Vitia ishte komuna e vetme ku votat e diasporës mund të ndryshonin rezultatin e balotazhit, por megjithatë LDK ka arritur ta ruajë epërsinë.
Sipas numërimit të votave me postë:
VV ka marrë 317 vota,
LDK ka marrë 234 vota.
Edhe pse Lëvizja Vetëvendosje doli bindshëm fituese në diasporë, diferenca nuk mjaftoi për ta kapërcyer avantazhin e krijuar nga votimi i rregullt, transmeton Indeksonline
Në Viti po zhvillohet beteja më e ngushtë e balotazhit. Diferenca mes dy kandidatëve është vetëm 197 vota, ndërsa 552 vota nga diaspora pritet të numërohen sot.
LDK me Sokol Halitin ka 8,352 vota, ndërsa kandidati i VV-së, Arsim Ademi, 8,155 vota.
Meqë numri i votave me postë është më i madh se hendeku mes tyre, Vitia mbetet e vetmja komunë ku rezultati mund të ndryshojë plotësisht.
QNR sot nga ora 10:00 nis numërimin e fletëvotimeve të diasporës për raundin e dytë në 18 komuna, ka konfirmuar zëdhënësi i KQZ-së, Valmir Elezi.
Në faqen e Komisionit Qendror të Zgjedhje tashmë janë publikuar rezultatet e numërimit të votave me kusht dhe të atyre të personave me nevoja të veçanta për balotazhin e 9 nëntorit në komunën e Pejës.
Sa i përket votave me nevoja të veçanta, Gazmend Muhaxheri ka marrë 107, derisa kandidati i VV-së, Taulant Kelmendi vetëm 38.
Ndërsa tek votat me kusht, Kelmendi ka marrë 14 vota, derisa Muhaxheri vetëm 8.
Përzgjedhësi i Kombëtares së Kosovës, Franco Foda ka ndarë tashmë mendjen për formacionin që do ta vendos për ndeshjen e sotme (e shtunë) ndaj Sllovenisë, në kuadër të kualifikuese për Kupën e Botës 2026.
Kosova do të luajë si mysafir i Sllovenisë në ndeshjen e parafundit të Grupit B, e cila pritet të zhvillohet në stadiumin “Stozice” të Lubjanës me fillim nga ora 20:45.
Kjo ndeshje është shumë e rëndësishme për të dyja kombëtaret, por sidomos për Kosovën, e cila me një barazim siguron pozitën e dytë apo ‘play-off’-in për kualifikim në Kampionatin Botëror.
Kështu, trajneri gjerman, Foda, ka vendosur tashmë për formacionin që pritet të luajë në ndeshjen jetike ndaj Sllovenisë.
Sipas burimeve të Telegrafit, Foda do të vazhdojë t’i besojë rreshtimit 3-5-2, i cili në mbrojtje transformohet në 5-3-2, ku pjesë e tij do të jenë disa ndryshime të domosdoshme.
Ndryshimi i parë do të jetë në portë, ku Amir Saipi do ta marrë vendin e Arijanet Muric, i cili mungon shkaku i kartonëve.
Kapiteni Amir Rrahmani pritet të kthehet në ekip pas lëndimit dhe do të marr vendin e tij nga minuta e parë.
Përveç Rrahmanit, në treshen e mbrojtjes pritet të luajnë edhe Albian Hajdari dhe Lumbardh Dellova, i cili shihet si i favorizuar ndaj Fidan Alitit, ndërsa krahët do t’i mbulojnë Mërgim Vojvoda dhe Dion Gallapeni.
Mesfusha do të përbëhet nga Leon Avdullahu, Elvis Rexhbeçaj dhe Florent Muslija, teksa në sulm dyshja Vedat Muriqi dhe Fisnik Asllani.
Milot Rashica dhe Edon Zhegrova pritet të marrin minutat e tyre gjatë pjesës së dytë.
Në faqen e Komisionit Qendror të Zgjedhje tashmë janë publikuar rezultatet e numërimit të votave me kusht dhe të atyre të personave me nevoja të veçanta për balotazhin e 9 nëntorit në komunën e Prizrenit.
