Sulmohen policia e Kosovës

Një incident serioz ka ndodhur paraditen e 12 dhjetorit 2025 në fshatin Zhegër të Gjilanit, ku dy persona janë arrestuar nën dyshimin për sulm ndaj personit zyrtar.

Sipas informatave, rreth orës 10:00, patrulla policore e Zhegrit kishte ndaluar një veturë të tipit Golf për kundërvajtje në trafik. Nga vetura kanë dalë drejtuesi A.N, rreth 26-vjeçar dhe bashkudhëtari Sh.Z., rreth 27-vjeçar, të cilët fillimisht kanë refuzuar të paraqesin dokumentet personale.

Burimet bëjnë të ditur se situata ka eskaluar shpejt, pasi të dyshuarit kanë përdorur fjalor fyes dhe kërcënues ndaj zyrtarëve policorë. Gjatë tentativës për shoqërimin e tyre në Stacion Policor, të dyshuarit kanë sulmuar fizikisht njërin nga zyrtarët policorë, duke i shkaktuar lëndime të lehta trupore.

Për ta vënë situatën nën kontroll, zyrtarët policorë janë detyruar të përdorin sprej OC, ndërsa të dyshuarit janë arrestuar në vendngjarje.

Si pasojë e incidentit, dy zyrtarët policorë dhe dy të dyshuarit kanë kërkuar ndihmë mjekësore dhe janë pajisur me raporte mjekësore nga Spitali Rajonal i Gjilanit.

Me urdhër të Prokurorit kujdestar, A.N dhe Sh.Z janë dërguar në qendrën e ndalimit për 48 orë, ndërsa rasti është iniciuar dhe po trajtohet si “Sulm ndaj personit zyrtar”. Hetimet janë në vazhdim.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.

E rëndë: Gjendet pa shenja jete një 29-vjeçare, dyshohet se ishte me grip ditë më parë

Një ngjarje e rëndë është raportuar pasditen e djeshme në Prishtinë, ku një grua e re është gjetur pa shenja jete në banesën e saj, në rrugën “Ismet Jashari”, mëson ekskluzivisht Gazeta Sinjali.

Sipas informatave të para, rreth orës 15:00 Policia ka pranuar njoftim për një person të dyshuar të vdekur. Njësitë policore kanë dalë në vendngjarje, ku kanë hasur G. Sh, rreth 29-vjeçare të shtrirë në tokë. Në lokacion ka intervenuar edhe ekipi i emergjencës, i cili ka konstatuar vdekjen e saj.

Burimet bëjnë të ditur se viktima dyshohet se kishte qenë me grip disa ditë më parë dhe kishte marrë tretman mjekësor në shtëpi. Në vendngjarje është intervistuar edhe një familjare e saj, e cila ka dhënë deklaratë lidhur me gjendjen shëndetësore të së ndjerës ditët e fundit.

Në vendin e ngjarjes kanë dalë njësitë e hetimeve dhe Instituti i Mjekësisë Ligjore, të cilët kanë tërhequr trupin e pajetë për ekzaminim të mëtejmë.

Me urdhër të Prokurorit të Shtetit, rasti është iniciuar si “Hetim mbi vdekjen”, ndërsa autoritetet po hetojnë rrethanat e plota që çuan në këtë rast tragjik.

Peci numëron pesë vendimet e para që do t’i bëjë si kryetar i Mitrovicës së Jugut

Pas betimit në seancën inauguruese të Kuvendit Komunal të Mitrovicës së Jugut, kryetari i ri Faton Peci në një deklarim për media tha se vendimet e para që do të ndërmarrë do të fokusohen në mbështetjen e fëmijëve me nevoja të veçanta dhe në prioritetet arsimore të komunës.

Ai paralajmëroi formimin e një komisioni të posaçëm komunal për vlerësimin e nevojave të tyre dhe theksoi se arsimi do të jetë fusha e parë ku do të nisë angazhimi i tij institucional.

“Pesë vendimet e para janë vendime të vullnetit të mirë. Vendimi i parë është themelimi i komisionit komunal për vlerësimin e nevojave të fëmijëve të cilët kanë nevoja të veçanta për të pasur të qartë se sa asistentë në mbështetje dhe në përkrahje të fëmijëve për nevoja të veçanta është në sistemin arsimor të komunës. Arsimi do të jetë njëra nga prioritetet e mia të para, vizitën e parë do ta kemi në kopshtin e qytetit të hënën bashkë me presidenten Vjosa Osmani”, tha ai.

