Ministri i Shëndetësisë, Arben Vitia, në Këshillin e Përgjithshëm të VV-së, ka thënë se gjatë këtyre katër vjet të qeverisjes kanë përmirësuar kushtet për mjekët dhe infermierët, duke filluar me rritjen e pagave të mjekësve specialistë, të cilët sot nuk kanë pagesa mujore nën 2 mijë euro.
Sipas Vitisë, kjo është një rritje substanciale të pagave në gjithë historinë e pasluftës në Kosovë.
“Kemi pasur edhe dimension tjetër të këtyre investimeve, përmirësimi i kushteve për mjekët dhe infermierët në spitalet tona. Kemi pasur rritjen më substanciale të pagave në gjithë historinë e pas luftës në Republikën e Kosovës. Sot reflektohet me atë që specialistët e shumtë në Qendrën Klinike Universitare të Kosovës, në spitalet e përgjithshme nuk kanë më rrogë bashkë me kujdestari dhe shtesat e tjera, të cilat në koordinim të plotë dhe duke falënderuar Ministrinë e Financave, sot nuk ka më rrogë të mjekëve specialistë nën 2 mijë euro, një rrogë e cila është një nga rrogat më të larta në të gjithë rajonin e Ballkanit Perëndimorë”, ka thënë Vitia.
Ai ka theksuar se përveç kësaj, do të shtohen mbi 550 mjekë specialistë dhe infermierë.
“Qytetarëve tonë do t’i shtohen mbi 550 mjekë specialistë dhe infermierë, të cilët do të kontribuojnë për shërbime sa më cilësore. Synimi jonë është që të gjithë specialistët, të cilët jo për faj të tyre, deri tani kanë mbetur pa punë të kenë një vend pune meritorë në shërbim të qytetarëve të republikës. Është hera e parë në MSH që specializimet jepen në mënyrë të koordinuar, të projektuar, cilësore me monitorim të vazhdueshëm që specializantët e ri të bëhen specialist ë denjë të fushave të tyre në shërbim të qytetarëve”, ka shtuar ai, shkruan KP.
Vitia ka theksuar se për katër vjet është premtuar buxhet për 40 milionë euro për listën e barnave, por MSH-ja ka arritur shumën prej 63 milionë eurosh.