Incidenti në veri – “Kjo është Banjska 2”, publikohen pamjet, ku mbeti i plagosur qytetari

Avokati Ivan Niniq ka publikuar në llogarinë e tij në X foto të makinës së shkatërruar të Millan Vukashinoviqit nga Leposaviqi, i cili u plagos nga forcat e xhandarmërisë serbe fundjavën e kaluar në rrethana të paqarta pranë fshatit Jelakce, dhe u transferua në një spital në Nish, ku mjekët po luftojnë për jetën e tij.

Niniq tha se “Vukashinoviq është qëlluar padyshim me një plumb serb, si një kafshë”.

Së bashku me këto pretendime, ai bashkëngjiti edhe foto të makinës së shkatërruar që i përkiste Vukashinoviqit, teksa bëri thirrje për bashkësinë ndërkombëtare që të reagojë pasi, sipas tij, “kjo është Banjska 2”.

“Makina e Milanit, e cila u shkatërrua gjatë sulmit ndaj tij, u gjet sot! I bëj thirrje EULEX-it dhe KFOR-it të kryejnë një hetim në vendngjarje, por komunitetit ndërkombëtar të reagojë, sepse kjo është ‘Banjska 2’”, tha avokati Niniq.

“Fiton bindshëm” – Shala tregon kush fiton nesër në Prishtinë

Nesër do të mbahen zgjedhjet e balotazhit në Kosovë.

Gara më interesante do të jetë në Prishtinë, ku kandidatë janë Përparim Rama dhe Hajrulla Çeko.

Sipas Shalës, Përparim Rama do të jetë fitues i bindshëm.

Pak orë para zgjedhjeve arrihet një koalicion në Klinë

Në prag të raundit të dytë të zgjedhjeve lokale, në komunën e Klinës është arritur një marrëveshje e re bashkëpunimi mes Aleancës për Ardhmërinë e Kosovës (AAK) dhe Partisë Shqiptare Demokristiane të Kosovës (PSHDK).

Zenun Elezaj ka njoftuar se në zyrën e AAK-së në këtë komunë ka pritur kryetarin e degës së PSHDK-së, Tush Berisha, dhe sekretarin e degës, Lorenc Culaj.

“Me PSHDK-në kemi arritur një marrëveshje parimore për mbështetje në raundin e dytë të zgjedhjeve lokale, që do të mbahen nesër”, ka shkruar Elezaj.

Elezaj i AAK’së do të përballet me Sokol Bashotën e PDK’së në raundin e dytë të zgjedhjeve.

“Do t’i dal zot kësaj toke deri në vetëflijim”- Peci ndez “motorët” e patriotizmit në Mitrovicë

Kandidati i Lëvizjes Vetëvendosje për kryetar të Mitrovicës së Jugut, Faton Peci, ka “ndezur” motorët e patriotizmit në tubimin përmbyllës para raundit të dytë të zgjedhjeve (9 nëntor).

Peci, duke tentuar të rimojë me një gjuhë populiste, tha se është në gjendje edhe të flijohet për qytetin nëse bëhet kryetar i Mitrovicës, shkruan Insajderi.

“Si i pari i Mitrovicës do t’i dalë Zot kësaj toke e kësaj treve, duke i shërbyer me përulësi, e përkushtim dhe nëse është e nevojshme deri në vetëflijim“, deklaroi ai.

Ndër të tjera, Peci përdori gjuhë të vrazhdtë për kundërshtarët politikë, duke e paraqitur partinë e tij si çlirimtare dhe partitë e tjera si tradhtare.

“Fushata ishte e egër në Mitrovicë si asnjëherë më parë në histori, sepse Mitrovica është një betejë, po përplasen trashëgimitë politike. Trashëgimia që kishte angazhimet për zhvillim, sovranitet që nuk ka çmim, as nuk ka kthim dhe, në anën tjetër, kishim pjesën e fushatës së egër të pasuar nga trashëgimia e errët që Ujmanin e shihte të gatshëm ta ndante me Serbinë. Të gatshëm për çdo kompromis, të gatshëm të bëjnë kompromise edhe me Serbi edhe me Rusi. Ata s’janë të gatshëm që Kosova të ketë qeveri, sepse s’kanë probleme me Radoiçiqin dhe Listën Srpska, por problemet i paskan me Albin Kurtin”, deklaroi ndër të tjera ai.

Kajtazi tregon kë do ta votojë në balotazh

Gazetari Vehbi Kajtazi ka treguar se për cilin kandidat do të votojë në balotazh.

Ai ka bërë të ditur se preferenca e tij është Përparim Rama, pasi që sipas tij Rama ka luftuar përball një regjimi bllokues.

