Studimi i ri: Ilaçi që po jep shenja pozitive tek pacientët me kancer të cilëve nuk iu ndikon më as kemioterapia
Mjekët kanë përshëndetur rezultatet e një studimi klinik që tregon se një injeksion i ri kundër kancerit, i cili vepron në tre mënyra të ndryshme, mund të eliminojë plotësisht tumoret te disa pacientë. Sipas The Guardian, në një studim ndërkombëtar të zhvilluar në 11 shtete, injeksioni iu dha pacientëve, kanceri i të cilëve ishte përhapur ose ishte rikthyer dhe nuk po reagonte më ndaj trajtimeve të tjera.
Ilaçi, i quajtur amivantamab, arriti të zvogëlojë tumoret te më shumë se një e treta e pacientëve, ndërsa përmirësime të mëdha u vunë re brenda pak javësh. Te 15 pacientë, mjekët konstatuan se tumoret ishin zhdukur plotësisht.
“Janë rezultate jashtëzakonisht të forta te pacientët, sëmundja e të cilëve është bërë rezistente si ndaj kimioterapisë ashtu edhe ndaj imunoterapisë”, tha Kevin Harrington, profesor i terapive biologjike kundër kancerit në Institutin për Kërkime mbi Kancerin në Londër (ICR).
“Ky është një grup pacientësh që kanë shumë pak mundësi trajtimi, prandaj ky nivel përfitimi është vërtet mbresëlënës”, shtoi ai.
Harrington, i cili është gjithashtu onkolog në Royal Marsden NHS Foundation Trust, shtoi se ky trajtim “ka potencialin të ndihmojë mijëra pacientë çdo vit”.
Në studim morën pjesë 102 pacientë me kancer të kokës dhe qafës, forma e gjashtë më e zakonshme e kancerit në botë. Te 43 pacientë tumoret u zvogëluan ose u zhdukën plotësisht. Nga këta, 28 pacientë patën tkurrje të ndjeshme të tumoreve, ndërsa te 15 tumoret u eliminuan krejtësisht.
Studiuesit thanë se injeksioni ka treguar rezultate të ngjashme edhe te pacientët me kancer të mushkërive. Amivantamab, i zhvilluar nga Johnson & Johnson, po vlerësohet aktualisht në rreth 60 studime klinike, kryesisht për kancerin e mushkërive, por edhe për kancerin kolorektal, të trurit dhe të stomakut.
Ilaçi sulmon kancerin në tri mënyra. Ai bllokon proteinën EGFR, e cila ndihmon rritjen e tumoreve, si dhe MET, një mekanizëm që qelizat kancerogjene përdorin shpesh për t’i shpëtuar trajtimit. Gjithashtu, ai ndihmon në aktivizimin e sistemit imunitar për të sulmuar tumorin.
Një nga pacientët e parë që përfitoi nga trajtimi ishte Carl Walsh, 56 vjeç, i cili u diagnostikua me kancer të gjuhës në maj të vitit 2024 dhe iu bashkua studimit OrigAMI-4 në Royal Marsden në korrik të vitit 2025.
“Fillimisht u trajtova me kimioterapi dhe imunoterapi, por fatkeqësisht ato nuk dhanë rezultat”, tha ai. “Më pas më rekomanduan të merrja pjesë në studimin OrigAMI-4. Tani jam në ciklin e 17-të të trajtimit dhe jam shumë i kënaqur me përparimin e deritanishëm.”
Ndryshe nga shumë trajtime të tjera kundër kancerit, amivantamab jepet me një injeksion të vogël nën lëkurë dhe jo përmes infuzionit intravenoz, duke e bërë trajtimin më të shpejtë, më të përshtatshëm për pacientët dhe më të lehtë për t’u ofruar në klinikat ambulatore.
Shumica e efekteve anësore ishin të lehta ose mesatare dhe më pak se një në dhjetë pacientë u detyruan ta ndërprisnin trajtimin.
Walsh tha se tani ndihet në gjendje të jetojë normalisht.
“Para se të filloja trajtimin, e kisha të vështirë të flisja dhe të haja për shkak të ënjtjes dhe dhimbjeve. Që nga fillimi i trajtimit, ënjtja është zvogëluar ndjeshëm dhe dhimbjet janë reduktuar shumë. Gjithashtu nuk kam më efektet anësore të rënda që përjetoja gjatë kimioterapisë.”
Ai shtoi se në periudhën më të vështirë ushqehej kryesisht me supë, puding me oriz, ravioli dhe spageti të konservuara, si dhe shumë omëleta, të shoqëruara me pije ushqyese të përshkruara nga mjekët. Si pasojë kishte humbur shumë peshë.
“Pas vetëm dy cikleve të trajtimit fillova të ushqehesha më normalisht, ndërsa pas gjashtë muajsh isha kthyer plotësisht në dietën e zakonshme. Gjëja që më pëlqeu më shumë ishte bifteku im i parë i madh. Tani flas normalisht dhe në punë përdor rregullisht kufje komunikimi pa asnjë problem.”
Studiuesit theksuan gjithashtu se studimi u përqendrua te pacientët me kancer të kokës dhe qafës që nuk kishin karcinomë orofaringeale me qeliza skuamoze të lidhur me virusin HPV. Kjo konsiderohet veçanërisht e rëndësishme, pasi kanceret e kokës dhe qafës që nuk shkaktohen nga HPV zakonisht janë më të vështira për t’u trajtuar.
Pacientët që morën amivantamab jetuan mesatarisht 12.5 muaj pas fillimit të trajtimit, pavarësisht se bëhej fjalë për një formë kanceri me prognozë shumë të dobët pasi trajtimet standarde kishin pushuar së funksionuari.
Kristian Helin, drejtor ekzekutiv i ICR-së, tha:
“Ky studim tregon se zhvillimi i trajtimeve të reja përmes kërkimeve të kujdesshme shkencore mund të sjellë përparime të rëndësishme edhe për pacientët që kanë shumë pak alternativa trajtimi. Arritja e këtij niveli të reagimit të tumoreve dhe rezultatet inkurajuese të mbijetesës në një grup pacientësh kaq të vështirë për t’u trajtuar përfaqësojnë një hap të rëndësishëm përpara.”