Pas disa muajve të bllokadës, deputeti i Vetëvendosjes, Dimal Basha, siguroi votat e mjaftueshme dhe u zgjodh kryetar i Kuvendit të Kosovës.
Derisa një pjesë e skenës politike e ka cilësuar këtë si hap përpara drejt zhbllokimit institucional, të tjerët e kanë kritikuar mënyrën se si u arrit kjo zgjedhje.
Pavarësisht këtij hapi, Kuvendi vazhdon të mbetet i paplotësuar, pasi ende nuk është zgjedhur nënkryetari nga komuniteti serb.
Në lidhje me këtë situatë për Front Online, ka folur njohësi i zhvillimeve politike, Azem Vllasi, i cili ka vlerësuar se bllokada institucionale ka qenë e panevojshme dhe se Kuvendi mund të ishte konstituar shumë më herët.
“Zgjedhja e Kryetarit të Parlamentit na tregoi se kjo punë paska mund të kryhet që moti e jo me humb aq shumë kohë, me mbajt Kuvendin dhe shtetin në ngërç dhe me pasoja të pariparueshme”, tha ai.
Vllasi: Disa në Parlament e duan ngërçin, drama do të vazhdojë me formimin e Qeverisë
Njohësi i zhvillime politike, Azem Vllasi, në një prononcim për Front Online, thotë se dështimi për të votuar Nenad Rashiqin si nënkryetar tregon një prirje shqetësuese në Kuvend, pasi sipas tij, deputetët po hezitojnë të përkrahin një përfaqësues legjitim të serbëve të Kosovës, ndërsa mbajnë derën hapur për ndikimin e Listës Serbe dhe strukturave që lidhen me Beogradin.
“Nëse Nenad Rashiqin nuk e votojnë për Nënkryetar Kuvendi, i cili si kandidat u nxjerr me short pasi që dy deputete serbe u tërhiqen po del se goxha do deputet shqiptar po pritkan që Millan Radojçiqi nga Kopaoniku ta dërgoi një kandidat nga Lista Serbe që në Kuvend, pra edhe në Kosovë i përfaqëson interesat e Serbisë, e jo të Serbëve të Kosovës”, tha ai.
Vllasi thotë se problemi nuk është se kush do të jetë nënkryetari serb, por që deputetët shqiptarë nuk ia japin votën Rashiqit.
Ai pyet pse ata që votuan Dimal Bashën për kryetar, nuk e mbështesin Rashiqin për nënkryetar.
“Nuk është problemi se cili prej 5 nënkryetarëve do të jetë i nacionalitetit serb, por te deputetët shqiptar që nuk ia japin votën Rashiqit. Shtrohet pyetja: pse këta që i dhanë votat Dimal Bashës për Kryetar, nuk i dhanë Rashiqit për Nënkryetar?”, tha ai.
Sipas tij, disa në Parlament po e mbajnë shtetin në ngërç, duke krijuar pasoja të mëdha.
Vllasi e lidh këtë me refuzimin për të votuar Nenad Rashiqin për nënkryetar, duke paralajmëruar se situata mund të përkeqësohet edhe gjatë zgjedhjes së Qeverisë.
“Disa në Parlament sikur e kanë vendos që gjendja e ngërçit të vazhdoj me pasoja për shtetin që edhe ashtu janë të mëdha. Në vazhdim do të shohim dramën lidhur me zgjedhjen e Qeverisë”, tha Vllasi. /Front Online/