“Na te Istogut, ndonse e kishim kryetarin Ilir Ferati, u dashte ta rikonfirmonim voten per te. Une nuk votoj atje, por angazhimin e kisha per rikonfirmimin e Ilirit. Ne Prishtine na pret edhe nje raund votimi. Do ta votoj Perparimin sepse eshte me i mire se kunderkandidati dhe ka luftuar me dinjitet ne perballje me nje regjim bllokues”, thuhet në postimin e Kajtazit në Facebook.

Përpos në Prishtinë, Kajtazi ka treguar edhe preferencën e tij në Mitrovicë.

Në Mitrovicë ai ka thënë se do ta votonte kandidatin e PDK-së, Arian Tahirin.

“Mitrovica si epiqendra e perplasjes se demokracise me autokracine eshte fokusi tjeter im. Po te isha votues ne Mitrovice, me kenaqesine me te madhe do ta votoja Arian Tahirin i cili po perballet me regjimin si askush tjeter deri sot. Pos te tjerash, Ariani nuk eshte hajn. Shpresoj te fitoje demokracia perballe autokracise”, thuhet në postimin e Kajtazit.

Përurohet droni “Made in Kosova”, Kurti: Shteti ynë po shndërrohet në vend që prodhon

Kryeministri në detyrë, Albin Kurti, ka njoftuar të shtunën për përurimin e dronit “Skifteri” të prodhuar në Gjilan nga kompania “Future Minds Academy”. Në një shkrim në Facebook, ai ka thënë se pos furnizimeve nga jashtë, tash Kosova po prodhon vetë dronët e parë.

“Të ardhmen e industrisë së mbrojtjes dhe avancimit të dronëve luftarakë po e ndërtojmë e zhvillojmë edhe në Kosovë. Shteti ynë po shndërrohet në vend që prodhon. Në Gjilan, bashkë me kryetarin Hyseni, vizituam kompanitë e prodhimit të dronëve ushtarak ‘Skifteri’ dhe dronët civil, nga ‘Future Minds Academy’ dhe MIGA SkyShield MAR”, ka shkruar Kurti.

Ai ka dhënë detaje për dronët..

“Made in Gjilan” përveçse natyrisht ‘Made in Kosova’. Droni kamikaz ‘K1’, arrin shpejtësi maksimale prej 180km/h e lartësi deri në 2500 metra. Ndërsa ‘Skifteri’ arrin në 5000 metra lartësi, hapësirë operuese 20km dhe shpejtësi prej 270km/h”, ka shkruar tutje ai.

Kurti ka premtuar se pas furnizimeve me dronët “Bayraktar TB-2”, “Puna” dhe “Skydagger”, do të vazhdojnë investimet për mbrojtje e siguri por edhe ngritje të kapaciteteve dhe prodhimtarisë.

Ndërkaq kryetari i Gjilanit, Alban Hyseni, e ka cilësuar këtë prodhim “frymëzues” dhe “dëshmi që të rinjtë gjilanas janë kreativë”.

“Sot ishte kënaqësi e veçantë që bashkë me Kryeministrin Albin Kurti të marrim pjesë në përurimin e dronit “Skifter”, të prodhuar nga kompania inovative “Future Minds Academy”. Ky është shembull shumë frymëzues dhe dëshmon që të rinjtë gjilanas janë kreativë dhe me vizion të qartë. Bashkë me Kryeministrin takuam afaristë dhe inxhinierë, me të cilët diskutuam për projektet që do ta transformojnë qytetin edhe në mandatin që po e konfirmojmë nesër”, ka shkruar Hyseni në Facebook.

Ky dyshohet të jetë motivi që çoi në vrasjen e dy vëllezërve

Më 6 nëntor në fshatin Gollubovc të Malishevës, Naim Morina, 45 vjeç, dhe Driton Morina, 32 vjeç, dyshohet se u vranë nga dhëndri i tyre, Astrit Isufi, nga një fshat i komunës së Drenasit, i cili u kap një ditë më parë në një shtëpi të pa banuar 

Gjykata merr vendim për Astrit Isufin

Klankosova.tv ka mësuar se para dy dite ngjarja ka ndodhur rrëth orës 11:30, kur i dyshuari kishte shkuar në shtëpinë e viktimave për të marrë bashkëshorten e tij, pas të pameve për babanë e tyre të ndjerë.

Pas disa minutash, sipas burimeve të redaksisë dyshohet se ai është rikthyer dhe ka hapur zjarr, duke i lënë të vdekur dy vëllezërit, njëri në vendin e ngjarjes, derisa tjetri nuk arriti t’iu mbijetonte plagëve sa ishte rrugës për në Qendrën e Mjekësisë Familjare në Kijevë.

Në momentin kritik, siç thanë burimet, gruaja e të dyshuarit (motra e viktimave) dhe vajza e tyre kanë qenë në veturë, duke parë gjithë ngjarjen.

