Gruaja e rrah burrin, e bën për spital

Një rast i dhunës në familje është raportuar në Prishtinë, ku një burrë ka denoncuar bashkëshorten e tij për dhunë fizike dhe psikike, mëson Sinjali nga burime të afërta me hetimin.

Burimet bëjnë të ditur se ankues në këtë rast është N. A., rreth 38-vjeçar, ndërsa e dyshuar figuron bashkëshortja e tij, A. B. A.

Sipas informatave, rasti është raportuar më 15 maj 2026 rreth orës 23:05 në Stacionin Policor “Jugu” në Prishtinë, ndërsa incidenti dyshohet të ketë ndodhur më herët, rreth orës 19:25 në rrugën “Holger Pedersen”.

Sinjali mëson se pas një mosmarrëveshjeje të çastit, e dyshuara dyshohet se e kishte goditur bashkëshortin e saj dhe, sipas deklarimit të ankuesit, kishte ushtruar vazhdimisht edhe dhunë psikike ndaj tij.

Burimet bëjnë të ditur se ankuesi ka deklaruar po ashtu se nuk ishte lejuar të kthehej në banesën ku bashkëjetonin së bashku me katër fëmijët e tyre.

Ai ka marrë trajtim mjekësor në QKUK, ndërsa më pas është larguar drejt familjes së tij në Viti deri në pajisjen me urdhër mbrojtës.

Sipas burimeve, prezenca e të dyshuarës nuk ka arritur të sigurohet deri në këtë fazë të hetimit.

Me udhëzim të Prokurorit kujdestar për dhunë në familje, rasti është iniciuar si: “Dhunë në familje”.

Grumbullimi i qytetarëve dhe traktorët në rrugët e Skënderajt, Mehani: Metoda të Radojiçiqit

Kryetari i degës së Vetëvendosjes në Skenderaj, Hysni Mehani, ka përshkruar grumbullimin e qytetarëve dje dhe vendosjen e disa traktorëve në rrugë para stacionit policor ku po intervistohej kryetari i komunës, Sami Lushtaku, për rastin ku Mehani u sulmua.

Mehani krahasoi ngjarjen me trazirat në veri dhe tha se Lushtaku po mundohet t’i imitojë metodat e Milan Radoiçiqit.

“Nëse parmbrëmë prania e njësisë speciale ua kujtonte një të kaluar të errët, çfarë u kujtonte bllokimi i rrugëve dhe i policisë me kamionë, traktorë dhe mjete të tjera? Sami Lushtaku mund t’i imitojë metodat e Radoiçiqit në Drenicë, por Drenica kurrë nuk do të mendojë serbisht. Deri në frymën e fundit”, ka shkruar ai në rrjetin social Facebook.

Vdes 60 vjeçari që po trajtohej në QKUK

Ka ndërruar jetë në QKUK personi që ishte plagosur rëndë në janar të këtij viti në motelin “Villa Pisha” në Sllatinë të Fushë Kosovës, në një rast që po hetohej si “Vrasje në tentativë” dhe “Grabitje”, mëson Sinjali nga burime të afërta me hetimin.

Burimet bëjnë të ditur se viktima është Ajet Krasniqi, rreth 60-vjeçar, i cili kishte qenë duke u trajtuar në repartin intensiv të QKUK-së që nga dita e incidentit.

Ngjarja kishte ndodhur më 23 janar 2026 rreth orës 15:00 në Motelin “Villa Pisha” në rrugën e Pejës në Sllatinë.

Sipas informatave, pas veprimeve intensive hetimore, më 26 janar 2026 ishte identifikuar dhe arrestuar i dyshuari Sh.J., rreth 25-vjeçar.

Sinjali mëson se ai ishte intervistuar në prezencë të avokatit mbrojtës dhe me urdhër të Prokurorit ishte dërguar në mbajtje për 48 orë.

Burimet bëjnë të ditur se gjatë hetimeve, ndaj tij ishte shtuar edhe vepra penale “Grabitje”, pasi dyshohej se kishte marrë një shumë parash nga viktima.

Zhvillimi i fundit ka ndodhur më 16 maj 2026, kur infermierët e repartit intensiv në QKUK kanë njoftuar familjarët se rreth orës 00:30, Ajet Krasniqi kishte ndërruar jetë.

Me urdhër të Prokurorit kujdestar, trupi i pajetë do të tërhiqet nga Instituti i Mjekësisë Ligjore dhe do t’i nënshtrohet obduksionit.

Pas vdekjes së viktimës, pritet që kualifikimi juridik i rastit të pësojë ndryshim në fazat e mëtejme të procedurës penale.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

Tentoi ta godasë policin me veturë gjatë ndalimit në Prizren – arrestohet 32-vjeçari

Një incident serioz ka ndodhur në Prizren, ku një shofer dyshohet se tentoi ta godiste me veturë një zyrtar policor pasi u ndalua për vozitje të rrezikshme, mëson Sinjali nga burime të afërta me hetimin.

Burimet bëjnë të ditur se i dyshuar është D.B, rreth 33-vjeçar.

Sipas informatave, ngjarja ka ndodhur më 15 maj 2026 rreth orës 18:55 në fshatin Serbicë e Poshtme.

Sinjali mëson se patrulla policore kishte pranuar informacion për një automjet me targa “04 … ….” që po zhvillonte vozitje të rrezikshme.

Pas lokalizimit dhe ndalimit të veturës, gjatë komunikimit me policët, i dyshuari dyshohet se kishte nisur automjetin me vrull në drejtim të njërit prej zyrtarëve policorë, me qëllim goditjeje.

Burimet bëjnë të ditur se pas urdhrave të përsëritur policorë, ai kishte ngadalësuar lëvizjen dhe më pas ishte vënë nën kontroll nga zyrtarët policorë.

Gjatë arrestimit, i dyshuari ka pësuar lëndime të lehta trupore dhe fillimisht është dërguar për trajtim në Spitalin Rajonal të Prizrenit, e më pas është shoqëruar në stacion policor.

Në lidhje me rastin është njoftuar Prokurori kujdestar, ndërsa hetimet po zhvillohen nga Njësia Rajonale e Hetimeve.

Rasti është iniciuar si “Sulm ndaj personit zyrtar”.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.