Më tej ai tha se “unë do të jem në mbështetje të koalicionit të LVV për shkak se na duhet partneriteti edhe mbështetja e qeverisë për të implementuar një pjesë të konsiderueshme të programit dhe zotimeve që kam pasur për Mitrovicën”.

I pyetur për mungesën në seancë të ish-kandidatit të PDK-së për kryetar të Komunës, Arian Tahiri, Peci theksoi se nuk e di arsyen e mos pjesëmarrjes, duke shtuar se e ka përshëndetur në fjalimin e tij.

“Unë fjalimin tim e kam pasur një përshëndetje për të, ai mungoi, por megjithatë nuk i di arsyet, mund të jenë rrethana objektive”, tha Peci.

Ish-deputetja e VV’së e quan manipulues Kurtin: Nëse nuk pajtohet me gjuhën e Kurteshit, pse nuk e shkarkon?

Shqipe Pantina, kandidate e Lidhjes Demokratike të Kosovës (LDK) për deputete në zgjedhjet e 28 dhjetorit, ka reaguar ashpër ndaj kryeministrit në detyrë Albin Kurti pasi ia tha se distancohet nga gjuha e anëtarit të partisë së tij në KQZ, Sami Kurteshi.

Në një postim publik, Pantina e ka quajtur Kurtin manipulues.

“Një herë manipulues, gjithmonë manipulues, zanatin nuk e harron.”

Ajo ka shtuar se distancimi i vërtetë nga gjuha e urrejtjes dhe kërcënimet ndaj gazetarëve nuk bëhet vetëm me një deklaratë në media, duke pyetur pse Kurti nuk ndërmerr veprime konkrete nëse nuk pajtohet me veprimet e emëruarit të tij.

“Sami Kurteshi në KQZ është emëruar nga VV-ja, partia e kryesuar nga Kurti. Nëse Kurti vërtet nuk pajtohet me gjuhën dhe veprimet e tij, atëherë pse nuk e shkarkon?”, tha ajo.

Shqiprim Arifi i bën ftesë publikisht Albin Kurtit: “Baba” juaj të dal në debat me mua ku të dojë dhe kur të dojë

Kryetari Shqiprim Arifi, ka publikuar një reagim të gjatë në rrjetet sociale, ku ka drejtuar kritika të ashpra ndaj Vetëvendosjes dhe Albin Kurtit që ai e quan “Baba” i kësaj partie, duke e akuzuar për qasje autoritare dhe për izolimin e Kosovës në arenën ndërkombëtare.

Arifi ka kujtuar se, sipas tij, për herë të parë ishte pozicionuar ndryshe ndaj VV-së në vitin 2017, kur siç thotë ai kishte vërejtur “qasje destruktive, diktatoriale dhe imponuese”.

Ai shton se që nga ajo kohë ishte përballur me “kërcënime, sharje dhe komente banale”, sidomos pas pretendimit të tij se “Baba i VV-së është non-grata në SHBA”.

Postimi i plotë:

Ofertë publike për “Babën” e VV-së!

Gjatë vitit 2017, për herë të parë jam pozicionuar NDRYSHE në drejtim të VV-së, pasi atë kohë hasëm në një qasje përveç destruktive e diktatoriale, poashtu dhe imponuese (siç vërehet qartësisht sot tek pushteti aktual në Preshevë – i nënshtruar ndaj VV-së).

Që atëherë, më kanë vërshuar kërcënimet dhe sharjet banale, me komente të ulëta në faqen time, apo në faqet e mediave anembanë shqiptarëve. Sidoqoftë, ndër të parët ju solla informacione në raport me aleatin tonë historik SHBA, se “Babai” i VV-së është “Non-Grata” në Amerikë, me ç`rast jam kërcënuar e sharë në gjitha mënyrat. Tani askush nuk ka dyshim se atë që e bëra publik vite më parë është faktike, sepse “Baba” është izoluar si askush më parë dhe ka izoluar Republikën e Kosovës si kurrë më parë në qarkun diplomatik, e sidomos atë të SHBA-së. I paprecedentë është një konsensus i demokratëve dhe republikanëve të SHBA-së se “Baba” është duke sharruar Republikën drejtë humnerës së iluzioneve dhe eksperimenteve të tij patologjike.

