Përleshje fizike mes dy mësimdhënësve
Policia Rajonale e Ferizajt ka konfirmuar se ka ndodhur një përleshje fizike mes dy mësimdhënësve në një shkollë të mesme të qytetit.
Sipas zëdhënësit të Policisë, Kanun Veseli, incidenti ka ndodhur të enjten rreth orës 09:25 në korridorin pranë sallës së mësimdhënësve, transmeton Zeri.info.
“Më datë 29.01.2026, rreth orës 11:15, Policia ka pranuar informacionin për këtë rast. Dy profesorë janë përfshirë në një përleshje fizike, ndërsa situata është qetësuar menjëherë nga drejtoria e shkollës. Të dyja palët janë paraqitur në stacion policor dhe janë intervistuar nga Njësia e Hetimeve”, ka deklaruar Veseli.
Policia ka nisur hetimet për të sqaruar rrethanat e ngjarjes dhe për të marrë masat e nevojshme ligjore. /Zëri