Deputetja kërkon hetim të çdo parregullsie, ndërsa KQZ sqaron ndalimin e përkohshëm të numërimit të votave.
Vlora Çitaku theksoi se qytetarët e Mitrovicës e kanë merituar dhe e meritojnë një proces zgjedhor demokratik, transparent dhe të ndershëm, pa intimidime, pa presione dhe pa ndërhyrje.
“Çdo parregullsi, para, gjatë dhe pas procesit zgjedhor, duhet të hetohet nga organet kompetente, pa asnjë ndikim apo ndërhyrje politike,” tha Çitaku.
Deklarata e saj erdhi pas raportimeve se gjatë mbrëmjes numërimi i votimeve në Mitrovicë ishte ndalur përkohësisht. Komisioni Qendror i Zgjedhjeve (KQZ) sqaroi se ndalimi ishte për shkak të disa çështjeve teknike dhe garantoi se procesi i numërimit nuk është komprometuar dhe se çdo parregullsi do të trajtohet sipas ligjit.
Çitaku shtoi se vota është e shenjtë dhe duhet mbrojtur me çdo kusht, duke nënvizuar rëndësinë e respektimit të procesit zgjedhor.
