Telefonat e mençur nuk janë faktori i vetëm që iu lë zgjuar.
Nëse shpesh herë e gjeni veten duke numëruar orët deri në agim, atëherë duhet t’i shqyrtoni disa faktorë të papritur që mund të jenë shkaktarët e pengesës së gjumit.
Ani pse stresi, kafeina e drita blu e ekraneve janë armiqtë më të njohur të gjumit, ekzistojnë edhe faktorë të tjerë të fshehur që ndihmojnë në mungesën e gjumit tuaj.
1. Merimangat e pluhurit
Merimangat e pluhurit janë ato krijesa mikroskopike që shfrytëzojnë lëkurën tuaj të vdekur, e cila mbetet në jastëkë dhe çarçafë. Ne humbasim rreth 500 milionë qeliza të lëkurës çdo ditë, prandaj këto krijesa ndihen si në shtëpinë e tyre.
Një rritje e ndjeshmërisë ndaj merimangave të pluhurit mund të shkaktojë simptoma të pagjumësisë. Prandaj, është e rëndësishme të ndërroni këllëfët e jastëkut rregullisht. Gjithashtu, lani çarçafët çdo javë, pastroni dhomën e gjumit të paktën dy herë në javë dhe mos harroni të pastroni gjithashtu perdet dhe sipërfaqet e tjera.
2. Shpërqendrimet
Shikimi i televizorit, bisedat në telefon dhe çdo aktivitet tjetër përveç gjumit aktivizojnë sinjalet e zgjimit në tru. Këto aktivitete krijojnë një lidhje me vendin ku flini, duke e bërë më të vështirë të bini në gjumë.
Mbani shpërqendrimet larg dhomës suaj të gjumit dhe sigurohuni të largoni telefonin para se të shkoni në shtrat. Provoni të ndërprisni aktivitetet të paktën 30 minuta përpara se të flini për të çaktivizuar këto stimuj që shkakojnë pagjumësi.
3. Rrëmuja në dhomë
Një dhomë e çrregullt mund të shkaktojë stres dhe të rrisë nivelin e ankthit, duke e bërë më të vështirë të flini. Rrethimi nga gjëra që kërkojnë organizim mund të mbajë trurin tuaj aktiv dhe t’ju bëjë të qëndroni zgjuar.
Nuk është e nevojshme të bëni një pastrim të thellë, por organizimi i hapësirave tuaja mund të ndihmojë shumë në ndjenjën e qetësisë.
4. Alkooli dhe ilaçet
Disa ilaçe që përdorni mund të jenë shkaktarë të pagjumësisë. Disa zhbllokues për hundët përmbajnë stimulues që dëmtojnë gjumin, ndërsa shumë antidepresantë mund të rrisin problemet me gjumin, citon Anabel.
Mos lini pas dore çdo ndryshim që vëreni në cilësinë e gjumit tuaj dhe mos harroni se alkooli gjithashtu kontribuon në prishjen e gjumit. Edhe pse mund t’ju ndihmojë të flini më shpejt, ai ndikon në cilësinë e gjumit gjatë natës.