Çitaku për intervistën e Konjufcës: Paska folur sikur ta kishte dorëzuar librezën e VV-së

Sekretarja e Partisë Demokratike të Kosovës (PDK), njëherit edhe kandidate për deputete, Vlora Çitaku ka ironizuar me intervistën e njeriut të dytë të Lëvizjes Vetëvendosje (LVV), Glauk Konjufca, për të cilin tha se fliste sikur ta kishte dorëzuar librezën e Vetëvendosjes në hyrje të emisionit.

Çitaku ka vlerësuar se intervista e tij mbrëmë ishte sikurse e një mysafir rasti në historinë e Vetëvendosjes.

“Konjufca dje paska folur sikur ta kishte dorëzuar librezën e Vetëvendosjes në hyrje të “Pressing”-ut në T7. Në njërën anë dalin me thirrje patetike “Mos lësho pe”.

Ndërsa, në anën tjetër, Konjufca vetë paska lëshuar pe në gjithçka. Madje, e paska lëshuar edhe Vetëvendosjen, gjuhën e saj, arrogancën e saj, dështimet e saj.

Pesë vjet në pushtet i paska shndërruar në amnezi politike. Paska folur sikur të ishte një mysafir i rastit në historinë e Vetëvendosjes.

Një këshillë miqësore: në vend të një narrative të re në funksion të zgjedhjeve, filloni duke marrë përgjegjësi për përçarjet dhe linçimet që keni ushqyer”, ka shkruar Çitaku për intervistën e Konjufcës  dhënë mbrëmë në në T7.

Kosova pranohet në Federatën Ndërkombëtare të Golfit

Kosova është pranuar zyrtarisht si anëtarja e 154-të e Federatës Ndërkombëtare të Golfit.

Ky vendim, u bë i ditur me anë të një njoftimi të Federatës së Golfit të Kosovës e cila tha se ai shënon një prej momenteve më të rëndësishme në historinë e sportit të golfit në vendin tonë.

“Anëtarësimi në IGF nuk është vetëm një status formal – është një dëshmi e rrugëtimit tonë të gjatë. Është rezultat i më shumë se një dekade pune të palodhshme, qindra takimeve ndërkombëtare, mijëra orëve në terren, ndërtimit nga themelet të një strukture kombëtare të golfit dhe përkushtimit të çdo individi që besoi se Kosova mund të jetë pjesë e familjes globale të këtij sporti fisnik.

“Një vend të veçantë në këtë histori e zë shqiptaro-amerikani Dino Asanaj, vizionari që e themeloi golfin në Kosovë dhe i dha jetë këtij sporti në kohë kur pak kush e besonte. Kontributi i tij mbetet themeli mbi të cilin u ndërtua e gjithë struktura e sotme”, thonë nga kjo federatë.

Sipas saj, një rol të jashtëzakonshëm ka pasur mërgata shqiptare, e cila në çdo hap të rrugëtimit tonë ka qenë forcë shtytëse.

“Me përkushtimin, mbështetjen financiare, rrjetëzimin ndërkombëtar dhe përfaqësimin dinjitoz të Kosovës, mërgata ka kontribuar thellësisht në ngritjen e golfit në nivelin ku jemi sot.Falë tyre, Kosova ka qenë e pranishme në tryezat dhe institucionet ku shpesh nuk ka qenë e lehtë të depërtohet.Ky sukses është edhe i tyre — i secilit shqiptar që nga larg ka ndihmuar, ka besuar dhe ka kontribuar”.

“Sot Kosova është një vend që përfaqëson golfin në arenën ndërkombëtare.Ky është fillimi i një kapitulli të ri: pjesëmarrja në garat botërore, mundësia e përfshirjes në ciklet olimpike, forcimi i infrastrukturës vendore, zhvillimi i talenteve të rinj dhe afirmimi i Kosovës si një destinacion serioz sportiv”.