Falë qasjes suaj të pa rezervë, “Baba” juaj ka filluar të ndjehet superior dhe i pakonkurrent, besa mendjemadh edhe arrogant, duke i ikur çdokujt që mendon ndryshe nga ai, veçanërisht mediave që tanimë në baza ditore kanë material që e shpërfaqin në mënyrë të qartë keqqerverisjen e keqpërdorimet në pushtet. Tani ka pesë vite pushtet absolut, zotëron pothuajse të gjitha institucionet publike e gjysëm publike. Por, ja që ai bashkë me kukavajkat e tij ditë e natë ankohet se nuk po mundet të punojë, “sepse Kosovën në 20 vitet e fundit e paskan rrënuar të tjerët”, ndërkohë Kosova për 20 vite doli e djegur nga lufta dhe kaloi nëpër proceset më të rëndësishme shtetndërtuese, duke kulminuar me shpalljen e pavarësisë, të cilën i ashtuquajturi “Baba” e kundërshtoi.

“Baba” kurrë në jetë nuk ka punuar për të mbajtur familjen sikurse 2 milion shqiptarë të tjerë në Kosovë, kurse përnjëherë i ra në hise që t’i “menaxhoj” rreth 25 miliardë Euro të Buxhetit të Kosovës, të cilat kryesisht rrëshqitën drejt xhepave të klikës së tij. Shihet qartë se është peng i botës paralele ku jeton ai dhe mendja e tij e “ndritur”.

Prandaj, sot vi me një ofertë publike:

Ju kritikues, opinionistë, militantë, të papunë, kafexhinj, komunistë, ateistë, analfabetë, spiuna e UDB-asha, pseudopolitikanë, e të tjerë, ftojeni “Babën” tuaj të dalë në debat publik me mua, ku të dojë dhe kur të dojë!

Mihali lavdëron Kurtin: Aktivisti, politikani dhe intelektuali par excellence shqiptar

Koordinatorja e Komiteteve brenda Vetëvendosjes e cilëson kryeministrin si figurë të rrallë politike dhe intelektuale, me ndikim të madh në zhvillimin e Kosovës.

Koordinatorja e Komiteteve brenda Lëvizjes Vetëvendosje, Dejona Mihali, ka shprehur vlerësime të larta për kryeministrin e Kosovës, Albin Kurti, duke e cilësuar atë si një nga figurat më të spikatura shqiptare në politikë dhe në botën intelektuale.

Mihali ka deklaruar se Kurti nuk është vetëm një drejtues i angazhuar për Kosovën, por edhe “aktivisti, politikani dhe intelektuali par excellence shqiptar”. Ajo theksoi se ai dallohet jo vetëm për “intelektin e rrallë”, por edhe për “mirësinë e pamatë dhe guximin e çmuar”.

Sipas saj, personaliteti i Kurtit ka ndikuar dukshëm në zhvillimin e pakthyeshëm të Kosovës, duke e pozicionuar atë si një zë autentik, të dallueshëm dhe të dobishëm në skenën ndërkombëtare.

Mihali shtoi se Kurti është një nga figurat shqiptare që i flet botës “me një gjuhë autentike”, duke e forcuar rolin e tij si lider me ndikim të madh në rajon.

Këto lavdata erdhën pas intervistës së gjatë të Kurtit në Kanal 10 me Kushtrim Sadikun.

Postimi origjinal:

Albin Kurti nuk është vetëm Kryeministri më i vyeshëm për Kosovën por dhe aktivisti, politikani, intelektuali par excellence shqiptar.

Ai nuk ka vetëm intelekt të rrallë por mbi të gjitha njeri me mirësi të pamatë dhe guxim të çmuar.

Personaliteti me të cilin Kosova zhvillohet pakthyeshëm dhe i flet botës me një gjuhë autentike, të dallueshme dhe të dobishme.

Aksident fatal mes një kamioni dhe veture – Vdes shoferi i automjetit, dy të lënduar

Një aksident i rëndë trafiku ka ndodhur mëngjesin e sotëm në magjistralen Prizren – Suharekë, duke rezultuar në fatalitet. Si pasojë e përplasjes, shoferi i një automjeti ka humbur jetën, ndërsa dy persona të tjerë, një pasagjer dhe shoferi i kamionit, kanë pësuar lëndime të rënda, raporton Sinjali.

Lajmin për Sinjalin e ka konfirmuar Togeri i Policisë në Prizren, Tahir Kabashi.

