“Lamtumirë, Lorik” – familjari me fjalë prekëse pas aksidentit fatal ku vdiq kosovari në Mirditë

Një 38-vjeçar nga Kosova ka humbur jetën mbrëmjen e së enjtes pas një aksidenti të rëndë me motoçikletë në autostradë, në afërsi të fshatit Fan të Mirditës.

Viktima është identifikuar si Lorik Deci. Lajmi për vdekjen e tij është bërë i ditur edhe nga një familjar, i cili përmes një postimi në rrjetet sociale ka shprehur dhimbjen për ndarjen e parakohshme nga jeta.

“Lamtumirë, Lorik… Ka lajme që ta thyejnë zemrën. Ikja jote e parakohshme na tronditi të gjithëve”, ka shkruar familjari.

Sipas Policisë së Shqipërisë, aksidenti ka ndodhur rreth orës 20:00. Dyshohet se 38-vjeçari ka humbur kontrollin mbi motoçikletën, duke dalë nga rruga.

Ai është dërguar me urgjencë në Spitalin e Rrëshenit, por, pavarësisht përpjekjeve të mjekëve, nuk ka arritur t’u mbijetojë plagëve të marra.

Në vendin e aksidentit kanë dalë shërbimet policore dhe grupi hetimor, ndërsa vijojnë hetimet për të përcaktuar rrethanat dhe shkaqet e plota të aksidentit tragjik.

Familjarët dhe të afërmit e kanë përshkruar Lorikun si një person që do të mbahet mend për buzëqeshjen dhe kujtimet që la pas, duke shprehur ngushëllime për familjen Deci, miqtë dhe të gjithë të afërmit.