Faton Peci merr vendimin e parë si kryetar i Mitrovicës

Kryetari i Mitrovicës, Faton Peci ka marrë vendimin e parë si kryetar, për themelimin e komisionit për Identifikimin e Nevojave për Fëmijet me Nevoja të Veçanta Arsimore, transmeton Gazeta Online Veriu.info.

“Ky komision do identifikojë me saktësi nevojat e nxënësve, me fokus ata me vështirësi në të nxënë dhe me nevoja të veçanta”, ka shkruar Peci.

Kujtojmë se Peci u betua si kryetar i Mitrovicës të premtën me 12 dhjetor.

Postimi i plotë:

Mirëmëngjesi

Vendimi i parë si kryetar që e mora është themelimi i komisionit për Identifikimin e Nevojave për Fëmijet me Nevoja të Veçanta Arsimore.

Ky komision do identifikojë me saktësi nevojat e nxënësve, me fokus ata me vështirësi në të nxënë dhe me nevoja të veçanta.

Pasqyra më e mirë e një shoqërie është se si iu qaset këtyre kategorive .

Paralajmërohet borë dhe temperatura -20°C në Kosovë

Menaxheri i departamentit meteorologjik në KANS, Sherif Gosalci ka thënë se do të ketë mjegull edhe në ditët në vijim.

“Zhvillimet aktuale preliminare, na paralajmërojnë për një ndërrim të motmoteve me reshje bore dhe acar që mund të përshkohet me temperatura polare edhe deri – 20°C”, ka thënë Gosalci.

Vrasje në tentativë në Prishtinë, dy persona hyjnë në oborrin e një shtëpie dhe qëllojnë me armë zjarri

Një vrasje në tentativë ka ndodhur dje në Prishtinë.

Policia e Kosovës bën të ditur se se dy persona të panjohur kanë hyrë në oborrin e një personi në Prishtinë dhe kanë shtënë me armë zjarri në drejtim të shtëpisë.

Disa predha kanë depërtuar brenda, duke dëmtuar dhe disa mobilje shtëpiake. Në vendin e ngjarjes janë gjetur dhe sekuestruar 27 gëzhoja.

“Prishtinë / 15.12.2025 – 19:21. Është raportuar se dy persona të panjohur kanë hyrë në oborrin e ankuesit mashkull kosovar dhe kanë shtënë me armë zjarri në drejtim të shtëpisë, ku disa predha kishin depërtuar brenda dhe kishin dëmtuar disa mobile shtëpiake. Në vendin e ngjarjes janë gjetur dhe sekuestruar 27 gëzhoja”, bën të ditur policia.

Plagoset me armë zjarri tiktokeri i njohur shqiptar

Personazhi i njohur i “TikTok”, Fabion Kuçi ose GUCCI, është plagosur mbrëmjen e kaluar në qytetin e Durrësit, në lagjen Nr. 9, e njohur si lagja e Re. Policia lokale ka identifikuar autorin dhe po punon për arrestimin e tij, ndërkohë që i plagosuri ndodhet nën kujdesin e mjekëve në spital.

Fabion Kuçi ka një histori të mëparshme kriminale jashtë vendit, duke qenë i dënuar në Angli për vepra të ndryshme penale dhe duke shërbyer disa vite burg. Ai ishte kthyer në Shqipëri vetëm pak muaj më parë dhe ishte bërë mjaft aktiv në rrjetin social TikTok, ku shpesh herë përfshihej në debate dhe përplasje me personazhe të tjerë si Kozak Braçi dhe Xhemal Ujka (Fire).

Policia vijon hetimet për të zbardhur rrethanat e incidentit dhe për të ndëshkuar përgjegjësit. Autoritetet bëjnë thirrje për bashkëpunim nga dëshmitarët që mund të kenë parë ngjarjen në lagjen e Re.

Vdes kandidati për deputet në Kuvendin e Kosovës

Ka vdekur kandidati për deputet në Kuvendin e Kosovës, Bastri Dubova, i cili ishte pjesë e listës zgjedhore të Partisë Liberale Egjiptiane.

Lajmin e ka bërë të ditur kryetari i kësaj partie, Veton Berisha përmes një postimi në rrjetin social në Facebook.

