Deputeti i GUXO: Prej sonte kryeqyteti i Kosovës është Mitrovica

Deputeti i lëvizjes Guxo, Nezir Kraki, ka reaguar pas rezultateve preliminare të balotazhit zgjedhor në emisionin Politiko. Ai ka thënë se, ndonëse rezultatet në Prishtinë nuk ishin ashtu siç i kishin pritur, procesi ende nuk ka përfunduar, pasi po pritet numërimi i plotë i votave.

“E thash më herët si me humor: prej sonte kryeqyteti i Kosovës është Mitrovica. Në Prishtinë nuk dolëm siç e kemi prit, por i presim numërimin e të gjitha votave, përfshirë edhe diasporën,” ka deklaruar Kraki.

Mustafa feston në Prishtinë: Xhelal, “hajde nalna”

Deputeti nga radhët e Lidhjes Demokratike të Kosovës, Besian Mustafa i është bashkuar festës së partisë, për fitoren e Përparim Ramës.

Përmes një postimi në Facebook, Mustafa ironizoi me ministrin e Brendshëm në detyrë, Xhelal Sveçlën, i cili mëngjesin e sotëm, ishte  kapur me një aktivist të LDK-së në Prishtinë, pasi i pengoi stema e partisë që i riu kishte vendosur në xhaketë.

“Xhelal, ‘hajde nalna’”, ka shkruar deputeti i LDK-së në Facebook.

Ndryshe, sipas rezultateve preliminare të KQZ-së, del që Përparim Rama mposhti Hajrulla Çekon e VV-së për të parin e kryeqytetin.

Çeku reagon pasi humbi në Prishtinë, e uron Ramën

Sa komuna fituan partitë politike në balotazh?

Në shumicën e komunave të Kosovës tashmë ka përfunduar numërimi i votave për zgjedhjet lokale.

Sipas rezultateve të publikuara nga Komisioni Qendror i Zgjedhjeve (KQZ), Lëvizja Vetëvendosje ka arritur të fitojë në komunat e Mitrovicës, Gjilanit, Fushë Kosovës dhe Obiliqit.

Partia Demokratike e Kosovës (PDK) ka siguruar fitore në tri komuna: Prizren, Vushtrri dhe Kaçanik, pas balotazhit.

Ndërkohë, Lidhja Demokratike e Kosovës (LDK) ka dalë fituese në Prishtinë, Pejë, Viti, Dragash dhe Junik.

Aleanca për Ardhmërinë e Kosovës (AAK) ka fituar në komunat e Gjakovës, Suharekës, Klinës dhe Rahovecit.

Zgjedhjet lokale, vjen reagimi i Kurtit

Kryetari i Vetëvendosjes, Albin Kurti tha se partia me të cilën ai udhëheq ka fituar në shtatë komuna në zgjedhjet lokale të vitit 2025.

Ai, në një paraqitje për media nga selia e Lëvizjes Vetëvendosje në Prishtinë, tha se fitorja në shtatë komuna është një sukses për LVV-në.

“Lëvizja Vetëvendosje është hera e katërt që merr pjesë në zgjedhjet lokale. Herën e parë në vitin 2013 kemi fituar një komunë, herën e dytë në vitin 2017 kemi fituar tri komuna, herën e tretë në vitin 2021 kemi fituar në katër komuna dhe në bazë të të dhënave që kemi marrë nga komisionerët tanë, kësaj radhe kemi fituar shtatë komuna. Ky është një sukses i Lëvizjes Vetëvendosje”, tha ai.

“Ne po i presim ende rezultatet nga komunat e tjera, mirëpo tash më duhet të shkojë me nxitim në tubimin festiv një herë në Fushë Kosovë, pastaj në Obiliq, e në fund në Mitrovicë”, u shpreh Kurti.

Mitrovica me kryetar të ri, Arian Tahiri e uron Pecin për fitoren

Kandidati i Partisë Demokratike të Kosovës për Komunën e Mitrovicës, Arian Tahiri, ka uruar kundër-kandidatin e tij, Faton Pecin, për fitoren në këtë komunë.

Tahiri ka pranuar humbjen, teksa ka uruar Pecin për fitoren.

“Nuk kam pasur komunikim, por do ta uroj atë edhe gjithë qytetarët e Mitrovicës. E uroj Faton Pecin përmes kësaj telefonate”, ka thënë Tahiri në një lidhje telefonike në Debat Plus, raporton Paparaci.

Përkundër se pranoi humbjen, Tahiri tha se ekipe të partisë janë duke përgatitur ankesa për parregullsitë në ditën e zgjedhjeve në këtë komunë.

Përfundon numërimi i votave për Prishtinën – Kaq vota ka më shumë Rama se Hajrulla Çeku

Përparim Rama, ka dalë fitues në garën për komunën e Prishtinës, duke siguruar 51.54% të votave, apo 46,935 vota gjithsej, shkruan Insajderi.

Në anën tjetër, kandidati i Lëvizjes Vetëvendosje, Hajrulla Çeku, ka marrë 48.46% të votave, që përkthehet në 44,126 vota.

Dallimi mes dy kandidatëve është 2,809 vota, me ç’rast Rama ka arritur të ruajë kryeqytetin për LDK-në pas një gare të ngushtë dhe të tensionuar.

Mbyllet numërimi i votave në Gjilan, fitore bindëse e këtij kandidati

Numërimi i votave në Gjilan ka përfunduar, dhe kandidati i Lëvizjes Vetëvendosje, Alban Hyseni, ka dalë bindshëm para rivalit të tij nga LDK, Arbër Ismajli.

Rezultati final preliminar:

Alban Hyseni (VV) – 61.06% / 22,269 vota

• Arbër Ismajli (LDK) – 38.94% / 14,203 vota

Numërohen mbi 90 për qind të votave, Peci drejt fitores

Komisioni Qendror i Zgjedhjeve ka numëruar 92,38 për qind të votave në Komunën e Mitrovicës së Jugut.

Kandidati i Lëvizjes Vetëvendosje, Faton Peci, siç duket po shkon drejt fitores. Peci ka marrë 16,393 vota apo 53,67 për qind të tyre.

Ndërkaq kandidati i PDK’së, Arian Tahiri, ka marrë 14,149 vota apo 46,33 për qind të tyre.

Në bazë të rezultatit aktual, Peci është para Tahirit me mbi dy mijë vota. /Insajderi.org/

Xhafer Gashi jep dorëheqje nga të gjitha funksionet në LDK

Xhafer Gashi ka dhënë dorëheqje nga të gjitha funksionet e tij në LDK.

“Falënderoj secilin prej juve edhe shumë të tjerë që s’janë prezentë këtu. Meqenëse jemi mundu me organizu, ndoshta nuk ia kemi dalë për arsye se dikun na kanë vjedhë”, ka deklaruar Gashi.

“Unë si kryetar i degës së LDK-së në Obiliq, e marr përgjegjësinë për humbjen dhe jap dorëheqje nga Këshilli i Përgjithshëm, nga kryesia e Lidhjes Demokratike dhe nga kryetar i nëndegës”.