asnjërin nga kandidatët e tyre”, u shpreh Lushaku-Sadriu.

Gucati: Nuk i besoj Kurtit, ai vetë u tha ish-krerëve të UÇK-së të shkojnë në Hagë

Kryetari i OVL-UÇK-së, Hysni Gucati, ka komentuar deklaratën e kryeministrit në detyrë, Albin Kurti, i cili tha sot se nuk ka arsye ligjore e as morale që ish-udhëheqësit e Ushtrisë Çlirimtare të Kosovës të mbahen në paraburgim nga Gjykata Speciale në Hagë dhe se për këtë ai publikoi edhe një letër që i kishte dërguar kryetares së Dhomave të Specializuara të Kosovës, me seli në Hagë, Ekaterina Trendafilova e ku kishte kërkuar lirimin e tyre.

Gucati tha se nuk beson në qëndrimet e Kurtit, duke e akuzuar atë se dikur vetë u kishte thënë ish-luftëtarëve të UÇK-së të shkojnë në Hagë.

Sa i përket letrës që Kurti tha se e ka dërguar në vitin 2022, ai tha se në atë kohë edhe ai ka qenë në burg por që nuk ka dëgjuat për këtë letër.

“Unë nuk du të besoj shumë në atë hiç, por dhashtë Zoti InshAhllah e ka bërë atë kërkesë. Unë në vitin 2022 kam qenë edhe unë në burg, me qenë do të kishim dëgjuar, nuk kemi dëgjuar kurrë. Nuk pres nga Albin Kurti asgjë, një njeri që ju ka thënë ju jeni me shku në Hagë, shkoni në Hagë. S’dua të besoj në asgjë në të. Ky është mirë mi kry detyrat e shtëpisë me ju ndihmu mbrojtjes me pare, që e ka bërë një tavan të çmimit të tyre që i ka bllokuar edhe mjetet, kështu që s’dua të besoj në të hiq”, tha Gucati.

Ndryshe, kryeministri në detyrë, Albin Kurti, sot tha se nuk ekziston asnjë arsye ligjore apo morale që ish-krerët e UÇK-së, Hashim Thaçi, Kadri Veseli, Jakup Krasniqi e Rexhep Selimi, të vazhdojnë të mbahen në paraburgim pesë vjet pas arrestimit të tyre.

Në një publikim në Facebook, Kurti kujtoi se më 2022 i kishte dërguar një letër kryetares së Dhomave të Specializuara, Ekaterina Trendafilova, duke kërkuar lirimin e tyre, por siç theksoi ai, kërkesa nuk kishte marrë përgjigje.

“Po sillet si një dashnor nazelik e nevrik” – Bajqinovci për Abdixhikun

Deputeti i VV-së, Mefail Bajqinovci i ka reaguar kreut të LDK-së, Lumir Abdixhikut i cili sot ka thënë se Kurti dhe Konjufca, sa përqafoheshin do të ishte mirë me i lut disa parti që kishin gatishmëri të merren me ta.

Në lidhje me këtë, Bajqinovci ka bërë një krahasim për Abdixhikun.

“Ai po harron që LVV (48) është më shumë se dyfishi i LDK (20), dhe po ka qejf hala me e lutë. Po sillet si një dashnor/e nazelik/e e nevrik/e”, ka shkruar Bajqinovci