Berisha tha se Dubova ishte shpallur Qytetar nderi në Komunën e Obiliqit nga kryetari i kësaj komune

“Në emër të Partisë Liberale Egjiptiane, shprehim ngushëllimet tona më të sinqerta për ndarjen nga jeta të z.Bastri Dubova , aktivist kombëtarë, anëtar i Lëvizjes Egjiptiane, anëtar i Partisë Liberale Egjiptiane, si dhe pjesë e listës së kandidatëve për deputet në zgjedhjet e 28 dhjetorit! Bastri Dubova është shpallur Qytetar nderi në Komunën e Obiliqit nga kryetari i kësaj komune  z. Xhafer Gashi, falë punës dhe angazhimit të tij rreth në të mirë të qytetarëve të Obiliqit”.

“Mikun tonë do ta kujtojmë përgjithmonë si një aktivist i palodhur, burrë fisnik e bujar! Humbja e tij është e madhe për familjen, miqtë dhe për gjithë komunitetin tonë Egjiptian. Kontributi dhe angazhimi i tij do të mbetën gjithmonë të çmuara dhe të paharruara”.

“Njoftojmë se varrimi i të ndjerit do të bëhet sot më datë 16.12.2025 në fshatin Medvec Komuna e Lipjanit duke filluar nga ora 12:00h! Partia Liberale Egjiptiane, sot do i ANULOJ të gjitha aktivitetet zgjedhore në kujtim të punës dhe veprës së të ndjerit z. Dubova! Fotografia më poshtë është fotografia e fundit e z.Dubkva, e cila është realizuar më 14.12.2025, në kuadër të përgatitjeve për zgjedhjet e 28 dhjetorit”, ka shkruar ai.

Lahi Brahimaj shokon me deklaratën: Albin Kurti, dezertor i UÇK-së

Gjenerali i UÇK-së dhe kandidati për deputet nga AAK, Lahi Brahimaj, ka komentuar këngën e Edona Llalloshit dedikim për Albin Kurtin.

Në “VV Show”, gazetari Vehbi Kajtazi e pyeti Brahimajn se si e vlerëson që për Kurtin është bërë një këngë, ndërsa për të jo.

“Për Kurtin është bë një këngë e për juve jo, si e sheh këtë, Kurti po na del goxha njëfarë patrioti”, pyeti Kajtazi.

Brahimaj u shpreh se, Kurti nuk ka qenë pjesë e UÇK-së dhe nuk ka marrë pjesë aktive në luftë, madje e ka quajtur edhe “dezertor”.

“Unë i kam pa komentet, por këngën jo. Kom pas fatin me qenë pjesë e Shtabit të UÇK-së që nga themelimi deri në çlirimin e vendit, kam qenë në malet e Berishës kur kanë Muhamet Mavraj dhe Albin Kurti. Dhe ai nuk ka pranu me kanë pjesë e UÇK-së. Unë e kam dëgju komandant Remin, për të cilin kam respekt, e komandant Selimin, që kanë thënë ai është bashkëluftëtar i joni. Në fakt ai, në asnjë rrethanë nuk ka qenë ushtar, nuk ka pas pushkë, nuk ka vesh uniformë, në zyrën e Adem Demaçit ka qenë  si përkthyes. Nuk ka pas asnjë pozicion në strukturat e UÇK-së. Zyra e Adem Demaçit ka qenë në Prishtinë. Demaçi ka qenë i emëruar si përfaqësues i UÇK-së , dhe e ka zgjedh një djalë të ri që ka dit më përkthy anglisht, kaq ka qenë, dhe deri në një moment edhe nga ajo zyre ka dhënë dorëheqje.