“Sipas raportit të Policisë së Kosovës, rreth orës 07:30 është pranuar informacioni për një aksident të rëndë në aksin rrugor Prizren – Suharekë. Në përplasjen e shkaktuar, janë përfshirë një kamion me targa vendore dhe një automjet pasagjerësh me targa të Republikës së Shqipërisë. Shoferi i automjetit pasagjerë ka humbur jetën në vendngjarje, ndërsa pasagjeri dhe shoferi i kamionit janë transportuar menjëherë në spital për trajtim mjekësor. Policia ka dalë në vendngjarje, ndërsa ekipet emergjente mjekësore konfirmuan vdekjen e shoferit të automjetit pasagjer”, ka thënë ai për Sinjalin.

Ndihma e shpejtë dhe hetimet në vazhdim

Në vendngjarje janë angazhuar edhe njësitë e zjarrfikësve, të cilët kanë ofruar ndihmën e nevojshme, ndërsa ekipet e Policisë kanë nisur hetimet për të sqaruar rrethanat e aksidentit.

Kabashi, nga Drejtoria Rajonale e Policisë së Kosovës në Prizren, konfirmoi se Prokurori i Shtetit është njoftuar për rastin dhe hetimet janë duke vazhduar.

Rikthimi i Kurtit në media, vjen reagimi nga LDK

Kandidatja për deputete nga radhët e LDK-së, Hykmete Bajrami, ka reaguar ashpër ndaj deklarimeve të kryeministrit Albin Kurti në “Kanal10”, duke e akuzuar atë se “ka gënjyer pa iu dridhur qerpiku” lidhur me menaxhimin e ekonomisë, diplomacisë, arsimit dhe shëndetësisë.

“Papritmas ”Mafia Energjetike” dhe tregtari Vuk Hamoviq qenka prezent në rajon por kur është puna për Kosovë fajet i paskan kompanitë private paçka se energjia është sektor i rregulluar me ligj, paçka se importi i energjisë vetëm këtë vit ka arritë shifrën 247 milionë Euro dhe ka raste kur Kosovës vetëm transporti i një MWh e energjisë elektrike i ka kushtu deri 800 Euro, ndërkohë që EFT-ja e Vukit ka monopol në kapacitete transportuese ndërkufitare.”, ka shkruar Bajrami, transmeton IndeksOnline.

Statusi i saj i plotë:

Paska gënjyer pa iu dridhur qerpiku kur ka folur për rrënimin që ia ka bërē ekonomisë, diplomacisë, arsimit e shëndetësisë.Papritmas ”Mafia Energjetike” dhe tregtari Vuk Hamoviq qenka prezent në rajon por kur është puna për Kosovë fajet i paskan kompanitë private paçka se energjia është sektor i rregulluar me ligj, paçka se importi i energjisë vetëm këtë vit ka arritë shifrën 247 milionë Euro dhe ka raste kur Kosovës vetëm transporti i një MWh e energjisë elektrike i ka kushtu deri 800 Euro, ndërkohë që EFT-ja e Vukit ka monopol në kapacitete transportuese ndërkufitare.Paska marrë përgjegjsinë për mijëra kontrata njëburimore, për vjedhjen masive dhe të strukturuar të rezervave shtetërore, ndërsa pa pikë turpi paska mbrojtur tregtarin e energjisë Martin Berishaj dhe të akuzuarin Nagip Krasniqi duke sulmuar drejtësinë.Mashtruesi Kurti paska ricituar ish-ministrat dhe, në fund, e paska cituar edhe veten.Paska gënjyer për secilin numër, për Gjykatën Kushtetues dhe nuk paska thënë asnjë të vërtetë, asnjë të vetme Fundi i tij politik ka nisur më 9 shkurt dhe përfundon më 28 dhjetor!Kurti është në panik, sepse kurrë më nuk do të jetë Kryeministër

Kastrati: Nëse ka Adem Jashara të gjallë, ata janë Ramushi e Dauti

Kandidati i AAK-së për deputet në Kuvendin e Kosovës, Ardian Kastrati ka folur së fundmi për aderimin e tij në këtë parti, ku lartësoi figurën e kryetarit të saj, Ramush Haradinaj si dhe vëllait të tij, Daut Haradinaj.

Ai shprehu mirënjohjen e tij për kontributin e dhënë të tyre ndër vite, teksa i paralelizoi me figurën e heroit kombëtar, Adem Jashari.

“Nëse ka Adem Jashara të gjallë, ata janë Ramushi e Dauti”, u shpreh Kastrati.

I njëjti gjithashtu kritikoi gjuhën e rëndë sipas tij të akterëve të VV-së kundrejt Ramush Haradinajt.

Kurti sfidon Prokurorinë: “Ejani në zyrën time nëse doni dëshmi”