Po ashtu, Klan Kosova ka mësuar se viktimat, dy vëllezërit Morina i kishin kërkuar motrës së tyre të ndahej nga bashkëshorti, në këtë rast nga i dyshuari Astrit Isufi.

Zëdhënësi i Policisë për rajonin e Gjakovës, Sheremet Elezaj, ka konfirmuar për Klankosova.tv se rasti është regjistruar si vrasje e dyfishtë.

Ndaj tij, Prokuroria Themelore në Prishtinë kishte ngritur aktakuzë, ndërsa Isufi kishte qëndruar për disa muaj në paraburgim. Ende nuk dihet saktësisht kur i është ndërprerë masa e sigurisë.

Gjykata merr vendim për Astrit Isufin

Gjykata Themelore në Gjakovë ka caktuar masën e paraburgimit ndaj Astrit Isufit, të dyshuarit për vrasjen e dy vëllezërve në Golluboc të Malishevës.

Në njoftimin e gjykatës, bëhet e ditur se Isufi po dyshohet për dy vepra penale: Vrasje e rëndë dhe armëmbajtje pa leje, shkruan Insajderi.

“Gjykata Themelore në Gjakovë, ka aprovuar kërkesën e Prokurorisë Themelore të Gjakovës, duke i caktuar masën e paraburgimit një (1) muaj të pandehurit A.I., për shkak të dyshimit të bazuar se ka kryer dy vepra penale, atë të vrasjes së rëndë dhe mbajtjes së armës pa leje-autorizim”, thuhet në njoftim.

Gjykata bën të ditur se lënia e të dyshuarit në liri rrezikon që të ndikojë në rrjedhën e procedurës penale, meqë i dyshuari mund të ndikojë tek dëshmitarët ose edhe ta përsërisë veprën penale.

“I pandehuri do të mbahet në paraburgim në kohëzgjatje prej një muaji, i cili do të llogaritet prej kohës së arrestimit më 7 nëntor 2025 dhe do të zgjasë deri më 6 dhjetor 2025”, thuhet në njoftim.

Palët kanë të drejtën e ankesës ndaj këtij vendimi në Gjykatën e Apelit, bën të ditur gjykata

“E besoj Allahun, por jo të dërguarin e tij”- Feraj i VV’së skandalizon, e krahason Kurtin me Zotin

Këshilltari i Albin Kurtit, Hysamedin Feraj, bëri një krahasim skandaloz mes Zotit (Perëndisë) dhe shefit të tij.

Feraj këtë e bëri teksa tentoi të ngriste një analogji ndërmjet bindjeve të një besimtari dhe të një votuesi të Lëvizjes Vetëvendosje.

Sipas tij, votuesi që mbështet Kurtin në nivel qendror, por jo kandidatin e tij lokal, është si një besimtar që pranon Zotin, por mohon profetin.

Deklarimi i tij në Facebook:

Bisedë interesante, sepse “teologjike”, mes votuesve të LVV-së:

Njëri: e votoj Albinin në nivel Kosove, por jo kandidatin që ai më propozon për nivelin lokal.

Tjetri: si muslimani që thotë “e besoj Allahun, por jo të të dërguarin e tij në tokë, profetin Muhamed a.s.”, ose i krishteri që thotë “e besoj Atin, por jo birin (Krishtin), i krishteri nuk i beson Krishtit”.

(nga shënimet e mia gjatë fushatës elektorale).

Avokati: Astrit Isufin e kisha klient, ishte aq mosmirnjohës sa as në telefon nuk më thirri- më ka mbet edhe borxh

Avokati Haki Sertolli ka shkëmbyer një përvojë të hidhur që ka pasur me Astrit Isufin, të dyshuarin për vrasjen e dyfishtë të vëllezërve në Golluboc të Malishevës.

Sertolli me anë të një shkrimi në ‘Facebook’ deklaroi se para disa muajsh Isufin e kishte palë në një rast dhe që përmes ankimimit në Gjykatën e Apelit, kishin arritur që i njëjti pjesën tjetër të dënimit ta vuante në liri, shkruan Insajderi.

Megjithatë, avokati thotë se Isufi ishte mosmirnjohës dhe se i kishte mbetur borxh atij.

“Astritin, para tre-kater muajsh e kisha pale nje rast, te cilin ne Apel arritem ta lirojme dhe pjesen tjeter te denimit ta vuaj ne liri, por ishte aq mosmirnjohes pasi doli nga burgu sa asnje telefonate mem tha faleminderit avokat sma tha, e besa edhe financiarisht borgj me ka mbete. Ama Astrit me sot po ta fali borgjin dhe ndaj meje ske me asnje detyrim financiar”, ka shkruar avokati.