Në fakt, nëse ky ka qenë ushtar dhe ka dhënë dorëheqje dhe thotë unë nuk jam që Kosova me pushkë, ai në fakt është dezertor. Dhe për mendimin tim, më mirë është mos me qenë UÇK sesa dezertor. Ata që e njohin ushtrinë, më mirë është mos me kanë fare ushtar sesa dezertor. Për mu nuk është marrë që në atë kohë një djalë nuk ka qenë pjesë e UÇK-së, trimërinë edhe tutën ta falë Zoti. Por është e rëndë dhe e dënueshme, në shtetet demokratike çdo dezertor dënohet.  Nëse ai është ashtu, me pas qenë shteti siç duhet ai ish dënu me ligjet e Kosovës për dezertim. Nëse do me marrë merita se ke qenë atëherë duhet me trajtu edhe atë pjesën që je dezertor”.

Ai shtoi se këngët që lidhen me luftën duhet të fokusohen te ata që kanë sakrifikuar jetën për vendin.

“Më vjen mirë që Edona ka vendos me i këndu dikujt, por më vjen keq që nuk e ka përzgjedh me këndu një nënë të dëshmorit, një djalë dëshmorit. Unë e kam pas fatin me njoft Faruk Elezin, një djalë i ri, student që ka ardh mu bo ushtar dhe Sylejman Selimi e ka refuzu, për shkak se ishte djalë i shumë motrave, prindin e kishte invalid dhe e ka refuzu. Pastaj ka ardh me imponim është bë ushtar, ka ra me 21 maj në hyrje të Grobonicës, Klinës, në mbrojtje të pozicioneve. Ndërsa ai (Kurti) nuk e ka pranu. Edona sigurisht do ishte më mirë me i këndu Faruk Elezit se cilitdo të gjallë, edhe mua. Nëse e do për nder, do duhej një asi djali, që ia shëron plagët një nëne kur e dëgjon këngën e djalit të vet

Konjufca: Lotët e nanës Rukë janë lot të dhimbjes por edhe krenarisë, ata lotë nuk mundet me i gjyku bash kërkush

Nënkryetari i Lëvizjes Vetëvendosje, Glauk Konjufca, ka qenë I ftuar në “Pressing” të T7.

Për deklaratën e zyrtarit të Lëvizjes Vetëvendosje në KQZ, Alban Krasniqi rreth lotëve të nënës së Ramush Haradinaj, Konjufca a thënë se ka qenë deklaratë e gabueshme.

Ai ka thënë se askush nuk mundet t’i gjykojë lotët e nënës Rukë.

“Ka qenë deklaratë e pakujdesshme, mendoj që ka qenë e gabueshme. Lotët e Nënës të Haradinajve, nënes Rukë, janë lot të dhimbjes, por edhe të krenarisë që i ka dhënë djemt për lirnë e Kosovës. Ata lot nuk mundet me i gjyku bash askush”, ka thënë Konjufca.

Ishte shpallur i zhdukur, gjendet i vdekur 23-vjeçari shqiptar në Gjermani

23 vjeçari Valentin Vokaj, i cili jetonte në Bremen të Gjermanisë raportohet se është gjetur i vdekur, pas rreth një muaj kërkimesh.

Sipas JOQ, vdekjen e të riut shqiptar e kanë konfirmuar familjarët.

Deri më tani nuk dihen detajet rreth kësaj ngjarje tragjike.

Autoritetet gjermane tashmë kanë nisur hetimet lidhur me rastin.

alentin Volaj ishte raportuar i zhdukur nga familjarët më 9 nëntor, pasi kishte dalë nga banesa ku jetonte në Bremen rreth orës 4 të mëngjesit dhe nuk ishte kthyer më.

Në momentin e zhdukjes, familjarët kishin bërë të ditur se ai kishte lënë në banesë sendet personale, celularin dhe paratë, si dhe një letër lamtumire për familjen.

Sipas tyre, i riu po kalonte një periudhë të vështirë emocionale dhe përballej me stres dhe gjendje të rënduar psikologjike.

Pasi u raportua zhdukja, rasti u paraqit edhe në policinë gjermane, u kërkua po ashtu edhe ndihma e Ambasadës Shqiptare, ndërkohë që kërkimet u përqendruan edhe në zonën Sodenmattsee, ku për fat të keq u gjet trupi i tij i pajetë.