Shaqir Totaj i PDK-së nga votat me nevoja të veçanta ka marrë 47 derisa Artan Abrashi i VV-së 28.
Sa i përket votave me kusht, Abrashi i VV-së ka marrë 75 derisa Totaj 52.
Në faqen e Komisionit Qendror të Zgjedhje tashmë janë publikuar rezultatet e numërimit të votave me kusht dhe të atyre të personave me nevoja të veçanta për balotazhin e 9 nëntorit në komunën e Mitrovicës së Jugut.
Arian Tahiri i PDK-së nga votat me nevoja të veçanta ka marrë 38 vota, derisa Faton Peci i LVV-së, 26.
Ndërsa sa i përket votave me kusht, Faton Peci i LVV-së ka marrë 70 vota, ndërsa Arian Tahiri i PDK-së vetëm 39.
Kryetari i degës së AAK-së në Prizren, Besnik Krasniqi, ka thënë se Aleanca për Ardhmërinë e Kosovës duhet ta shqyrtojë me përgjegjësi mundësinë e bashkëpunimit me Lëvizjen Vetëvendosje. Krasniqi, përmes një postimi në Facebook, ka theksuar se duhet të shmangen zgjedhjet e jashtëzakonshme.
Krasniqi ka vlerësuar se dalja e Glauk Konjufcës si kandidat për kryeministër ka ndryshuar llogaritë politike në vend dhe se kjo situatë kërkon një qasje serioze, të matur dhe larg interesave të ngushta partiake.
“Aleanca duhet ta shqyrtojë me përgjegjësi mundësinë e bashkëpunimit, sidomos nëse kjo hap rrugën për stabilitet institucional, shmang zgjedhjet e jashtëzakonshme dhe zgjidh njëherë e mirë çështjen e presidentit. Nëse VV-ja dhe z. Konjufca janë të sinqertë në këtë drejtim, unë besoj se Aleanca dhe kryetari Haradinaj do të dinë të marrin vendimin e duhur, si gjithmonë kur është fjala për të mirën e Kosovës”, ka shkruar ai.
Krasniqi ka theksuar se sot kërkohet mençuri, jo retorikë boshe.
“Kërkohet stabilitet, jo tension. Kërkohet vendim, jo improvizim. Kosova ka nevojë për drejtim të qartë dhe kjo është koha kur burrat e shtetit duhen parë në vepër”, ka shtuar ai.
Në faqen e Komisionit Qendror të Zgjedhje tashmë janë publikuar rezultatet e numërimit të votave me kusht dhe të atyre të personave me nevoja të veçanta për balotazhin e 9 nëntorit në komunën e Prishtinës.
Kandidati i LDK-së për kryetar, Perparim Rama, pas numërimit 100% të votave të personave me nevoja të veçanta ka marrë 108 vota, derisa ai i LVV-së, Hajrulla Çeku ka marrë 68.
Ndërsa sa i përket votave me kusht, Çeku ka marrë 82 vota, derisa Perparim Rama 54.
Klankosova.tv merr vesh se Shpend Qalaj, është i riu që humbi jetën tragjikisht në fshatin Mirash të Ferizajt, pasi ra në kontakt me rrymën derisa po punonte në pullazin e shtëpisë.
Familjarët e të ndjerit kanë njoftuar se varrimi i tij do të bëhet sot në varrezat e fshatit Mirash, transmeton Klankosova.tv.
Rastin e rëndë e ka raportuar edhe Policia e Kosovës.
“Është raportuar se viktima mashkull kosovar, deri sa ishte duke punuar në pullazin e shtëpisë ka rënë në kontakt me rrymën dhe si pasojë ka humbur jetën. Vdekjen e viktimës e ka konstatuar mjeku ndërsa me kërkesë të familjarëve dhe konsultim me prokurorin trupi i pajetë u është liruar familjarëve për ceremoni mortore”, ka njoftuar Policia.
